རེ་མདོ་སེངྒེས་འོས་སྦྱོར་བྱས།
༄༅།། དེ་རིང་ལོ་གསར་ཐོག་མཉམ་འཛོམས་བྱུང་བའི་མི་རེ་རེའི་མཚན་ནས་སྨོས་མ་དགོས་པར་མདོ་སྨད་པ་སྐྱ་སེར་ཡོངས་རྫོགས་ལ་འཚམས་འདྲི་བཀྲ་ཤིས་བདེ་ལེགས་ཡོད། ཨ་མདོའི་ཁ་སྐད་ལྟར་བྱས་ན། ལོ་སར་བཟང༌། དེ་རིང་གི་གོ་སྐབས་འདི་བརྒྱུད་ནས་བོད་ཕྱི་ནང་གི་མདོ་སྨད་པ་ཡོངས་རྫོགས་གནམ་ལོ་གསར་པ་འདིའི་ནང་བཀྲ་ཤིས་བདེ་ལེགས་དང་བྱ་བ་ལམ་འགྲོ་ཡོང་བའི་སྨོན་འདུན་ཞུ་རྒྱུ་ཡིན།
དེ་རིང་དགའ་དགའ་སྤྲོ་སྤྲོའི་ཐོག་ནས་ལོ་གསར་ལ་རོལ་པའི་དགའ་སྟོན་གྱི་ཉིན་མོ་ཞིག་ཡིན་དུས་སྐད་ཆ་ཉུང་ཉུང་ཞིག་བཤད་ནས་འཐུས་པར་བྱ་རྒྱུ་ཡིན། བོད་ནང་དུ་དེང་སང་མདོ་སྨད་པ་ཡོངས་རྫོགས་སྔར་དང་མ་འདྲ་བའི་འཆམ་མཐུན་ཡག་པོ་ཞིག་གི་ཐོག་ཏུ་གནས་ཐུབ་ཀྱི་འདུག གཤོག་ཀ་ཕན་ཚུན་གྱི་བར་དང༌། དགོན་པ་ཕན་ཚུན་གྱི་བར། ཆོས་བརྒྱུད་ཕན་ཚུན་གྱི་བར་མཐུན་ལམ་བཟང་པོ་ཞིག་ཆགས་ཐུབ་འདུག ལྷག་པར་དུ་མདོ་སྨད་ཁུལ་གྱི་ཆོས་བརྒྱུད་རིས་མེད་ཀྱི་དགོན་སྡེ་ཁག་མང་ཆེ་བ་ཆོས་འཆད་ཉན་དང་བསླབ་པ་སློབ་གཉེར་གང་ཅིའི་ཐད་ནས་འགྲན་ཟླ་མེད་པ་ཤིན་ཏུ་ཡག་པོ་འདུག བཟང་ཕྱོགས་ཀྱི་ཡར་རྒྱས་ལ་མཐའ་མེད་པ་ཡིན་དུས་རྣམ་པ་ཚོས་མ་འོངས་པར་སྔར་ལས་ལྷག་པའི་ཤུགས་བརྒྱབས་ཏེ་ཡར་རྒྱས་འགྲོ་བར་འབད་བརྩོན་གནང་རོགས་ཞེས་རེ་སྐུལ་ཞུ་འདོད་བྱུང༌།
བོད་ནང་དུ་བོད་མིའི་རང་དབང་གི་དོན་དང་བོད་ཀྱི་ཆོས་དང་རིག་གཞུང་གི་དོན་དུ་སྐུ་ལས་བསྐྱོན་མཁན་ཤིན་ཏུ་མང་པོ་རེད། རྣམ་པ་ཚོས་དེ་སྔ་སྐུ་ལས་བསྐྱོན་པ་བཞིན་མ་འོངས་པར་ཡང་སྔར་བཞིན་བོད་ཀྱི་ཆོས་དང་རིག་གཞུང་གི་དོན་དུ་སྐུ་ལས་བསྐྱོན་རོགས་ཞེས་སྤྱི་ཡོངས་ཀྱི་ཆ་ནས་གཞེན་སྐུལ་ཞུ་འདོད་བྱུང༌། ཨ་མདོའི་བརྙན་འཕྲིན་ཁང་གི་ལས་བྱེད་ཚོ་ལ་ལོ་སྔོན་མའི་ནང་ངའི་ངོས་ནས་ལོ་གསར་གྱི་དུས་སྟོན་དང་བསྟུན་ནས་འཚམས་འདྲི་ཞུས་པ་ཡིན་ལ། ད་ལོ་ཡང་རྣམ་པ་ཚོར་དམིགས་བསལ་གྱིས་ལོ་གསར་ལ་འཚམས་འདྲི་བཀྲ་ཤིས་བདེ་ལེགས་ཞུ་འདོད་བྱུང༌། གང་ཡིན་ཟེར་ན། ཁྱེད་རྣམ་པ་ཚོས་བོད་ཀྱི་སྐད་ཡིག རིག་གཞུང་དང་བཅས་པར་བསྲེས་བསླད་མེད་པར་བདག་སྐྱོང་ཡག་པོ་གནང་གི་འདུག ལས་བྱེད་པ་ཡོངས་རྫོགས་འཆམ་མཐུན་ཡོད་པའི་ཐོག་ནས་བོད་ཀྱི་སྐད་ཡིག་བསྲེས་བསླད་མེད་པ་དང༌། རིག་གཞུང་དང་གོམས་གཤིས། ཆས་གོས། སྐྲ་ལུགས་བཅས་པར་བསྲེས་བསླད་མེད་པར་བདག་སྐྱོང་ཡག་པོ་གནང་གི་འདུག