བཀྲས་ཁང་པ་སངས།
དེང་སང་གངས་ཅན་སྐྱིད་གཤོངས་ཀྱི་གཏམ་དཔེ་གསར་པ་ཞིག་སྟེ། ‘’གང་དུ་པར་ཆས་ཡོད་ན།། དེ་རུ་སྲིད་སྐྱོང་ཡོད།།’’ ཟེར། གཏམ་དཔེ་འདི་ནི་གཞུང་ཞབས་རྣམ་པ་དང་སྤྱི་འཐུས་རྒྱུན་ལས་ཚོས་བཟོས་པའི་གངས་སྐྱིད་ཀྱི་གཏམ་དཔེ་ཞིག་རེད། གཏམ་དཔེ་འདི་ཏན་ཏན་སྲིད་སྐྱོང་གིས་གསན་ཡོད་ཤག འོན་ཏང་། སྲིད་སྐྱོང་ནི་གང་དུ་སྐྱོན་བརྗོད་ཡོད་ན།། དེ་ལ་གཡོལ་ཐབས་བྱེད་མཁན་ཞིག་ཡིན་པས། གཏམ་དཔེ་འདི་མ་གོ་མདོག་མདོག་གནང་རྒྱུ་ནི་ཚང་མས་ཚོད་དཔག་ཐུབ་པ་ཞིག་རེད།
པར་ཆས་ཀྱི་ནང་དུ་ཐོན་རྒྱུ་མང་དྲག་པས། བྱ་སྤུ་གནོན་ཕར་ཟད། ལྷན་ཁང་ཁག་གི་གང་བྱས་པའི་ངོ་སོ་ཚང་མ་སྲིད་སྐྱོང་ལ་ཐོབ་དགོས་པ་དང་། ལས་དོན་ཡག་པོ་རེ་སྒྲོག་དགོས་ཚེ་མདུན་དུ་སྲིད་སྐྱོང་ཐོན་དགོས་པ་ཆགས་པས། ལས་བྱེད་དཀྱུས་མ་ཞིག་གིས་ཀྱང་སྲིད་སྐྱོང་ལ་ལྗིད་ཁོག་ག་ཚོད་ཡོད་མེད་དང་། གཟི་བརྗིད་ག་ཚོད་ཡོད་མེད་ཧ་གོ་དོན་གསལ་ཆགས་སྟབས། གངས་སྐྱིད་ཀྱི་གསར་འགོད་གསལ་བསྒྲགས་རེ་རེ་ནི་འཕྱ་ལེ་རྒྱག་སྤྱད་ལྟ་བུ་ཞིག་ཏུ་གྱུར་དང་འགྱུར་བཞིན་པ་ཡིན།
བྱ་སྤུ་གནོན་ཟེར་པ་དང་། སྒྲིག་ཁྲིམས་ཀྱིས་གནང་བའི་འོས་འགན་རྣམས་རང་བབ་དུ་བཞག་སྟེ། སྲིད་སྐྱོང་གིས་སྲིད་སྐྱོང་གི་ཆེ་མཐོང་དང་རིན་ཐང་ནང་བཞིན་ཕྱག་ལས་སྔར་བཞིན་གནང་མ་ཐུབ་པ་ནི། སློབ་བཟང་སངས་རྒྱས་ཀྱིས་སྨན་ལོག་ཅིག་མཆོད་པ་རེད་དམ། ཡང་ན་གཤམ་འོག་གི་ལས་བྱེད་རྙིང་པ་ཇུས་ལ་མཁས་པ་དག་གིས་བསྟོད་བསྔགས་གནང་། མདུན་ལ་འཆོང་དུ་བཅུག སྤར་རྐྱལ་ལང་དུ་བཅུག མཐའ་མར་མཆིལ་མ་གནམ་དུ་འཕངས་པ་ལྟར་གདོང་དུ་ཟགས་འཇུག་པ་འདི་ག་རེ་བྱས་ནས་ཡོང་གི་ཡོད་པ་རེད་དམ།
དེང་སང་བོད་མིའི་ནང་གི་སྲིད་སྐྱོང་གི་པར་ཙམ་མཐོང་ནའང་། ཐུགས་སུན་སྣང་གིས་མཇལ་འདོད་མེད་སྣང་སྟོན་མཁན་ཉིན་རེ་ནས་ཉིན་རེར་ཇེ་མང་དུ་འགྲོ་བཞིན་པ་འདི་ཡང་སྙིང་སུ་ཡི་བྱེད་ལས་ལ་བརྟེན་ནས་བྱུང་བ་རེད་དམ། ཁ་སང་ཤེས་རིག་ལས་ཁུངས་ཀྱི་བོད་སློབ་འཛིན་ཚོགས་CSTཁོངས་ཀྱི་སློབ་གྲྭ་ཁག་རྩིས་ལེན་སྐོར་དང་། RS སྐྱབས་བཅོལ་ལག་དེབ་དེབ་སྐྱེལ་ཞུ་ཕྱོགས་གཉིས་ཀྱི་གསར་འགོད་གསལ་བསྒྲགས་སྐབས་ཀྱང་པར་ཆས་ཀྱི་མདུན་དུ་ཁོ་པ་ཡང་ཐོན། མི་རྣམས་གད་མོ་ཤོར། བྱ་སྤུ་གནོན་ཟེར་པ་དེ་སྒང་ནས་ག་རེ་བྱས་བྱས་དང་། འོག་ནས་གཅིག་མ་འགྲིག་ན་སྲོག་ཐོག་གཏོང་རྐྱང་ལ་མི་ཟེར་པ་ཚང་མས་ཤེས་ནའང་། ཤེས་རིག་ལས་ཁུངས་བདེ་སྲུང་ལས་ཁུངས་ཀྱི་འབྲེལ་ཡོད་དྲུང་ཆེ་དང་ལས་བྱེད་ཀྱིས་གནས་ཚུལ་དེ་ཙམ་ཡང་གསལ་བསྒྲགས་གནང་རྒྱུར་མི་འཇོན་ནམ། གནད་དོན་དེ་ཙམ་ནི་སྲིད་སྐྱོང་ཡ་གི་ནས་མར་སླེབས་ཏེ་བསྒྲགས་དགོས་པ་ཞིག་རེད་དམ།
