བོན་རྒྱ་བསྟན་འཛིན་རབ་རྒྱས་ཀྱིས་འོས་སྦྱོར་བྱས།
སྤྱི་ཚོགས་ནི་འགལ་འདུའི་རྣམ་པ་ཅན་དང་། འཐབ་རྩོད་ཀྱི་རང་བཞིན་ཅན་ཞིག་ཡིན་པས། ནམ་དུའང་འགལ་འདུ་དང་འཐབ་རྩོད་ལ་རྒྱུན་ཆད་པ་མེད། མུ་འབྲེལ་གྱི་འགལ་འདུ་དང་འཐབ་རྩོད་བརྒྱུད་མི་རིགས་དང་རྒྱལ་ཁབ་ཚུགས་ཀྱིན་ཡོད་ལ། མི་རིགས་དང་རྒྱལ་ཁབ་འཐོར་གྱིན་ཡང་ཡོད། ལྷག་པར་རྒྱལ་དོན་དང་འབྲེལ་བའི་འགལ་འདུའི་བསམ་བློ་དང་འཁྲུག་ཆ་ཆེ་བའི་སྤྱོད་པ། རྣོ་ངར་ལྡན་པའི་འཐབ་རྩོད་ཀྱི་རྦ་རླབས་དགུང་དུ་འཕྱོ་ཞིང་། འགལ་འདུའི་བསམ་བློ་དང་སྤྱོད་འཆལ་གྱིས་སྤྱི་ཚོགས་ཡོམ་ཡོམ་དཀྲུག་པའི་སྐབས་སུ་སྤྱི་ཚོགས་ལྷིང་འཇགས་དང་། རྙོག་དྲ་ཞི་འཇགས་སུ་གཏོང་བ་ནི་ཐབས་ལ་མཁས་པ་དང་རྣམ་དཔྱོད་ལྡན་པའི་ཡུལ་ཉིད་དུ་ངེས་པ་ལས་དབང་ཡོད་དང་དཔུང་བསྒྲིགས། ངོ་རྒོལ་དང་ཡར་ལངས་བཅས་ཀྱིས་ནུས་པ་ཞིག་གཞར་ཡང་མིན།
སྐྱབས་མགོན་རྒྱལ་བ་རིན་པོ་ཆེ་ནི་ཐབས་ལ་མཁས་པ་དང་རྣམ་དཔྱོད་ལྡན་པའི་གནམ་འོག་གི་སྐྱེས་བུ་འགྲན་ཟླ་མེད་པ་དེ་ཡིན་ལ། ཁོང་གིས་འཛམ་གླིང་རང་བཞིན་དང་རྒྱལ་ཁབ་ཕན་ཚུན་དབར་གྱི་རྙོག་དྲ་ཞི་འཇགས་སུ་གཏོང་བའི་ཐབས་སུ་གྲོས་མོལ་དང་། བསམ་ཤེས། ཡིད་ཆེས་བཅས་ཀྱི་ཁྱབ་ཁོངས་ནས་ལམ་སྟོན་འགྲེལ་བརྗོད་གནང་ཡོད་ལ། ཁ་དགྲར་གཏད་དེའང་གཏན་རྒྱལ་དང་གཏན་ཕམ་གྱི་ཕྱོགས་སུ་མ་ལྷུང་བའི་དབུ་མའི་ལམ་གྱི་ཐབས་ཇུས་འདོན་གནང་ཡོད། ལྷག་པར་བོད་ལ་མཚོན་ནས་བཤད་ན། ཆོས་ལུགས་ཕན་ཚུན་གྱི་དབར། ཆོལ་ཁ་དང་ལུང་ཚན་ཕྱོགས་ཁག་དབར། མི་སྒེར་དང་སྤྱི་ཚོགས་ཀྱི་རྙོག་དྲ་ཕྲན་བུ་ཚུན་ཆད་ལ་ཁོང་གི་རྣམ་དཔྱོད་ལྡན་པའི་ཐབས་མཁས་ཀྱི་སྤྱོད་པ་ཤ་སྟག་གིས་སྤྱི་ཚོགས་ལྷིང་འཇགས་དང་རྡོག་རྩ་ཆིག་སྒྲིལ། སེམས་ཐག་ཉེ་བོ། དམ་ཚིག་ལྡན་པ་བཅས་སུ་བསྐྲུན་པ་དེ་ལོ་ཆིག་སྟོང་ཡར་སྔོན་གྱི་བཙན་པོ་དུས་སྐབས་དང་འདྲ་མཚུངས་ལ་གྱུར་ཡོད།