མ་འོངས་པར་ཡང་བོད་ཀྱི་སྐད་ཡིག་དང་རིག་གཞུང་མི་ཉམས་རྒྱུན་འཛིན་དང་ཉམས་པ་སླར་གསོའི་དོན་དུ་སྔར་བཞིན་འབད་བརྩོན་གནང་རོགས་ཞེས་ཞུ་འདོད་བྱུང༌། ཁྱེད་ཚོའི་བརྙན་འཕྲིན་དང་རླུང་འཕྲིན་གྱི་ལེ་ཚན་ཁག་བརྒྱུད་ནས་བོད་རིགས་གཞོན་སྐྱེས་ཚོ་བོད་ཀྱི་སྐད་ཡིག་དང་རིག་གཞུང་ལ་དོ་སྣང་ཡོང་བར་ཕན་ཐོགས་ཆེན་པོ་ཡོང་གི་འདུག དེ་ཙམ་མ་ཟད་བོད་ཕྱི་ལོགས་སུ་ཡོད་མཁན་རྣམས་ཀྱིས་ཀྱང་ལེ་ཚན་དེ་དག་བརྒྱུད་ནས་བོད་ནང་གི་གནས་ཚུལ་མང་པོ་ཞིག་ཤེས་རྟོགས་ཡོང་ཐུབ་ཀྱི་འདུག ཨ་མདོའི་བརྙན་འཕྲིན་ཁང་གི་མགོ་འཛིན་དང་ལས་བྱེད་ཡོངས་ལ་ལོ་གསར་པའི་ཐོག་མར་འཚམས་འདྲི་བཀྲ་ཤིས་བདེ་ལེགས་ཞུ་རྒྱུ་ཡིན།
སྐྱབས་བཅོལ་དུ་ཡོད་པའི་མདོ་སྨད་མི་མང་རྣམས་ཀྱིས་ཀྱང་གནའ་སྔ་མོ་ནས་བཟུང་བོད་སྤྱི་པའི་དོན་དུ་ཕྱག་ལས་གནང་སྟེ་སྐུ་ལས་བསྐྱོན་ནས་ད་ལྟའི་བར་དུ་ཕེབས་པ་ཞིག་རེད། ད་ཕྱིན་ཆད་ཡིན་ན་ཡང་མདོ་སྨད་མི་མང་རྣམས་ཀྱིས་སྔར་རྒྱུན་བཞིན་བོད་སྤྱི་པའི་དོན་དུ་འགན་ཁུར་ནས་སྐུ་ལས་བསྐྱོན་གྱི་རེད་ལ་བསྐྱོན་དགོས་པ་ཡང་རེད། བོད་སྤྱི་པའི་བསྟན་སྲིད་ཀྱི་དོན་དུ་མདོ་སྨད་པ་སེར་སྐྱ་མི་མང་ཡོངས་རྫོགས་ལ་དམིགས་བསལ་གྱི་འགན་འཁྲི་ཞིག་ཡོད་དུས། རང་རང་གི་གནས་བབས་དང་བསྟུན་པའི་ཐོག་ནས་ལྷག་བསམ་རྣམ་དག་གིས་སྐུ་ལས་བསྐྱོན་རོགས་ཞེས་གལ་པོ་ཆེ་ལ་ནན་ཏན་གྱི་ཚུལ་དུ་རེ་སྐུལ་ཞུ་འདོད་བྱུང༌།
ང་ཚོ་ཐེངས་དང་པོར་རྒྱ་གར་དུ་སྐྱབས་བཅོལ་ལ་འབྱོར་བའི་སྐབས། བཙན་བྱོལ་བའི་སྤྱི་ཚོགས་ནང་མདོ་སྨད་པའི་གྲངས་ཀ་ཤིན་ཏུ་ཉུང་ངུ་ལས་མེད་ན་ཡང་བོད་སྤྱི་པའི་དོན་ལ་ཐུག་དུས་མདོ་སྨད་པ་ཚོས་ཆོལ་ཁ་གཅིག་གི་འགན་ཁུར་ནས་ཆོལ་ཁ་གཞན་དག་དང་མཉམ་གཤིབ་འདྲ་མཚུངས་ཀྱིས་ཧུར་ཐག་འབད་ཐག་བྱས་ཏེ་མི་གོ་ཆོད་པའི་བྱ་བ་བྱས་ཡོད་པ་མ་གཏོགས་མདོ་སྨད་པས་ཞབས་འདྲེན་ཞུས་པའི་གནས་ཚུལ་ཞིག་གཏན་ནས་བྱུང་མྱོང་མེད། ད་ཕྱིན་ཆད་ཡིན་ན་ཡང་མདོ་སྨད་པ་ཚོས་སྤྱི་སྒེར་གྱི་བྱ་བ་གང་བྱས་ཀྱང་རུང་གཟབ་གཟབ་བྱ་དགོས་པ་དེ་གལ་ཆེན་པོ་རེད།
མི་ཐོག་གསར་པའི་མདོ་སྨད་པ་ཚོ་ཤེས་ཡོན་གྱི་ཐོག་ནས་ཞུས་ན། རྣམ་པ་ཚོ་མང་ཆེ་བར་ཤེས་ཡོན་སློབ་སྦྱོང་གི་གོ་སྐབས་ཡག་པོ་ཐོབ་ཡོད་པར་མ་ཟད་ལས་ཀའི་ཉམས་མྱོང་ཡང་གང་འཚམས་ཡག་པོ་ཐོབ་ཡོད་མཁན་ཤ་སྟག་ཡིན་དུས། རང་གི་ལས་ཀ་བྱེད་སྟངས་ཀྱི་ཐོག་ནས་ནོར་འཁྲུལ་གྱི་ལམ་དུ་མ་ཕྱིན་པར་སྤྱི་སྒེར་གཉིས་ཀའི་ཐོག་ཕན་ཐོགས་ཡོད་པ་དང་ནུས་པ་ཐོན་པ་ཞིག་བྱེད་དགོས། སྔ་མོ་ང་