ཨ་མདོ་སྐྱབས་ཀྱིས།
འབྲོག་པ་ནི་གདོད་མ་ནས་མཐོ་སྒང་ལ་འཚོ་གཞི་བཅོལ་བའི་སྤྱི་ཚོགས་ཤིག་ཡིན། སྤྱི་ཚོགས་དེར། ཁ་བ་ཟེར་བའི་ལོངས་སྤྱོད་ཅིག་ཡོད། ལོངས་སྤྱོད་དེར་བརྩེ་ཞེན་ཟེར་བའི་ཞེ་འདང་ཞིག་ཡོད། ཞེ་འདང་དེར་དྲན་ཤིང་ཟེར་བའི་རྨི་ལམ་ཞིག་ཡོད། རྨི་ལམ་དེ་ང་ཡི་ཁྲག་རྩ་རེ་རེའི་སྦུབས་སུ་སིམ་ཞིང་སྙིང་རླུང་གི་འཕར་ལྡང་རེ་རེ་དང་ཡང་ཅིས་ཀྱང་འབྲེལ་ནས་ཡོད་པས། བྲོས་བྱོལ་གྱི་མི་འདིའི་གཏན་རྒྱུད་ཀྱི་ཁྲོད་དུ། ཁ་བ་ཁོ་ན། ང་ཡི་རྨི་ལམ་ལ་ཡང་ཡང་འཁོར་ཡོང་བའི་ཕྱིར་དྲན་གྱི་འཇིག་རྟེན་ཧྲིལ་བོ་དེ་ཡིན་པས། ལོ་ངོ་དུ་མའི་རྗེས་ཀྱི་རྡ་སའི་ཁ་བའི་ཁྲོད། ང་ཚོ་འཁྱགས་གྲང་གི་ནམ་ཟླའི་ཁྲོད་གཅེར་བུར་འགྱིངས་ནས། ཁ་བའི་འདབ་མ་རེ་རེ་དམར་རྗེན་རྗེན་གྱི་བྲང་གཞུང་དུ་སྤྲོ་བས་བསུས་ཡོད། རེད་ཡ། ཁ་བའི་འདབ་མ་རེ་རེ་ནི་བརྩེ་ཆེན་གྱི་མ་ཡུལ་སུ་ཞིག་གི་ཕྱག་ཟུང་ལྟར། ཇི་འདྲའི་དྲོད་ཁོལ་ལྡན་པའི་ལྷག་བསམ་གྱི་བྱིལ་བ་རེ་རེ་རེད་ཨང་། དེ་ལྟ་ནའང་ཆེས་མངོན་པར་མཛེས་པ་ནི། ཕྱིར་མིག་ཀློང་གི་ཕ་ཡུལ་གྱི་བྱིས་དུས་ཀྱི་འཚོ་བ་སྣུམ་པོ་སྟེ། སླད་མ་འདྲེས་པའི་ཚོར་བ་རེ་རེ། མར་ཕྱུར་གྱི་དྲི་ངད་དང་ལྷན་དུ་ཆལ་ཆིལ་ཆལ་ཆིལ་དུ་འཐིབས་ནས་སླེབས་ཤིང་། མཁུར་ཚོས་ཀུ་ཤུ་ལྟར་དམར་བའི་ཨ་ཅེ་འབྲོག་མོ་སུ་ཞིག་གིས། ཕ་གའི་ཉག་ཀ་དེར། བླ་སྲོག་ཅིག་ཅར་དུ་འགོག་པའི་ལ་གཞས་སྙན་མོ་ཞིག་གིས་གནམ་ས་སྒུལ་བར་བྱས། དེ་ནི་དེ་རིང་སྟེ། ཁ་བའི་ཁྲོད། ང་ཡི་ཕྱི་ནང་གསང་གསུམ་འོ་སྤྲུ་ཐུལ་བའི་དམིགས་གསལ་གྱི་ཞོགས་པ་ཞིག་ཡིན།
ཁ་བ་ལ་དུང་དྲག་པས། ང་ཚོས་ཀུ་སོའི་གད་རྒྱངས་དགུང་ལ་སྤུར་ཏེ། ཁ་བ་ཟེར་བ་ང་ཡིན། ང་ཟེར་ན་ཁ་བ་ཡིན་ཞེས་དྲན་གདུང་དང་ན་ཟུག་གི་བསྒྲགས་གཏམ་སྤེལ་ཡོད། ཡིན་ནའང་། བས་མཐའི་འཚོ་བ་འདིར། རྐང་འོག་གི་ས་གོར་མོ་དེ་ང་ལ་མི་དབང་ནའང་། ནམ་མཁའ་ནས་སྤྲིན་དཀར་ལྟར་ཆད་ཡོང་བའི་ཁ་བ་ལེབ་མོ་འདི་དག ང་ཁོ་ནར་དབང་བའི་དྲན་གདུང་གི་ལོངས་སྤྱོད་ཡིན། ང་ཁོ་ནས་ཚོར་བའི་ཕྱིར་དྲན་གྱི་མིག་ཆུ་ཡིན་པའི་བདག་དབང་ཡོད་ཚད་གློ་སྙིང་གི་སྦུབས་སུ་བསྐུངས་ཡོད།
