གནས་ཚུལ་མཁོ་སྤྲོད་པ། ཐའེ་ཝན་རྒྱལ་སྤྱིའི་བོད་བརྒྱུད་ནང་བསྟན་ཞིབ་འཇུག་ཚོགས་པའི་ཡིག་ཚང་།
སྤྱི་ཟླ་4 ཚེས་21ཉིན། ཐའེ་ཝན་གྱི་རྒྱལ་ས་ཐའེ་པེ་རུ་ལོ་སྔ་མ་ནང་བཞིན། རྒྱལ་སྤྱིའི་བོད་བརྒྱུད་ནང་བསྟན་ཞིབ་ཚོགས་ཀྱིས་གོ་སྒྲིག་ཞུས་པའི་འདི་ལོའི་སངས་རྒྱས་ཀྱི་འཁྲུངས་སྐར་དུས་ཆེན་གཞི་རྒྱ་ཆེ་བ་ཞིག་སྲུང་རྩི་ཞུས་འདུག
དེ་ཡང་། ཐའེ་ཝན་རྒྱལ་སྤྱིའི་བོད་བརྒྱུད་ནང་བསྟན་ཞིབ་འཇུག་ཚོགས་པའི་ངོས་ནས་སྤྱི་ལོ་2019ཟླ་4 ཚེས་21 ཉིན། ས་གནས་རྒྱ་ལུགས་ཞིང་རྩིས་ཀྱི་ས་ག་ཟླ་བ་འཆར་ཉེ་དང་བསྟུན། ཐའེ་ཝན་གྱི་རྒྱལ་ས་ཐའེ་པའི་མེ་འཁོར་འབབ་ཚུགས་ལྟེ་བའི་ལྷོ་སྒོའི་མདུན་ཐང་དུ་འདི་ལོའི་སྟོན་པའི་འཁྲུངས་སྐར་སྲུང་རྩི་ཞུས་ཡོད་པ་དང་། སྟོན་པའི་ཞལ་ཐང་ཤིན་ཏུ་ཆེ་ཞིང་ལེགས་པ་བཤམས་པའི་མདུན། མེ་ཏོག་སོགས་མཆོད་པའི་རྫས་སྣ་ཚོགས་དང་། བོད་རྒྱའི་ལུགས་ཀྱི་ཁྲུས་གསོལ་གྱི་སྟེགས་བུ། སྟོན་པའི་འཁྲུངས་སྐར་སྲུང་རྩི་དང་ཁྲུས་གསོལ་གྱི་ཕན་ཡོན་གྱི་བྱང་བུ་སོགས་བཤམས་ཤིང་། སྔ་དྲོ་ཆུ་ཚོད་བཅུ་པ་ནས་དངོས་གཞི་དབུ་འཛུགས་ཀྱིས། ཞིབ་འཇུག་ཚོགས་པའི་འགན་འཛིན་བླ་མ་ཡེ་ཤེས་རབ་རྒྱས་དང་། བཀྲ་ཤིས་རིན་པོ་ཆེ། སྒྲུབ་དཔོན་སློབ་དཔོན་བསོད་ནམས་ཉི་མ་སོགས་ཐའེ་ཝན་གནས་བཞུགས་བོད་བརྒྱུད་ནང་པའི་མཁན་སྤྲུལ་དགེ་བཤེས་རྣམ་པས་དབུ་དྲངས་པའི་དགེ་འདུན་པ་དྲུག་ཅུ་ལ་ལྷག་དང་། མི་མང་བརྒྱ་ཕྲག་འགའ་ཞིག་འདུ་འཛོམས་ཐོག་འཁྲུངས་བསྐར་དང་འབྲེལ་བའི་ཞལ་འདོན་ཁག་དབུ་འཛུགས་དང་འབྲེལ། འདུས་མང་ཡོངས་ནས་སྟོན་པ་ཐུགས་རྗེ་ཅན་གྱི་སྐུ་ཐང་གི་དྲུང་དུ་ཁྲུས་གསོལ་དང་འབྲེལ་བའི་ཐོག་ནས་སྟོན་པའི་འཁྲུངས་སྐར་སྲུང་རྩི་ཞུས་ཡོད། དེ་ནས་མུ་མཐུད་ཕྱི་དྲོའི་ཆུ་ཚོད་གསུམ་པའི་བར་དུ་ཆེད་དུ་ཕེབས་མཁན་དང་། འབབ་ཚུགས་སུ་རྒྱུ་འགྲུལ་བྱེད་པའི་མི་མང་བྱིངས་ལ་འཁྲུངས་སྐར་ལ་མཉམ་ཞུགས་ཀྱི་གོ་སྐབས་བསྐྲུན་ཏེ་སྣེ་ལེན་གནང་བས་དུས་རྒྱུན་བོད་བརྒྱུད་ནང་བསྟན་དང་འབྲེལ་བ་ཡོད་པའི་སློབ་མ་དག་ལས་གཞན་པའི་ལམ་འགྲོ་བ་མང་པོ་ཞིག་ཀྱང་ཡ་མཚན་དང་དང་བའི་བློས་སྐུལ་ནས་རང་འགུལ་གྱིས་ཁྲུས་གསོལ་དང་བྱིན་རླབས་ཞུ་བ་སོགས་ཀྱིས་མཉམ་ཞུགས་བྱེད་པ་དང་། དུས་རྒྱུན་འབབ་ཚུགས་སུ་ངེས་མེད་དུ་རྒྱུ་བའི་ཉམ་ཐག་སྤྲང་པོ་དེ་འདྲས་ཀྱང་མཛད་སྒོ་ལ་ཁ་ཟས་ཀྱི་གནང་སྦྱིན་ཡོད་མེད་དྲིས་ནས་མཉམ་ཞུགས་བྱེད་པ་སོགས་འཁྲུངས་སྐར་ལ་མཐོང་ཐོས་དྲན་རེག་གིས་འབྲེལ་བ་འཇོག་མཁན་ཧ་ཅང་མང་པོ་ཞིག་བྱུང་།
