༈ སྲུང་བརྩི་མེད་པའི་དུས་ཆེན།

མགར་གཡུལ་རྒྱལ།

སྤྱིར་རང་རེ་བོད་ལ་མཚོན་ན། དུས་ཆེན་འདྲ་མིན་སྣ་ཚོགས་ཤིག་ཡོད་མོད། འོན་ཀྱང་ཡོད་ཚད་སྲུང་བརྩི་བྱེད་རྒྱུ་ནི་དེ་འདྲ་གལ་ཆེན་ཞིག་མིན་ནའང་། ༧གོང་ས་མཆོག་གི་འཁྲུངས་སྐར་དང་ཁོང་གིས་ཨ་རིའི་གསེར་གྱི་རྟགས་མ་བཞེས་ཉིན་གྱི་དུས་ཆེན། ད་དུང་ནོར་བེ་ཞི་བདེའི་གཟེངས་རྟགས། དེ་ག་ནང་བཞིན་ཁོང་གིས་གསོལ་རས་གནང་བའི་བོད་ཀྱི་དམངས་གཙོ་དུས་ཆེན་སོགས་སྲུང་བརྩི་ཞུ་དགོས་པ་ནི་རང་རེ་བོད་མི་གང་ན་སུ་མཆིས་ཡོད་ཚད་ཀྱི་གཡོལ་ཐབས་མེད་པའི་འོས་འགན་ཞིག་ཏུ་སྙམ། ལྷག་པར་དུ་གཞི་རྒྱ་ཆེ་བའི་རང་རེ་བཙན་བྱོལ་བོད་མིའི་སློབ་གྲྭ་ཁག་ལ་དེ་བས་སྲུང་བརྩི་ཞུ་དགོས་པ་ནི་རྒྱུ་མཚན་དང་གནས་ལུགས་ལྡན་པ་ཞིག་རེད།གང་ཡིན་ཟེར་ན། ༧གོང་ས་མཆོག་ཐོག་མར་བཙན་བྱོལ་ནང་འབྱོར་མ་ཐག་ཏུ་དཀའ་སྤྱད་འབད་བརྩོན་བྱེད་ས་ཞིག་ནི་བོད་ཀྱི་ཆོས་དང་རིག་གཞུང་མི་ཉམས་རྒྱུན་འཛིན་ཡོང་སླད་བོད་མིའི་ཁྱད་རྣམ་ལྡན་པའི་བོད་ཀྱི་སློབ་གྲྭ་ཟུར་འཛུགས་མཛད་རྒྱུ་དེ་ཡིན་པས་རེད། འོན་ཀྱང་། རང་རེ་སུ་ཇཱ་བོད་ཁྱིམ་ནི་བོད་ཁྱིམ་སློབ་གྲྭ་གཞན་དང་མི་འདྲ་བར་ཉེ་ཆར་༧གོང་ས་མཆོག་གི་ནོར་བེ་ཞི་བདེའི་གཟེངས་རྟགས་བཞེས་ཉིན་གྱི་དུས་ཆེན་ལ་བོད་ཁྱིམ་སློབ་གྲྭ་གཞན་ཁག་དང་འཛམ་གླིང་གང་སར་སྲུང་བརྩིའི་མཛད་རིམ་བསྟུད་མར་སྤེལ་དུས་རང་རེ་སུ་ཇཱ་སློབ་གྲྭ་ནི་གྲ་སྒྲིག་ཅི་ཡང་མེད་པར་ཁ་ཁུ་སིམ་མེར་ངང་གུང་གསེང་བཏང་པ་རེད།

