གནས་ཚུལ་མཁོ་སྤྲོད་པ་མཛད་སྒོ་གོ་སྒྲིག་ཚོགས་ཆུང་།
རྒྱལ་བ་འབྲི་གུང་པའི་བསྟན་པའི་སྲོལ་གཏོད་མཁན། དཔལ་མགོན་འཕགས་པ་ཀླུ་སྒྲུབ་ཀྱི་རྣམ་འཕྲུལ་དུ་གྲགས་པ་སྐྱོབ་པ་འཇིག་རྟེན་གསུམ་མགོན་གྱི་རྗེས་དྲན་དང་འབྲེལ་བའི་ཆོས་ཕྱོགས་ཀྱི་མཛད་སྒོ་སྣ་ཚོགས་པ་ཞིག་འཛམ་གླིང་ཡུལ་གྲུ་ཁག་གི་འབྲི་གུང་བཀའ་བརྒྱུད་ཀྱི་རྗེས་འཇུག་པ་ཡོངས་ནས་ལོ་རེ་བཞིན་སྤེལ་སྲོལ་ཡོད་པ་ལྟར། 
འདི་ལོའི་ཐའེ་ཝན་གྱི་ཉི་ཤུའི་ལྔ་མཆོད་ཆེན་མོ་དེ་ཉིད། རྒྱལ་སྤྱིའི་འབྲི་གུང་བཀའ་བརྒྱུད་ཐའེ་ཝན་ལྷན་ཚོགས་ཀྱི་ལམ་སྟོན་དང་ཐའེ་ཝན་གྱི་འབྲི་གུང་བཀའ་བརྒྱུད་ཀྱི་ཆོས་ཚོགས་ཁག་གི་མཐུན་གྱུར་བཅས་ཀྱི་འོག རྒྱལ་སྤྱིའི་བོད་བརྒྱུད་ནང་བསྟན་ཞིབ་འཇུག་ཚོགས་པའི་ཚོགས་གཙོ་ལས་ཐོག་པ་ཐའེ་ཝན་བྱམས་བརྩེའི་ཆོས་གླིང་གི་དབུ་འཛིན་བླ་མ་ཡེ་ཤེས་རབ་རྒྱས་མཆོག་གིས་ཐུགས་འགན་ཡོངས་རྫོགས་ཁུར་བའི་ཐོག་ནས། སྤྱི་ཟླ་༦ ཚེས་༢༩ ཉིན་ཐའེ་ཝན་དུ་ཟབ་རྒྱས་ངང་སྲུང་བརྩི་ཞུས་ཡོད།
འདི་ནི་ཐའེ་ཝན་དུ་འབྲི་གུང་སྐྱོབ་པ་འཇིག་རྟེན་གསུམ་མགོན་གྱི་༼ཉི་ཤུ་ལྔ་མཆོད་༽ཆེན་མོ་ཚོགས་ཐེངས་བཅུ་གསུམ་པ་ཡིན་འདུག་ཅིང་། ལོ་འདིར་ལོ་སྔ་མ་དག་དང་ཅུང་ཟད་མ་འདྲ་བར་གོ་སྒྲིག་ཚོགས་པའི་ངོས་ནས་དམིགས་བསལ་བསྟན་པ་སྤྱིའི་བར་གྱི་མཐུན་ལམ་དང་གཅིག་གྱུར་གྱི་འདུ་ཤེས་མཐོར་འདེགས་ཡོང་རྒྱུར་དམིགས་ནས་བོད་བརྒྱུད་ནང་བསྟན་ཆོས་བརྒྱུད་ཆེན་པོ་བཞི་དང་། རྒྱ་བརྒྱུད་དང་ལྷོ་བརྒྱུད་ཀྱི་ནང་པའི་མཁན་སྤྲུལ་དགེ་བཤེས་དང་གནས་བརྟན་མང་པོ་ཚོགས་དབུར་གདན་འདྲེན་ཞུས་ཡོད།
དེ་ཡང་ལྷོ་བརྒྱུད་ནང་བསྟན་གྱི་གནས་བརྟན་མིན་ཀོ། རྒྱ་བརྒྱུད་ནང་བསྟན་གྱི་མཁན་པོ་ཧཱའོ་ཞན་ཧྥ་ཧྲི། སྔ་འགྱུར་རྙིང་མའི་ཀཿཐོག་རིག་འཛིན་ཆེན་པོ། དཔལ་ལྡན་ས་སྐྱ་བའི་བཀྲ་ཤིས་རིན་པོ་ཆེ། རི་བོ་དགེ་ལུགས་པའི་ལྷ་རམས་པ་ཧ་ཤེན་རིན་པོ་ཆེ་བཅས་དང་། བྱེ་བྲག་འགྲོ་མགོན་བཀའ་བརྒྱུད་པའི་མཁན་པོ་དབང་ཕྱུག་རྡོ་རྗེ་རིན་པོ་ཆེ་དང་། མགར་རྣམ་རོལ་རིན་པོ་ཆེ། བུ་མང་རིན་པོ་ཆེ། ཆོས་འཕེལ་རིན་པོ་ཆེ། དཔལ་མཁྱེན་རིན་པོ་ཆེ། མཁན་པོ་པ་སངས། མཁན་པོ་བཟང་པོ། སྒྲུབ་དཔོན་བསོད་ནམས་ཉི་མ། མཁན་པོ་ཤེས་རབ་འོད་ཟེར་སོགས་བླ་སྤྲུལ་དགེ་བཤེས་བཞི་བཅུ་ལྷག་གིས་དབུས་པའི་དགེ་འདུན་པ་བརྒྱ་དང་བདུན་ཅུ་དོན་གསུམ་ཙམ་དང་། མི་མང་བདུན་བརྒྱ་ལྷག་ཙམ་བཅས་མཉམ་ཞུགས་གནང་ཡོད། གོ་སྒྲིག་ཚོགས་པའི་ངོས་ནས་དགེ་འདུན་པ་ལ་སྙེན་བཀུར་སོགས་གྱ་ནོམ་པ་ཞུས་ཐོག །ཐའེ་ཝན་ནང་པའི་ཚོགས་པ་ཆེ་ཤོས་ཚི་ཅིས་ཀྱིས་ཀྱང་ཚོགས་པ་དེར་དམིགས་བསལ་ཞབས་ཏོག་ཞུས་འདུག་པ་སོགས་ཆོས་བརྒྱུད་རིས་མེད་ཀྱི་རྣམ་པ་བཟང་པོ་མངོན་པ་ཞིག་བྱུང་ཡོད་པར་མ་ཟད་ཚང་མས་གདེངས་འཇོག་ཧ་ཅང་ཆེན་པོ་ཞུས་ཡོད་འདུག
དེ་བཞིན་དུ། ཆེད་དུ་གདན་འདྲེན་ཞུས་པའི་རྒྱ་བརྒྱུད་དང་ལྷོ་བརྒྱུད་ཀྱི་ནང་པའི་སྐུ་ཚབ་དག་གིས་ཀྱང་དམིགས་བསལ་ཐུགས་ཚོར་ཆེན་པོའི་ཐོག་ནས་ང་ཚོ་འདི་ལྟར་ནང་པའི་ཆོས་བརྒྱུད་ཚང་མ་དམ་ཚིག་གོང་བའི་གཅིག་གྱུར་གྱི་ཐོག་ནས་སྡིངས་ཆ་གཅིག་ཏུ་མཉམ་དུ་འཛོམས་ཤིང་ཕན་ཚུན་གཅིག་ངོ་གཅིག་གིས་ཤེས་པ་ཞིག་བྱུང་བ་འདི་ཧ་ཅང་དོན་སྙིང་ཆེན་པོ་ལྡན་པ་ཞིག་ཡིན་ཚུལ་གྱི་གཏམ་བཤད་དང་གདེངས་འཇོག་མཐོན་པོ་བྱས་ཡོད།
བོད་བརྒྱུད་ནང་པའི་ངོས་ནས་ཀྱང་སྤྲུལ་སྐུ་ཀཿཐོག་རིག་འཛིན་ཆེན་པོ་རིན་པོ་ཆེས། དེ་ཡང་འབྲི་གུང་སྐྱོབ་པ་འཇིག་རྟེན་གསུམ་མགོན་པོ་ནི་བོད་གངས་ཅན་དུ་སངས་རྒྱས་དངོས་སུ་བྱོན་པ་ལྟ་བུའི་མཛད་པ་སྐྱོང་གནང་མཁན་ཡིན་པར་མ་ཟད། དབྱར་གནས་གཅིག་ལ་དགེ་འདུན་པ་འབུམ་གྱིས་ཚུལ་ཤིང་བཞེས་པ་བྱུང་བ་ཡིན་ཚུལ་སོགས་སྐྱོབ་པ་རིན་པོ་ཆེའི་ཆེ་བ་དང་འབྲེལ་བའི་གསུང་བཤད་གལ་ཆེན་གནང་བ་ལྟ་བུས་མཚོན། ཆོས་བརྒྱུད་གཞན་གྱི་ཁོངས་ནས་གདན་འདྲེན་ཞུས་པའི་རིན་པོ་ཆེ་རྣམ་པས་ཀྱང་དེ་དང་མཚུངས་པའི་གདེངས་འཇོག་གནང་ཡོད།
མཇུག་མཐར། ཐའེ་ཝན་གྱི་༼ཉི་ཤུ་ལྔ་མཆོད་ཆེན་མོ༽་ཐེངས་བཅུ་གསུམ་པའི་སྤྱིའི་འགན་འཛིན་པ་བླ་མ་ཡེ་ཤེས་རབ་རྒྱས་མཆོག་གིས་ཚོགས་ཞུགས་པ་ཡོངས་ལ་ཐུགས་རྗེ་ཆེ་ཞུའི་གསུང་བཤད་གནང་ཞིང་། ཁོང་གི་ངོས་ནས། མཛད་སྒོ་འདིར་ནང་པའི་ཆོས་བརྒྱུད་ཁག་ཡོངས་རྫོགས་ཀྱི་དགེ་འདུན་པ་དང་སྐྱེས་ཆེན་མང་པོ་ཞིག་གདན་འཛོམས་པ་ཞིག་ཞུ་ཐུབ་པ་བྱུང་བ་ནི་དམིགས་བསལ་སྐལ་བ་བཟང་པོ་ཡིན་པར་ངོས་འཛིན་ཞུ་གིན་ཡོད་ཚུལ་སོགས་ཀྱི་གཏམ་བཤད་གྲུབ་རྗེས། མཛད་སྒོ་ཡོངས་རྫོགས་ཧ་ཅང་ཧ་ཅང་ཕུན་སུམ་ཚོགས་པའི་ངང་ནས་མཇུག་སྒྲིལ་གནང་ཡོད་པ་རེད།
རྒྱལ་བ་འབྲི་གུང་པའི་བསྟན་པ་རྒྱས་གྱུར་ཅིག