དགའ་བ་མཇེ་ཕྲུག
མི་རིགས་རེ་ལ་རྒྱལ་ཁབ་རེ་རེ་དང་།།
རྒྱལ་ཁབ་རེ་ལ་མི་དཔོན་རེ་འགའ་ཡོད།།
མི་འབངས་བདེ་ཞིང་ལྷིང་འཇགས་ཡོད་མེད་ཀྱང་།།
ཡུལ་གྱི་རྗེ་བོའི་གང་བྱས་རང་བཞིན་གྱུར།།
མགོ་དཔོན་བར་གྱི་འཛད་མེད་གྱོད་ཁའི་ཀློང་།།
མེ་མདའི་སྐད་སྒྲ་འབྲུག་ལྟར་གང་སར་གྲགས།།
མདའ་དང་མདེའུ་ཆར་བཞིན་ཆད་མེད་བབས།།
ལུང་པའི་ཕུ་མདའ་ཁྲག་དང་ངུ་ངག་རྒྱང་།།
གོང་གི་སྲིད་དཔོན་བར་ལ་འགལ་ཟླས་གྱེས།།
འཁོན་འཛིན་གནག་པོས་དམངས་ལ་གྱོང་གུན་བཏང་།།
བསམ་མེད་བྱིས་དང་མི་དམངས་དཀྱུས་མ་དག །
ཉེས་མེད་ཚེ་སྲིག་ཤོར་བ་གྲངས་མེད་རེད།།
འབར་རྫས་རེ་རེས་གནས་མལ་རྒྱ་སྟོང་གཏོར།།
མེ་མདའ་རེ་རེས་ཚེ་སྲོག་གྲངས་མེད་བཅོམ།།
རྒྱལ་ཁབ་བར་གྱི་འཁྲུག་རྩོད་རེ་རེ་ལས།།
གྲོང་སྡེ་མང་པོ་ཐལ་རྡུལ་རང་བཞིན་གྱུར།།
ས་ཁམས་མི་ཡི་འཚོ་རྟེན་བཟང་པོ་འདི།།
ཀླ་ཀློའི་གཤིས་ཀྱིས་ཁྲག་གིས་འཁོར་ལོ་སྐོར།།
མི་བསད་ཁྲག་སྦྱོར་ལས་ལ་མི་གཞོལ་བའི།།
བྱིངས་ཀྱི་མངོན་འདོད་སུས་ཀྱང་ཁ་ཡ་མེད།།
དམངས་ཀྱི་ཚེ་སྲོག་དགྲ་ཡི་འབེན་དུ་བཙུགས།།
འཆི་གསོན་ངེས་མེད་སུས་ཀྱང་འགན་ལེན་མེད།།
སྲོག་ལ་རིན་ཐང་མི་རྩི་དཔོན་ངན་ཚོས།།
རིགས་ལ་ཤ་ཞེན་ཟེར་བ་སྐྱག་རྫུན་རེད།།
ཁང་རལ་ཐོག་མེད་གསེང་ནས་ངུ་སྐད་ཐོས།།
རྒྱ་ལམ་གཡས་གཡོན་ཀུན་ལ་ཁྲག་རྗེས་མངོན།།
ནང་ཚང་འགའ་རེ་འཆི་ཞིང་འགའ་རེ་གསོན།།
མཐོང་ཐོས་འཕྲལ་ལ་སྐྱོ་བ་གཏིང་ནས་སྐྱེས།།
གཡུལ་སའི་མདེའུ་དྲག་ཆར་གཏུམ་པོའི་ཀློང་།།
མི་འབངས་སྤྱང་ཀིའི་གསེང་གི་ལུག་ཁྱུ་བཞིན།།
གར་བྲོས་ངེས་མེད་འཆི་གསོན་རྟིང་ལ་ཁད།།
ཅི་བྱ་གཏོལ་མེད་རང་སྣང་སྐྱོ་བ་འཆར།།