བསྟན་འཛིན་རབ་རྒྱས།
མཇལ་བའི་གང་སྐུ་གཟི་བྱིན་སྟོང་འབར་མཁའ་ཁྱབ་ཀུན་གྱི་བརྗིད་མཆོག་ཉིད། །
ཐོས་པའི་གསུང་བཟང་བདུད་བརྩིའི་སྙིང་པོ་སྐྱེ་འགྲོ་ཡོངས་ཀྱི་དབྱངས་མཆོག་གོ། །
དཔོག་དཀའི་ཐུགས་བྱམས་ཟབ་རྒྱས་བདག་ཉིད་འགྲོ་བའི་མགོན་དཔུང་ཁོ་ན་མཆོག །
གང་ལའང་མེད་པའི་སྙིང་རྗེའི་བདག་ཉིད་༸རྒྱལ་དབང་མཆོག་ལ་མགོས་ཕྱག་འཚལ། །
བཅུ་དྲུག་བཞད་པའི་སྐུ་ན་ཕྲ་དུས་བོད་ལྗོངས་ཆབ་སྲིད་བདག་གིར་བཞེས། །
བོད་འབངས་བདེ་ཐབས་ཁོ་ནར་གཞོལ་མཛད་བཅོས་སྒྱུར་མཛད་ཆེན་གྲངས་ལས་འདས། །
བཙན་བྱོལ་གཞུང་བཙུགས་མང་གཙོའི་རིང་ལུགས་མི་ལོ་དྲུག་བཅུར་བརྒལ་བའི་རིང་། །
གངས་ཅན་པ་ཡི་བླ་ན་མེད་པའི་སྐྱབས་མགོན་༸རྒྱལ་མཆོག་པད་དཀར་འཆང་། །
གཞལ་མེད་ཐུགས་ཀྱི་རླབས་ཆེན་མཛད་པས་འགྲོ་ཀུན་བུ་ལྟར་གཅིག་ཏུ་བརྩེས། །
མུ་མེད་གྲངས་ཡས་ཕྱོགས་བཅུར་ཁྱབ་པའི་འཕྲིན་ལས་རྨད་བྱུང་མཛད་མཆོག་ལ། །
མགྲིན་དབྱངས་གཅིག་ཏུ་ཀུན་གྱིས་བཀུར་ཞིང་མོས་པས་དད་གུས་མེ་ཏོག་མཆོད། །
ཡོངས་སུ་གསོལ་བའི་ཏྰ་ལའི་བླ་མའི་མཚན་སྙན་འཇིག་རྟེན་རྒྱན་མཆོག་གོ། །
འདི་ལོ་ས་ཕག་དགུང་གི་ལོ་དེར་གང་མཆོག་གུང་གྲངས་གྱ་བཞིར་ཐོག །
ཕེབས་པའི་༸སྐུ་ཡི་འཁྲུངས་སྐར་ཉིན་མོར་གུས་ཕྱག་ལན་བརྒྱ་འཚལ་དང་བཅས། །
གུང་ཀེག་ཉེར་འཚེ་རབ་ཏུ་ཞི་ཞིང་སྐུ་ཁམས་གསལ་གདངས་གསེར་ཁྲིའི་སྟེང་། །
གཞོམ་བྲལ་མེད་པར་བརྟན་པོར་བཞུགས་ཤིག་འགྲོ་བའི་སྐྱབས་གཅིག་སྤྱན་རས་གཟིགས། །