ཁ་སྒང་ཤེས་རབ་རྒྱ་མཚོ།
ཨེ་མ་ལུང་རིགས་ནོར་བུའི་མཛོད་འཛིན་བཤེས་གཉེན་རི་དབང་བྱེ་བའི་ཞབས་སེན་དབུ་སྐྱེས་ཚལ་དུ་རབ་བླངས་ཤིང༌།།
ཐུབ་བསྟན་ཕ་ལམ་ཞུན་མའི་སྙེ་མ་རྣམ་དཔྱོད་མཆོག་གི་རླུང་བུར་འཁྲིལ་བས་ཀུན་བཟང་འབྲས་བུའི་རྡོག་པ་འབུམ།།
མཐའ་དག་ངུར་སྨྲིག་ཆོས་ཀྱི་གྲྭ་ན་མ་སྨད་བརྒལ་རྟགས་རིགས་པའི་སྐྱོགས་ཀྱིས་ཀུན་ཏུ་ཀུན་ལ་ཉེར་བསྟབས་པས།།
ཀླུ་སྒྲུབ་ལ་སོགས་རྒྱལ་རྣམས་ཡིད་ཀྱང་ངོ་མཚར་གཏམ་གྱི་རོལ་མོར་ཆགས་ཏེ་ཏིང་འཛིན་ཟས་ལ་སྲེད་པ་བོར།།
འཆད་པ་ཆུ་སྤྲིན་འཁྲིགས་པའི་གསེབ་ནས་དགེ་ལེགས་ཆར་གྱི་ཟེགས་མ་འཐོར་བས་ས་གསུམ་ཡིད་ཀྱི་པད་འདབ་གྲོལ།།
རྩོད་པ་མུན་སེན་གློག་གི་ཞགས་ཐག་བརྒལ་རྟགས་རིགས་པའི་ཀློང་ནས་འཁྱུག་པས་རིག་འཁྲུལ་མུན་པའི་སྣང་བ་བདས།།
རྩོམ་པ་གཡས་འཁྱིལ་དུང་གི་སྒྲ་དབྱངས་དྲེགས་ལྡན་རལ་པའི་རྩེ་ནས་འཕུར་བས་ཁེངས་པའི་ཡིད་ལ་གྲང་བ་སྟེར།།
བློ་བཟང་དོན་གྱི་རིག་པའི་གྲལ་ན་འགོག་མེད་སེང་ཆེན་གཅིག་པུར་བཞེངས་པས་སྙན་པའི་སྙན་པ་བླ་རུ་བཏེགས།།
དེ་ཚེ་བློ་གྲོས་ཤེད་མོང་གཅིག་གིས་ཁེངས་ལྡན་རལ་བ་བསྙིལ་བའི་གཏམ་ཚོགས་གངས་ཀྱི་རི་བོ་བརྒལ་བྱས་ཏེ།།
ཤར་ནུབ་རིག་པའི་ཚལ་དག་རྒྱུ་བས་གཟུར་གནས་ཡིད་ཀྱི་སུག་པ་འགྱུ་བའི་བསྟོད་ཚིག་གླེགས་བམ་བརྩེགས་བྱས་ཀྱང༌།།
ངན་བྱུས་ཧ་ལོའི་མལ་དུ་གཟིམ་རྣམས་གངས་ལྡན་ར་བ་ཟ་བའི་རྨི་ལམ་མ་བཏང་འབྱུང་པོའི་དཔུང་ཚོགས་བཅས།།
གྲོག་རོང་གྲོག་མའི་ཚང་ཆེན་བརྡོལ་བཞིན་ས་ཡ་དྲུག་གི་མིག་ཀོང་ཚལ་དག་མུན་སྟུག་རོལ་བའི་ཟླ་བོར་བྱིན།།
དེ་བས་ཀུན་ཏུ་ཀུན་བཟང་སྤྱོད་པའི་མ་སྨད་རྨད་བྱུང་བྱུང་བ་འབུམ་དགུ་ཐུགས་སྟོབས་ཀྱོ་བ་རྣོན་པོ་ཡིས།།
