ཆང་སྐྱེས་ནས།
ཁ་སང་སྤྲིན་པ་ལང་ལོང་འཁྲུགས་ཏེ་ཉིན་བྱེད་གཞོན་ནུའི་འོད་སྣང་བསྒྲིབས།།
ཁོར་ཡུག་མེ་ཏོག་ཆར་ཆུས་བརླན་ཞིང་གཙང་ཆུ་སྔོན་མོས་སྨྲེ་སྔགས་འབྱིན།།
རླུང་འཚུབ་དམར་པོ་ཤུགས་ཀྱིས་ལྡང་སྟེ་རྩྭ་སྐྱ་འཇག་མའི་སྐྱོ་གླུ་འཕུར།།
བདག་གིས་མགོ་བོ་སྨད་ཞོར་སྨད་ཞོར་རྒུན་ཆང་དམར་པོ་ཧབ་ཀྱིས་འཐུང་།།
གློ་བུར་སེམས་ཀྱི་ཡོལ་རས་ངོས་ལ་འདས་པའི་ལོ་ཟླ་རིང་མོའི་གཟུགས།།
མུ་འབྲེལ་བརྙན་འཕྲིན་ཟློས་གར་ཇི་བཞིན་ཡོད་ཚད་ཝ་ལེར་ཝ་ལེར་ཤར།།
མགོ་ཙ་ལ་ཙ་འོག་ཙ་སོགས་ཀྱི་སྒྲིག་གཞི་བཙན་པོའི་ཐུ་འོག་ན།།
ས་སུ་ག་བ་བློ་ལ་འཛིན་བཞིན་དབྱངས་གསལ་གཉིས་ཀྱི་བརྡར་ཤ་བཅད།།
ཚོད་དཀར་རུལ་བའི་དྲོས་ཇ་འཐུང་ཞོར་ཐ་མག་རྐང་གཅིག་འཕྲོག་རེས་བྱས།།
ཁྱེད་ཀྱིས་མགོ་སྐྲ་གཙང་མར་བཀྲུས་ཏེ་གསར་ཚུགས་སྟོན་རྒྱུར་ཧ་ཅང་དགའ།།
འདི་དག་བསམ་ན་བཟོད་ཐབས་མི་འདུག་གྲོགས་ཀྱི་དྭངས་མ་རྔོག་བུ་ལགས།།
སྐྱེ་རྒ་ན་འཆིི་འཇིག་རྟེན་ཆོས་ཉིད་བདག་སེམས་བདག་གིས་གསོ་ཐབས་བྱས།།
བདག་གིས་མཆོད་མེ་ཀོང་གཅིག་བཞག་པ་ཁྱེད་ལ་ཕུལ་བའི་འོད་སྣང་ཡིན།།
མ་ཎི་ཡིག་དྲུག་ཚར་འགའ་ཟློས་པ་གྲོགས་ལ་གནང་བའི་རྒྱགས་ཕྱེ་ལགས།།
དེ་བས་གྲོགས་ཁྱོད་ཕྱི་མའི་གྲོང་ན་མི་འཇིགས་བདེ་བར་བཞུད་པར་སྨོན།།
སློ་གྒྲོགས་རྔོག་བུའི་འཆི་རྫོང་ལ། །
གསོན་ལུས་ཆང་སྐྱེས་སྙན་དངགས་བྲིས། །
ཆང་སྐྱེས་མ་རེད་བློ་སྐྱེས་རེད། །
སྙན་དངགས་མ་རེད་གསོལ་འདེབས་རེད། །
འཆི་བ་ཟློག་པ་མི་ནུས་ཀྱང་། །
འཆི་བའི་འཇིགས་པ་ཟློག་ཐབས་ཡོད། །
གསོན་ལུས་སེམས་སྡུག་མི་ཟློག་ཀྱང་། །
སེམས་སྡུག་དགེ་བར་སྒྱུར་ཐབས་ཡོད། །
བཞུད་སོང་བའི་གཞིས་རྩེས་པ་བློ་བཟང་བསྟན་འཛིན་ནམ། རྒན་བསྟན་འཛིན་ལགས་ཀྱི་སྐོར་ལ།
https://www.youtube.com/watch?v=1UQIjJcnkQQ