དེ་བཞིན། ཡུལ་ངོས་སུ་སྔར་ནས་གྲ་སྒྲིག་ཡོད་པའི་འཁྲུངས་སྐར་གྱི་དྲན་རྟེན་ལག་རྟགས་དང་། སྟོན་པའི་འཁྲུངས་སྐར་གྱི་ཕན་ཡོན་དང་དགོས་དམིགས་ངོ་སྤྲོད་སོགས་གང་ལ་གང་འདོད་ཀྱིས་བློ་ཡིད་ཚིམ་པར་བྱས་པ་སོགས་ལས་འགུལ་ཧ་ཅང་དོན་སྙིང་ལྡན྄་པའི་ངང་ནས་མཇུག་དྲིལ་གནང་ཡོད།
དེ་ཡང་ཞིབ་འཇུག་ཚོགས་པའི་ངོས་ནས། དེང་གི་དུས་འདིར་ནང་པའི་ཆོས་གྲོགས་གཞན་དང་མཉམ་དུ་རང་ཉིད་ནང་པ་སངས་རྒྱས་པ་ཞིག་ཡིན་པ་མཚོན་པ་ལ། བསྟན་པ་སྤྱི་བཙན་གྱི་དབང་དུ་བྱས་ན་སྟོན་པ་ཤཱཀྱ་ཐུབ་པའི་རྗེས་འཇུག་ཅིག་ཡིན་པ་གསལ་སྟོན་གནང་རྒྱུ་དེ་རང་ཉིད་ནང་པ་ཞིག་ཡིན་པའི་ཐུན་མོང་གི་ངོས་འཛིན་ཆགས་ཀྱི་ཡོད་པར་ངོས་འཛིན་བྱེད་བཞིན་ཡོད་པར་མ་ཟད། ས་ཆ་དམིགས་བསལ་འདི་འདྲ་ཞིག་ཏུ་ལས་འགུལ་འདི་འདྲ་ཞིག་སྤེལ་བ་བརྒྱུད་ནས་སྤྱིར་སྐྱེ་བོ་མང་པོ་ཞིག་ལ་སྟོན་པ་ཐུགས་རྗེ་ཅན་གྱི་སྐུ་གསུང་ཐུགས་ཀྱི་སྣང་བརྙན་མཇལ་བའི་སྐལ་བཟང་བསྐྲུན་པ་དང་། 
ཁྱད་པར་དུ་ལོ་གཅིག་ནང་ཐེངས་གཅིག་ལས་མེད་པའི་ནང་པའི་རྗེས་འཇུག་པའི་དུས་ཆེན་གལ་ཆེ་ཤོས་འདིར་ཐའེ་ཝན་གྱི་སྤྱི་ཚོགས་སུ་ཡོད་པའི་བོད་བརྒྱུད་ནང་པ་རྣམས་ཀྱིས་ཀྱང་སྲུང་རྩི་ཞུ་བའི་དགོས་ངེས་ཀྱི་འགན་འཁྲི་སྒྲུབ་པ་ཞིག་ལ་ངོས་འཛིན་བྱེད་ཀྱི་ཡོད། ལོ་རེ་བཞིན་བོད་བརྒྱུད་་ནང་བསྟན་རྗེས་འཇུག་པ་རང་གིས་འགན་ཁུར་ནང་གོ་སྒྲིག་གནང་བཞིན་པའི་སངས་རྒྱས་ཀྱི་འཁྲུངས་སྐར་དུས་ཆེན་འདི་ནི་ད་ལྟའི་ཆར་
ཐའེ་ཝན་དུ་ཀུན་གྱིས་ངོས་འཛིན་ཡོད་པའི་ཐའེ་ཝན་བོད་བརྒྱུད་ནང་བསྟན་ཐུན་མོང་མཉམ་ཞུགས་ཀྱི་ཐོག་ནས་སྟོན་པ་ཐུགས་རྗེ་ཅན་གྱིས་སྟོན་པའི་འཁྲུངས་སྐར་འཁྲུངས་རྩི་བྱེད་བཞིན་པའི་སྡིང་ཆ་གཅིག་པུ་དེ་ཆགས་ཀྱི་ཡོད། དེ་དང་ཆབས་ཅིག ཞིབ་འཇུག་ཚོགས་པའི་ངོས་ནས། འཛམ་གླིང་ཡུལ་གྲུ་ཁག་གི་བོད་བརྒྱུད་ནང་པའི་རྗེས་འཇུག་ཚང་མའི་ངོས་ནས་ཀྱང་སྟོན་པའི་འཁྲུངས་སྐར་ལ་གལ་ཆེན་དུ་རྩི་རྒྱུ་དང་ལོ་རེ་བཞིན་ས་གནས་སོ་སོ་ནས་རྣམ་པ་འདྲ་མིན་གྱི་ཐོག་ནས་ལས་འགུལ་སྲུང་རྩི་གནང་རྒྱུར་འབོད་སྐུལ་གནང་བཞིན་ཡོད་པ་བཅས།
ནང་བསྟན་རིན་པོ་ཆེ་ཁྲི་ལོར་བརྟན་པར་སྨོན།