བོད་མིའི་སྒྲིག་འཛུགས་ཀྱིས་རྒྱལ་གཅེས་པ་ཞིག་སྣང་མེད་སྐྱུར་འཇོག་བྱས་འདུག 

སྲིད་རྡོ།
 
བོད་མིའི་སྒྲིག་འཛུགས་དྲ་བའི་སྟེང་རང་ལུས་མེར་བསྲེགས་གནང་མཁན་གྱི་རྒྱལ་གཅེས་དཔའ་བོ་བསྟན་འཛིན་ཆོས་དབྱིངས་ལགས་ཀྱི་གནས་ཚུལ་མི་འདུག ཇི་ལྟར་མ་ཡོད་པ་རེད། ཡང་ན་ཅིའི་ཕྱིར་རང་ལུས་མེར་བསྲེགས་གནང་མཁན་གྲས་སུ་མ་ཚུད་པ་རེད། འོ་ན་རྒྱལ་གཅེས་དཔའ་བོ་ཞིག་མིན་པ་རེད་དམ། འདི་ནི་ང་ཚོས་ག་ལེར་དཔྱད་དགོས་ཀྱི་འདུག་ལ། ང་ཚོས་གནས་ཚུལ་ཚབས་ཆེན་ལ་བོད་གཞུང་གིས་ཇི་ལྟར་བདག་པོ་རྒྱག་གི་ཡོད་མེད་སྐོར་ལ་དོ་ཁུར་བྱེད་དགོས་ཀྱི་འདུག

ཉིན་དེ་ནི་ཟླ་ ༧ པའི་ཚེས་ ༡༤ ཡི་སྔ་དྲོ་རེད། བོད་མིའི་སྒྲིག་འཛུགས་དྲ་ཐོག་ཏུ། ༼དཔལ་ལྡན་སྲིད་སྐྱོང་མཆོག་ལ་ཝཱ་ཎ་བོད་ཀྱི་མཐོ་སློབ་ཏུ་ཕེབས་སུ་གཟབ་རྒྱས་ཞུས་པ།༽ཞེས་པའི་གསར་འགྱུར་ཞིག་ཉིན་འདིར་དྲ་འགོད་བྱས་འདུག་པའི་ནང་དུ། “ཕྱི་ཚེས་ ༡༤ སྔ་དྲོ་ཆུ་ཚོད་ ༩ པའི་ཐོག་མཐོ་སློབ་ཀྱི་དགེ་སློབ་ཡོངས་ལ་གསུང་བཤད་གནང་རྒྱུ་དང་ཉིན་རྒྱབ་མཁའ་ལམ་བརྒྱུད་དིལླཱི་དང་དེ་ནས་བཞུགས་སྒར་དུ་ཕེབས་ཐོན་གནང་རྒྱུ་ཡིན་པ་བཅས་པར་དང་མཉམ་དུ་”འཁོད་འདུག མང་ཚོགས་ཀྱིས་གཞུང་དང་གཞུང་འབྲེལ་མིན་པའི་ཚོགས་པ་ཁག་གི་ཉིན་རེའི་འགྲོ་འདུག་སྤྱོད་གསུམ་དྲ་རྒྱའི་བརྒྱུད་ལམ་ཁག་ཏུ་ཐོན་པར་ནམ་རྒྱུན་གཟིགས་ཀྱི་ཡོད་མོད། ཉིན་འདིའི་ཆེས་གལ་ཆེ་བའི་གནས་ཚུལ་ནི་རང་ལུས་མེར་བསྲེགས་གནང་བ་དེ་རེད། འོན་ཀྱང་བོད་གཞུང་དྲ་བའི་སྒང་དུ་སྲིད་སྐྱོང་གི་པར་མ་གཏོགས་བཀོད་མི་འདུག་པ་མ་ཟད། རང་ལུས་མེར་བསྲེགས་གནང་མཁན་གྱི་ཟུར་ཙམ་ཡང་གླེང་མི་འདུག  ག་རེ་བྱས་ཏེ་མ་གླེང་བ་རེད།  

