རོང་པོ་བློ་བཟང་རིན་ཆེན།
ཉིན་ཤས་རིང་ <<ཡབ་ཀྱིས་བུ་མོར་སྤྲིངས་པའི་འཕྲིན>>ཞེས་པའི་དཔེ་དེབ་འདི་ཉིད་སྔར་གྱི་འཕྲོ་ནས་ཀློག་རྒྱུ་དང་བཀླགས་བྱང་འབྲི་རྒྱུའི་ཁོམ་ལོང་མ་བྱུང་། རེད་དེ་དེ་རིང་ཞོགས་པའི་བསིལ་རླུང་འཇམ་པོ་གདོང་ལ་ཕོག་པའི་བདེ་ཚོར་ལ་རོལ་བཞིན་<<རུས་སྡེ་གྲུབ་ཚུལ་>>ཞེས་པའི་ཚན་པ་འདི་སྔར་བཞིན་བཀླགས།
ང་ཚོས་མིག་སྔར་མཐོང་བཞིན་པའི་གླང་ཆེན་དང་། ཤ་བ། སྤྲེའུ་སོགས་ཁོ་ཚོ་ཚང་མས་རུ་དཔུང་བསྒྲིགས་ཏེ་རང་ཉིད་སྲུང་་སྐྱོབ་བམ། ཚོགས་པ་སྲུང་སྐྱོབ་བྱེད་ཀྱི་ཡོད་པ་བཞིན་གནའ་བོའི་ཤེས་རིག་གི་ཁྲོད་ནས་ཆེས་ཐོག་མར་མདུན་བསྐྱོད་བྱེད་མཁན་གྱི་མི་ཚོས་དཔུང་བསྒྲིགས་ཏེ་ཚོ་ཁག་བཟོས་པ་དེ་ལ་“རུས་སྡེ་”འབོད་སྲོལ་ཆགས་ཤིང་། ཁོ་ཚོས་མཉམ་ལས་ཀྱི་བྱ་བའི་འགོ་ཡང་དེ་ནས་བརྩམས་པ་ཡིན་འདུག
ང་ཚོས་ཅི་ཙམ་ཁོ་ཚོ་དང་ང་ཚོ། མི་དཀར་དང་མི་ནག ཤར་ཕྱོགས་པ་དང་ནུབ་ཕྱོགས་པ་སོགས་ཟེར་ནས་དབྱེ་འབྱེད་བྱས་རུང་། རྩ་བའི་ཁྱིམ་རྒྱུད་ཆེན་མོ་གཅིག་ལས་མཆེད་པའི་སྤུན་ཟླ་མིང་སྲིང་ཡིན་པའི་དྲན་སྐུལ་དང་གསལ་འདེབས་ནི་དཔེ་དེབ་འདི་ལས་ཡང་ཡང་བགྱིད་བཞིན་འདུག སྤྱིར་རུས་སྡེ་མ་གྲུབ་པའི་ཡར་སྔོན་དུ་འགྲོ་བ་མི་ནི་གླང་ཆེན་དང་སེང་གེ་སོགས། སེམས་ཅན་གཞན་ལས་སྟོབས་ཞན་ཞིང་། ཉམས་ཆུང་བ་ཞིག་ཡིན་དུས། རྒྱུན་དུ་སེམས་ཅན་གཞན་གྱི་གནོད་འཚེ་ལ་འཇིགས་ཤིང་སྔངས་སྐྲག་དང་དོགས་ཟོན་ཁྲོད་ནས་འཚོ་བ་སྐྱེལ་དགོས། མ་ཟད་རང་བྱུང་ཁམས་ཀྱང་ཁོ་ཚོའི་དགྲ་བོ་བཞིན་ས་འགུལ་དང། སྤྲིན་གསེབ་ནས་དྲག་ཆར་སོགས་བབས་པ་སོགས་ཀྱིས་སྡུག་ལ་སྦྱོར་བཞིན་ཡོད། ཁོང་ཚོ་བླང་དོར་གྱི་གནས་ལ་ཧ་ཅང་རྨོངས་པའི་དབང་གིས་སྤྲིན་གསེབ་ནས་སེར་དྲག་བབས་པ་དེ་ཡང་། རང་ཉིད་ནང་བཞིན་ཁ་ཟས་མཁོ་བའི་ལྷ་ཞིག་སྤྲིན་གསེབ་ལ་གནས་ཏེ་ཁ་ཟས་དགོས་པའི་འབོད་སྐུལ་བྱེད་ཀྱི་ཡོད་པ་ཚོར་ནས། སེམས་ཅན་གཞན་བསད་པའི་ཤ་ཁྲག་སོགས་ས་གནས་ག་གེ་མོ་ཞིག་ལ་ལྷའི་ཞལ་ཟས་ཀྱི་ཆེད་དུ་ཕུལ། ཁོང་ཚོས་དེ་ལ་བརྟེན་ནས་ས་འགུལ་དང་དྲག་ཆར་སོགས་འགོག་ཐུབ་པའི་ཚོག་དཔག་བྱས་པ་ཡིན་འདུག
རྩོམ་ཡིག་འདི་ལ་བརྟེན་ནས་ད་ལྟའི་ཆོས་ལུགས་གཞན་གྱིས་སེམས་ཅན་འབུམ་ཕྲག་རེ་བསད་ནས་མཆོད་འབུལ་བྱེད་ལུགས་དེའང་། གོང་བཞིན་རྨོངས་དད་ཅིག་གི་དབང་གིས་བྱུང་བ་ཐག་ཆོད་པ་ཞིག་མ་རེད་དམ། མ་ཟད་རང་ཉིད་ལ་ཁ་ལས་དགེ་ཕྱིར་རླུང་རྟ་མཆོད་པ་དང་། གཏེར་བུམ་མཚོ་ལ་གཡུགས་པ་སོགས་དེ་ལྟ་བའི་རྨོངས་དད་ཅིག་ལས་བྱུང་བ་མིན་པའི་ངེས་པ་ཡེ་ནས་མི་འདུག
2019/2/26་ལ་རང་ཤག་ཏུ་བྲིས།