ཚོའི་སྐབས་ཀྱི་མི་རྒན་པ་ཚོའི་ནང་ཡི་གེ་འབྲི་ཀློག་ཙམ་ཡང་ཤེས་མཁན་ཤིན་ཏུ་དཀོན་པོ་ཡིན་ན་ཡང་ནུས་པ་གང་ཡོད་ཀྱིས་བོད་སྤྱི་པའི་དོན་དུ་ཧུར་ཐག་འབད་ཐག་བྱས་ཡོད། དེང་སྐབས་རྣམ་པ་ཚོ་སློབ་སྦྱོང་དང་ཉམས་མྱོང་གང་ཅིའི་ཐད་ནས་ཆ་རྐྱེན་འཛོམས་པའི་སྐབས་འདིར་སྤྱི་པའི་ཐོག་སྔར་ལས་ཀྱང་ནུས་པ་ལེགས་པོ་ཞིག་ཐོན་པར་འབད་བརྩོན་བྱེད་དགོས་ཀྱི་འདུག
མི་སྒེར་པ་རེ་ཟུང་གི་ལས་ཀ་བྱེད་སྟངས་ཀྱི་ཐོག་ནས་མདོ་སྨད་པ་སྤྱི་པའི་མིང་གི་ཐོག་ལ་ནག་ཐིག་མ་ཕོག་པ་ཞིག་བྱ་དགོས་པ་དེ་གལ་ཆེན་པོ་རེད། མདོ་སྨད་པ་སྤྱིའི་མིང་གི་ཐོག་ལ་ནག་ཐིག་ཅིག་ཕོག་པ་ཡིན་ན་དེ་སེལ་ཐབས་ཡོད་པ་མ་རེད། ང་ལོ་བདུན་ཅུ་དོན་བདུན་ལོན་པའི་མདོ་སྨད་པའི་མི་རྒན་ལོ་ལོན་ཞིག་ཡིན་པའི་ཆ་ནས་འདིའི་ཐོག་སེམས་མ་བདེ་བ་ཞིག་དེང་སང་རྒྱུན་དུ་ཡོང་གི་འདུག སེམས་མ་བདེ་བའི་ཐོག་ནས་དེ་རིང་རྣམ་པ་ཚོ་ལ་རེ་སྐུལ་འདི་མི་ཞུ་ཀ་མེད་བྱུང༌། ནོར་འཁྲུལ་ཟེར་བ་དེ་མི་སུ་ལ་ཡིན་ན་ཡང་ཡོང་སྲིད་པ་ཞིག་ཡིན་དུས་ནོར་འཁྲུལ་བྱུང་སྐབས་ནོར་འཁྲུལ་ལ་ཡོ་བསྲང་བྱས་ཏེ་ལམ་བཟང་པོ་ཞིག་གི་ཐོག་ལ་འགྲོ་ཐུབ་ཐབས་བྱ་དགོས་པ་དེ་གལ་ཆེན་པོ་རེད།
ལོ་གསར་པ་འདིའི་ནང་ྋརྒྱལ་བ་རིན་པོ་ཆེ་དགུང་ལོ་བརྒྱད་ཅུ་གྱ་བཞི་ལ་ཕེབས་ཀྱི་ཡོད། ྋརྒྱལ་བ་རིན་པོ་ཆེ་དགུང་ལོ་བརྒྱ་དང་བཅུ་གསུམ་ལ་བཞུགས་པའི་ཞལ་བཞེས་བཟང་པོ་ཡོད་ནའང་ཞལ་བཞེས་ཡོད་པ་བཞིན་ྋརྒྱལ་བ་རིན་པོ་ཆེ་དགུང་ལོ་བརྒྱ་དང་བཅུ་གསུམ་བར་དུ་བཞུགས་མི་བཞུགས་དང་སྐུ་ཚེ་བརྟན་དང་མི་བརྟན་ནི་ང་ཚོའི་མང་ཚོགས་ཀྱི་བསམ་སྤྱོད་ལ་རག་ལུས་པ་ཞིག་ཡིན་པ་མ་གཏོགས། ྋརྒྱལ་བ་རིན་པོ་ཆེས་ཞལ་བཞེས་གནང་བ་ཙམ་གྱིས་དགུང་ལོ་བརྒྱ་དང་བཅུ་གསུམ་བར་དུ་བཞུགས་ཐུབ་པའི་ཁ་ཚོན་ཆོད་རྒྱུ་ཁག་པོ་རེད། ྋརྒྱལ་བ་རིན་པོ་ཆེ་དགུང་ལོ་བརྒྱ་དང་བཅུ་གསུམ་ལ་བཞུགས་ཐུབ་པ་ཞིག་ཡོང་བའི་དོན་དུ་བོད་མི་ཡོངས་རྫོགས་མཐུན་ལམ་རྡོག་རྩ་ཆིག་སྒྲིལ་བྱ་དགོས་པ་དེ་གལ་ཆེ་ཤོས་ནང་གི་ཆེ་ཤོས་རེད། བོད་ཆོལ་ཁ་གསུམ་གྱི་མཐུན་ལམ་གོང་བུ་གཅིག་ཏུ་གནས་ཐུབ་པ་ཞིག་བྱེད་དགོས་པ་དེ་ང་ཚོ་ཡོངས་རྫོགས་ཀྱི་ལས་འགན་རེད། ང་ཚོ་རང་རང་གི་ལས་འགན་འདི་ལ་གཡོལ་ནས་མཐུན་ལམ་གྱི་ཐོག་བསམ་བློ་མ་བཏང་བ་ཡིན་ན་ྋརྒྱལ་བ་རིན་པོ་ཆེ་སྐུ་ཚེ་བརྟན་དགོས་ཀྱི་ཡོད་ཅེས་བརྟན་བཞུགས་ཚར་བརྒྱ་ཐམ་པ་ཕུལ་ཡང་ཕན་ཐོགས་ཡོད་པ་མ་རེད།
