ན་ནིང་དཔྱིད་ཀ་སྤྱི་ཟླ་༤ཚེས་༣༠ཉིན།བོད་ས་ཁུལ་ཁྱོན་ཡོངས་ལ་ “བོད་ཀྱི་ཡིག་གཟུགས་ཉིན་མོ་”ཐེངས་དང་པོ་དེ་སྲུང་བརྩི་ཞུས་ཡོད།དེ་ནས་ལོ་ལྟར་༤།༣༠ལ།བོད་ཀྱི་ཡིག་གཟུགས་ཉིན་མོར་གཏན་འཁེལ་བྱུང་ནས།བོད་ཀྱི་གྲོང་ཁྱེར་ཁག་དང་།གྲོང་གསེབ།སློབ་གྲྭ།དགོན་པ།དེ་བཞིན་སྡེ་པ་སོ་སོའི་ནང་ལ་བོད་ཀྱི་ཡིག་གཟུགས་དང་འབྲི་རྩལ་གོང་འཕེལ་གཏོང་བའི་བྱེད་སྒོ་སྣ་ཚོགས་སྤེལ་བཞིན་ཡོད། བོད་ནང་ལ་བཞུགས་པའི་མི་དམངས་རྣམས་ཀྱིས་བོད་ཀྱི་སྐད་ཡིག་དང་རིག་གཞུང་ལ་བཅངས་པའི་ལྷག་བསམ་ལ་རྒྱབ་སྐྱོར་དང་སྲུང་བརྩི་ཞུ་ཆེད།ད་ལོ་ང་ཚོ་ལ་རྩེས་ཨ་རིའི་ནེའུ་ཡོག་ལ་དམིགས་བསལ་བོད་ཀྱི་ཡིག་གཟུགས་ཉིན་མོའི་དུས་ཆེན་ཞིག་སྲུང་བརྩི་ཞུ་རྒྱུ་གཏན་འཁེལ་བྱས་པ་ཡིན།འདི་ནི་ཨ་རིའི་ནང་ལ་འདི་ལྟ་བུའི་དམིགས་བསལ་ཡིག་གཟུགས་དུས་ཆེན་གྱི་བྱེད་སྒོ་སྤེལ་བ་ཐེངས་དང་པོ་དེ་ཡིན།
གོང་དུ་བརྗོད་པའི་ “བོད་ཀྱི་ཡིག་གཟུགས་ཉིན་མོ་”དེ་ཨ་རིའི་ནེའུ་ཡོག་གྲོང་ཁྱེར་ལ་སྤྱི་ཟླ་4ཚེས་29ཉིན་སྤེལ་རྒྱུ་ཡིན།སྤེལ་ཡུལ་ས་གནས་ནི་ཁུན་སི་ས་ཁུལ་གྱི་ཤར་པའི་དགོན་པར་ཞོགས་པ་ཆུ་ཚོད་༡༡ནས་དགོང་དྲོའི་ཆུ་ཚོད་༦བར་ཡིན།ཉིན་དེའི་བྱེད་སྒོར།རྒྱལ་སྤྱིའི་སྟེང་གི་བོད་ཡིག་གི་ཡིག་གཟུགས་སྒྱུ་རྩལ་བ་མི་གྲངས་༡༥ཙམ་གྱིས་བོད།རྒྱ་གར།ཨ་རི།ཡུ་རོབ་བཅས་ནས་བསྐུར་གནང་བའི་བོད་ཡིག་གི་ཡིག་གཟུགས་བརྩམས་ཆོས་དང་། ༧རྒྱལ་དབང་སྐུ་ཕྲེང་བཅུ་གསུམ་པ་ཆེན་པོའི་ཕྱག་བསྟར་མའི་འཕྲིན་ཡིག་གིས་མཚོན་པའི་ལོ་རྒྱུས་ཀྱི་རང་བཞིན་ལྡན་པའི་ཡིག་བྲིས། སྲོལ་རྒྱུན་གྱི་ཡིག་ཆས་སྣ་ཚོགས། ཀ་དཔེ་སྣ་ཚོགས་ཀྱིས་མཚོན་པའི་ཡིག་གཟུགས་སྐོར་གྱི་དཔེ་ཚོགས་བཅས་ འགྲེམས་སྟོན་བྱ་རྒྱུ་དང་།དེ་བཞིན་བྱིས་པའི་ཡིག་གཟུགས་བྱེད་སྒོ་སྤེལ་བ།ཡིག་གཟུགས་འབྲི་སྟོན་ཡང་བྱེད་རྒྱུ་ཡིན།ཉིན་མོ་དེར་ས་གནས་ཡུལ་གྲུ་ཁག་ནས་བསྐུར་བའི་ཤིན་དུ་ཡིད་དབང་འཕྲོག་པའི་ཡིག་གཟུགས་བརྩམས་ཆོས་དེ་དག་ཞལ་འདེབས་ལ་བརྟེན་ནས་བཙོང་རྒྱུ་ཡིན།
ད་རེས་ཀྱི་བྱེད་སྒོ་འདི་རིན་མེད་ཡིན་པ་དང་།བོད་ཀྱི་སྐད་ཡིག་དང་རིག་གཞུང་ལ་རྒྱབ་སྐྱོར་མཚོན་ཆེད།ལྷན་རྒྱས་ཡིག་གཟུགས་ཉིན་མོ་སྲུང་བརྩི་གནང་བར་ཕེབས་རོགས།