གལ་སྲིད་བོད་ནང་གི་གནས་ཚུལ་ཡིན་ན། ང་ཚོས་ཁ་གསལ་བོ་ཡིན་མིན་གྱི་དབང་གིས་ལམ་སང་གནས་ཚུལ་འགོད་པར་དཀའ་ལས་འདུག་མོད། དེ་མིན་པར་གནས་ཚུལ་འདི་ནི་དངོས་ཡོད་གནས་ཚུལ་དང་སྲིད་སྐྱོང་ཡོད་ས་ནས་བྱུང་བ་རེད། འདི་ལ་སྲིད་སྐྱོང་གིས་སྐད་ཆ་ཚིག་གཅིག་ཀྱང་མ་བཤད་པ་མ་ཟད། དབུས་བོད་མིའི་སྒྲིག་འཛུགས་ཀྱི་དྲ་བའི་ཐོག་ཏུ་ཡང་མ་ཐོན་པ་ནི་གནད་དོན་ཞིག་རེད། ང་ཚོའི་བོད་དོན་འཐབ་རྩོད་ཁྲོད་ཀྱི་ཆེས་རྣོ་ངར་ལྡན་ཞིང་འཛམ་གླིང་གི་ཡུལ་གྲུ་ཚང་མས་གཟབ་ནན་གྱིས་ལྟ་ས་ནི། བོད་ནང་གཙོས་བཙན་བྱོལ་ནང་དུ་རང་ལུས་མེར་བསྲེགས་གནང་སྟེ་བོད་ཀྱི་བདེན་དོན་རྩོད་ཀྱི་ཡོད་པ་དེ་རེད།

སྲིད་སྐྱོང་ཕྱོགས་བསྐྱོད་བྱས་པའི་གོ་རིམ་ཁྲོད་དུ། རང་ལུས་མེར་བསྲེགས་ཀྱི་གནས་ཚུལ་བྱུང་བ་ནི་སྲིད་སྐྱོང་ལ་ངོ་རྒོལ་ཡིན་པ་ཞིག་སྤྱི་ཚོགས་དྲ་རྒྱའི་བརྒྱུད་ལམ་ཁག་ཏུ་ཡིག་འཁྱམས་གང་མང་ཞིག་ཐོན་གྱི་ཡོད་མོད། དེ་ནི་སྣང་མེད་བྱས་ཆོག་པའི་གཏམ་ཞིག་སྟེ་ཁུངས་ལུང་ཅི་ཡང་མེད་པའི་དྲ་འབུ་དག་གི་ལས་ཀ་རེད། འོན་ཀྱང་། དབུས་བོད་མིའི་སྒྲིག་འཛུགས་ཀྱིས་རྒྱལ་གཅེས་པ་ཁོང་གི་མཚན་དང་ལོ་རྒྱུས། དངོས་སུ་སྟོན་རྒྱུ་ཡོད་པའི་ཁ་ཆེམས་སོགས་འཁོད་པའི་གནས་ཚུལ་མ་བཏང་བའི་རྐྱེན་ནི་སྲིད་སྐྱོང་ལ་ངོ་རྒོལ་བྱས་པ་ཞེས་པའི་ཡིག་འཁྱམས་དེ་བཞིན་ཡིན་ནམ་སྙམ་པའི་ཚོར་བ་ཞིག་སྤྲོད་ཀྱི་འདུག

རྒྱལ་གཅེས་པ་ཁོང་གིས་རང་ལུས་མེར་བསྲེགས་མ་བཏང་བའི་ཉིན་སྔོན་མ་དེར། “དཔལ་ལྡན་སྲིད་སྐྱོང་མཆོག་གིས་ལིའུ་ཞའོ་པོ་མཆོག་འདས་གྲོངས་སུ་གྱུར་བར་མྱ་ངན་གུས་འདུད་ཞུས་པ།”ཞེས་པ་ཞིག་དབུས་བོད་མིའི་སྒྲིག་འཛུགས་ཀྱི་དྲ་རྒྱས་བཀོད་འདུག ཉིན་གཉིས་པ་དེར་བོད་ཀྱི་ཤ་ཁྲག་རུས་གསུམ་ནས་མཆེད་པའི་མཐོ་རིམ་སློབ་མ་ཞིག་གིས་རང་ལུས་མེར་བསྲེགས་བྱུང་བ་དེར་བཀའ་སྤྱི་གཉིས་གང་གིས་ཀྱང་གདུང་སེམས་མཉམ་བསྐྱེད་ཙམ་ཡང་བྱས་མེད་པ་ཟད། དེ་རིང་ཕྱི་ཚེས་ ༢༠ སྟེ་བདུན་ཕྲག་གཅིག་རྗེས་སུ་ད་དུང་གཞུང་འབྲེལ་དྲ་རྒྱའི་སྟེང་དུ་ཁོང་གི་གནས་ཚུལ་ཙམ་ཡང་མེད་པ་འདི་ནི་བོད་གཞུང་གི་རྣམ་འགྱུར་ཞིག་རེད་དམ།