དེང་སང་སྐྱབས་བཅོལ་བའི་སྤྱི་ཚོགས་ནང་གི་བོད་ཆོལ་ཁ་གསུམ་ཆིག་སྒྲིལ་གྱི་གནས་སྟངས་ལ་ཉམས་ཆག་འགྲོ་དང་འགྲོ་བཞིན་པའི་གནས་སྟངས་འདི་བོད་མི་ཡོངས་རྫོགས་ཀྱིས་གསལ་པོར་ཤེས་ཀྱི་ཡོད། དེང་སང་བོད་ཀྱི་ཕྱི་ལོགས་ལ་ཆོལ་ཁ་གསུམ་གྱི་མཐུན་ལམ་གནས་སྟངས་སྐྱོ་པོ་ཞིག་གི་ཐོག་འགྲོ་བཞིན་པ་འདིའི་ཐོག་ནས་མུ་མཐུད་དེ་ཕྱིན་པ་ཡིན་ན་བོད་སྤྱི་སྒེར་གཉིས་ཀར་གྱོང་གུད་ཆེན་པོ་ཡིན་པ་ལས་བོད་མི་སུ་ལའང་ཕན་ཐོགས་མེད། དེ་དགྲ་དགའ་གཉེན་སྡིག་གི་ལས་ཀ་བྱེད་སྟངས་རེད། བོད་ཆོལ་ཁ་གསུམ་མཐུན་ལམ་རྡོག་རྩ་ཆིག་སྒྲིལ་ཡོང་བ་ཞིག་བྱེད་པ་ལ་མདོ་སྨད་པ་ཡོངས་རྫོགས་ལ་འགན་འཁྲི་དང་ནུས་པ་གཉིས་ཀ་དམིགས་བསལ་ཅན་ཞིག་ཡོད་དུས། དེ་རིང་འདིར་དངོས་སུ་ཕེབས་ཡོད་པ་དང་ཕྱི་རྒྱལ་ཁག་ཏུ་ཡོད་པའི་མདོ་སྨད་པ་ཡོངས་རྫོགས་ལ་བོད་སྤྱི་པའི་ཆིག་སྒྲིལ་དང་མཐུན་ལམ་གྱི་ཐོག་ཐུགས་བསམ་བཞེས་ཏེ་བབ་བརླིང་བརྟན་གསུམ་གནང་རོགས་ཞེས་ངས་དེ་རིང་དམིགས་བསལ་གྱིས་རེ་འདུན་ཞུ་འདོད་བྱུང༌།
བོད་གཞུང་ངམ་སྐྱབས་བཅོལ་བོད་མིའི་སྒྲིག་འཛུགས་འདི་མ་འོངས་པར་བརྟན་པོར་གནས་ཐུབ་མིན་གྱི་གཞི་རྟེན་ས་གཙོ་བོ་ནི་བོད་ཆོལ་ཁ་གསུམ་ནང་ཁུལ་གྱི་མཐུན་ལམ་ཡག་པོ་ཡོད་མེད་ལ་རག་ལུས་ཀྱི་རེད། གལ་སྲིད་བོད་གཞུང་འདི་བརྟན་པོར་གནས་མ་ཐུབ་ན་ྋརྒྱལ་བ་རིན་པོ་ཆེས་དུས་ད་ལྟའི་བར་དུ་སྐུ་ལས་བསྐྱོན་ནས་བཙུགས་པའི་བོད་གཞུང་འདི་མི་ཐོག་གསར་པ་ཚོས་བདག་པོ་བརྒྱབ་མ་ཐུབ་པ་ཞིག་ཏུ་འགྱུར་སྲིད་པ་རེད་ལ། གཞིས་ལུས་བོད་རྒྱ་ཆེ་མི་མང་གིས་རེ་བ་རྒྱག་སའི་གཞུང་དེ་མེད་པར་ཆགས་རྒྱུའི་ཉེན་ཁ་ཡང་ཡོང་སྲིད། གཞིས་ལུས་བོད་རྒྱ་ཆེ་མི་མང་གིས་ཆབ་སྲིད་ཀྱི་ཐོག་ནས་ྋརྒྱལ་བ་རིན་པོ་ཆེས་དབུ་ཁྲིད་པའི་སྐྱབས་བཅོལ་པའི་གཞུང་འདི་ལ་རེ་བ་རྒྱག་གི་ཡོད། ྋརྒྱལ་བ་རིན་པོ་ཆེས་ཆབ་སྲིད་དབུ་ཁྲིད་ཀྱི་མཚན་གནས་དངོས་སུ་བཞེས་མ་བཞེས་ཀྱི་གནས་ཚུལ་ཙམ་ཞིག་གཏན་ནས་མིན། ྋརྒྱལ་བ་རིན་པོ་ཆེས་དངོས་སུ་ཆབ་སྲིད་ཀྱི་དབུ་ཁྲིད་ཀྱི་མཚན་གནས་བཞེས་མ་བཞེས་གང་ཡིན་ཀྱང་རུང། གཞིས་ལུས་བོད་རྒྱ་ཆེ་མང་ཚོགས་ཀྱི་སེམས་གཏིང་ལ་གཞུང་འདི་ྋརྒྱལ་བ་རིན་པོ་ཆེས་དབུ་ཁྲིད་པའི་གཞུང་དེ་ཡིན་པའི་ངོས་འཛིན་གཏིང་ཟབ་ཡོད། གཞུང་འདི་མ་འོངས་པར་སྲ་བརྟན་དང་ནུས་པ་ལྡན་པ་ཞིག་གི་ཐོག་ནས་རྒྱུན་གནས་ཡོང་བ་ལ་བོད་མི་ཡོངས་རྫོགས་ཀྱིས་ཤུགས་རྒྱག་དགོས།
