༼རྒྱ་བོད་ཚིག་མཛོད་༽ཐོན་རིམ་གཉིས་པ་ནའང་ཡིག་ནོར་འདུག གསུམ་པ་ཞིག་དགོས་པའི་རེ་སྐུལ་ཞུ་ཡིག

—པ་སངས་དོན་འགྲུབ།

 
དག་ཡིག་དང་ཚིག་མཛོད་ཀྱི་ཁྱད་ཆོས་གཙོ་བོ་ནི། ཡི་གེ་མ་ནོར་བ་དང་འགྲེལ་བཤད་མ་ནོར་བ་དགོས་པ་དེ་རེད། དེ་ནི་ཚིག་དོན་གང་ཞིག་འགྲིག་དང་མི་འགྲིག་གི་ཚད་འཇལ་བྱེད་དུ་བེད་སྤྱོད་བྱེད་པའི་དབང་གིས་རེད། དག་ཡིག་ལ་ཁ་མི་གྲག་པའི་དགེ་རྒན་ཞེས་བརྗོད་སྲོལ་ཀྱང་ཡོད། དེ་ཡང་མ་ནོར་བ་ཞིག་དང་ལམ་སྟོན་ཡང་དག་ཅིག་གནང་མཁན་དུ་ཆ་བཞག་པའི་ངོས་འཛིན་བྱེད་སྟངས་རེད། དག་ཡིག་དང་ཚིག་མཛོད་ཡིན་ན། ཡི་གེ་གཅིག་ནོར་ནའང་དགོས་དོན་གྱི་ཆ་ཤས་ཤིག་མ་ཚང་བར་གྱུར་པ་ཡིན། འགྲེལ་བཤད་གཅིག་ནོར་ནའང་དེ་བཞིན་རེད།

ལོ་སྔོན་མའི་ནང་། སྨོན་ལམ་བརྡ་འཕྲིན་ཞིབ་འཇུག་ཁང་དང་ཐེ་ཝན་རྒྱལ་སྤྱིའི་བོད་བརྒྱུད་ནང་བསྟན་ཞིབ་འཇུག་ཚོགས་པ་མཉམ་འབྲེལ་གྱིས་༼རྒྱ་བོད་མིང་མཛོད་༽དྲ་ལམ་དུ་སྤེལ་བ་ནས་དེ་རིང་བར་ཕལ་ཆེར་ལོ་གཅིག་འཁོར་ཡོད་པ་རེད། ལོ་གཅིག་གི་སྔོན་ལ་འགྲེམས་སྤེལ་གནངས་པའི་ཚིག་མཛོད་དེ་ནི་ཡིག་ནོར་མང་པོ་ཡོད་པ་ཞིག་རེད་ཅེས་དྲ་ལམ་ནས་མང་པོ་གླེང་སོང་། དེ་ལ་ཡིག་ནོར་མང་པོ་ཡོད་པར་བརྟེན། ཡང་སྐྱར་ཞུས་དག་གནངས་ཏེ་ད་ལྟ་ཐོན་རིམ་གཉིས་པ་འགྲེམས་སྤེལ་གནངས་ཡོད། གནང་སྟངས་འདི་ཡར་རྒྱས་ཀྱི་ཕེབས་སྟངས་ཤིག་ཡིན་པའི་ཆ་ནས། འབྲེལ་ཡོད་ཚང་མར་སྙིང་ཐག་པ་ནས་ཐུགས་རྗེ་ཆེ་ཞུ་དགོས་པ་ཞིག་རེད།