ཡིན་ནའང་། ཉེ་བའི་ལོ་ཤས་གོང་ནས་དབུ་རང་ཕན་ཚུན་དབར་ལ་ཕྱོགས་བསྒྲིགས་དང་ལེ་འདེད། ཐ་ན་ཞྭ་མོ་བཟོ་རེས་ཚུན་ཆད་ཀྱིས་སྤྱི་ཚོགས་ཡོམ་ཡོམ་སྒུལ་ཞིང་། རྩ་དོན་ཡལ་བར་དོར་ཏེ་རང་དོན་དང་ཁ་ཕོ། དད་པ་དང་དྲང་བདེན་ཁ་ལ་ཁྱེར་བའི་ཚོ་ཁག་གཉིས་སུ་གྱེས་མགོ་ཚུགས། ལྷག་པར་འགྲེམས་སྤེལ་དང་ཁྱབ་བསྒྲགས་ཀྱི་མགྱོགས་ཚད་ཤིན་ཏུ་མྱུར་བའི་དྲ་བའི་འཇིག་རྟེན་ན་ཉིན་མཚན་དབྱེར་མེད་དུ་རྒྱུ་བའི་ཡིག་རྨོངས་པ་ཁ་རྒོད་ཚོ་དང་། གབ་སྦས་འབའ་ཞིག་གི་འོག་ཏུ་ལག་བརྒྱ་མཚན་སྟོང་གིས་འཚོ་བའི་གཡོ་ཅན་པའི་སྡེ་ནི། ཞྭ་མོ་དམར་ནག་གཉིས་ཀྱི་ཚོང་ར་ཆེ་ཤོས་དང་ཚོང་བ་མང་ཤོས་ཡིན། བར་སྐབས་འདིར་ངོས་འཛིན་ཡ་མཚན་པོ་ཞིག་བྱུང་བ་ནི། རང་བཙན་སྐོར་གྱི་ཚོགས་འདུ་ཆུང་ཆུང་ཞིག་ལ་ཞུགས་པ་ཚུན་ཆད་རྒྱལ་བ་རིན་པོ་ཆེ་ལ་དད་ལོག་དང་། དབུས་བོད་མིའི་སྒྲིག་འཛུགས་ལ་ངོ་ལོག་བྱེད་མཁན་གྱི་ངོས་འཛིན་དང་། དབུ་མའི་ལམ་གྱི་ཆེད་དུ་སྐད་ཆ་བཤད་པ་དང་ལས་ཀ་བྱེད་པ་ཚུན་ཆད་ལ་ལོ་རྒྱུས་ཀྱི་ནག་ཉེས་འགེལ་མགོ་ཚུགས་ཏེ། ཆེས་ཧ་ཅང་ཐ་ཆད་པའི་སྤྱོད་འཆལ་གྱི་མཐའ་ལ་ཟགས་ཏེ་རྒྱལ་བ་རིན་པོ་ཆེ་ཚུན་ཆད་ལ་རྒྱལ་ཚོང་བའི་ཁ་ཕོ་འཐེན་མཁན་བྱུང་། བར་སྐབས་འདིར་སྤྱི་ཚོགས་ནང་དྲང་བདེན་གྱི་སྨྲ་ལྕེ་འགག་པར་གྱུར། གཟུར་གནས་བ་རེ་ཟུང་གིས་མགོ་བོ་སྟོབས་ཀྱིས་བཏེགས་ཀྱང་ཞྭ་མོ་ཁྲི་སྟོང་གི་ལྗིད་ཚད་ཀྱིས་མནན་པར་གྱུར།
གང་ལྟར་སྤྱི་ཚོགས་ཅི་བྱ་གཏོལ་བྲལ་གྱི་གནས་སུ་གྱུར་བའི་སྐབས་འདིར། སྐྱབས་མགོན་ཐམས་ཅད་མཁྱེན་པས། འཕྲལ་ཕུགས་རྒྱང་གསུམ་གྱི་གནས་བབ་ལ་ཡེ་ཤེས་དབྱིངས་དཔྱད་ཀྱིས། དབུ་རང་གཉིས་ནི་གཅིག་རྒྱལ་གཅིག་ཕམ་གྱི་འགལ་བའི་ལྟ་གྲུབ་ཞིག་མིན་པར། ཐུན་མོང་གི་འཚོལ་སྙེག་ཡོད་པ། ཐུན་མོང་གི་གཞི་རྟེན་ཡོད་པ། ཕན་ཚུན་དབར་ལ་གལ་གནད་ཆེ་བའི་རྟེན་འབྲེལ་གྱི་འབྲེལ་ཐག་ཡོད་པ་དེ། ཞྭ་ནག་ཁྲི་སྟོང་གིས་གཡོག་མྱོང་བའི་སྐུ་ཞབས་འཇམ་དབྱངས་ནོར་བུ་ཕོ་བྲང་ལ་ཆེད་འབོད་ཀྱིས་མཇལ་ཁ་གནང་། ལམ་སྟོན་གནང་། བྱིན་རླབས་གནང་ནས་ཕེབས་བཅུག་པ་གཅིག་བུས་གསལ་འདོན་གྱིས་ང་ཚོ་ལ་དབུ་རང་ཕན་ཚུན་བར་དུ་ཐུན་མོང་གི་གཞི་རྟེན་ཞིག་དང་རུམ་བྲོ་ཞིག་ཡོད་པའི་ལམ་སྟོན་བསྩལ་གནང་ཡོད།