ལྷག་པར་དུ་ད་ལྟའི་ཆར་བཙན་བྱོལ་ནང་གི་མདོ་སྨད་མི་མང་གི་ངོས་ནས་ཀྱང་ལུགས་དང་མཐུན་པ་དང་གཟབ་གཟབ་གནང་དགོས་པ་ཞིག་ཏུ་གྱུར་ཡོད། གཞུང་འདི་བརྟན་པོ་ཡོང་བ་ལ་ང་ཚོ་མདོ་སྨད་མི་མང་གི་ངོས་ནས་ཀྱང་བབ་བརླིང་བརྟན་གསུམ་གྱི་སྒོ་ནས་བོད་མི་ཡོངས་རྫོགས་མཐུན་ལམ་རྡོག་རྩ་ཆིག་བསྒྲིལ་ཡོང་ཐབས་ལ་གཙོ་བོར་འབད་དགོས། ཧོལ་རྒྱུག་མི་བྱེད་པར་དཔྱད་པ་ཞིབ་མོ་དང་ཞི་བདེ་ལྷིང་འཇགས་མཛད་དགོས་པའི་དུས་ཤིག་ཡིན། ྋརྒྱལ་བ་རིན་པོ་ཆེས་སྲིད་སྐྱོང་འོས་བསྡུའི་སྐབས། མ་འོངས་པར་བོད་ཆོལ་ཁ་གསུམ་ཡོངས་རྫོགས་འཆམ་མཐུན་ཡོང་བ་ཁྱེད་རང་གཉིས་ལ་འགན་ཡོད་པ་རེད། ཅེས་དངོས་སུ་བཀའ་གནང་མྱོང་ཡོད་ནའང་དངོས་ཡོད་གནས་ཚུལ་ལ་སོ་སོའི་ངོས་ནས་ྋརྒྱལ་བ་རིན་པོ་ཆེས་བཀའ་གནང་བ་ནང་བཞིན་ལས་འགན་འདིའི་ཐོག་དམིགས་ཀྱིས་བཀར་ནས་ཕྱག་ལས་ནུས་པ་ཐོན་པ་ཞིག་གནང་ཐུབ་འདུག་གམ་མི་འདུག་སོ་སོ་སོ་སོས་དགོངས་པ་གཟབ་ནན་བཞེས་རོགས་ཞེས་ཞུ་འདོད་བྱུང༌། ངའི་སྐད་ཆ་འདི་དག་དེ་རིང་དུས་སྟོན་འདིའི་ཐོག་བཤད་དགོས་པ་དང་བཤད་འོས་པ་ཞིག་ཡིན་མིན་མི་ཤེས་ཀྱང་ང་རང་བློ་མ་བདེ་བ་དང་ལྷག་བསམ་རྣམ་དག་གིས་གལ་ཆེན་དོན་ཆེན་ཞིག་ཏུ་བརྩིས་ནས་ཞུས་པ་ཡིན།
དེ་རིང་གི་དུས་སྟོན་གོ་སྒྲིག་བྱེད་མཁན་ཚོའི་ངོས་ནས་གོ་སྒྲིག་ཚགས་ཚུད་པོ་དང་ཡག་པོ་བྱས་འདུག མདོ་སྨད་པ་རྣམས་མཉམ་དུ་འཛོམས་ནས་ཕན་ཚུན་ངོ་ཤེས་པ་དང་རྒྱུས་ཡོད་ཅི་ཙམ་མང་པོ་བྱུང་བའི་ཚོད་ཀྱིས་མདོ་སྨད་པའི་ནང་ཁུལ་མཐུན་ལམ་ཡོང་བར་ཕན་ཐོགས་ཡོང་གི་རེད། བོད་མི་རྣམས་རྒྱུན་དུ་གོ་སྐབས་ནམ་བྱུང་ལ་མཉམ་རུབ་བྱ་དགོས་པ་འདི་གལ་ཆེན་པོ་རེད། མཉམ་འཛོམས་བྱས་པའི་ཐོག་ནས་མཐུན་ལམ་ཡོད་པ་དང་རྡོག་རྩ་ཆིག་སྒྲིལ་ཡོང་བའི་ཕྱོགས་ལ་འགྲོ་ཐུབ་ཐབས་བྱ་དགོས་པ་དེ་ད་ལྟའི་ཆར་གལ་ཆེ་ཤོས་སུ་གྱུར་ཡོད། འབྲེལ་ཡོད་ཚོའི་ངོས་ནས་སྐུ་ལས་བསྐྱོན་ཏེ་གོ་སྒྲིག་ཡག་པོ་གནང་འདུག་པ་ལ་ཐུགས་རྗེ་ཆེ་ཞེས་ཞུ་འདོད་བྱུང༌། ཐུགས་རྗེ་ཆེ།
རེ་མདོ་སེངྒེ།
ཕྱི་ལོ་ ༢༠༡༨ ལོའི་ཟླ་ ༢ ཚེས་ ༡༧ ཉིན།
བོད་ལོ་གསལ་ལ། ༧སྐྱབས་མགོན་ཀི་རྟི་རིན་པོ་ཆེས་བཀའ་སློབ་བཟང་པོར་སྩལ་པ་དང་། རིན་པོ་ཆེ་མཆོག་ཉིད་ཞབས་པད་བརྟན་ཅིག
