—
ཡིག་ཕབ་པ། གླིང་ལོ་མ་སེར་པོ།
བཀྲ་ཤིས་བདེ་ལེགས། ལྷན་རྒྱས་སྐུ་ཁམས་བཟང་།
ཉིན་ཤས་རིང་ནས་ང་ལ་ཚོར་བ་ཤུགས་ཆེན་པོ་ཞིག་བྱུང་བས་དེ་རིང་ཧ་ཅང་ཤུགས་ཆེ་བའི་ཚོར་བ་དེ་ཁྱེད་རྣམས་ལ་བཤད་ན་བསམ་བྱུང་། སྔོན་ཆད་ང་རང་ཉིད་ལ་བོད་པ་ཡིན་བསམ་པའི་ང་རྒྱལ་དང་སྤོབས་སེམས་ཧ་ཅང་ཆེན་པོ་ཡོད་མཁན་ཞིག་ཡིན།
ཡིན་ནའང་། ད་ལྟ་བསམ་བློ་ཞིབ་ཕྲ་གཏོང་སྐབས་རང་ཉིད་ཀྱིས་བཤད་པའི་ཕ་སྐད་ནི་ར་མ་ལུག་ཅིག་ཡིན་པ་མ་ཟད། བོད་ཡིག་ཀྱང་ཡིག་རིགས་གཞན་པ་བཞིན་ཡག་པོ་དེ་ཙམ་མི་ཤེས་པས། སྔོན་ཆད་ང་བོད་པ་ཡིན་བསམ་པའི་ང་རྒྱལ་དང་སྤོབས་སེམས་དག་ལ་ལྗིད་ཚད་དེ་ཙམ་མི་འདུག སྔོན་ཆད་ང་རང་གིས་ངོ་དེབ་ནང་དུ་བརྙན་ཐུང་བཟོ་དུས་མི་མང་པོ་ཞིག་གིས་བོད་སྐད་ཡག་པོ་ཤོད། ཁྱེད་རང་བོད་པ་མ་ཡིན་ནམ་ཟེར་ནས་མི་སྙན་པའི་ཚིག་རྩུབ་སྣ་ཚོགས་བཀོལ་དུས། སེམས་ནང་ལ་ང་རང་ལ་མཐོང་ཆུང་བཟོ་བཞིན་འདུག་བསམ་པའི་ཚོར་བ་མི་བདེ་བ་ཞིག་རྟག་པར་སྐྱེ་ཡི་ཡོད། ད་སྐབས་བསམ་བློ་ཞིབ་ཕྲ་དང་ཡག་པོ་ཞིག་གཏོང་སྐབས་དེ་དག་ནི་ཁོང་ཚོས་ང་ལ་མཐོང་ཆུང་དང་ངན་སྨྲས་བྱས་པ་མ་ཡིན་པར་ཁོང་ཚོ་རང་གི་སྐད་དང་ཡི་གེ་ཤ་ཚ་དང་འགན་ཁུར་ཡོད་པས་རེད་འདུག ང་རང་གི་རང་ཉིད་ཀྱི་ཕ་མེས་ཀྱི་སྐད་ཡིག་གི་ཤེས་ཚད་ལ་བསམ་བློ་ཞིབ་ཕྲ་ཞིག་གཏོང་བ་ཡིན་ན་སྔོད་ཆད་ཀྱི་ང་རྒྱལ་དང་སྤོབས་སེམས་དག་ལ་ལྗིད་ཚད་དེ་ཙམ་མེད་པ་ཤེས་ཀྱིན་འདུག
ཁྱེད་ལ་དེ་འདྲའི་བསམ་བློ་ཅི་ལྟར་སྐྱེ་བ་རེད་དམ་ཞེ་ན། ཕ་མེས་ཀྱི་སྐད་ཡིག་ལ་ཤ་ཚ་དང་འགན་ཁུར་ཡོད་མཁན་རྣམས་ཀྱིས་སྐྱོན་དང་ནོར་བར་མཛུབ་མོ་བཙུགས་པར་བརྟེན་ནས་བྱུང་བ་རེད། གལ་སྲིད་སྐྱོན་དང་ནོར་བ་ལ་མཛུབ་མོ་དེ་འདྲ་འཛུགས་མཁན་མེད་པ་ཡིན་ན་ང་རང་ལ་ཡོད་པའི་སྐྱོན་དེ་དག་ལ་ངས་དོ་སྣང་ཙམ་ཡང་བྱུང་ཡོད་རྒྱུ་མ་རེད། རྒྱུ་མཚན་དེ་དག་བརྟེན་ནས་སྐྱོན་དང་ནོར་བ་ལ་མཛུབ་མོ་བཙུགས་ནས་གསུང་མཁན་དག་བཀའ་དྲིན་ཆེ་ཞུ། ཁྱེད་ཅག་གིས་སྐྱོན་དང་ནོར་བ་མཛུབ་མོ་བཙུགས་པས་ང་རང་ལ་བོད་སྐད་གཙང་མ་བཤད་རྒྱུ་དང་བོད་ཡིག་འབྲི་རྒྱུ་ལ་དོ་སྣང་སྔར་ལས་ཆེ་བ་བྱུང་སོང་། བོད་པ་ཡིན་པའི་ང་རྒྱལ་དང་སྤོབས་སེམས་ཡོད་པ་ཙམ་གྱིས་འགྲིག་གི་མེད་པའང་ཤེས་བྱུང་།