འདི་ནི་བདག་ལྟ་བུའི་བོད་ཀྱི་ཆོས་དང་རིག་གཞུང་ལ་དགའ་མོས་དང་སྤོབས་པ་ལྡན་མཁན། ༧གོང་ས་མཆོག་ལ་རྩེ་གཅིག་ཏུ་དད་པ་ཡོད་མཁན་སློབ་ཕྲུག་དང་དགེ་རྒན་དག་གི་བློ་ངོར་ཆེས་མི་ཤོང་བའི་བྱས་ངན་ཞིག་སྟེ། འདིས་ང་ཚོ་དགེ་རྒན་དང་སློབ་ཕྲུག་ཁག་ཅིག་ལ་ཕོག་ཐུག་བཏང་བ་མ་ཟད་བོད་སྤྱི་པའི་གཟི་དཔལ་དང་། ལྷག་པར་དུ་༧གོང་ས་མཆོག་གི་མཚན་སྙན་དང་མཛད་རྗེས་ལའང་ཕོག་ཐུག་བཏང་ཡོད། ནམ་རྒྱུན་ཁྱེད་ཚོ་འགན་དབང་འཛིན་པ་དག་གིས་ཁ་ན་ན་ལ་ཤོད་ཀྱིན་པའི་”བཀའ་དྲིན་རྗེས་དྲན”དང་”དད་པ་དག་སྣང་” ཟེར་བ་དེ་འདི་རེད་དམ། ཁྱེད་ཅག་གིས་ཞོགས་ཚོགས་དང་འདུ་འཛོམས་སོགས་ལ་༧གོང་ས་མཆོག་ཁ་ལ་འཁྱེར་ནས་རྫིག་ཉམས་གང་འདྲ་སྟོན་གྱི་ཡོད། འདི་ཁྱེད་ཅག་གི་རྫིག་ཉམས་རེད་དམ། ད་དུང་ཧང་སང་དགོས་པ་ནི་ཁྱེད་ཅག་གི་ཧ་ཅང་བྱས་རྗེས་ཆེན་པོ་ཞིག་བཞག་ཡོད་མདོག་གིས་གསལ་བཤད་བྱེད་ཁུལ་བགྱིས་པའི་སྤོབས་པ་དེ་རེད། སོ་སོའི་མགོ་ཐོག་བབ་དུས་ཁྱེད་ཅག་ལ་རྫུན་མ་བདེན་པར་བཟོ་བའི་ཐབས་ཤེས་འདུག་ལ་ཡིན་པ་མ་ཡིན་པར་བཟོ་བའི་སྤོབས་པའང་འདུག འོན་ཀྱང་། ང་ཚོར་གནས་ལུགས་དང་རྒྱུ་མཚན་དྲངས་པའི་སྤོབས་པ་ཡོད་མི་ཆོག་ལ་བདེན་པ་ར་སྤྲོད་བྱེད་པའི་འགྲེལ་བརྗོད་ཀྱང་ཡོད་མི་ཆོག་པ་འདི་སུ་ཞིག་གིས་ཁྱེད་ཅག་ལ་གནང་བའི་གོ་དབང་( གོ་ས་དང་དབང་ཆ )རེད། ང་ཚོ་ལ་ཁྱེད་ཅག་གི་དྲན་གཡོག་ལྟ་བུ་ཅི་ཟེར་ཁ་ལ་ཉན་པའི་གཤིས་ལུགས་མེད་ལ་རང་དོན་ཕྲན་ཙག་ཞིག་གི་ཆེད་དུ་ངོ་དགའ་སྤྲེལ་ལད་བྱེད་པའི་ནུས་རྩལ་དེ་བས་མེད། ང་ཚོ་ང་རང་ཚོ་ལ་དབང་བའི་བོད་ཀྱི་ཆོས་དང་རིག་གཞུང་ལ་མོས་པའི་སེམས་ཁམས་གཞན་ཞིག་ཡོད་ལ་བོད་ཀྱི་རླབས་ཆེན་མི་སྣ་ཁག་དང་ལྷག་པར་དུ་༧གོང་ས་མཆོག་ལ་དད་པ་བྱེད་སྟངས་ཀྱང་མི་འདྲ་བ་ཞིག་ཡོད། ཁྱེད་ཚོར་ཇི་ལྟར་དད་པ་ཡོད་པ་ནང་བཞིན་ང་ཚོ་ལའང་དེ་ལྟར་ཡོད་པས། ཕྱིན་ཆད་ཁྱེད་ཚོ་ལས་ང་ཚོར་དད་པ་མེད་པ་ལྟ་བུའི་གཏམ་ཉོག་བཤད་མ་ཡོང་། གཏམ་ཉོག་དེ་དག་ཁྱེད་ཚོས་རང་དོན་བསྒྲུབ་ཆེད་དུ་བེད་སྤྱོད་མ་གཏང་། འདིས་སུ་གཅིག་ལའང་དགེ་མཚན་སྦྱིན་མི་ནུས་པར་དྲང་བདེན་བརྟུལ་ཞུགས་ཀྱི་རང་ཚུགས་ཟིན་པའི་ཉམས་ཆུང་མི་སྣ་དག་གི་མགོ་ཐོག་གཞུད་བའི་ཐོ་བ་དེ་ཆགས་འགྲོ།