ཁོང་གིས་རྣམ་ཀུན་རྙོག་དྲ་ཆེ་ཆུང་མེད་པར་གྲོས་མོལ་གྱི་ལམ་ནས་སེལ་དགོས་པའི་ལམ་སྟོན་དང་། འཇམ་ནོར་ལ་ལོ་རྒྱུས་ཀྱི་ངོས་ནས་བོད་རང་བཙན་གཙང་མ་ཡིན་པའི་ཁུངས་སྐྱེལ་དང་དཔང་རྟགས་ར་སྤྲོད་མ་ཐུབ་ཚེ། དབུ་མའི་ལམ་ནི་སྤྲང་པོ་ལྟོ་སློང་མཁན་ཞིག་དང་འདྲ་བའི་བཀའ་མོལ་གནང་བ་འདི་གཉིས་ལས་ང་ཚོས་དབུ་རང་ཕན་ཚུན་དབར་གྱི་རྟེན་འབྲེལ་གྱི་གསང་ཐག་དང་། ཐུན་མོང་གི་གཞི་རྟེན་རྙེད་ནུས་པ་ཡིན། ཐུན་མོང་གི་གཞི་རྟེན་འདི་ལས་ང་ཚོས་བསྐྱར་ཏུ་ཆིག་སྒྲིལ་དང་དམ་གཙང་གི་སྤྱི་ཚོགས་ཡིད་དུ་འོང་བ་ཞིག་བསྐྲུན་དགོས་པ་མ་ཡིན་ནམ།
ད་དུང་དབུ་མ་ནང་ཁུལ་དུའང་སྤེན་སེང་གཉིས་ཀྱིས་སྤྱི་ཚོགས་དཀྲུག་དཀྲུགས་པའི་རྗེས། སྲིད་སྐྱོང་གིས་ཀྱང་ཁྲིམས་ལ་གཏུགས། ཁྲིམས་ཐོག་ནས་ཐག་གཅོད་པ་ལས་ཐབས་གཞན་མེད་པའི་བཀའ་སློབ་བསྟུན་མར་གནང་ལ། ཚོགས་ཟུར་གྱིས་ཀྱང་ཁྲིམས་ལ་གཏུགས་ཀྱིན་ཡོད། ཁྲིམས་ཀྱིས་གང་ཐག་བཅད་པ་དེར་ཤར་སྐྱོད་བྱེད་རྒྱུ་ཡིན་ཞེས་མཐར་གཉིས་ཀ་ཁྲིམས་ཐོག་ལ་ཕྱིན་པ་འདི་ནི་འགྲོ་ས་དང་འདུམ་སྟངས་ལེགས་པོ་ཞིག་ཡིན་ཏེ། འདི་ལ་ཁྲིམས་ཀྱིས་དབང་བསྒྱུར་ཟེར་བ་མ་ཟད། ཁོ་གཉིས་མང་གཙོའི་སྤྱི་ཚོགས་ནང་འཚར་ལོངས་བྱུང་བའི་ཁྱད་ཆོས་དེའང་ངོམ་པ་རེད། བར་སྐབས་འདིར་བོད་པ་ཚོ་ས་ལ་བརྡབས་ཏེ་དུམ་བུར་འཐོར་དུས་རྒྱལ་བ་རིན་པོ་ཆེ་དང་ཁྲིམས་ལས་རེ་ས་གཞན་དུ་མེད་པའི་ངོས་འཛིན་ཞིག་དང་། གནམ་ཐང་ནས་ཁ་ཐུམ་རྒྱག་མཁན་དང་ཀི་བཞེངས་བྱེད་མཁན་རྣམས་ནི་ཆབ་སྲིད་པ་ཚོའི་འུར་རྡོ་དང། ཕྱོགས་ལྷུང་གི་ལག་རྡོ་འབའ་ཞིག་ལས་ཅི་ཡང་མིན་པའི་ངོས་འཛིན་ཞིག་ཀྱང་མི་ཐུབ་བམ།