གནམ་ལོ་གསར་ཚེས་ལ་བཀྲ་ཤིས་བདེ་ལེགས།

ཨེ་མ་ཧོ།

ཆོས་སྐུའི་སྒྲོལ་མ་ཀུན་ཏུ་བཟང་མོ་དང་།།
ལོངས་སྐུའི་སྒྲོལ་མ་འཕགས་མ་ཉེར་གཅིག་སྐུ།།
སྤྲུལ་སྐུའི་སྒྲོལ་མ་བསམ་ཡུལ་འདས་པའི་ཚོགས།།
སྐུ་གསུམ་སྒྲོལ་མའི་ཚོགས་ཀྱིས་དགེ་ལེགས་སྩོལ།།
འཛམ་གླིང་འཛིན་མའི་དྭངས་གཙང་བཀྲ་ཤིས་རྒྱས།།
དུང་ཕྱུར་བདུན་བཅུའི་ཚེ་སྲོག་བདེ་ལེགས་འཕེལ།།
བརྒྱད་ཁྲི་བཞི་སྟོང་འགྲོ་དོན་ཕུན་སུམ་ཚོགས།།
བསྟན་འགྲོར་ཕན་བདེ་གང་བསམ་ལྷུན་གྲུབ་ཤོག།
ཨེ་ཝཾ་རིག་པའི་གཞུང་ལུགས་ཕྱོགས་ཀུན་ཁྱབ།།
ཕུན་ཚོགས་སྡེ་བཞིའི་སྣང་བ་འོད་དུ་གསལ།།
ཞི་བདེ་ཡིད་བཞིན་ནོར་བུའི་འདོད་དོན་འགྲུབ།།
གསང་གསུམ་རྣམ་ཀུན་ཕྱོགས་ལས་རྒྱལ་གྱུར་ཅིག།
ཅེས་པ་རབ་གནས་མེ་བྱའི་རྒྱལ་ཟླའི་དཀར་ཕྱོགས་རྒྱལ་བ་དང་པོ་འམ་དབྲ་རིགས་ཀྱི་ལོ་སར་ཉི་མོར་མཁན་པོ་ཨེ་ཝཾ་རིག་པ་དང་དབྲ་ཆེན་སྤྲོ་བ་ཀུན་མཐུན་སོགས་ཀྱི་སྐུལ་ངོར་བཀྲ་ཤིས་བདེ་ལེགས་ཕུན་སུམ་ཚོགས་པའི་གཡང་འབོད་དུ་དབྲ་ཆེན་དཔལ་དགྱེས་པ་རྡོ་རྗེས་དེ་ཉིད་དུ་དབྱིན་ཡུལ་ཛྙཱ་ན་གུ་རུའི་གཟིམ་ཁང་ནས་བགྱིས་པར་དགེའོ།། །།
སྤྱི་ལོ་༢༠༡༨ཟླ་༡ཚེས་༡༧ལ།། ཤྲཱིཿསརྦ་ལོ་ཀ་བི་ཛ་ཡནྟུ།།