ད་ལྟ་ཀུན་གྱི་སྣ་ལམ་དུ་གྲགས་ཀྱིན་པའི་རང་རེ་སུ་ཇཱ་སློབ་གྲྭའི་མཚན་སྙན་དང་གཟི་དཔལ་ནི་སྔོན་ཆད་ཀྱི་སློབ་ཕྲུག་དང་དགེ་རྒན་ལས་བྱེད་སོགས་ཀྱི་བྱས་རྗེས་ལས་བྱུང་བ་ལས་ཁྱེད་ཅག་གོ་དབང་འཛིན་པ་རེ་གཉིས་ཤིག་གི་འཇོན་ཐང་ལས་བྱུང་བ་ཞིག་གཏན་ནས་མིན་པ་ཁྱེད་ཅག་གིས་བསམ་བློ་འཁོར་མྱོང་ངམ། ཕལ་ཆེར་འཁོར་མྱོང་ཚོད་མེད་པ་འདྲ། འོན་ཀྱང་འདི་གཙོ་བོ་མིན། གཙོ་བོ་འདི་ལོར་ང་ཚོས་ཅིའི་ཕྱིར་བོད་སྐད་ཡིག་དང་འབྲེལ་བའི་བྱེད་སྒོ་མ་སྤེལ་བ་དང་ལྷག་པར་དུ་ཉེ་ཆར་༧གོང་ས་མཆོག་གི་ནོར་བེ་ཞི་བདེའི་གཟེངས་རྟགས་བཞེས་པའི་དུས་ཆེན་སྲུང་བརྩི་ཅིའི་ཕྱིར་དུ་མ་ཞུས་འདི་རེད། འདི་ལ་རྒྱུ་མཚན་འགྲོ་ས་གཅིག་ལས་མེད། གཅིག་དེ་གང་ཞེ་ན་བོད་སྐད་ཡིག་དང་༧གོང་ས་མཆོག་གི་མཛད་རྗེས་ལ་སྣང་ཆུང་ཚོད་མེད་བྱས་པ་དེ་རེད། དེ་ལས་ལྷག་པའི་རྒྱུ་མཚན་གཞན་ཞིག་ཡོད་མི་སྲིད་ལ། སྲིད་ཀྱང་སྐྱག་རྫུན་ཁོ་ན་ཡིན་པར་སྙམ།

ཞེས་ཀྱང་མགར་གཡུལ་རྒྱལ་གྱིས།

<< གསལ་བཤད།>>

༸གོང་ས་མཆོག་གི་ནོར་བེ་ཞི་བདེའི་གཟེངས་རྟགས་བཞེས་ཉིན་གྱི་དུས་ཆེན་ལ། སློབ་གྲྭའི་འགན་འཛིན་གྱིས་གཞུང་འབྲེལ་གྱི་མཛད་རིམ་མེད་པ་བཟོས་ཏེ་གུང་གསེང་བཏང་བར་བློ་ཕམ་བྱུང་བའི་སེམས་ཚོར་དང་། ལྷག་པར་དུ་འདི་ལོར་སློབ་གྲྭའི་ངོས་ནས་བོད་ཀྱི་སྐད་ཡིག་དང་འབྲེལ་བའི་བྱེད་སྒོ་ཚགས་ཚུད་མ་སྤེལ་བའི་སེམས་ཚོར་གཞི་ལ་བཞག་ནས་ད་ལྟའི་སློབ་གྲྭའི་ནང་གི་དངོས་ཡོད་གནས་སྟངས་ཀྱི་ཚད་གང་འདྲ་ཞིག་སླེབས་ཡོད་མིན་སྐོར་ལ་སྒྲོ་བཏགས་ཀྱི་ཆ་ཅུང་ཟད་ཙམ་ཡང་མེད་པའི་རྩོམ་ཡིག་ཅིག་ལགས་ན། བོད་ཀྱི་སྐད་ཡིག་ལ་དོ་སྣང་དང་ཐུགས་ཁུར་ཡོད་མཁན་དག་གིས་བརྟག་པར་འཚལ།