དགའ་ཕྲུག
མི་སེམས་མི་ལ་ཆགས་པའི་གཏམ་རྒྱུད་ལས།།
དགའ་སྡུག་འདྲེས་མའི་ལེའུ་སྣ་ཚོགས་ལྡན།།
བློ་འདྲིས་སེམས་ཀྱི་མི་སྣ་གལ་ཆེན་དེར།།
ཚེ་འདིའི་འགྲོ་འདུག་ལས་ལ་མཉམ་འཇུག་བྱས།།
དགའ་དུས་དགའ་བའི་ངོ་འཛུམ་བསུ་རེས་བྱས།།
སྡུག་དུས་མྱ་ངན་ཐང་ལ་མཉམ་འཛོམས་བྱས།།
སྐྱིད་སྡུག་འཇིག་རྟེན་ཆོས་ཉིད་རང་བཞིན་འདིར།།
གཏན་གྱི་འཚོ་བའི་རོལ་བྱ་གཅིག་ཏུ་འདུས།།
ཉིན་མོ་གང་འགྲོ་ས་དེར་མཉམ་དུ་ཆས།།
མཚན་མོ་གང་འདུག་མལ་དེར་མཉམ་དུ་ཉལ།།
ལུས་གཉིས་གཅིག་ཏུ་འདུས་པའི་རང་འགྲོས་འདིར།།
འདང་རེ་རྒྱག་དུས་སེམས་ལ་སྤྲོ་བས་གཏམས།།
དུས་རབས་གསར་པའི་འགྱུར་ཁུགས་བཙན་ཀྱང་རུང་།།
དེང་དུས་ཕོ་མོའི་གནས་ལུགས་མཚར་ཡང་རུང་།།
ཆུ་དང་ཉ་མོའི་བརྩེ་དུང་ཟབ་མོ་འདི།།
ནམ་འཆི་ངེས་མེད་བར་དུ་གནས་ངེས་ཡིན།།
ཕ་མས་མི་འཐད་རྣམ་འགྱུར་བསྟན་ཡང་རུང་།།
གཉེན་ཉེས་ཁ་གྱེས་དགོས་ལུགས་བཤད་ཀྱང་རུང་།།
ལུས་སེམས་འདྲེས་པའི་མི་དང་མི་ཡི་བར།།
ས་ཐག་ལེ་དབར་གཅིག་ཀྱང་རྒྱང་ཐབས་མེད།།