གཡུ་སྒང་དགེ་འདུན་གྱིས།
རྒྱལ་ཀུན་ཐུགས་བརྩེ་མ་ལུས་གཅིག་བསྡུས་པའི།།
འཕགས་མཆོག་མི་ཡི་རྣམ་རོལ་གང་དེ་ཡིས།།
གྲངས་མེད་འགྲོ་བའི་བདེ་སྡུག་མཐའ་དག་ཀུན།།
བདག་གིས་བཞེས་པར་མཛད་ལ་ཕྱག་འཚལ་ལོ།།
གཞལ་མེད་ཐུགས་དགོང་ལྷ་ལམ་ཡངས་པོའི་གྲོགས།།
རྣམ་དཔྱོད་བློ་གྲོས་མཚམས་སྤྲིན་གསར་བའི་མདངས།།
བསླབ་གསུམ་ཉི་ཟླའི་ནོར་བུའི་དོ་ཤལ་འཆང་།།
རྩ་གསུམ་བླ་མ་སྤྱི་བོའི་རྒྱན་དུ་བཀུར།།
རབ་དཀར་བྱམས་བརྩེའི་ཆུ་འཛིན་ཕང་ཕུང་གཡོ།།
ལག་ལེན་བསིལ་འཇམ་རླུང་བུ་དལ་གྱིས་ལྡང་།
དད་ལྡན་ལྕུག་ཕྲན་མགོ་ལྕོག་ལྡེམ་ལྡེམ་བྱེད།།
བརྩེ་ཆེན་དམ་པ་བསྟན་འགྲོའི་མགོན་གྱི་མཆོག །
རབ་རྒྱས་གཟི་བརྗིད་ལྷུན་པོའི་དཔངས་སུ་སྙེགས།།
དོན་ལྡན་གསུང་གིས་མཁས་རྣམས་བག་ལ་ཉལ།།
ས་ཆེན་གོ་ལར་ཞི་བདེའི་འོད་སྣང་བསྐྲུན།།
འཇིག་རྟེན་སྒྲོན་མེ་ཁྱེད་ལས་གཞན་མ་མཆིས།།
དགུང་གྲངས་གྱ་བཞིའི་བགྲང་བྱ་གདན་དུ་བཏང་།།
སྔོན་བྱུང་ལུང་བསྟན་བརྒྱ་དང་བཅུ་གསུམ་ཞེས།།
མཛད་ཀྱང་མཚན་ལམ་ལྷ་མོའི་ཞལ་སྔ་ནས།།
བཅུ་ཕྲག་བཅུ་གཅིག་གསུངས་ལ་ཕྱག་འཚལ་ལོ།།
གསང་གསུམ་མཛད་འཕྲིན་རྒྱ་མཚོའི་འཇིངས་བརྒལ་ཏེ།།
སྲིད་པའི་འདོད་ཡོན་ལྔ་ལ་ཆགས་བྲལ་ཞིང་།།
སྐྱོན་ཡོན་དབྱེ་བ་རྟོགས་པའི་བློ་གྲོས་ཀྱིས།།
བདག་གཞན་མཉམ་བརྗེ་མཛད་པ་འཇིག་རྟེན་མིག །
མ་གྱུར་འགྲོ་ལ་བརྩེ་བས་སྤྱན་རས་གཟིགས།།
ཟབ་བརླིང་བློ་གྲོས་རྗེ་བཙུན་འཇམ་དཔལ་དབྱངས།།
ལས་ཉོན་ཐབས་ཀྱིས་བཅོམ་པས་མཐུ་སྟོབས་བདག །
རིགས་གསུམ་གཅིག་བསྡུས་མགོན་པོ་རྟག་བརྟན་ཤོག །
གཡུ་སྒང་དགེ་འདུན་གྱིས། ༢༠༡༩། ཟླ་ ༠༧ ཚེས་ ༠༥ ཉིན་བྲིས།
བུ་རེ་བ་ཅན་ལ་རེ་བལྟས་ཡོད་ཟེར་བ་བཞིན་སྙན་ངག་ཡག་པོ་འདུག