འགྱུར་མེད་ཚེ་རིང་།
རབ་འབར་བྱིན་རླབས་ཀྱི་ཚན་ཁ་རྒོད་པའི་གནས་མཆོག་ཏུ།།
རབ་མང་མི་ཚོགས་ཀྱི་འཚང་ཁའི་རྦ་རླབས་ཆེ་ཆེ་འདྲ།།
རབ་ཞི་དམ་ཆོས་ཀྱི་ཉིང་ཁུ་རླབས་པོ་ཆེ་ཆེ་དེ།།
རབ་མྱུར་འགྲོ་ཚོགས་ཀྱི་སྙིང་ཁར་གྲང་ཆར་སིམ་སིམ་བཞིན།།
གཟུང་བ་གཞི་ཡུལ་ལ་འགྱུར་ལྡོག་རྣམ་འགྱུར་མོད།།
འཛིན་པ་ཡུལ་ཅན་གྱི་རྣམ་རྟོག་ཆུ་གཉེར་འདྲ།།
རྣམ་རྟོག་ཆུ་གཉེར་གྱི་རང་གཟུགས་རེ་རེ་དེ།།
སོ་བཞི་དབྱངས་གསལ་གྱི་སྲད་བུར་སྤེལ་བར་བྱ།།
སྲིད་པ་རྣམ་རྟོག་གི་གྲོང་ཁྱེར་ཆེན་པོ་ན།།
འདི་ཡིན་འདི་མིན་གྱི་ཁོ་ཐག་མི་ཆོད་པའི།།
འཕྲུལ་སྣང་སྒྱུ་མ་བཞིན་ཟློས་གར་གང་སར་སྣང་།།
རང་སེམས་སྣང་བ་ལ་རང་གཅུན་བྱ་གལ་ཆེ།།
སྐྱ་མིན་སེར་མིན་གྱི་ཕུང་གསུམ་བྱོལ་སོང་འགས།།
འདི་སྣང་འཚོ་བ་ཡི་མགོ་སྐོར་བསླུ་བྲིད་འོག།
ཕྱི་མ་གཡང་ས་ལ་གཡུགས་པའི་ཐ་ཤལ་ལས།།
འཛེམ་མེད་བྱུང་རྒྱལ་དུ་སྤྱོད་པ་ཡ་རེ་ང་།།
དོན་མེད་ཕ་རོལ་གྱི་འདས་མ་ད་གསུམ་གྱི།།
བྱ་སྤྱོད་ཅི་ཡིན་ལ་གཤེ་གཤེ་མང་མང་ལས།།
ཚུ་རོལ་རང་ཕྱོགས་ཀྱི་དཀར་ངན་བྱ་བ་ལ།།
བརྟག་པ་རྟོག་དཔྱོད་ཀྱི་གོམས་པ་མེད་འདི་སྐྱོ།།
འདི་སྣང་ཚུ་རོལ་གྱི་ལྟོ་གོས་གཏམ་གསུམ་ལ།།
རྣམ་དཔྱོད་རིག་རྩལ་གྱི་མཚོན་ཆ་བསྐོར་བསྐོར་པས།།
ཕྱི་མ་ཕ་རོལ་གྱི་ཕ་ས་སྟོང་པར་ལུས།།
བླུན་པོ་ཧོན་ལོག་གི་སྣང་ཚུལ་ཞེ་རེ་མུག།
ཤ་ཁྲག་རུས་པ་ནས་མཆེད་པའི་བུ་ཕྲུག་གིས།།
གཅེས་པའི་ཕ་མ་གཉིས་འཁོགས་ལ་རྒས་པའི་དུས།།
དགོས་མེད་ཟོག་རོ་དང་ཕན་མེད་ཁྱི་རྒན་བཞིན།།
སྙིགས་དུས་སེམས་ཅན་གྱི་བྱེད་སྟངས་ཡིད་རེ་མུག།
སྦྱང་བྱ་མཐའ་མེད་ཀྱི་ཟབ་ཡངས་ཆུ་གཏེར་ལ།།
སྦྱང་པ་བརྩོན་འགྲུས་ཀྱི་ཆུ་རྒྱུན་རྟ་རྔ་ཙམ།།
སྦྱངས་པ་ཏིལ་འབྲུ་ལ་ཁེངས་པའི་ལྟོ་བ་ནི།།
རི་རྒྱལ་ལྷུན་པོ་དང་མཉམ་པ་ངོ་རེ་ཚ།།
རྒྱུ་དངུལ་འབྱོར་བ་ལ་ཞེན་འཛིན་གྱི་འདུ་ཤེས་དེ།།
རྦབ་རྡོ་གཡང་གཟར་ནས་ལྷུང་བ་ཇི་བཞིན་དུ།།
བཙན་དྲག་ཨ་འཐས་ཀྱི་རང་བཞིན་ཆེས་ཆེ་བས།།
འདྲེན་བྱེད་མིག་ཟུང་ལ་མཐོང་དུས་ཡ་རེ་ང་།།
དབྱངས་གསལ་སོ་བཞི།
བོད་ཀྱི་ཡི་གེ
བོད་རིགས་གཞོན་ནུས།
གང་ནུས་སྦྱོངས་དང་།