གཞུང་དང་གཞུང་འབྲེལ་མིན་ཚོགས་པ་ཁག་གིས་ག་དུས་ཡིན་ཀྱང་བོད་དོན་བཤད་དུས་སུ། རང་ལུས་མེར་བསྲེགས་ཀྱི་གྲངས་ཀ་ཕྱོགས་བསྡོམས་ཀྱིས་ཁྱབ་བསྒྲགས་དང་དྲིལ་བསྒྲགས་བྱེད་ཀྱི་ཡོད། ད་ཐེངས་ཀྱི་འདི་ནི་བོད་གཞུང་གིས་དྲ་ཐོག་ཏུ་མ་བཀོད་པ་ཡིས་བོད་གཞུང་གིས་ངོས་འཛིན་ཡོད་པའི་བོད་དོན་ཆེད་རང་ལུས་མེར་བསྲེགས་བཏང་བའི་འདས་གྲོངས་གཉིས་ཀྱི་གྲས་སུ་ཚུད་ཀྱི་ཡོད་དམ། ད་ལྟའི་གནས་བབ་སུ་བལྟས་ན་ཚུད་ཀྱི་མེད་པའི་རྣམ་འགྱུར་ཞིག་འདུག

རྒྱལ་གཅེས་དཔའ་བོ་བསྟན་འཛིན་ཆོས་དབྱིངས་ལགས་ཀྱིས་བོད་ཀྱི་སྐད་ཡིག་གཙོས་བདེན་དོན་གྱི་ཆེད་དུ་རང་ལུས་མེར་བསྲེགས་གནང་བ་ནི་ཁོང་གི་ཁ་ཆེམས་ཡི་གེ་ནང་དུ་གསལ་བོ་ཡིན་ཀྱང་། བཙན་བྱོལ་གཞུང་གི་དྲ་སྟེང་དུ་མ་ཐོན་པ་ནི་གཞུང་གི་སྒྲིག་གཞི་གང་ཞིག་དང་འགལ་སོང་བ་རེད་དམ། གཞུང་གི་དྲ་རྒྱའི་ཐོག་གཞུང་འབྲེལ་མིན་པའི་ཚོགས་ཁག་གི་གནས་ཚུལ་དག་འགོད་ཀྱི་མེད་པ་བདེན་པ་ཡིན་མོད། བོད་ཕྱི་ནང་གཉིས་ནས་བོད་དོན་ཆེད་རང་ལུས་མེར་བསྲེགས་གཙོས་ལས་འགུལ་སྤེལ་མཁན་དག་ནི་༼བརྒྱུད་ལམ་གཞན་གྱི་གསར་གནས།༽ཞེས་པའི་སྡེ་ཚན་ནམ། ཡང་ན་༼གསར་གནས།༽ཞེས་པ་གཉིས་སུ་འགོད་ངེས་ཡིན་མོད། ད་ཐེངས་ཀྱི་གནས་ཚུལ་གལ་ཆེ་ཤོས་འདི་ནི་སྡེ་ཚན་འདི་གཉིས་ཀྱི་གཅིག་ཏུ་ཡང་བཀོད་མེད་པ་ཅི་ཞིག་ཡིན་ནམ། འདི་ནི་བོད་གཞུང་གིས་ང་ཚོར་ངེས་པར་དུ་གསལ་བཤད་བྱེད་དགོས་པའི་གནད་དོན་ཞིག་རེད་བསམ།

ཕྱི་ལོ་༢༠༡༧ ཟླ་༠༧ ཚེས་༢༠ ཉིན།