ཡིག་ནོར་ཐེར་འདོན་ནི་དམའ་འབེབས་པ་གང་ཡང་མ་རེད། ཡིན་ནའང་། ཡིག་ནོར་ཐེར་འདོན་བྱས་པ་ཡིན་ན། དེར་དྲ་ལམ་གྱི་ཡི་གེ་བ་འགའ་རེ་ཧ་ཅང་ཐུགས་ཁྲོ་བར་གྱུར་ནས། ཡིག་ནོར་མ་རེད་གཏགས་ནོར་རེད་ཟེར་བ་དང་། ལས་ཀའི་གྲུབ་འབྲས་ལ་བརྩི་བཀུར་དང་ཚིག་མཛོད་སྒྲིག་མཁན་ཚོའི་བཀའ་དྲིན་ལ་བསམ་ཤེས་མེད་པར་སྐྱོན་བརྗོད་བྱས་སོང་ཟེར་བ་སོགས་རྒྱུ་མཚན་མིན་པའི་རྒྱུ་མཚན་བགྲངས་ནས་ཅ་ཅོ་མང་ཙམ་སྒྲོག་པའི་གཤིས་ཀ་ཞིག་ཀྱང་མངོན་གྱིན་ཡོད། ཁོ་པ་ཚོས་ཡིག་ནོར་ཐེར་འདོན་ནི་དམའ་འབེབས་བྱེད་པར་ངོས་བཟུང་བ་ལས་སྐད་ཆ་དེ་དག་བྱུང་བ་ཡིན་ངེས།

དགའ་འོས་པ་ཞིག་ལ། སྨོན་ལམ་བརྡ་འཕྲིན་ཞིབ་འཇུག་ཁང་དང་ཐེ་ཝན་རྒྱལ་སྤྱིའི་བོད་བརྒྱུད་ནང་བསྟན་ཞིབ་འཇུག་ཚོགས་པ་གཉིས་ཀྱིས་ཁྱོན་ཡོངས་ལ་ཞུས་དག་གནང་སྟེ༼རྒྱ་བོད་ཚིག་མཛོད༽ཐོན་རིམ་གཉིས་པ་དྲ་ལམ་དུ་སྤེལ་གནང་སོང་། ཐོན་རིམ་གཉིས་པ་སྤེལ་བར་དགའ་བསུ་དང་ཐུགས་རྗེ་ཆེ་ཞུ་ཡི་ཡོད།

དེ་དང་ཆབས་ཅིག རེ་འདུན་ཞིག་ཞུ་དགོས་པ་ཆགས་སོང་། ཐོན་རིམ་གཉིས་པ་འདི་ལའང་ད་དུང་ཡིག་ནོར་འདུག་ཅེས་ཞུ་དགོས་སོང་། མི་རིང་བར་ད་ལྟའི་ཐོན་རིམ་གཉིས་པ་འདི་ལ་ཞུས་དག་ཅིག་གནང་སྟེ། ད་ལྟའི་འདི་ལས་ཡིག་ནོར་དང་དོན་ནོར་ཅུང་ཉུང་བའི་ཐོན་རིམ་གསུམ་པ་ཞིག་འགྲེམས་སྤེལ་གནང་བའི་རེ་འདུན་ཞུ་ཡི་ཡོད། འདིར་དཔེར་མཆོན་ཙམ་བཀོད་ན། གནད་ཚིག་༼སྒྲིག་ཁྲིམས་ཆེན་པོ་གསུམ༽་ཞེས་པའི་འགྲེལ་བཤད་ནང་། ༼སྒྲིག་ཁྲིམས་ཆེན་པོ་བརྒྱད༽་ཅེས་དོན་ནོར་བྱུང་འདུག་པ་དང་། བོད་སྐད་ཀྱི་འགྲོས་ལ་༼ཧ་ཅང་སྒྲུབ་དཀའ་བ༽་ཞེས་དགོས་རྒྱུ་ལ་༼སྒྲུབ་ཧ་ཅང་དཀའ་བ༽ཞེས་སུ་བྲིས་པ། ཡང་། ༼ཕྲུ་གུ་མི་སྐྱེ་བ༽་ཞེས་ན་གོ་རྒྱུ་འདུག་ཀྱང་། ༼སྦྱུམ་མར་མི་ཆགས་པ།༽ ཞེས་པས་གོ་རྒྱུ་ཅི་སྟེར་སོགས་ལ་དཔྱད་ཞིབ་ཞུ་བཅོས་རེ་དགོས་པར་མཐོང་སོང་། ཚིག་མཛོད་འདི་གློག་ཀླད་ནང་བལྟ་བདེ་བ་བྱས་འདུག་པར་དགའ་བ་སྐྱེས། དེ་ནས་ཚིག་རེ་འགའི་འགྲེལ་བཤད་བཀླགས་པས་མིག་ལ་འདི་དག་ཐོགས་ཤིང་། དོགས་འཆར་འདི་ལྟར་བྱུང་། ངའི་ལྟ་སྟངས་ནོར་ཡོད་ན་དགོངས་སེལ་ཞུ། རགས་བལྟ་ཞིག་བྱས་པ་ལས་མཐོང་བའི་ཡིག་ནོར་དང་དོན་ནོར་འགའ་པར་བརྒྱབ་ནས་དཔེ་མཚོན་དུ་བཀོད་ཡོད་པ་ཙམ་ཡིན། ཞིབ་ཚགས་པོས་བལྟ་བར་ཞུགས་མེད། དུས་ཚོད་ཀྱིས་སྟབས་འགྲིག་པ་བྱུང་ན། ཞིབ་ཚགས་པོས་བལྟ་བར་ཞུགས་འདོད། དེ་དུས་གང་ནས་ཡི་གེ་དང་དོན་དག་གི་ནོར་འཁྲུལ་མཐོང་བ་དག་ཐོར་བཏབས་ནས་འབྲེལ་ཡོད་རྣམ་པར་ཞུ་བཅོས་ཀྱི་དཔྱད་གཞིར་འབུལ་ཐུབ་པ་ཞུ་འདོད། ད་ལྟ་ནོར་འཁྲུལ་གྱི་དཔེ་མཚོན་འགའ་བཀོད་པ་འདི་ནི་ད་ཡོད་གྲུབ་འབྲས་ལས་ཀྱང་གྲུབ་འབྲས་ཚད་ལྡན་ཡོང་བར་བསྐྱར་ཞིབ་ཀྱི་འབོད་སྐུལ་ཞུ་ཆེད་ཡིན།