རིས་སུ་བཞེངས་ལ་རིས་མེད་རབ་འབྱམས་རྒྱལ་བའི་འཕྲིན་ལས་བསིལ་བའི་གདུགས་དཀར་གཡོ་བའི་གཡར་དམ་ཉེར་བསྒོས་ཏེ།།
གངས་སུལ་བྲག་འཕྲང་བརྒལ་བའི་ངལ་བ་དཔུང་བ་གཉོམ་པོས་འཁུར་བའི་གཏམ་རྒྱུད་ད་ལྟའང་ད་དུང་གསེར་ཞུན་གྱིས།།
འཛམ་གླིང་འཛིན་མའི་བྱུང་རབས་ངོས་སུ་བྲིས་དང་འབྲི་བར་སྟོབས་ལྡན་སུས་ཀྱང་འགྲན་པའི་བསྐལ་བ་ཡོད་མ་དམིགས།།
ཐུགས་བསྐྱེད་གངས་ཀྱི་སུལ་ནས་བབས་པའི་ཟབ་དོན་ཆུ་ཀློང་བྱེ་བ་འབུམ་དགུ་གཡས་སུ་འཁྱིལ་བའི་དཔལ་ཡོན་ནི།།
འཕགས་ཡུལ་འཛིན་མའི་ལྟོ་བར་བསྐྱིལ་ལ་ནེ་རུ་ལ་སོགས་གྲགས་པའི་རྔ་གཡབ་སྲིད་ན་མཐོ་བའི་ཆེན་པོ་དག།
ངེས་དོན་རོགས་འདེགས་དཔུང་པ་སྦོམ་པོ་མ་ལྷོད་འཇུངས་མེད་གཞུ་མོ་བདུངས་བས་སྤུར་རྒྱལ་ནོར་བུའི་བང་མཛོད་ཀྱང༌།།
ས་ཆེན་ས་ཡི་རྨི་ལམ་ཞིང་དུ་ཐིམ་པའི་ངང་ཚུལ་འཇའ་ཡིས་ཟོས་པའི་སྒྲུང་གཏམ་རིང་མོར་རྫོགས་ཡོད་མིན།།
དེ་ནས་གནའ་དེང་གཙུག་ལག་བྱེ་བའི་ཆུ་གཏེར་རླབས་ཕྲེང་རྩེན་པའི་མཉེས་གཤིན་ཐུགས་སྟོབས་བུམ་པར་བསྲེལ་བ་ལས།།
བྱུང་བའི་ངོ་མཚར་གདམས་པའི་བདུད་རྩི་བསྩལ་དང་སྩོལ་ལ་འཕངས་པ་མེད་པས་འགལ་རྐྱེན་མུན་ཚོགས་ཡོངས་བདས་ཏེ།།
བསྐལ་བ་དུ་མར་མིག་སྟོང་ཅན་ཡང་འབད་པས་བཙལ་ཀྱང་རྙེད་དཀའི་ནོར་ཚོགས་སྤུངས་པའི་ཞིང་ས་སྔར་མེད་པ།།
ངེས་དོན་རིག་པའི་བསྟི་གནས་འབུམ་ཕྲག་ཅིག་ཅར་བཞེངས་པའི་འཕྲིན་ལས་རྔ་ཆེན་ཉི་ཟླས་མཁའ་ན་རེས་ཀྱིས་རྡུང༌།།
༢༠༡༨།༣།༣༡ ཉིན།
སྲོལ་རྒྱན་གྱི་རྩ་བ་བརྟན་ལ་ཚིག་སྦྱོར་གྱི་གཉོམ་ལག་བརྐྱངས་ཤིང་དོན་སྙིང་གི་རོ་བཅུད་ལྡན་པའི་རྩོམ་ཞིག་ཏུ་མཇལ།