བློ་གྲོས་རབ་བརྟན།
ལོ་མང་བོ་སོང་ཤུལ་ན་ཁྱེད་ལྟ་བུ་ཞིག་བོད་ཡུལ་ན་སུ་ཡང་བྱོན་མ་སོང་། དེའི་དབང་གིས་བོད་ཡུལ་འདི་དང་བོད་མི་ཚོས་ད་བར་དུ་གནམ་ལ་ལག་པ་གཟེད་ཅིང་། རྐང་པས་ས་གཞི་འདི་དྲག་ཏུ་བརྡུངས་ཀྱང་དགོས་པ་དེ་རག་མེད་ལ། ཐོབ་དགོས་པ་དེ་ཐོབ་པ་ཕར་ཟད་ད་དུང་འགྲོ་སོང་ཇེ་མང་དུ་གྱུར་སོང་།
འགྲོ་སོང་མང་བའི་བོད་ཡུལ་འདི་དྲན་ཐེངས་རེ་དང་། བསམ་ཐེངས་རེ་ལ་ཁྱེད་དྲན་ཞིང་། དྲན་དགོས་པ་དེ་ཁྱེད་ད་དུང་འཚོ་བཞུགས་གནང་ཡོད་ན། ཐོབ་དགོས་པ་དེ་ཐོབ་མེད་ཀྱང་འགྲོ་སོང་ཇེ་མང་དུ་འགྲོ་མི་སྲིད་སྙམ། འགྲོ་སོང་འདི་དངུལ་མ་རེད་ལ་དངུལ་ལས་འབུམ་འགྱུར་གྱི་ལྷག་ཅིག་རེད། འགྲོ་སོང་དེ་མི་རིགས་ཀྱི་ཤེས་དཀའ་ཡང་བོད་མིའི་ཚོ་སེམས་ན་འགྲོ་སོང་དེ་རིན་ཐང་གིས་གཞལ་སར་མི་འགྲོ། བོད་མི་ཚོས་བཏང་བའི་འགྲོ་སོང་དག་འདི་ལྟར་ཆུ་ལ་ཐིམ་ཞིང་གནམ་ལ་ཡལ་སོང་ན་ཕངས་པ་ལ་ཚད་མེད་པས། ཕངས་སེམས་ཀྱི་སྣེ་ནས་ངས་ཁྱེད་ཉིད་ལྷག་ཏུ་དྲན།
སྐུ་ཉིད་སྔོན་མ་ཞིག་ལ་ངའི་ཕ་ཡུལ་དུ་ཕེབས་ཤིང་། ཕ་ཡུལ་གྱི་མི་རྣམས་དགའ་དད་སྤྲོ་གསུམ་གྱིས་ཁྱེད་ཉིད་ཕེབས་བསུ་བྱས་སོང་། ང་ཧ་ཅང་ཧ་ཅང་གི་ཆུང་ན་ཡང་། ཁྱེད་ཉིད་མོ་ཊ་ཞིག་གི་ནང་ལ་བཞེངས་ནས་ཕེབས་ཡོང་བ་དེ་ད་ལྟ་ད་དུང་ཡང་ངའི་མིག་ལམ་ན་གསལ། བོད་མི་ཚོས་ཀི་ལྡིར་དང་རླུང་རྟ་གཏོར་ཞིང་། ཕེབས་འཁོར་གཡས་གཡོན་ན་ཕེབས་བསུ་རྟ་བ་ཚོས་སྤུར་བའི་ཐལ་རྡུལ། ཕེབས་སྒོའི་གཡས་གཡོན་དང་ལམ་བར་གྱི་མཚམས་མཚམས་སུ་བརྩིགས་པའི་བསང་ཁྲི་ཆེ་ཆུང་དུ་མ་ལས་འཕྱུར་བའི་བསང་དུད། བོད་མི་ཚོའི་སེམས་ལ་དགའ་ཚོར་དང་གདོང་ལ་འཁྱིལ་བའི་མིག་ཆུ་དག་གིས་ཁྱེད་ཉིད་བསུས་ཏེ། ལོ་མང་རིང་གི་དཀའ་སྡུག་གི་ལོ་ཟླ་དག་རེ་ཞིག་སེམས་ཀྱི་མཐའ་རུ་དེད་ཐུབ་པ་བྱུང་།
གང་དུ་ཕེབས་ཀྱང་ཅི་ཞིག་གསུང་་ནའང་། སྙིང་སྟོབས་དང་སྤོབས་པ། རང་གི་སྐད་ཡིག་དང་རང་གི་རིག་གཞུང་ལ་དགའ་ཞེན། མི་རིགས་ཀྱི་འདུ་ཤེས་གསར་རྟོགས། ཕན་ཚུན་མཛའ་མཐུན་དང་མཉམ་གནས། རྒྱལ་གཅེས་ཆོས་གཅེས་ཀྱི་སློབ་གསོ་དང་ལམ་སྟོན་གནང་སྟེ། ལམ་ཁ་གསར་བ་ཞིག་ཏུ་རྒྱ་ནག་ཁྱིམ་ཆེན་དེའི་ནང་དུ་རང་རིགས་ལ་ལམ་ཁ་དང་མདུན་ལམ་་ཡོད་པའི་ཕྱོགས་སུ་སྐྱོན་གྱིན་པའི་སྐབས་སུ། གློ་བུར་ཏུ། ཁང་ཆེན་གྱི་ཀ་བ་ཆག་སོང་བ་ནི་ད་ལྟའི་བོད་ཐོག་ཏུ་བརྡིབས་པའི་དཀའ་ངལ་དག་སེལ་མི་ཐུབ་པའི་རྐྱེན་རྩ་དང་གཞལ་སར་མི་འགྲོ་བའི་འགྲོ་གྲོན་དག་གི་འབྱུང་རྩར་གྱུར་འདུག
བོད་འདི་རྒྱ་དམར་གྱིས་བཙན་བཟུང་བྱས་པ་དེ་ང་ཚོ་རང་སྲུང་མི་ཤེས་པའི་རྐྱེན་རེད་ལ། ༧གོང་ས་མཆོག་རྒྱ་དམར་གྱི་མེ་མདའི་སོ་བར་ནས་ཐར་བ་ནི་ང་ཚོ་ཤི་རན་མེད་པའི་རྟགས་སུ་གོ། སྐུ་ཉིད་གློ་བུར་དུ་མེད་སོང་བ་ནི་བོད་དུ་བོད་མི་ཚོར་ཕོག་པའི་གོད་ཆག་ཚབས་ཆེ་ཤོས་སུ་གྱུར།
དེ་རིང་སྐུ་ཉིད་ལ་ཁ་ཆེ་མང་ཚོགས་ཀྱིས་ཕེབས་བསུ་བྱེད་བཞིན་པའི་སྐུ་པར་རྙིང་བ་ཞིག་མཐོང་སྟེ། ངའི་སེམས་ལ་སྐུ་ཉིད་ཇི་ལྟར་བཞུགས་ཡོད་པ་དེ་ལྟར་འདིར་བྲིས་ཡོད་ལ།མ་ཟད་སྐུ་ཉིད་མེད་ཤུལ་དུ་བོད་ལ་ལྷག་པའི་འགྲོ་གྲོན་ཆེན་པོ་དེས་ཀྱང་ཡང་ཡང་དྲན་འཇུག་གི་འདུག