སྣང་བ་བན་བུན།  


དགའ་བ་མཇེ་ཕྲུག་ནས།
 
རི་ནགས་གནས་རི་བསྐོར་ནས་རྐང་ཆུང་ན་རོགས་ཙམ་རེད།།
ཆོས་མཇལ་ཆོས་འདོན་མང་ན་ང་རྒྱལ་རྒྱས་པའི་རྒྱུ་རེད།།
སོ་སོའི་སེམས་པ་གཅིག་དེ་སོ་སོས་བདག་གཅེས་ཤེས་ན།།
ཆོས་དང་འཇིག་རྟེན་གཉིས་ཀྱི་སྙིང་པོ་དོན་གྱི་ནོར་རེད།།

རང་གི་སེམས་པ་གཅིག་དེ་དུལ་བའི་ནུས་ཤིག་མེད་དུས།།
གཞན་སེམས་བརྒྱ་སྟོང་འདུལ་བའི་ཆོས་པ་སུ་ཞིག་ཡོད་རེད།།
རང་ཉིད་དཔེ་ལ་བཞག་ཏེ་ཆོས་དང་འཇིག་རྟེན་གཉིས་ཀྱི།།
བདེན་དོན་དངོས་ཡོད་མཐའ་དག་མ་སྦས་གསུང་ན་ལོས་བཟང་།།

ང་རང་ལྷ་ལ་དགའ་བའི་རྒྱུ་མཚན་བཙལ་རུང་མ་རྙེད།།
རང་ཉིད་ཀུན་ལ་དབང་བའི་མི་ཚེའི་སྐལ་བཟང་འདི་ཀོ།།
རང་གཞན་སོ་སོའི་གཤིས་དང་མཐུན་པའི་འཚོ་བ་རོལ་ན།།
ལྷ་འདྲེའི་ཕན་གནོད་རྩོད་པའི་ཐ་ཤལ་ལས་ཤིག་མི་མཁོ།།

གང་བྱས་བླ་མ་དཀོན་མཆོག་གསུམ་གྱིས་བཀའ་དྲིན་ཡིན་ན།།
ང་ཚོ་བོད་ལས་སྡུག་ག་ས་སྟེང་འདི་ལ་མ་མཐོང་།།
རང་ས་རང་ཡུལ་འཕྲོག་མཁན་རྒྱ་ནག་དམར་པོའི་རིགས་ལ།།
མགོ་ལ་དཀོན་མཆོག་མེད་ཀྱང་སྐྱིད་པའི་འཚོ་བ་ཡོད་རེད།།

རྐང་ལག་རང་ལ་ཡོད་ཀྱང་ལས་དབང་ལྷ་ལ་བཅོལ་མཁན།།
སྒྱིད་ལུག་སོས་དལ་གཤིས་ལ་རིང་ནས་ངན་ལང་ཤོར་མཁན།།
དཀའ་ལས་མ་རྒྱག་འདོད་པའི་མི་ཚེའི་རྒྱས་སྤྲོས་འཚོ་བ།།
དཀོན་མཆོག་གསུམ་ལས་མེད་པའི་བདག་ཅག་བོད་རིགས་སྤུན་ཟླ།།

སོ་སོས་ལས་ཤིག་བྱེད་དང་ལས་ལ་གྲུབ་འབྲས་ཡོད་རེད།།
ཐམས་ཅད་ལྷ་ཡིས་བཀོད་ཚུལ་ཅོལ་ཆུང་གཏམ་དེ་དོར་རོགས།།
ལྷ་དང་བླ་མ་དཀོན་མཆོག་སོ་སོའི་ས་ལ་བཞག་རོགས།།
གང་བྱས་ལས་ཀྱི་ཁྲོད་ལ་དཀོན་མཆོག་དགོས་དོན་མི་འདུག །

ལྷ་ལ་མངོན་ཤེས་ཡོད་ན་འདྲེ་ལ་ནུས་མཐུ་ཡོད་ན།།
ང་དགུའི་ལོ་ཡི་ནང་ལ་བོད་རིགས་སྡུག་པོ་མྱང་དུས།།
ཡུལ་ལྷ་དཀོན་མཆོག་གསུམ་པོ་གང་དུ་བྲོས་པ་རེད་དམ།།
ལྷ་ས་ཁྲག་གིས་ཁེངས་དུས་ཚོར་བ་མེད་པ་ཅི་རེད།།