བླ་མ་སྐུ་ཚེ་བརྟན་ལ་གསོལ་བ་འདེབས།

རྔ་བ་རྒྱལ་ཁམས་པ།
ཨ་ཧོ་གཉུག་མ་ཀ་དག་ཆོས་སྐུའི་རྒྱལ་ཁམས།།
ལྷུན་གྲུབ་འོད་ལྔའི་ཐིག་ལེ་རྡོ་རྗེའི་སྐུ་ཅན།།
ཁྱབ་བདག་བླ་མ་ལམ་མཁྱེན་རྒྱལ་བོའི་མཚན་ཅན།།
སྙིང་དབུས་བདེ་ཆེན་འཁོར་ལོར་རྟག་ཏུ་བཞུགས་མཛོད།།

ཆོས་དབྱིངས་རྣམ་དག་འོད་གསལ་གཉུག་མ་འདི་ལ།།
སྐྱེ་གནས་འཇིག་པའི་སྤྲོས་མཚན་ཡེ་ནས་ཞི་ཡང་།།
རང་ངོ་མ་ཤེས་རིག་རྩལ་ཆོ་འཕྲུལ་ཆེན་པོས།།
སྲིད་པའི་རྟེན་འབྲེལ་ཕྱིར་ཟློག་དཀའ་དཀའ་འདུག་གོ།

རང་སེམས་རྟ་རྒོད་མུན་པའི་གཡང་སར་མཆོང་དུས།།
སྤྲོས་བྲལ་དབྱིངས་ནས་འཕངས་བའི་འོད་ཀྱི་ཞགས་པ།།
སྙིང་གའི་འཁོར་ལོར་རེག་ཙམ་རེག་ཙམ་བྱེད་དུས།།
དཔལ་ལྡན་བླ་མའི་བཀའ་དྲིན་བརྗེད་ཐབས་མི་འདུག།

རྫོགས་པའི་སངས་རྒྱས་ནས་བཟུང་མགོན་ཁྱོད་བར་དུ།།
དངོས་བརྒྱུད་བླ་མའི་བྱིན་རླབས་གསེར་གྱི་སྐུད་ཐག།
དམ་སེལ་གཡའ་ཡིས་མ་གོས་གཙང་མའི་བརྒྱུད་པ།།
དྲན་ཞིང་བསམ་ཚེ་ང་ནི་སྐལ་བ་བཟང་སོང་།།

ཆོས་ཀྱི་རྒྱལ་བོའི་མཚན་སྙན་ཡོད་ཀྱང་མེད་ཀྱང་།།
མཁས་གྲུབ་བྱེ་བའི་གཙུག་རྒྱན་ཡིན་རུང་མིན་རུང་།།
དགེ་སྦྱོང་ངུར་སྨྲིག་འཛིན་པ་བྱམས་བརྩེའི་བདག་ཉིད།།
རང་སེམས་བྱིས་པ་སྙོར་བའི་ཕ་མ་འདྲ་སོང་།།

མི་ཡུལ་མྱ་ངམ་ཐང་ན་སྐོམ་པས་འཆི་དུས།།
ལུགས་གཉིས་ལྷ་ཆབ་གཙང་མའི་ཐིག་པ་རེ་རེ།།
ཕངས་མེད་སྐལ་ལྡན་བུ་ལ་ཅི་དགར་སྩོལ་བའི།།
ལས་སྨོན་རྟེན་འབྲེལ་དཀར་བོ་རྨི་ལམ་འདྲ་བྱུང་།།

རྒྱུ་ཡི་ཐེག་པར་གསུང་བའི་རྟེན་འབྲེལ་ཟབ་མོ།།
འབྲས་བུ་ཕྱག་རྫོགས་ལྟ་བའི་དགོངས་པ་རྣོན་པོས།།
འཇིགས་མེད་རྟུལ་ཞུགས་སྤྱོད་པ་དཔའ་བོའི་གད་རྒྱངས།།
བསྐལ་པའི་མཐའ་འདིར་ཐོས་པ་ང་རེ་དགའ་འོ།།

གནས་ལུགས་ཆོས་ཀྱི་དབྱིངས་ལས་གཡོ་བ་མེད་ཀྱང་།།
སྣང་ཚུལ་ཆུ་ཟླའི་རོལ་གར་སེམས་ཀྱི་རི་མོ།།
མགོན་ཁྱེད་ཐང་གའི་གཞི་ལ་འཆར་ནུབ་མཐོང་ན།།
རྨེང་བའི་སེམས་ལ་སྐྱོ་སྣང་སངས་དུས་མི་འདུག།