ཀིརྟི་རིན་པོ་ཆེ་འདི་ཉིད་ནག་ཚོ་ལོ་ཙཱ་བའི་རྣམ་སྤྲུལ་ཡིན་པ་ཞིག་གོ་མྱོང་། དེ་ལྟར་ཡིན་ཚུལ་འཇམ་མགོན་བླ་མ་ཙོང་ཁ་བའི་དངོས་སློབ་ཁྲོད་རོང་ཆེན་ལྗགས་པ་ནག་དེ་ཉིད་ལྗགས་ནག་པོ་ཡིན་དོན་ཡང་། ནག་ཚོས་དཔལ་ལྡན་ཇོ་བོ་རྗེ་ཨ་ཏི་ཤ་བོད་ལ་གདན་འདྲེན་སྐབས། ནག་ཚོས་གནས་བརྟན་རབ་ན་ཨ་ཀ་ར་ལ་ཇོ་བོ་ལོ་གསུམ་ནས་ཕར་རྒྱ་གར་ལ་སྐྱེལ་རྒྱུ་ཁས་བླངས། འོན་ཀྱང་བལ་ཡུལ་ནང་འཁྲུག་གི་རྐྱེན་པས་སྐྱེལ་མ་ཐུབ་སྟབས། སྐུ་སྐྱེ་ཕྱི་མ་ཞིག་དེ་ལྟར་ལྗགས་ནག་པོར་གྱུར་རབས་ཤིག་བླ་མ་ཚད་ལྡན་ཞིག་གི་ཞལ་ནས་གོ། དངོས་ནས་སྐྱབས་རྗེ་འདི་ཉིད་མདོ་སྨད་ཙམ་མིན་པར། སྐུ་ཡི་ཚེ་རབས་མང་པོར་བོད་སྤྱི་ལ་བཀའ་དྲིན་ཆེ།
བཀའ་སློབ་རིན་ཐང་ལྡན་པ་ཞིག་གནང་འདུག་རིན་པོ་ཆེ་ལ་སྙིང་ཐག་པ་ནས་ཐུགས་རྗེ་ཆེ་ཞུ་བཞིན།
ཐུགས་ཀྱི་བཅུད་ཕྱུང་པའི་བཀའ་སློབ་སྙིང་བཅང་ཞུའོ།
བཀའ་སློབ་རིན་ཐང་ཅན་དུས་ལ་རན་པ་ཞིག་གནང་འདུག་པས། རིན་པོ་ཆེ་དང་ཡིག་འབེབས་པ་གཉིས་ཀ་ལ་བཀའ་དྲིན་ཞུའོ།།
ཀརྟི་རིན་པོ་ཆེས་བཀའ་སློབ་ཡག་པོ་གནང་འདུག བཀའ་དྲིན་ཆེ། ནམ་རྒྱུན་ཁོང་དེ་འདྲ་གནང་མཁན་ཞིག་ཀྱང་ཡིན་པ་ངས་ཤེས་ཀྱི་ཡོད།
རྣམ་པ་ཚོར་བཀའ་འདྲི་ཞིག་ཡོད། ངས་འདི་དཀྲུགས་བསམ་སོགས་ཀུན་སློང་ངན་པས་དྲིས་པ་ཡེ་ནས་མིན། ཁོང་གི་བཀའ་སློབ་ཀྱི་ནང་ནས་ “ལྷག་པར་དུ་ད་ལྟའི་ཆར་བཙན་བྱོལ་ནང་གི་མདོ་སྨད་མི་མང་གི་ངོས་ནས་ཀྱང་ལུགས་དང་མཐུན་པ་དང་གཟབ་གཟབ་གནང་དགོས་པ་ཞིག་ཏུ་གྱུར་ཡོད། གཞུང་འདི་བརྟན་པོ་ཡོང་བ་ལ་ང་ཚོ་མདོ་སྨད་མི་མང་གི་ངོས་ནས་ཀྱང་བབ་བརླིང་བརྟན་གསུམ་གྱི་སྒོ་ནས་བོད་མི་ཡོངས་རྫོགས་མཐུན་ལམ་རྡོག་རྩ་ཆིག་བསྒྲིལ་ཡོང་ཐབས་ལ་གཙོ་བོར་འབད་དགོས། ཧོལ་རྒྱུག་མི་བྱེད་པར་དཔྱད་པ་ཞིབ་མོ་དང་ཞི་བདེ་ལྷིང་འཇགས་མཛད་དགོས་པའི་དུས་ཤིག་ཡིན། ྋརྒྱལ་བ་རིན་པོ་ཆེས་སྲིད་སྐྱོང་འོས་བསྡུའི་སྐབས། མ་འོངས་པར་བོད་ཆོལ་ཁ་གསུམ་ཡོངས་རྫོགས་འཆམ་མཐུན་ཡོང་བ་ཁྱེད་རང་གཉིས་ལ་འགན་ཡོད་པ་རེད། ཅེས་དངོས་སུ་བཀའ་གནང་མྱོང་ཡོད་ནའང་དངོས་ཡོད་གནས་ཚུལ་ལ་སོ་སོའི་ངོས་ནས་ྋརྒྱལ་བ་རིན་པོ་ཆེས་བཀའ་གནང་བ་ནང་བཞིན་ལས་འགན་འདིའི་ཐོག་དམིགས་ཀྱིས་བཀར་ནས་ཕྱག་ལས་ནུས་པ་ཐོན་པ་ཞིག་གནང་ཐུབ་འདུག་གམ་མི་འདུག་སོ་སོ་སོ་སོས་དགོངས་པ་གཟབ་ནན་བཞེས་རོགས་ཞེས་ཞུ་འདོད་བྱུང༌། ངའི་སྐད་ཆ་འདི་དག་དེ་རིང་དུས་སྟོན་འདིའི་ཐོག་བཤད་དགོས་པ་དང་བཤད་འོས་པ་ཞིག་ཡིན་མིན་མི་ཤེས་ཀྱང་ང་རང་བློ་མ་བདེ་བ་དང་ལྷག་བསམ་རྣམ་དག་གིས་གལ་ཆེན་དོན་ཆེན་ཞིག་ཏུ་བརྩིས་ནས་ཞུས་པ་ཡིན།”་ཞེས་པ་འདིའི་དོན་དག་གང་ཡིན་ནམ། ང་རང་གི་སེམས་པར་བཀའ་སློབ་འདིའི་ནང་དོན་ངའི་ལངས་ཕྱོགས་དང་མཐུན་པར་གསུང་གི་མེད་དམ་སྙམ། ངའི་ལངས་ཕྱོགས་ནི་རྣམ་པ་ཚོས་མཁྱེན་ཡོད་ཚོད་རེད།