དེང་སང་ན་གཞོན་མང་པོ་ཞིག་ངོ་དེབ་དང་དྲ་བའི་བརྒྱུད་ལམ་དག་ནས་བརྙན་ཐུང་བཟོ་མཁན་མང་པོ་ཞིག་འདུག དེ་དག་ལའང་བོད་སྐད་གཙང་མ་ཤོད་ཟེར་ནས་སྐྱོན་བརྗོད་བྱེད་མཁན་མང་པོ་ཞིག་འདུག ན་གཞོན་ཁྱེད་ཅག་ཀྱང་སྔོན་ཆད་ང་ལ་བྱུང་མྱོང་ཡོད་པའི་ཚོར་སྣང་མི་བདེ་བ་བཞིན་ཁྱེད་ཅག་ལའང་དེ་འདྲ་འབྱུང་གིན་ཡོད་པ་ཏན་ཏན་རེད། ངས་ཀྱང་ཁྱེད་ཅག་ལ་བསམ་ཤེས་ཐུབ་ཀྱི་འདུག ཡིན་ནའང། སྐྱོན་བརྗོད་དེ་དག་ལ་བསམ་བློ་ཞིབ་ཕྲ་རེ་གནང་ནས་འུ་ཅག་གི་ཕ་མེས་ཀྱི་སྐད་ཡིག་ལ་དོ་སྣང་རེ་བྱོས་དང་། ཉིན་རེ་ལས་ཇེ་ཡག་ཏུ་འགྲོ་བའི་རེ་བ་ཡོད། ང་རང་ངོས་ནས་ཀྱང་བོད་སྐད་གཙང་མ་ཤོད་གསུང་མཁན་དག་ལ་སྙིང་དབུས་ནས་ཐུགས་རྗེ་ཞུ་གི་ཡིན།
2017/9/16
ང་ཚོ་བོད་པས། བོད་སྐད་རྒྱབ་མ་ཤེས་ན། ངོ་ཚ་ས་འདིའི་ནང་ལ་འདུག་གདའ། ལན་ཅིག་གསན་གཟིགས་གནོངས་དང་།
https://www.facebook.com/tenzin.gyalpo.549/posts/717013201826742
བོད་པས་བོད་སྐད་མ་ཤེས་ཕྱི་སྐད་རྒྱབ་།
བོད་པས་བོད་ཡིག་མ་ཤེས་ཕྱི་ཡིག་བྲིས་
བོད་པས་བོད་ཆས་མ་གྱོན་ཕྱི་གོས་གྱོན་།
བོད་པས་བོད་ཟས་མ་ཟས་ཕྱི་ཟས་ཟས་།
རིགས་དང་བྲལ་ན་མི་མཛེས་ཏེ་།
ཀིམ་ཀུ་ཀ་ཡིའི་མེ་ཏོག་འདྲ་།
ཆུ་དང་བྲལ་ན་ཉ་མོ་འཆི་།
ཁྱུ་དང་བྲལ་ན་དུད་འགྲོ་རླགས་།
ཟེར་ཡང་ཟེར་ལ་བདེན་ཡང་བདེན་།
བདེན་གཏམ་ངོ་མ་བཤད་ཡོད་དོ་།
ཉན་དང་མི་ཉན་རང་རང་སོ་སོ་རེད་།
ཁ་ཆེ་ཕ་ལུའི་རྣམ་མཐར་བཤད་ཡོད་དོ་།
༄༅། རང་ཡུལ་ཤོར་ནས་རྒྱུས་མེད་མི་ཡུལ་བསླེབས།།
རང་དབང་མེད་པར་ཕྱི་ཡི་སློབ་གྲར་ཕྱིན།།
འདོད་པ་མེད་ཀྱང་ཕྱི་སྐད་སྦྱང་དགོས་བྱུང་།།
འོན་ཏེ་རང་ཡུལ་ཕ་སྐད་བརྗེད་ནི་མེད།།
མི་ཡུལ་འདི་ན་བོད་པའི་སློབ་གྲ་མེད།།
བོད་ཡིག་སྦྱང་འདོད་ཡོད་ཀྱང་སློབ་མཁན་མེད།།
གང་བྱུང་འཕྱ་སྨོད་མ་བྱེད་བོད་རིགས་ཚོ།།
བོད་པ་ང་ཚོའི་གནས་སྟངས་ཤེས་པར་གྱིས།།
རང་ཡུལ་ཤོར་ནས་མི་ཡུལ་ས་མཐའ་རུ་།
གངས་ཅན་མགོན་པོའི་རླབས་ཆེན་མཛད་འཕྲིན་འོག་།
བོད་མིའི་གཞིས་ཆགས་བོད་མིའི་སློབ་གྲ་དང་།
བོད་མིའི་ཆོས་སྒར་བོད་མི་བཟོ་ལས་དང་།
མང་གཙོའི་སྒྲིག་འཛུགས་གྲོས་ཚོགས་ལམ་ལུགས་དང་།
ས་གནས་འཐུས་མི་མང་གཙོ་མཉམ་འབྲེལ་འོག་།
རང་ཡུལ་ལས་ལྷག་རང་དབང་བདེ་སྐྱིད་སྦྱིན་།
ཉལ་ས་ཀྱོང་སའི་རང་དབང་བོད་མིར་སྦྱིན་།
མགོན་བསྟན་འཛིན་རྒྱ་མཚོའི་སྐུ་ཚེ་བརྟན་པ་ཤོག་།
བློ་བཟང་སྒྲོལ་མ་འདི་རྣམ་པ་སྡུག་རྒྱུ་མི་འདུག་ལ། བསམ་བློ་ཡང་སྡུག་རྒྱུ་མི་འདུག ཡག་གི་ཡག་གི
ཡག་པོ་གསུང་འདུག་ཅིང་དགའ་པོ་བྱུང་།