ཉིན་ཐོ་གློག་འཁྱུག་མ། 

ཐེ་བོ་སངས་རྒྱས།
ཕྱི་ཟླ་༩ ཚེས་༢༨ གཟའ་པ་སངས། ཞོགས་པ།
ཆུ་ཚོད་ཀྱི་དྲིལ་སྒྲ་ཙེར་ཙེར་པོ་དེས་ངའི་རྨི་ལམ་སྐྱིད་པོ་ཞིག་ལ་བཞི་ཤད་བཀོད། རྣ་བར་གཟན་པའི་སྒྲ་དེར་འཚིག་པ་ཟ་ཞོར་སྔས་འགྲམ་ཅོག་ཙེའི་སྟེང་གི་ཁ་པར་ལ་ལག་པ་བསྙབས།

མིག་འཕུར་འཕུར་གཏོང་བའི་མཛུབ་གསེབ་བརྒྱུད་འཆར་ཤེལ་ངོས་ཀྱི་བརྡ་རྟགས་ནི་མར་ངོའི་ཚེས་ཆ་ཙམ་དུ་མཐོང་། དེ་ལྟ་ནའང་། སྐད་འཕྲིན་སྒོ་འབྱེད་ཐུབ་ཙམ་ན་གྲོགས་ཚོམས་ངོས་སུ་ ༼ཀརྨ་པ་མཐའ་ཡས་རྡོ་རྗེའི་སྲས་སུ་ཞྭ་དམར་པ་འཁྲུངས་པ།༽ ཞེས་དང་། ༼ཆོས་རྒྱལ་ནམ་མཁའི་ནོར་བུ་སྐུ་གཤེགས་པར་མྱ་ངན་ཞུ།༽ ༼རྒས་གསོ་ཁང་གི་སྐྱོབ་གསོ་ལྐོག་ཟ་བྱས་པ།༽ ༼ནད་པ་ཉམ་ཐག་ཆེད་ཞལ་འདེབས་སློང་ཡིག༽ ༼བྱིས་པ་འཚོལ་ཡིག༽ ཅེས་པ་སོགས་ཧ་ཅང་འཁྲུག་ཆ་དོད་པའི་མེག་ལེའོ་ཌི་གྷན་ཇིའི་༡ སྲང་བར་དང་འདྲ་ཆེ་ལ།

དཔེ་གཞན་ཞིག་བཞག་ན། སྐྱེ། རྒ། ན། འཆིའི་ཟློས་གར་འཁྲབ་སྟེགས་ཀྱི་ཡོལ་བ་ཕྱེ་བ་དང་འདྲ། གཞན་ཡང་། བོད་མི་ཚོས་སྐད་འཕྲིན་རྒྱབ་ངོས་སུ་བཏབ་པའི་མཆན་དང་། ཁྱབ་བསྒྲགས། ཚོང་བཤད། དྲན་ཐོ་འཆལ་ལེ་འཆོལ་ལེ་སོགས་རྒྱ་ཡིག་གམ། དབྱིན་ཡིག་གིས་བྲིས་པ་འདིས། ང་ཚོའི་མི་རབས་འདི་ཁྲོན་པའི་ནང་གི་༼ལྕོང་མོ་མགོ་རྡོ་༽ ཁྱུ་ཞིག་ཡིན་ཞེས་པའི་ཤུགས་བསྟན་དང་གཉིས་སུ་མ་མཆིས།

ད་དུང་སྐད་འཕྲིན་ཚོགས་པ་རེའི་ནང་། ལ་ལས་ངག་རྩལ་ངོམ་པ། ལ་ལས་ལ་གཞས་ལེན་པ། ལ་ལས་ངོ་བསྟོད། ལ་ལས་རྒྱབ་བཤད། ལ་ལས་ཟུར་ཟ། ལ་ལས་རྒོལ་གཏམ། ལ་ལས་སྟོང་གཏམ་སོགས་ཀྱི་དབུགས་ཐག་སྐར་ཆ་༦༠ ཅན་མུ་མཐའ་མེད་པ་འདི་དྲ་རྒྱའི་ཤུགས་ཚད་ཀྱིས་ཁྱོག་མིན་ཐད་སེམས་ཁྲལ་ཤོར།

