ཤྲཱིཿཨེ་མ་ཧོའི་ཞེ་བློ་བདེ་མགུར།།

ཨེ་མ་ཧོ།
 
ཆུང་ནས་བླ་མ་དམ་པས་རྗེས་སུ་བཟུང་།།
དར་ནས་ཐོས་བསམ་སྒོམ་པས་ལང་ཚོ་རྒྱས།།
ཆེ་ནས་དམ་པའི་ཆོས་ཀྱི་ཕྲིན་ལས་སྤེལ།།
མི་ངན་རུལ་བ་ཟེར་ཀྱང་ཞེ་བློ་བདེ།།
ངེས་འབྱུང་ཚུལ་ཁྲིམས་ས་གཞི་བཀྲ་ཤིས་ཤིང་།།
བྱང་སེམས་ཏིང་འཛིན་ལྗོན་བཟང་བདེ་ལེགས་འཕེལ།། 
གསང་ཆེན་ཤེས་རབ་འབྲས་བུ་ཕུན་སུམ་ཚོགས།།
གྲྭ་ལོག་སྡོམ་ཤོར་ཟེར་ཀྱང་ཞེ་བློ་བདེ།།
ཤར་ཕྱོགས་ཆོས་ཀྱི་གདམས་ངག་བདུད་རྩིས་སྨིན།།
ཡུལ་དབུས་མཚམས་སུ་བཤད་སྒྲུབ་རྣལ་འབྱོར་བརྩོན།།
ནུབ་ཕྱོགས་གསང་ཆེན་སྦྱིན་པའི་སྐལ་བ་བཟང་།།
བླ་ལོག་མཁན་རྫུན་ཟེར་ཀྱང་ཞེ་བློ་བདེ།།
ང་ནི་ཆོས་བཞིན་སྤྱོད་པའི་དགེ་སློང་ཆེ།།
མ་བཅོས་ལྷག་བསམ་དག་པའི་རྒྱལ་བུའི་སྲས།།
དག་སྣང་ཚུལ་བཞིན་མངའ་བའི་རྡོ་རྗེ་འཆང་།།
ཕུང་གསུམ་སྡུག་འདྲེ་ཟེར་ཀྱང་ཞེ་བློ་བདེ།།
གང་ལྟར་རང་བློ་ལྐོག་ཏུ་མ་གྱུར་བས།།
བསྟན་དང་འགྲོ་ལ་ཕན་བདེའི་མི་ཚེ་འདི།།
འཆི་གསོན་ཅི་བྱུང་དགའ་བདེ་ངང་དུ་མཆིས།།
གྲོགས་མེད་གཅིག་པུར་ཟེར་ཀྱང་ཞེ་བློ་བདེ།།
རྒྱ་སྒོར་དམར་པོས་ཕྱུག་པའི་ཚོང་དཔོན་མིན།།
ཨ་སྒོར་ལྗང་གུས་རྒྱགས་པའི་བླ་དཔོན་མིན།།
གཡོ་སྒྱུ་གཞན་མགོ་སྐོར་བའི་སྤྲུལ་དཔོན་མིན།།
སྤྲང་རྒན་འདོ་ཤོར་ཟེར་ཀྱང་ཞེ་བློ་བདེ།།
མདོར་ན་ལུས་ངག་ཡིད་ཀྱིས་བསམ་སྤྱོད་ཀུན།།
བསྟན་དང་འགྲོ་བར་མཆོད་པའི་དགེ་རྩ་འདིས།།
ཕན་བདེའི་ལེགས་ཚོགས་ཡིད་བཞིན་ནོར་བུའི་དཔལ།།
གང་བསམ་གེགས་མེད་བདེ་མྱུར་ལྷུན་གྱིས་གྲུབ།།
རི་སྤྲུལ་ངོར་ཤྲཱིས་སོ།།