ཤར་གླིང་སྙིང་ལ་རྗེ་བོ།

སྒྲོལ་མཚོ།
 
གཟུགས་པོ་ཅུང་ཟད་ཐུང་རུང་།།
འཕྱོར་ལྭའི་ནང་ནས་མཛེས་པ།།
ཤ་མདོག་སྨུག་པོ་ཡིན་པའི།།
བཀའ་ཤག་སྔོན་མའི་སྐབས་སུ།།
ཤར་གླིང་སྙིང་ལ་རྗེ་བོ།།
གྲོས་ཚོགས་ནང་ན་ཡོད་རེད།།

ཁ་པར་སིལ་སྒྲའི་སྣེ་ནས།།
འགྱུར་མེད་གྲོས་གཞི་བཏོན་པ།།
རང་ལོ་རང་གིས་བརྗེད་པས།།
ཉིན་གཅིག་ཉིན་གཉིས་རིང་ལ།།
ཤར་གླིང་སྙིང་ལ་རྗེ་བོ།།
བཀའ་བློན་ཁྲོད་ན་ཡོད་རེད།།

ཟླ་མཚན་དོར་མས་ཕྱིས་ཞོར།།
དོར་ཁ་གཙང་མ་བཟོ་ཞོར།།
ཟུར་མིག་ཡང་བསྐྱར་འཕངས་པས།།
ཐབས་ཤེས་ཡང་བསྐྱར་འཐེན་པས།།
ཤར་གླིང་སྙིང་ལ་རྗེ་བོ།།
དྲུང་ཆེ་ཁྲོད་ན་ཡོད་རེད།།

ཉི་མ་རི་ལ་ནུབ་དུས།།
སྙིང་གཏམ་ཚིག་གསུམ་བཤད་པ།།
དགོང་ཁའི་ལྷགས་རླུང་བཙན་པོས།།
སྙིང་གཏམ་རླུང་ལ་བསྐུར་སོང་།།
ཤར་གླིང་སྙིང་ལ་རྗེ་བོ།།
མྱི་ཁའི་ཁྲོད་ན་ཡོད་རེད།།

ཁ་ལ་སྦྲང་རྩི་བྱུགས་པས།།
རིན་མེད་དངོས་གྲུབ་བཞུར་སོང་།།
སྐུ་ངོ་ལུག་རྫི་སྤེན་པས།།
གོང་ཆེན་བྱིན་ནས་ཉོས་སོང་།།
ཤར་གླིང་སྙིང་ལ་རྗེ་བོ།།
ལག་ཆའི་ཁྲོད་ན་ཡོད་རེད།།

ཟླ་༡༡པའི་ཚེས་༢༨ཉིན་གྱི་མཚན་མོར་༼འབྲོག་མོ་སྙིང་ལ་རྗེ་བོ་༽ཟེར་བའི་གླུ་གཞས་ཤིག་ལ་ཉན་ཞོར་རང་ཉིད་ཀྱིས་ཀྱང་༼ཤར་གླིང་སྙིང་ལ་རྗེ་བོ་༽ཟེར་བའི་གླུ་གཞས་འདི་བཏང་བ་ཡིན།