ཕྱི་རོལ་ཏུ་ཆར་ཤུར་ཁྲོད་མིང་མི་ཤེས་པའི་ཤིང་ལོ་རྣམས་སྐད་འཕྲིན་ནང་གི་པར་རིས་བཞིན་ཟགས་ཀྱིན་པ་སྒེའུ་ཁུང་གི་དྲ་མ་ལས་མཐོང་ཐུབ། ངས་ལྟ་སྟངས་ཤིག་ལ། ངའི་དཔེ་སྒྲོམ་ལས་དཔེ་དེབ་ཐོག་གི་ཐལ་རྡུལ་ནི་སྐད་འཕྲིན་ནང་གི་གད་སྙིགས་བཞིན་མཐུག་པ་མཐོང་བས།སྒྱིད་ལུག་ཅེས་པའི་ཐ་སྙད་དེ་ཁད་ཀྱིས་ཡིད་ལ་འཁོར། ཀུན་གྱི་ཁ་ལ་བྱང་བའི་བརྡ་འཕྲིན་དུས་རབས་ཞེས་པ་འདི་བཞིན་ཡིན་པ་འདྲ་ལ།མ་མཐའ་ཡང་། འུ་ཚོར་འདི་འདྲ་རེད་འདུག དེ་ནས་གོམས་ལོབ་ལ་སྦྲུལ་སྦྲུལ་ཤུབས་ལས་དོན་པ་ལྟར་དུ་མལ་ལས་ལངས། ལག་ཏུ་ཁ་པར་བཟུང་བཟུང་ལ་བསིལ་ལྷམ་དྲུད་ཅིང་ཁྲུས་ཁང་ནང་སོ་བཀྲུ་རུ་སོང་། ཅང་མ་འགོར་བར་སྒོ་འགྲམ་དུ་བག་ལེབ་འཚོང་མཁན་གྱིས་སྐད་བརྒྱབ་པས་ཞོགས་ཟས་དྲན།

སྔ་དྲོ་ཆུ་ཚོད་༩ པ་ནས་ནམ་རྒྱུན་བཞིན། གློག་ཀླད་འཆར་ངོས་སུ་བརྡ་དང་ཐ་སྙད་ཀྱི་རྡེའུ་རྣམས། བཤེར། བསྲེས། བཤུག སྦྱོར། གཏུབ།སྣོན། བརྗེ། སྒྲིག འདེད་ཀྱིས་རྒྱལ་ཕམ་ཐག་མི་ཆོད་པའི་མིག་མངས་ཉིན་ཐོག་ཐག་ཏུ་བརྩེས།

ཕྱི་དྲོ་ཆུ་ཚོད་༥:༣༠ ཐོག་རང་ཤག་འབར་སྒམ་མའི་ནང་ཕྱིར་འབྱོར་མོད། འོན་ཀྱང་། ངའི་ནུས་ཤུགས་ནི་ཁ་པར་གྱི་གློག་རྫས་བཞིན་ཨང་ཀི་༢༠ ཡས་མས་སུ་ལྷུང་བས་ནུབ་འཚལ་གཡོ་ཐུབ་མིན་འཕྱང་མོ་ཉུག་ཏུ་གྱུར། བལྟས་ཡོང་ན། དོ་ནུབ་མྱི་རྐྱང་ཐུག་པ་ལས་ཧ་ལམ་རེ་བ་མེེད་པ་འདྲ། སྐད་འཕྲིན་ངོས་དང་གློག་སྒྲོན་དམར་ལམ་མེ་བའི་འོག་གོ་མེད་ཚོར་མེད་ངང་སླར་ཡང་གཉིད་དུ་གཡུར།

མཆན། ༡ McLeod Ganj རྒྱ་གར་བྱང་ཕྱོགས་རྡ་རམ་ས་ལའི་གྲོང་བརྡལ་ཞིག དེ་ལ་བོད་མི་ཚོས། དབྱིབས་བཀོད་འདྲ་བ་རྒྱུ་མཚན་དུ་བྱས་ནས་རྐང་སྣམ་ཁྲོམ་སྲང་ཞེས་འབོད།