སྲིད་སྐྱོང་གི་འུ་ཐུག་པ་ལྟ་བུའི་རང་ཉིད་ཆེན་པོ་བཟོ་སྟངས་ཀྱི་ཐབས་ཤེས་ཏེ། དྲིལ་བསྒྲགས་ལས་ཁུངས་སུ་ཨ་ནེ་སྙེ་མོ་དྲུང་ཆེར་བསྐོས། དེའི་འགུལ་སྐྱོད་དབུགས་གཏོང་ལེན་ཚུན་སྲིད་སྐྱོང་དྲིལ་བསྒྲགས་ལ་འབད། གཞུང་འབྲེལ་བརྒྱུད་ལམ་ཁག་གུང་བྲན་ཏང་གི་སྒེར་གཅོད་བརྒྱུད་ལམ་གྱི་གྲལ་དུ་བཞག་ཆོག་ཆོག་ཅིག་བཟོ་དང་བཟོ་བཞིན་པ་འདི་ལྟ་བུའི་ཁྱབ་བསྒྲགས་ཤིག་གིས་སྲིད་སྐྱོང་ལ་ཡང་སྙིང་ཕན་ཅི་ཞིག་ཐོགས་སམ། དེས་ཆེན་པོ་བཟོ་ཡི་འདུག་གམ་བྱབ་ཆུང་བཟོ་ཡི་འདུག དེ་ལ་ཚང་མས་དགོངས་པ་ཞིག་བཞེས་དང་།
དོན་དམ་པས་གངས་ཅན་སྐྱིད་གཤོངས་སྤྱི་འཐུས་དང་འཛིན་སྐྱོང་གཉིས་ཀའི་ནང་དུ་སྲིད་སྐྱོང་ལ་ཤ་ཚ་བ་ཞིག་མེད་པ་རེད་དམ། ཡོད་ན་མི་མང་ཞེན་པ་ལོག་པའི་གནང་སྟངས་འདི་མུར་གནང་བཅུག་པས་གང་ཡོང་། ཡང་ན་སྲིད་སྐྱོང་གིས་སྨན་ལོག་ཟོས་སམ། བདུད་ཀྱིས་བྱིན་གྱིས་བརླབས་པ་ཡིན་ནམ། གནང་སྟངས་འདི་རིགས་ནི་འདི་མེད་ཕྱི་མེད་རང་ཆགས་ཀྱི་འདུག་སྟབས། གུས་པ་སྲིད་སྐྱོང་ལ་ཤ་ཚ་ནས། རབ་བྱུང་ན། སྲིད་སྐྱོང་གིས་ཅི་ཡང་མ་འཇོན་ནའང་། རང་མདོག་ཆ་ཚང་དམར་རྗེན་Dance ཌན་སི་འཁྲབ་པ་ནང་བཞིན་མི་གནང་རོགས། དེ་ལས་རྦད་དེ་ཡ་གའི་ལས་ཁུངས་ནང་ལྷོད་ལྷོད་གཟིམ་བཞུགས་ནའང་དབུས་སྒྲིག་འཛུགས་ཀྱི་གཟི་བརྗིད་དེས་སྲུང་ནུས་པ་འདྲ།།
༢༠༡༨ ཟླ ༡ ཚེས ༩ ཉིན།།
དངོས་ནས་རེད་ད་སྐབས་མི་མང་གི་མིག་ལམ་ན་སྲིད་སྐྱོང་འདི་ཁྱི་ནག་ཞིག་ལས་སྡུག་པ་འདུག
༄༅། རང་སྐྱོན་གཡག་ཙམ་དེ་རྒྱབ་ལ་སྦས། གཞན་སྐྱོན་ཤིག་ཙམ་དེ་ཐང་ལ་བཀྲམས་པ་དང་
གཅིག་མཚུངས་རེད། འུར་གཏམ་དང། གཞན་ལ་སྐྱོན་ཤ་སྟག་བཤད་དེ་བསྡད་ན་ག་རེ་རག་གི་རེད།
སྙིང་ནི་སྙིང་ཡང་རྗེ། ཁག་ནི་ཁག་ཀྱང་མེད།
ཀླད་མེད་གཞན་ཟེར་རྗེས་སུ་རྒྱུགས།
རིག་གནས་མེད་པའི་རྟགས་རང་རེད།
ཆོས་མེད་དཔལ་མེད་གཉིས་ཀ་མེད།
གཉིས་མེད་པ་ལ་ཁག་རང་མེད།
བྱ་སྤུ་གནོན་ཟེར་བ་དང་རྟ་སྤུ་གྱེན་ལང་ཟེར་བ་དེ་ཚོ་སྤྱི་ཚོགས་རྙིང་པའི་སྐབས་ཀྱི་སྐུ་དྲག་རིང་ལུགསཀྱི་
བཀའ་བཙན་ཙམ་ལས་དེང་སང་མང་གཙོ་ཁྲིམས་ཀྱི་དབང་བསྒྱུར་ནང་བྱ་སྤུ་གནོན་ཟེར་བའི་གཏམ་དེ་ག་འདྲ་ཡིན་ནམ་།