ཁྱེད་ནི་མར་མི་དྭགས་གསུམ་བཀའ་ཡི་བརྒྱུད་པ།།
སྐྱོབ་པ་འཇིག་རྟེན་གསུམ་མགོན་ཐུགས་རྗེའི་ཉི་ཟེར།།
དགོངས་པའི་ནམ་མཁར་འཁྱིལ་བའི་སྐལ་ལྡན་ལགས་པས།།
ངེས་ངོར་བདེ་སྡུག་རེ་དྭོགས་བཞུགས་སྙམ་མི་འདུག།

ཀློང་ཆེན་རབ་འབྱམས་ཀ་དག་གདོད་མའི་གཞི་ལ།།
འཇིགས་མེད་སྣང་བཞིའི་རྩལ་རྫོགས་གངས་ཀྱི་སེང་ཆེན།།
འཁོར་འདས་རིག་སྟོང་རྡོ་རྗེའི་གླུ་ཡི་རོལ་མོ།།
དཀྲོལ་མཁས་རིག་འཛིན་དཔའ་བོའི་བུ་རྒྱུད་ཁྱེད་རེད།།

འཆི་མེད་ཞིང་གི་མགོན་པོ་ཚེ་དཔག་མེད་པ།།
རྗེ་བཙུན་ཡིད་བཞིན་འཁོར་ལོ་རྣམ་རྒྱལ་ལྷ་མོ།།
བརྟན་གཡོའི་ཚེ་བཅུད་འཛིན་པའི་ལྷ་ཚོགས་རྣམས་ཀྱིས།།
དཔལ་ལྡན་བླ་མའི་སྐུ་ཚེ་བརྟན་པར་གྱུར་ཅིག།

པདྨ་འབྱུང་གནས་རིག་འཛིན་རྩ་རྒྱུད་བླ་མ།།
ཡང་གསང་ཕུར་བ་བཅོམ་ལྡན་འཇིགས་མཛད་རྡོ་རྗེ།།
གནས་གསུམ་དཔའ་བོ་མཁའ་འགྲོ་དམ་ཅན་རྒྱ་མཚོས།།
དཔལ་ལྡན་བླ་མའི་སྐུ་ཚེ་བརྟན་པར་གྱུར་ཅིག།

མཁྱེན་དང་བརྩེ་བའི་བདག་ཉིད་བླ་མ་ཁྱེད་དང་།།
དད་བརྟན་དམ་ཚིག་གཙང་མའི་སློབ་བུ་གཉིས་ལ།།
ལས་སྨོན་རྟེན་འབྲེལ་བཟང་བོའི་རྒྱུ་ཞིག་འཛོམས་པས།།
སྐུ་ཚེ་ཡུན་རིང་བརྟན་པའི་གསོལ་འདེབས་ཞུ་འོ།།
ཞེས་པ་འདི་བཞིན་མཁྱེན་བརྩེའི་བདག་ཉིད་དཔལ་ལྡན་བླ་མ་འབྲི་གུང་པ་ལམ་མཁྱེན་རྒྱལ་བོ་མཆོག བསྟན་འགྲོའི་མཛད་འཕྲིན་ཡར་ལྡན་སྐྱོང་མུར་སྐུ་གཟུགས་ལ་སྙུན་གཞི་ཕྲན་བུ་བཞེས་པ། ཉེ་ལམ་ཇེ་ལོད་ལྟ་བུར་སོང་སྟེ་སྐུ་ཝོ་བརྒྱལ་གྱི་ངང་དུ་བཞུགས་ཚུལ་བསྟན་མོད། ད་ལྟ་སྐུ་མདངས་བཟང་ཞིང་ཐུགས་དམ་གཡོ་མེད་རྩེ་གཅིག་པའི་ངང་། སྐབས་སྐབས་སུ་དོ་ཧ་རྡོ་རྗེའི་མགུར་གླུའང་རྩོལ་མེད་དུ་བཞེངས་བཞིན་པའི་མཛད་འཕྲིན་ངོ་མཚར་བ་དེ་འདྲ་མཇལ་མོད། བླ་མ་གང་གི་སྐུ་ཚེ་བརྟན་ཅིང་ཟབ་རྒྱས་ཆོས་འཁོར་མུ་མཐུད་སྐོར་བའི་སྐལ་བཟང་ལ་རྩེ་གཅིག་ཏུ་མོས་པ་ཅན། སྙོམ་ལས་པ་བློ་བཟང་བཀྲ་ཤིས་ཀྱིས་ཟླ༡༠ཚེས་༡༥ཞོགས་པའི་ཐུན་མཚམས་སུ་སྤེལ་བ་དགེའོ།།