ཨཱཙཱརྱ་ཨག་ལོ་ཡིས།
༼ངའི།༽
ཡོད་ཚད་ལ་དཔྱིད་དཔལ་རྒྱས་ཤིང་ཐམས་ཅད་ལ་ཚེ་སྲོག་འཕར་མ་ཞིག་སྦྱིན་པའི་ནམ་ཟླ་དེར། ཁོ་བོས་ཨ་མའི་ནུ་ཞོ་ལྡུད་མཚམས་བཞག་སྟེ་རྒྱབ་ཏུ་དཔེ་ཁུག་ཆུང་ཆུང་ཞིག་འཁྱེར་ནས་སློབ་གླིང་གི་སྒོ་གླེགས་ཐོག་མར་བརྡུངས། དེ་དུས་ཁོ་བོ་ནི་རིག་པའི་མདའ་རྩེ་རྣོ་ལ་དྲན་པའི་གཞུ་མོ་ཡང་ཤིན་ཏུ་སྐྱེན། ཁྱད་པར་ལྷག་བསམ་གྱི་རང་མདངས་གངས་རིར་འདྲེས་ཤིང་སེམས་རྒྱུད་བལ་སྐུད་ལས་མཆེད་པའི་བྱིས་པ་སྣབས་ལུད་པ་ཞིག་ཡིན། ཕ་མ་དང་དགེ་རྒན་སོགས་ཀྱིས་བསྔགས་བརྗོད་ཀྱི་མེ་ཏོག་དགུང་ལ་འཐོར་བ་ནི་ཉུང་ཉུང་ཞིག་གཏན་ནས་མིན། འོན་ཀྱང་ཆུང་བྱིས་པའི་རྩེད་ར་ནི་ངའི་སེམས་ཀྱི་ཟབ་ས་དང་རུས་རྐང་གི་གཏིང་རུམ་ན་བཅས་ཡོད་རྐྱེན། དེའི་གཞན་དབང་གིས་མཚམས་རེ་ང་ལ་དགེ་རྒན་དང་ཨ་ཕས་ཐལ་ལྕག་བཞུས་ཏེ་མིག་ཆུས་སྐྱེལ་མ་ཡང་ལན་མང་བྱེད་དུ་བཅུག འདི་ལྟར་ངས་ཨ་མའི་རུམ་ནས་སློབ་ཆུང་དང་སློབ་འབྲིང་གི་ཐེམ་ཁར་བསྙེགས། འདི་ལྟར་ང་ཨ་མའི་འཐུ་འོག་ནས་སློབ་ལོ་ལོན་པའི་བྱིས་གཞོན་གྱི་ལང་ཚོ་ཞིག་ཏུ་གོམ་སྟབས་གྱུར།
༼ལང་།༽
ཁ་བ་ལྷབ་ལྷུབ་ཏུ་བབས་པའི་དགུན་གཞུང་ཞིག་ལ། ངས་སློབ་འབྲིང་གི་མཆོད་སྟེགས་ལ་གྱེས་ཕྱག་ཕུལ་ཏེ་ཞིང་འབྲོག་གི་འཚོ་བའི་ཨ་ལོང་ལ་འཁྱུད་འགོ་བཙུགས། སྐབས་དེར་ང་རང་ཧ་ལམ་དྲུག་ཟུང་ལང་ཚོའི་ས་བོན་འབུས་མ་ཐག་པའི་བྱིས་གཞོན་ཞིག་ཡིན་ཚོད་ལགས། ཉིན་མོ་དེ་ནས་བཟུང་། ཁོ་བོས་གྲོང་སྡེའི་ཡུལ་མི་རྒན་གཞོན་དང་བསྡོངས་སུ་གོད་སྒྲ་དང་གླུ་དབྱངས། ཁ་ཤགས་འདྲ་མིན་ལྷན་ཞིང་པ་རྒད་པོའི་རྐང་རྗེས་འཚོལ་བའི་བརྟུན་པ་བསྐྱེད། རྡུལ་རྩི་དང་རྔུལ་ཐིགས་ནི་ངའི་རྒྱུན་གཏན་གྱི་གོས་ལྭ་ཞིག་ལགས། འདི་ལྟར་ངའི་ལང་ཚོའི་ཆུ་རྒྱུན་མདུན་ནས་མདུན་དུ་རྒྱུགས་ཡོང་། ཡང་སྐབས་རེ། གཡང་དཀར་ལུག་གི་འབའ་སྒྲ་དང་ནོར་གནག་གི་ངོར་སྒྲ་ལྷན། བྱང་ཐང་འབྲོག་པ་རྣལ་མ་ཞིག་གི་རྣམ་ཐར་ཡང་བསྐྱངས། ཕུ་ཡི་བྲག་རི་དང་བར་གྱི་སྤང་གཤོངས། མདོ་ཡི་ཆུ་མོ་ནི་རང་ཉིད་ལ་དབང་བའི་ཤམྦྷལ་གྲོང་། ད་དུང་སྦྲ་ནག་གྲུ་བཞི་དང་ལྷས་ར་སྒོར་མོ། བཟང་ཁྱི་ཁ་ལྷུག་དེ་བཞིན་འུར་ཆུང་དགུ་སྒྲིལ་བཅས་ནི་ལས་དབང་གིས་བསྐོ་སྒྲིག་བྱས་པའི་བྲལ་ཐབས་མེད་པའི་འབྲོག་ཕྲུག་ངའི་རྩ་ཆེའི་ནོར་སྐལ་ཞིག་ཡིན། གང་ལྟར། ངས་ལྔ་རིག་སུམ་རྩེན་གྱི་གླིང་ཁ་ནས་འབྲོག་པའི་གདང་ར་གྲུ་བཞིར་ཕོ་གསར་གྱི་ལང་ཚོའི་གཏམ་རྒྱུད་ཅིག་འབྲི་བར་འཁོར། འདི་ལྟར་ཁོ་བོས་ཤེས་རིག་བསམ་འཕེལ་ནོར་བུའི་དགའ་ཚལ་ནས་སོ་ནམ་ཞིང་པའི་གཡུལ་སར་གཞོན་གསར་གྱི་ལང་ཚོ་དར་དུ་བསྒྲེང་བར་ཆས།
༼ཚོ།༽
སྡོང་ལོ་སེར་པོ་ས་ལ་འཐོར་ཞིང་ཞིང་པ་རྒད་པོས་ཉམས་བཟང་གི་སྨ་་ར་བྱིལ་བྱིལ་བྱེད་པའི་དུས། ཁོ་བོས་རི་ཆུ་སྟོང་ཕྲག་དུ་མ་སྡོམ་གྱིས་འཇལ་ཏེ་བཙན་འབྱོར་གྱི་འཚོ་བའི་ཐག་སྣེར་འཇུས། དུས་དེ་ནས་བཟུང་ངའི་རིག་པའི་སྤང་ཐང་དུ་གནའ་དེང་ཤེས་རིག་གི་སྦྲང་ཆར་སླར་ཡང་འཇོ་འགོ་བཙུགས། དེ་ནི་ངའི་བཅུ་དྲུག་ལང་ཚོའི་འགྲུལ་བཞུད་ལ་གློ་བུར་གྱི་སྲང་ལམ་གསར་བ་ཞིག་བསྟན་པ་ཡིན་ལ་རྐྱེན་ངན་གྲོགས་སུ་གྱུར་བའི་གྱ་ནོམ་པའི་གཏང་རག་ཅིག་ཀྱང་དེ་བས་ཡིན་ངེས། གང་ལྟར་ངས་ངན་ངོན་འཚོ་བའི་གྲུ་གཟིངས་ལ་བཞོན་ཞིང་བརྩོན་འགྲུས་ཀྱི་གྲུ་སྐྱ་ཤུགས་ཀྱིས་རྐྱལ་ནས། མ་ཡུམ་སུ་ཇཱ་དང་གནས་མཆོག་འཁོར་མོ་འཇིག་བཅས་སུ་ཤེས་རིག་གི་ནོར་བུ་ལེན་ཞོར་ངའི་དར་མའི་ལང་ཚོ་འདི་ལྟར་ཕར་ལ་བཞུད།། །།
སརྦམངྒལཾ།
ཨག་ལོད་ལགས།
གཞན་གྱི་རྒོལ་བ་ངན་པ་ཚར་བཅད་ནས།།
མུ་སྟེགས་སྟོན་པ་དྲུག་དང་ལྷས་བྱིན་སོགས།།
འཁོར་མོ་འཇིག་གི་ཡུལ་དུ་བདུད་རྣམས་བཏུལ།།
ཐུབ་པ་གཡུལ་ལད་རྒྱལ་ལ་ཕྱག་འཚལ་ལོ།།
ཞེས་ཁ་ཏོན་དུ་འདོན་ཀྱང་། ཡུལ་དེ་གར་ཡོད་མི་ཤེས། ཁྱེད་ཉིད་ཀྱིས་ཡུལ་དེར་སློབ་གཉེར་གནང་ཡོད་བཟོ་འདུག་ན། དེ་གར་ཡོད་དང་། ད་ལྟ་རྒྱ་གར་བས་ཅི་ལྟར་འབོད་གསལ་ཁ་ཞིག་ཡོང་བ་ཞུ།
ཱགྲོགས་བཟང་ལགས། འཁོར་མོ་འཇིག་ཅེས་པ་སྐབས་འགར་ཝཱརཱ་ཎི་སཱིར་གོ་བ་ཡོད་སྲོལ་འདུག་དེ་ནི་བུ་སྟོན་ཆོས་འབྱུང་ནང་གསལ་ངེས། ཡིན་ཡང་། ཉིད་ཀྱིས་བསྟན་པའི། འཁོར་མོ་འཇུག་གི་ཡུལ་དུ་བདུད་རྣམས་བཏུལ། །ཞེས་པ་དེ་ཡིན་མིན་ཁ་ཚོན་གཅོད་དཀའོ། །
ཝཱརཱ་ཎི་སཱི་ལ། འཁོར་མོ་འཇིག་བསྒྱུར་བ་ཡོད་སྲོལ་འདུག་ཀྱང་། དངོས་ནས་བྱས་ན། ཝཱརཱ་ཎི་སཱི་ནི། ཆུ་བོ་ཝཱརཱཎ་དང་། ཨ་སཱི་གཉིས་ཀྱི་བར་ཆགས་པའི་གྲོང་འཁྱེར་ལ། ཝཱརཱ་ཎི་སཱི་ཞེས་མིང་ཆགས་པར་བཤད་དོ།།