རོང་པོ་བློ་བཟང་རིན་ཆེན།
ལོ་སར་གྱི་གུང་སེང་ཉིན་བཅུ་པོ་འདི་ཡུད་ཙམ་གྱི་སྣང་བ་ལས་མ་བྱུང་། ཉིན་འདི་དག་ལ་ཁང་ཚན་གཅིག་པ་ཚོ་དང་མཉམ་དུ་ཧ་ཧ་ཧོ་ཧོ་ཡི་རྒོད་སྒྲ་དང་། ཁ་མཚར་ཀུ་རེ་ཡི་གཏམ་གླེང་ཁྲོད་ནས། ཟས་ཆུ་སྣ་ལྔ་གང་འདོད་ལ་རོལ་བཞིན་ལོ་སར་གྱི་གུང་སེང་འཁྱུག་ཙམ་གྱིས་རྫོགས་སོང་། ད་ནི་རང་ཤག་ཆུང་ཆུང་འདི་ལ་གད་བདར་ཞིབ་མོ་ཞིག་བགྱིས་ཏེ་ལྷོད་ལྷོད་ངང་<<ཡབ་ཀྱིས་བུ་མོར་སྤྲིངས་པའི་འཕྲིན་>>གྱི་<<རིགས་རྒྱུད་མི་འདྲ་བར་གྲུབ་ཚུལ་>>ཞེས་པའི་ཚན་པ་འདི་བཀླག་པར་བྱ།
གོ་ལ་འདིའི་སྟེང་དུ་ཤ་མདོག་དཀར་ནག་དམར་སེར་དང་། སྣ་ཡི་བཟོ་ལྟ་ལེབ་རིལ་ཉག་ཀྱོག་སོགས་མཆིས་ཤིང་། རིག་གཞུང་དང་གོམས་གཤིས་མི་འདྲ་བའི་རིགས་རྒྱུད་འདི་དག་རྩ་བའི་མེས་པོ་གཅིག་ལས་མཆེད་ཀྱང་། ཁོར་ཡུག་དང་གནམ་གཤིས་ཀྱི་རྐྱེན་གྱིས་ལུས་ཀྱི་ཁ་མདོག་དང་མཛེས་སྡུག་གི་ལང་ཚོ་ལྡན་མིན་ལ་ཁྱད་པར་ཤོར་བ་རེད་ཟེར།
ད་དུང་དེའི་དཔེར་མཚོན་དུ་ཀཱ་ཤཱི་མིར་གྱི་མི་རིགས་དང་རྒྱ་གར་ལྷོ་ཕྱོགས་ཀྱི་མི་རིགས་གཉིས་བཀོད་འདུག ཀཱ་ཤཱི་མིར་གྱི་མི་རིགས་ནི་འཚོ་སྡོད་བྱེད་སའི་གནམ་གཤིས་ཅུང་ཙམ་གྲང་མོ་ཡིན་པས་ཁོང་ཚོའི་ངོ་གདོང་སྐྱ་བོ་ཡིན་པ་དང་། རྒྱ་གར་ལྷོ་ཕྱོགས་ནི་གོ་ལའི་དཀྱིལ་ཐིག་ལ་ཁེལ་གྱི་ཡོད་དུས་ཚ་བ་ཧ་ཅང་ཆེན་པོ་ཡོད། དེའི་རྐྱེན་གྱིས་ལྷོ་ཕྱོགས་ཀྱི་མི་རིགས་ནག་པོ་གྱུར་བ་རེད་ཅེས་བཀོད་འདུག
སྤྱིར་རིགས་རྒྱུད་མི་འདྲ་བ་དག་གི་ལུས་ཀྱི་ཁ་མདོག་ལ། ཁོར་ཡུག་དང་གནམ་གཤིས་ཀྱིས་ཤུགས་རྐྱེན་ཐེབས་པ་རེད་ཟེར་ན་ཡིད་ལ་འཐད་པ་ཞིག་ལོས་ཡིན། འོན་ཏེ་མིག་ལ་སྔོ་ལྗང་སེར་གསུམ་དོད་པ་དང་། སྣ་ལ་ལེབ་རིལ་ཉག་གསུམ་ཡོད་པ། གཟུགས་ལ་རིང་ཐུང་འབྲིང་གསུམ་ཤོར་བ་སོགས་གནམ་གཤིས་དང་ཁོར་ཡུག་གིས་བསྐྲུན་པ་རེད་ཟེར་ན་ཅུང་ཙམ་ཡིད་ལ་འཐད་དཀའ་བ་ཞིག་མ་རེད་དམ།
མདོར་ན་རིགས་རྒྱུད་མི་འདྲ་བ་འདི་དག་དུས་ནམ་ཞིག་ལ་བྱུང་བའི་དུས་ཚོད་ངེས་ཅན་ཞིག་སུས་ཀྱང་གླེང་མི་ཐུབ་ནའང་། ནེ་རུ་ཁོང་གིས་རྡོ་ཆས་གསར་པའི་དུས་སུ་བྱུང་བའི་ཚོད་དཔག་བྱས་འདུག གང་ལྟར་རིགས་རྒྱུད་མི་འདྲ་བ་འདི་དག་རྩ་བའི་མེས་པོ་གཅིག་ལས་མཆེད་མིན་གང་ཡིན་ཡང་། ཁོར་ཡུག་དང་གནམ་གཤིས་ཀྱི་ཤུགས་རྐྱེན་འོག་ནས་རིགས་རྒྱུད་སོ་སོར་གྱུར་བ་རེད་ཅེས་སྡོམ་ཚིག་བཀོད་ཡོད་པ་འདྲ།
2019/2/10ཉིན་ལ་རང་ཤག་ཏུ་བྲིས།