དེ་ལྟར་དྲན་གྱིན་དྲན་གྱིན། ཁ་བ་ནི་ཞེན་ཆགས་དང་དྲན་གདུང་གི་ཀློང་ནས་འབར་བཞིན་པའི་མེ་ལྕེ་ཞིག་ཡིན་པ་ཤེས་ཤིང་། ཁ་བ་ནི་རྨི་ལམ་གྲོང་ན་རེ་སྨོན་གྱིས་སྐྱོང་བཞིན་པའི་དག་ཞིང་ཞིག་ཡིན་པའང་ཚོར་སོང་། ད་ནི། དྲན་གདུང་དང་ན་ཟུག རྨི་ལམ་དང་རེ་སྨོན། ཞེན་ཆགས་དང་ཕྱིར་མིག་ཡོད་ཚད། དུས་ཡུན་སྐལ་ཅིག་མའི་རྡ་སའི་ཁ་བ་འདིའི་ཁྲོད་ནས་དམར་རྗེན་གྱི་བྲང་གཞུང་ལ་ཡང་ཡང་ཀླན་ཞིང་། ཚ་བ་ཟེར་བའི་ཉི་འོད་ཅིག་ལ་མཚང་འབྲུ་དང་སྨོད་མོ་ཡིད་ཚིམས་པ་ཞིག་བྱས་ཏེ། དེ་རིང་གི་མཛེས་སྡུག་ཡོད་ཚད་མིག་ཀོང་དུ་བསྡུས་ནས་ཁ་བ་དང་འབྲོག་མྱི་ཟེར་བའི་ཟིན་ཐོ་ཞིག་བྲིས་ཏེ། བཙན་བྱོལ་གྱི་མི་ཚེའི་ཁྲོད་ཀྱི་ཁ་བ་ཡིའི་དྲན་གདུང་ལ་བློས་བསླངས་ཀྱི་ཏེ་ཏོག་རྐང་གཅིག་གི་མཆོད་པ་ཕུལ་ཡོད།
ཁ་བ་འམ་གངས་ནི་འབྱུང་བ་ལྔ་གི་ནུས་པ་དུས་གཅིག་ཏུ་འདུས་
ནས་ཆུ་ལ་ཁྱག་པ་ཆགས་པ་དང་སྤྲིན་ཆར་ཁྱག་པ་ཆགས་ནས་ས་
ལ་ལྷུང་བ་ལ་ཁ་བ་འམ་གངས་ཟེར་བ་དང་འབྲོག་པ་ནི་ཆེས་སྔ་བའི་
དུས་སུ་འཇིག་རྟེན་འདིར་མི་གི་འགྲོ་བ་འཕེལ་ནས་འབྲོག་གི་རྣམ་པ་
ནས་རིམ་པས་ཡར་རྒྱས་ཕྱིན་པ་ལ་ཞིང་པ་དང་རྗེས་ལུས་ཚོ་ལ་འབྲོག་པ་ཟེར་བའི་ཐ་སྙད་དེ་ཐོགས་ནས་ཟུར་དུ་འཇིག་རྟེན་གཞན་ནས་སླེབས་མེད་པ་དེང་སྐབས་འཛམ་གླིང་གི་ལུང་པ་མང་པོའི་ནང་གསར་བརྗེའི་ལམ་ལ་འགྲོ་མ་ཐུབ་པའི་འབྲོག་པ་དུད་འགྲོ་སེམས་ཅན་གསོ་སྐྱོངས་འོག་རྩ་ཆུ་བཟང་སར་མི་ཚེེ་སྐྱེལ་མཁན་གྲངས་ལས་འདས་པ་ཡོད་པ་དེ་དག་སྙིགས་དོར་བཅུད་ལེན་མ་ཐུབ་ནས་རྙིང་ཞེན་རིང་ལུགས་ཟེར་བའི་ཐ་སྙད་དེ་ལ་འགན་འཁུར་ནས་སོ་སིའི་མི་སྐྱེལ་བཞིན་པའི་སྤྱི་ཚོགས་དེ་ལ་འབྲོག་པ་ཟེར་བ་རེད་ལ་དེང་སྐབས་འཛམ་གླིང་འདི་དུས་རབས་དང་
བསྟུན་ནས་གསར་བརྗེའི་ལམ་ལ་ཁ་ཕྱོགས་ནས་ཞིང་པ་དང་འབྲོག་པ་
བཟོ་བཅོས་རིང་ལུགས་སོགས་སྤྱི་ཚོགས་ཀྱི་འཚོ་བ་ལ་འགན་འཁུར་ཐུབ་
པའི་མདུན་ལམ་མང་པོ་ཡོད་པ་ནི་གཡང་རྩེའི་ཁ་ལ་ཡར་མགྲོན་གྱི་དཔེལྟར་མ་རེད་དམ།