དུས་ལ་རན་པའི་གསུང་བཤད་ཡག་པོ་གནང་འདུག རིན་པོ་སྐུ་ཚེ་བརྟན་པར་ཤོག དཀའ་ངལ་ལ་ཐུག་དུས་སྐད་ཆ་ཞལ་གསོང་ནས་ཤོད་ཐུབ་མཁན་དཀོན་པོ་རེད། རིན་པོ་ཆེས་ནམ་ཡང་འགན་ཁུར་བར་ཐུགས་རྗེ་ཆེ། ཡིག་འབེབས་ཞུ་མཁན་ལ་ཡང་ཐུགས་རྗེ་ཆེ་ཞུ།
ཀིརྟི་རིན་པོ་ཆེའི་་བཀའ་སློབ་ཡིག་འབེབས་གནངས་འདུག་པར་བཀའ་དྲིན་ཆེ་ཞུ། ཡིན་ནའང་། ཡིག་ནོར་ཅན་དུ་སྤེལ་ནས་ཡོང་གི་འདུག་པར་བློ་ཕམ་ཡོད། འབྲེལ་ཡོད་རྣམ་པས་ནན་ཏན་གནང་སྐྱོང་ཡོང་བའི་རེ་འདུན་གསོལ་འདེབས་ཞུ་བ་ཡིན།
གཤམ་གྱི་འདི་ཚོ་བསྡུར་དཔྱད་ཞིབ་ཅིག་གནང་དགོས་པར་མཐོང་།
ལོ་གསར་ལ་རོལ་༼པའི་༽
ལོ་གསར་ལ་རོལ་༼བའི༽
༼གཤོག་ཀ་༽ ཕན་ཚུན་
༼ཤོག་ཁ༽ཕན་ཚུན་
མི་སྒེར་༼པ༽
མི་སྒེར་༼བ༽
དགྲ་དགའ་གཉེན་༼སྡིག༽
དགྲ་དགའ་གཉེན་ས༼སྡུག༽
གཞུང་དེ་མེད་༼པར་༽ ཆགས་རྒྱུའི་ཉེན་ཁ་
གཞུང་དེ་མེད་ ༼པ༽ཆགས་རྒྱུའི་ཉེན་ཁ་
སྐྱབས་བཅོལ་༼པའི་༽
སྐྱབས་བཅོལ་༼བའི༽
པ་བའི་ཙམ་ལ་རྐང་པ་ཐོག་མ་འདུག་ལོ་
༄༅། མདོ་སྨད་པ་ རྣམས་ ༢༠༡༨ ལོའི་བོད་གནམ་ལོ་གསར་ཚེས་ཀྱི་དགའ་སྟོན་
སྐབས་ཀིརྟི་རིན་པོ་ཆེ་མཆོག་ནས་བཀའ་སློབ་རིན་ཐང་ཅན་ཞིག་གནང་བར་ཐུགས་རྗེ་ཆེ་ཞུ་གི་
ཡོད། ང་ཚོ་ཆོལ་གསུམ་བོད་མི་ཚང་མས་རྒྱལ་བ་རིན་པོ་ཆེའི་བྱམས་བརྩེའི་བཀའ་སློབ་མཐའ་ཡས་པ་
ཞིག་གནང་ཡོད་པ་ནས་ཕྲན་བུ་རེ་བསྒྲུབ་ཐུབ་པ་དང། ༧གོང་ས་མཆོག་ཐུགས་ཕམ་མི་ཡོང་བའི་འབད་བརྩོན་ངེས་པར་གནང་
དགོས་པ་པ་ཡིན། གལ་སྲིད་སྤྱི་བར་ཕན་མ་ཐོགས་ཀྱང་གནོད་ནམ་མ་སྐྱེལ་བ་བྱེད་དགོས།
ཕ་ཡུལ་བཙན་འཕྲོག་པས་ནམ་ཡང་མིག་བལྟས་ནས་བསྡད་བཞིན་པ་རེ།
བོད་སྤྱི་པའི་བསྟན་སྲིད་ཀྱི་དོན་དུ་མདོ་སྨད་པ་སེར་སྐྱ་མི་མང་ཡོངས་རྫོགས་ལ་དམིགས་བསལ་གྱི་འགན་འཁྲི་ཞིག་ཡོད་ ་་་་
བོད་ཆོལ་ཁ་གསུམ་མཐུན་ལམ་རྡོག་རྩ་ཆིག་སྒྲིལ་ཡོང་བ་ཞིག་བྱེད་པ་ལ་མདོ་སྨད་པ་ཡོངས་རྫོགས་ལ་འགན་འཁྲི་དང་ནུས་པ་གཉིས་ཀ་དམིགས་བསལ་ཅན་ཞིག་ཡོད་དུས།་་་་་་་་་་་་་
་ད་ལྟའི་ཆར་བཙན་བྱོལ་ནང་གི་མདོ་སྨད་མི་མང་གི་ངོས་ནས་ཀྱང་ལུགས་དང་མཐུན་པ་དང་གཟབ་གཟབ་གནང་དགོས་པ་ཞིག་ཏུ་གྱུར་ཡོད། གཞུང་འདི་བརྟན་པོ་ཡོང་བ་ལ་ང་ཚོ་མདོ་སྨད་མི་མང་གི་ངོས་ནས་ཀྱང་བབ་བརླིང་བརྟན་གསུམ་གྱི་སྒོ་ནས་བོད་མི་ཡོངས་རྫོགས་མཐུན་ལམ་རྡོག་རྩ་ཆིག་བསྒྲིལ་ཡོང་ཐབས་ལ་གཙོ་བོར་འབད་དགོས།་་་་
ངོ་མ་བཀའ་སློབ་ཡག་པོ་ཞིག་གནང་འདུག་ དུས་ཐོག་ཆར་པ་རང་རེད།
