(དེ་རིང་༧གོང་ས་མཆོག་གི་བཀའ་དགོངས་དབུ་མའི་ལམ་ལ་དད་སེམས་གཡོ་བ་མེད་པའི་མཁས་དབང་ཟམ་གདོང་རིན་པོ་ཆེའི་འཁྲུངས་སྐར་ལ་དད་ཞེན་གཙང་མས་མཆོད་པ་འབུལ་བའི་ཡིད་སྣང་ཉི་མ་རང་གྲོལ་དེའི་རྟེན་འབྲེལ་གྱི་ཚུལ་དུ་ཕུལ།)
རླུང་དམར།
༧རྒྱལ་བའི་ཐུགས་དགོངས་ཞེ་ལ་བཀྲ་བའི་སྲས་ཀྱི་ཐུ་བོ་རླབས་པོ་ཆེ་ཡི་འཁྲུངས་སྐར་ཉིན།།
འཇིག་རྟེན་སྐྱེ་བོས་དད་གཙུག་འགྱུར་མེད་ངང་ནས་རྟེན་འབྲེལ་འོ་མཚོ་རབ་ཏུ་འཕྱོ་བའི་དཔལ།།
བཙན་བྱོལ་ལོ་ནག་མགྱོགས་འགྲོས་ཇི་ཙམ་ཆེ་ཡང་རང་དབང་སླར་གསོའི་དབུ་མའི་ལྟ་གྲུབ་ཆེད།།
བོད་རྒྱ་གཉིས་སྨན་བྱ་བའི་སེམས་དཔའ་ཆེན་པོའི་དྲི་མེད་གཟིགས་པས་རྣམ་པར་ཀུན་ཡིད་འཕྲོགས།།
དགེ་མཚན་བྱེ་བའི་ཤེས་རབ་སྤྱན་ཟུང་གངས་རིའི་ལྗོངས་ལ་བཏེགས་པའི་སློབ་དཔོན་བྱམས་བརྩེའི་སྲས།།
སྐུ་ཉིད་མཆོག་སྤྲུལ་གསེར་འོད་ཐུགས་ཀྱི་ལམ་སྟོན་བྱང་ཆུབ་རྫོགས་ཆེན་ཞིང་གི་འགྲོ་དོན་གཉེར།།
༧གོང་ས་ཡིད་བཞིན་ནོར་བུའི་རྒྱལ་སྲས་ཆེན་པོ་ཁྱེད་ཉིད་སྲིད་མཐོའི་གངས་ལ་མེ་ཏོག་འཕོས།།
ཐུ་བྷོད་ལྗོངས་འདིར་ངོ་མཚར་མཛེེས་ལྡན་འབྱུང་བའི་དུས་བཟང་འདི་ལ་དགའ་ཚོར་སྟོང་གིས་བསུ།།
ཁ་བ་རི་བའི་གཙུག་ན་ཚད་མེད་ཡོན་ཏན་རབ་ཏུ་འཕགས་པའི་སྐྱེ་འགྲོའི་མགོན་པོ་བྱོན།།
དབུ་མའི་ལམ་གྱི་སྣེ་འདྲེན་མཁས་ཆེན་བདག་ཉིད་ཅན་པོའི་ཟབ་གསལ་རྟོགས་བརྗོད་མཛད་པའི་སྐུ།།
ཤེས་བློས་མ་རིག་མུན་སེལ་བྱེད་པོའི་སྐུ་ཡི་མངའ་ཐང་འཛམ་གླིང་ལྟེ་བར་མངོན་པར་གཟིགས།།
རྒྱ་མཚོའི་ཀློང་འབྱམས་འཕྲིན་ལས་དཔག་མེད་འཆད་ཁྲིད་སྨིན་པའི་མཛོད་རྟེན་མཆོག་གི་རྣམ་རོལ་བ།།
ནོར་འཛིན་ཕྲེང་བའི་ཚུལ་ཁྲིམས་བསྟན་པའི་མངའ་བདག་ཟམ་གདོང་བླ་མ་འཁྲུངས་བའི་དགའ་སྟོན་ལ།།
བདག་སེམས་དྲི་མེད་དཀར་བོས་མུན་འཇོམས་དད་པའི་བསྟོད་དབྱངས་ཁྱེད་སྐུ་ཞབས་ལ་རྟག་ཏུ་བསྒྲོན།།
བདེ་འབྱུང་སྐྱེས་ཆེན་རིག་པའི་གདུལ་བྱའི་ཁྲོད་ནས་མ་ལྟར་བརྩེ་བའི་བྱང་སེམས་རྒྱན་གཅིག་ཉིད།།
རྟེན་འབྲེལ་བསྟོད་པའི་ལེགས་ཚོགས་སྲིད་ན་བློ་མིག་འབྱེད་བའི་སེམས་དཔའ་མཁས་དབང་ཁྱེད་ཀྱིས་མཛད།།
བདེན་མཐའ་སྐྱོང་བའི་རིགས་ཀྱི་རྒྱལ་སྲས་གངས་རིའི་ཞིང་འདིར་འཁྲུངས་བའི་ཉིན་སྐར་བཟང་བོ་ལ།།
དགེ་བའི་ཁྱུ་མཆོག་སློབ་དཔོན་དམ་པས་འཁྲུལ་མེད་བསྟན་པའི་ལམ་བཟང་ཤེས་བྱའི་ལང་ཚོ་མངའ།།
ལུགས་གཉིས་ཀུན་མཐོང་གདོད་ནས་འཛིན་པའི་དབུ་བླ་མཆོག་གི་སྐུ་ཚེའི་མཛད་རྗེས་རིན་པོ་ཆེ།།
རིན་ཆེན་གསེར་གྱི་ལྗགས་ལུང་བསྩལ་བའི་འཆིང་ཐག་བློ་རྒྱ་ཀུན་ནས་གྲོལ་བའི་རྗེ་བོ་མཆོག།
༧སྐྱབས་རྗེ་སྲས་ཀྱི་ཐུ་བོའི་ཐུགས་བརྩེས་བསྐྱངས་པའི་བོད་འབངས་ཚོགས་དེའི་ཆོས་ཀྱི་སྒོ་མོའི་རིགས།།
ངོ་མཚར་ཡིད་དབང་འཕྲོགས་པར་ལྷ་མིའི་ཐུགས་ཀྱི་ནོར་རྒྱན་མཁྱེན་པའི་བདག་ཉིད་མཆོད་སྤྲིན་འབུལ།།
མཛེས་དཔྱོད་བསྟན་པའི་མཐུ་སྟོབས་མངའ་བའི་རང་བྱོན་སེམས་དཔའི་གཟི་མདངས་ནུབ་མེད་མཆོག་ལ་དད།།
བློ་མིག་དམན་པའི་སྐྱེས་བོ་ང་ཡིས་ཁྱེད་སྐུའི་འཁྲུངས་ཉིན་ཉི་མ་འཛུམ་བརྒྱ་བསུ་བ་དགེའོ།།
2018-11-05ཉིན།