—-ཁྲོ་གཏུམ།
མེ་ཏོག་གི་ལངས་ཚོ་འབར་བའི་དུས་དེ་ལས
སེམས་པ་དཀར་པོ་དཀར་པོ་མེ་ཏོག་ལ་འབྱར་ཞིང
བསམ་བློ་དྲང་མོ་དྲང་མོ་རྩྭ་ཐང་ལ་འཐིམས་པར་གྱུར
མེ་ཏོག་གི་གྲངས་ལོན་དཀའ་བའི་སྤང་ཡངས་པོ་དེར
མེ་ཏོག་གི་ཁ་བཏོག་རྩི་དཀའ་བའི་དྲི་ཞིམ་གྱི་དབལ་ཁ་ལ
མེ་ཏོག་ཧེབ་ཀྱིས་བཏོག་ཀྱང་མེ་ཏོག་ཚར་མ་མྱོང
མེ་ཏོག་བཏུས་ཤིང་མེ་ཏོག་བཀད་པ
མེ་ཏོག་བསྒྲིགས་ཤིང་མེ་ཏོག་བསླས་པ
མེ་ཏོག་དེ་ལྟར་ངའི་རྩེད་སྤྱད་དུ་བྱོན
ཡང་ན་བཞད ད་རུང་འཁྲུངས
མེ་ཏོག་དེ་ལྟར་ང་དང་མ་མཉམ་དུ་བགད
དེ་ལྟར་ང་རང་འཚར་ཞིང་མེ་ཏོག་གི་འཚང་ཁར་བཛུལ
དེ་ནི་ཡ་མཚན་ཞིག་སྟེ་ངས་སྔོན་ཆད་མེ་ཏོག་བཏུས་པ་ནི་བདེན་པ་མ་ཡིན་པ་འདྲ་བོ
ངོ་མཚར་བའི་ཁྲོད་དུ་ངས་ཕྱིར་དྲན་བསྔོགས
ཕྱིར་དྲན་གྱི་བང་རིམ་ནི་རྟོགས་སྒྲུང་མ་ཡིན་པའི་སྒྲུང་དེ་ཡིན་ཞིང
སྒྲུང་དེ་ནི་ང་རང་གིས་རང་ཉིད་ཀྱི་སྒྲུང་ཀློག་པའི་འཆར་སྣང་ཞིག་སྟེ
འཆར་སྣང་དེ་ནི་ད་ལྟའི་བསམ་བློའི་རྙོག་འཛིངས་སུ་སིམ
མེ་ཏོག་མཐོང་བ་ནི་སྔོན་ཆད་ངས་མེ་ཏོག་བཏོག་པས་དྲན་སླ་རུང
པར་ངོས་སུ་ཡོད་པ་ནི་མེ་ཏོག་རྫུན་མའི་ཀླང་ཀ་ཞིག་ཏུ་ཐོན་པ་འདྲ
ཡིན་ནའང
ངའི་ཕ་ཡུལ་ན་དབྱར་ཁའི་མེ་ཏོག་སྔར་བཞིན་བཞད་ཡོད
2017/07/29ཉིན།