དུས་ཚོད་ཟང་ཟིང་འདི་ཡི་ནང་བཀའ་སློབ་གནད་ལ་སྨིན་པ་ཞིག་གསུང་འདུག་པས་ཡི་རངས་ཡོད།
དོན་དང་ལྡན་པ་སྤེལ་འདུག
#14 ཆོས་དབྱིངས་བསྟན་འཛིན། ་ལགས་ཀྱིས་སྤེལ་དོན།:
March 1st, 2018 at 1:45 am
#14 ཆོས་དབྱིངས་བསྟན་འཛིན་ཞབས་འདྲེན་མཁན།
ཀརྟི་བླ་མ་སྐྱབས་སུ་མཆིས།
བོད་སྤྱི་པ་ཕན་ལྷ་མོ་དོན་གྲུབ་མཁྱེན། མཁྱེན། མཁྱེན།
རྒྱལ་ལོ་དོན་གྲུབ་དང་པད་མ་ལ་སོགས་ལ་བཀའ་དྲིན་ཆེའོ།
་
ཁ་བརྡས་འདིར་ནོར་འཁྲུལ་ཕྱིན་མི་འདུག་གམ། ལགས།
༧གོང་ས་༧སྐྱབས་མགོན་༧རྒྱལ་དབང་ཡིད་བཞིན་ནོར་བུ་རིན་པོ་ཆེ་གཆོག་གི་དབུས་བསྟན་འཛིན་གྱི་སྐྱེས་ཆེན་དམ་པ་གང་ན་སུ་བཞུགས་རྣམས་སྐུ་ཚེ་བསྐལ་བརྒྱར་བརྟན་ཅིང་། མཛད་འཕྲིན་ཡར་ཟླ་ལྟར་རྒྱས་ཏེ་བོད་དོན་དཀའ་རྙོགས་མྱུར་དུ་སེལ་བའི་གསོལ་འདེབས་སྨོན་འདུན་ཞུ།
གངས་རི་རྭ་བས་བསྐོར་བའི་ཞིང་ཁམས་སུ། ཕན་དང་བདེ་བ་མ་ལུས་འབྱུང་བའི་གནས།
སྤྱན་རས་གཟིགས་དབང་བསྟན་འཛིན་རྒྱ་མཚོ་ཡི། ཞབས་པད་སྲིད་མཐའི་བར་དུ་བརྟན་གྱུར་ཅིག།
བླ་མ་སྐུ་ཁམས་བཟང་བར་གསོལ་བ་འདེབས། མཆོག་ཏུ་སྐུ་ཚེ་རིང་བར་གསོལ་བ་འདེབས།
ཕྲིན་ལས་དར་ཞིང་རྒྱས་པར་གསོལ་བ་འདེབས། བླ་མ་དང་འབྲལ་བ་མེད་པར་བྱིན་གྱིས་རློབས།།
ཀིརྟི་རིན་པོ་ཆེས་བཀའ་སློབ་རླབས་ཆེན་ཞིག་གནང་འདུག
བསྟན་པའི་དཔལ་འགྱུར་བླ་མའི་སྐུ་ཚེ་བརྟན།
བསྟན་འཛིན་སྐྱེས་བུས་ས་སྟེང་ཡོངས་ལ་ཁྱབ།
བསྟན་པའི་སྦྱིན་བདག་མངའ་ཐང་རྒྱས་པ་ཡིས།
བསྟན་པ་ཡུན་རིང་གནས་པའི་བཀྲ་ཤིས་ཤོག
ཨ་མདོ་ཁམས་པ་ངས་མི་ཤེས།
ཆོལ་གསུམ་འཐོར་བ་ངས་མཐོང་གིས།
རྙིང་མ་གསར་མ་ངས་མི་ཤེས།
ཆོས་ལུགས་འཁྲུགས་པ་ངས་མཐོང་གིས།
བོད་པ་རྒྱས་ན་རང་རེ་རྒྱལ།
བོད་པ་སྐྱིད་ན་རང་རེ་སྐྱིད།
བོད་པའི་ལས་དང་རང་རེ་རྣམས།
ཆུ་ལ་ཆུ་བོ་བཞག་པ་འདྲ།
རེ་མདོ་སེང་གེ་ཟེར་བ་འདི་ཀི་རྟི་རིན་པོ་ཆ་ག་ས་གང་དུ་བེད་སྤྱོད་བྱེད་མཁན་ཞིག་རེད།
ཀིརྟི་བླ་མ་དེ་ཚེ་གང་བོར་རྒྱལ་བའི་ཞབས་ཕྱི་བསྒྲུབས་སོང་། མེ་ཚེ་དོན་ལྡན་རེད། བསོད་ནམས་རེད། ངོ་མ་ཁོང་གི་བླ་མ་སྟེན་ཚུལ་དེར་དད་པ་དང་ཡིད་རངས་ཤོར་སོང་། བླ་མ་མཁྱེནོ།
ཆོས་དབྱིངས་བསྟན་འཛིན་སྐད་པའི་འབྱུང་བོའི་གྲིབ་གཟུགས་ཤིག་ཁ་བརྡ་ཚང་གི་སྒེའུ་ཁུང་ནས་མཐོང་གི་འདུག་ད། གཉིད་ཁུག་མེད་ན་འབྱུང་བོ་འདི་དག་མིའི་གྲལ་ནས་ཕུད་དགོས་བ་རེད་མ་གཏོགས་ནང་ཁུལ་ལ་བླ་བཙོང་རྐང་འདྲེན་གྱི་འཛེ་གྲུབ་དེ་ཕོག་གི་རེད་དོ།། གོ་སོང་ངམ་ཁ་བརྡ་ཚང་།