ཁྲོ་གཏུམ།
ང་ཚོས་ཉི་འོད་ཤེས་ན་བཟང་།
ཉི་འོད་ཀྱིས་གློག་རིན་གྲོན་ཆུང་བྱེད
རི་བོའི་རྩེ་དང་ཡངས་པའི་སྤང་གི་མཐའ་ལ་འོད་ཀྱི་བརྩེ་བ་འཁྱུལ
དྲོད་འཁོལ་གྱི་བྱམས་སེམས་ཉིན་སྲིབ་ལ་རྒྱུ
ཉི་འོད་དུས་ལྟར་མི་ཡུལ་ནས་ཕར་ཆས་དུས
རྐང་པའི་འདེགས་འཇོག
སྐད་ཆའི་སྒྲ་སྒམ
མཐའ་ན་ཁྱིའི་ཟུག་སྐད་ཀྱང་འཇག་འགྲོ
ཉི་ནུབ་ཀྱི་བར་མཚམས་སུ
ཆེས་བྲེལ་འཚུབ་ཀྱི་རྐང་པ་དག
འགྲོ་འོང་གི་རྐང་ལམ་དུ་ངལ་བ་རིང་དུ་དོར
དེ་རིང་ཉི་མ་འོད་ཀྱིས་འཁྱུལ་ཡང
མིའི་ངོ་གདོང་ན་ཉི་འོད་ཀྱི་དཀར་ཐིག་དེ་མ་གཏོགས
འཛུམས་མདང་གི་སྙིང་བོ་མི་འདུག
2017/12/06ཞོགས་པ།
ངའི་སེམས་ཀྱི་མཆོད་ཁང་།
༧གོང་ས་མཆོག་གིས་ནོ་བྷེལ་ཞི་བདེ་གཟེངས་རྟགས་བཞེས་ནས་ལོ་ངོ་ཧྲིལ་བོ་ཉེར་ལྔ་འཁོར་བའི་དུས་དྲན་གྱི་ཉིན་མོ།
འཛུམ་མདངས་ཀྱི་འོད་ཀྱིས་ཡངས་བའི་གོ་ལ་སྒུལ
ས་ཆེན་པོའི་མཐོང་ག་ནས
རང་དབང་གི་ཞལ་གསང་གནང་བའི་གསོལ་རས་དྲོན་མོ་དག
གླིང་ཕྲན་ནས་གླིང་ཕྲན་གྱི་གོང་ཁ་བསྲོ་བའི་དུས་རབས་ཀྱི་དབང་པོ
མིའི་རིགས་ཀྱི་དངངས་སྐྱོམས་གཡོ་འགུལ
འཛུམ་མདངས་ཤིག་གི་བཞད་མོ་ནས་ཐར་ཞིང
གྲངས་ངར་གྱི་ཡོ་ལང་རི་ཉིལ་བྱས་ཏེ
སྡིག་རྩུབ་ཀྱི་རལ་གྲི་ཡང་ཙ་རུ་འབྱར་ལ་ཉེ
ཞི་བའི་ལམ་ཁ་ནས
སེམས་ཀྱི་དྲོད་ཐིག་ཏུ་ལྗང་སྨྱུག་གི་ཞིང་ཁ་བཏབ་ཅིང
བརླན་གཤེར་གྱིས་ནེམ་པའི་གཤིས་ཀ་ལྷང་ལ་འབུད་དུ་བཅུག་པའི་དེ་ཙ་ན
འཛམ་གླིང་གི་མིག་ཟུང་འོད་ཟེར་ཁྱེད་ལ་འཕྲོས་ཤིང
ཁྱེད་ཀྱི་ཡངས་བའི་མཁའ་དབྱིངས་སུ
བདེན་པའི་རྒྱབ་རི་སྨུག་པོ་དག་སྔོ་ལྗང་གིས་བརྒྱན་ཡོད
བཞད་འཛུམ་གྱི་ཞལ་རས
ཚེ་སྲོག་གི་གནད་དུ་འཁེལ་བའི་བདེ་བ་གཅིག་ཉིད་དེ
ངའི་ཡ་ཆུང་གི་ངོས་སུ་ཁྱེད་ཀྱི་མཆོད་ཁང་གཅིག་པུས་བརྒྱན་ཆ་བཏགས་སོང
༢༠༡༤།༡༢།༡༠ཞི་བདེ་གཟེངས་རྟགས་ཉིན་མོ།