འདི་ལྟར་ནན་ཞུ་བྱེད་དོན་ནི། ཇི་ལྟར་ཚིག་མཛོད་འདིའི་མཉམ་སྤེལ་ཡོད་པའི་ངོ་སྤྲོད་ཀྱི་ཡི་གེའི་ནང་། ༼ད་དུང་འཐུས་སྒོ་མ་ཚང་བ་དང་། ཡིག་ནོར་སོགས་མང་དག་ཅག་ལྷག་ཡོད་ངེས་མོད། རིམ་གྱིས་ཡར་རྒྱས་དང་འཐུས་སྒོ་ཇེ་ཚང་དུ་གཏོང་འདོད་ཡོད༽ཅེས་དཀྱེལ་ཡངས་ཀྱི་སྒོ་འཕར་ཕྱེས་ཡོད་པ་དང་། ཡང་ན། ཞུས་དག་གི་ལས་དོན་དང་འབྲེལ་ཡོད་ནས་༼ ཡི་གེ་རེ་རེ་བཞིན་འབྲུ་འདེད་ཀྱིས་ཞུ་དག་བཏང་བའི་ཁུལ་ཡིན། ད་དུང་འདིར་ངེད་ཅག་གིས་མ་ཤེས་པ་དང་། ཤེས་བཞིན་མིག་འོག་ནས་ཤོར་བའི་སྐྱོན་ཆ་ཅི་རིགས་ཡོད་ངེས་པས་མཁྱེན་ལྡན་དག་ཡོ་བསྲང་མཛུབ་སྟོན་གནང་བར་ནན་གྱིས་ཞུ།༽ཞེས་རེ་སྐུལ་གནང་འདུག་པར་བརྟེན། ཚིག་མཛོད་འདི་བེད་སྤྱོད་གཏོང་མཁན་ཅིག་གི་ངོ་བོ་ནས་རྣམ་པ་ཚོས་མཐའ་མའི་ཞུས་དག་ཅིག་ཐུགས་ལ་འཛིན་པར་ཞུ་ཞེས་རེ་འདུན་ཞུ་ཡི་ཡོད་ལགས།

༼གོང་དུ་ལུང་འདྲེན་ཁག་གཉིས་ཞུས་ཡོད་པ་མ་ཡིག་རང་སོར་བཞག་ཡོད།༽