རོང་པོ་བློ་བཟང་རིན་ཆེན།
ཞོགས་པའི་སྐྱ་རེངས་ཤར་ཏེ་ངའི་སྡོད་ཁང་གི་མུན་པ་ཡོངས་སུ་བསལ་ནས་དཀར་ཐིང་ཐིང་དུ་གྱུར། འོན་ཀྱང་ངས་དེ་རིང་ངལ་གསོ་ཡིན་པར་བསམས་ནས་སླར་ཡང་ཉལ་ཐུལ་མགོ་ལ་འཐེན་ནས་རྨི་ལམ་གྱི་ཞིང་ལ་བསྐྱོད་འགོ་བརྩམས། རེད་དེ་སྒེའུ་ཁུང་ནས་ཡོང་བའི་ཞོགས་པའི་བསིལ་རླུང་དང་། སྐད་ཅོར་འདྲ་མིན་སྒྲོགས་པའི་བྱ་བྱེའུ་ཡི་ཚོགས་ཀྱིས་ངའི་ལྷིང་འཇགས་ཀྱི་རྨི་ལམ་ཡོངས་སུ་དཀྲོགས་སོང་། དེ་ནས་ངས་བོད་གཞས་སྙན་མོ་ཞིག་ཁ་པར་དུ་གྲགས་སུ་བཅུག གཙང་ཆུ་དྭངས་མོ་ཕོར་གང་འཐུང་ཞོར་<<ཡབ་ཀྱིས་བུ་མོར་སྤྲིངས་པའི་འཕྲིན་>>གྱི་<<རྒྱ་ནག་དང་རྒྱ་གར་>>ཞེས་པའི་ཚན་པ་འདི་བཀླགས་པ་ཡིན།
ཚན་པ་ཐུང་ངུ་འདིར་རྒྱ་དཀར་ནག་གཉིས་ཀྱི་སྐོར་ནས་མདོ་ཙམ་བྲིས་འདུག མ་གཞི་རྒྱ་དཀར་ནག་གཉིས་ལོ་རྒྱུས་ཁྲོད་དུ་ཤེས་དཔལ་སྲིད་གསུམ་ཧ་ཅང་དར་མྱོང་བའི་རྒྱལ་ཁབ་གཉིས་ཡིན་མོད། འོན་ཀྱང་དེ་དག་གི་གཏིང་ཟབ་ས་དང་རྒྱ་ཆེ་ས་ནས་གང་ཡང་གླེང་མི་འདུག་ཟེར་ན་ཡང་ཐལ་མི་ཆེ། གཅིག་བྱས་ན་དེབ་ཆུང་འདི་ཉིད་བུ་མོ་ཆུང་ཆུང་ཞིག་གི་ཤེས་ཚད་དང་བསྟུན་ནས་བྲིས་པས་ཡིན་ཡང་སྲིད། གང་ལྟར་རྒྱ་ནག་གི་སྐོར་བཤད་སྐབས་ཤེས་དཔལ་སྲིད་གསུམ་གྱི་གལ་ཆེན་རང་བཞིན་གང་ཡང་མ་བཤད་པར། རྒྱ་ནག་གི་ཡི་གེ་འབྲི་ཐབས་སྐོར་ནས་ཉུང་ཙམ་བྲིས་འདུག རྒྱ་ནག་གི་ཡི་གེ་ནི་དང་ཐོག་ཧིན་རྡི་་དང་དབྱིན་ཡིག་སོགས་དང་གཏན་ནས་མི་འདྲ་བར་རི་མོའི་རྣམ་པས་གཟུགས་དབྱིབས་འབྲི་བཞིན་ཡོད། དེའང་ཧིན་་རྡི་དང་དབྱིན་ཡིག་སོགས་ནང་བཞིན་གཡས་ནས་གཡོན་དུ་འབྲི་རྒྱུ་དང་། ཡང་ན་ཁ་ཆེའི་ཡི་གེ་ནང་བཞིན་གཡོན་ནས་གཡས་སུ་འབྲི་རྒྱུ་མ་ཡིན་པར་རྩེ་ནས་མཇུག་བར་དུ་འབྲི་དགོས་པ་རེད་ཟེར་བ་སོགས་ལས་གཞན་མང་པོ་ཞིག་བྲིས་མི་འདུག་གོ །
རྒྱ་གར་གྱི་སྐོར་ནས་འབྲི་སྐབས་ཀྱང་དངོས་གནས་རིན་ཐང་ལྡན་པའི་རྒྱ་གར་གྱི་ཤེས་དཔལ་སྲིད་གསུམ་སྐོར་ནས་མ་གླེང་བར། གནའ་བོའི་ཚོང་ལས་ཀྱི་སྐོར་ནས་རོབ་ཙམ་གླེང་འདུག མ་གཞི་ནེ་རུ་ཁོང་ནི་རྒྱ་གར་གྱི་གནའ་དེང་གི་ཤེས་བྱ་ཡོངས་ལ་རྒྱུས་མངའ་ཆེ་བའི་པཎ་ཌི་ཏ་ཞིག་རེད། འོན་ཀྱང་ཁོང་གིས་བུ་མོར་རྒྱ་གར་སྐོར་ནས་འཕྲིན་ཡིག་འདི་འབྲི་སྐབས་ཅིའི་ཕྱིར་ཚོང་ལས་སྐོར་ནས་འབྲི་དགོས་པའི་རྒྱུ་མཚན་མ་ཤེས།
ཕྱོགས་གཅིག་ནས་བཤད་ན་དེ་ནི་རང་གི་བུ་མོར་གནའ་བོའི་རྒྱ་གར་གྱི་ཚོང་ལས་སྐོར་ལ་མི་རྨོངས་པ་ཙམ་བྱ་འདོད་ལས། ཚོང་ལས་རིག་པའམ་དཔལ་འབྱོར་རིག་པ་རྒྱ་གར་གྱི་ཤེས་དཔལ་སྲིད་གསུམ་ལས་ཆེས་གལ་ཆེན་དུ་མཐོང་ནས་འཆད་པ་མ་ཡིན་སྙམ།
ང་ཚོས་མ་མཐོང་བ་ཙམ་ལས་ནེ་རུས་རང་གི་བུ་མོར་བསྐུར་བའི་འཕྲིན་ནི་<<ཡབ་ཀྱིས་བུ་མོར་བསྐུར་བའི་འཕྲིན་>>གཅིག་བུ་མ་ཡིན་པར་ཧ་ཅང་མོད། དེ་དག་ཏུ་ཤེས་རིག་སྐོར་ནས་བཤད་མེད་པའི་ངེས་པ་ལར་ནས་མེད་པས་རྗེས་སུ་དབྱིན་ཡིག་གི་རྨོངས་པ་སད་སྐབས་དོ་སྣང་བྱ་ཆོག མ་ཟད་ཁོང་གིས་བརྩམས་པའི་དཔེ་དེབ་བཞི་བཅུ་ལྷག་ཡོད་སྐད་ཐོས། དེ་དག་ལས་རྒྱ་གར་ཤེས་རིག་སྐོར་གྱི་དཔལ་ཡོན་མང་པོ་ཞིག་ལོངས་སུ་སྤྱོད་ཐུབ་པའི་རེ་འདུན་གཙང་མ་ཡོད་དོ།།
2019/4/1ཉིན་རང་ཤག་ཏུ་བྲིས།
རྒྱ་གར་གྱི་སྲིད་བློན་དམ་པ་ནེ་རུའི་རྩམ་དེབ་ལྔ་བཅུ་དྲུག་བཅུ་
ལྷག་ཙམ་ཡོད་པ་དེ་བལྟ་འདོད་དང་ཀློག་འདོད་ཡོད་མཁན་ཚོ་
ཨི་ལ་སྦད་ཏི་ནེ་རུའི་དཔེ་མཛོད་ལ་གཟིགས་ན་དེ་ནས་ཆ་ཚང་
ཤེས་ཐུབ་པ་དང་ནེ་རུའི་ཚོང་ལས་སྐོར་བུ་མོར་རྒྱུས་སྟོན་གནང་
བ་ནི་འཛམ་གླིང་འདི་ཚོང་ལས་ཡར་རྒྱས་ཐོག་ནས་མཐུན་འབྲེལ་
དང་སྤྱི་ཚོགས་འཚོ་བར་ཚོང་ལས་ཐོག་ནས་བསྲ་བརྟན་དང་མཐུན་
འབྲེལ་བཟོ་ཐུབ་པའི་ཁྲོམས་རའི་དཔལ་འབྱོར་ ( Marketing Economey ) ལ་འགན་སྲུང་ཐུབ་པའི་ལམ་སྟོན་གནང་བ་ཞིག་ཀྱང་ཡིན་སྲིད།