རེ་མདོ་སེངྒེ།
༄༅།། ཁ་སང་སྟེ་ཕྱི་ལོ་ ༢༠༡༩ ལོའི་ཟླ་ ༧ ཚེས་ ༢༠ ཉིན་ཕྲན་འཇར་མན་གྱི་རྒྱལ་ས་བྷ་ལེན་དུ་ཡོད་པའི་སྐབས། ཨ་ལགས་གཙང་བླ་སྐུ་ཕྲེང་ལྔ་པ་འཇིགས་མེད་བློ་བཟང་བསྟན་པ་རྒྱ་མཚོ་མཆོག་སྐུ་ཞི་བར་གཤེགས་འདུག་ཅེས་པའི་གནས་ཚུལ་ཞིག་ཐོས་འཕྲལ་སེམས་ཁམས་སྐྱོ་སྣང་གིས་ཁེངས་པ་ཞིག་བྱུང། ཨ་ལགས་ཚང་ཀིརྟིའི་མཚན་ཞབས་རིན་པོ་ཆེའི་ཞལ་ཆེམས་ཡོད་པ་ལྟར་བར་ལམ་ལོ་ཤས་ཀྱི་གོང་ནས་རྐྱང་ཚའི་ཆབ་ཚན་དུ་ཐུགས་རྗེ་ཆེན་པོ་རྒྱལ་བ་རྒྱ་མཚོའི་བསྙེན་མཚམས་ལ་བཞུགས་བཞིན་ཡོད་པའི་མཚམས་ཁོངས་སུ་སྙུང་གཞི་བཞེས་བཞིན་ཡོད་པའི་གནས་ཚུལ་ཐོས་ཀྱང། སྐུ་གཟུགས་ཀྱི་གནས་སྟངས་དང་དགུང་ནའི་བབ་གང་ཅིའི་ཐད་ནས་གློ་བུར་དུ་དགོངས་པ་རྫོགས་འགྲོ་རྒྱུ་རེད་བསམ་པ་མ་བྱུང་ཡང། གཏམ་ངན་དེ་ཐོས་པའི་སྐབས་རང་གི་ནུས་པ་ལ་དཔག་པའི་དགོངས་རྫོགས་ཕྲན་བུ་ཞུ་རྒྱུ་ལས་བྱེད་ཐབས་གཞན་གང་ཡང་མ་མཆིས། ཨ་ལགས་ཚང་ཁོང་གདན་ས་སྟག་ཚང་ལྷ་མོའི་བླ་སྤྲུལ་ཆེ་ཁག་ཅིག་ཡིན་པར་མ་ཟད། ཁོ་བོ་དཀའ་ཁག་ལ་ཐུག་པའི་སྐབས་བཀའ་དྲིན་གྱིས་བསྐྱངས་མྱངས་པ་ཞིག་ཡིན་པས་འདིར་ཁོང་གི་རྣམ་ཐར་གནད་བསྡུས་ཤིག་ངོ་སྤྲོད་ཞུ་བར་འདོད།
སྤྱིར་གདན་ས་སྟག་ཚང་ལྷ་མོར་གཙང་བླ་ཆེ་བ་དང་ཆུང་བ་གཉིས་ཡོད་པ་ལས་ཁོང་ནི་གཙང་བླ་ཆེ་བ་ཡིན་པས་ཡོངས་གྲགས་སུ་ཨ་ལགས་ཆེ་བ་ཞེས་མཚན་འབོད་ཞུ་བའི་སྲོལ་དར་ཡོད། ཨ་ལགས་གཙང་བླ་སྐུ་གོང་མ་ཐུབ་བསྟན་རྒྱ་མཚོ་ཚང་གདན་ས་སྟག་ཚང་ལྷ་མོའི་ཚོགས་ཆེན་ཁྲིར་ཕེབས་པས་ཁོང་གདན་ས་འདིའི་ཁྲི་པ་མཚན་སྙན་ཅན་ཞིག་ཡིན་ལ། ༸སྐྱབས་མགོན་ཀིརྟི་སྐུ་ཕྲེང་བརྒྱད་པ་བློ་བཟང་འཕྲིན་ལས་ཚང་དགོངས་པ་རྫོགས་པའི་རྗེས་སུ་ཁོང་གི་རྒྱལ་ཚབ་ཏུ་བཞུགས་པ་དང། ༸སྐྱབས་མགོན་ཀིརྟི་སྐུ་ཕྲེང་དགུ་པ་སྐལ་བཟང་བློ་གྲོས་ཚང་གི་ཡང་སྲིད་ངོས་འཛིན་ཞུ་བ་དང་གདན་སར་འགོད་པའི་སྐབས་ཀྱི་བྱེད་སྒོ་མཐའ་དག་གི་འགན་ཁུར་གཙོ་བོར་བཞེས་པར་མ་ཟད། ༸སྐྱབས་མགོན་ཀིརྟི་སྐུ་ཕྲེང་དགུ་པ་སྐལ་བཟང་བློ་གྲོས་ཚང་གི་ཡོངས་འཛིན་སྐུ་བགྲེས་པའི་ཐུགས་འགན་ཡང་བཞེས། ཀིརྟི་ཚང་གི་གདན་ས་ཁག་གི་སྲོལ་རྒྱུན་ལ་རྒྱལ་ཚབ་དང་ཡོངས་འཛིན་གྱི་སྤྲུལ་སྐུ་སུ་ཡིན་པ་དེ་རང་བཞིན་གྱིས་གདན་ཐོབ་ཡོད་པའི་བླ་སྤྲུལ་ཆེ་ཁག་གི་གྲས་སུ་གྱུར་པ་ཡིན་པས་གདོང་གྲལ་གྱི་བླ་མ་ཞེས་བརྩི་མཐོང་ཆེན་པོ་ཞུ་བའི་སྲོལ་ཡོད། ཨ་ལགས་གཙང་བླ་ལྟ་བུར་མཚོན་ན་སྟག་ཚང་ལྷ་མོར་ཀིརྟིའི་བླ་བྲང་ཁམས་གསུམ་ཟིལ་གནོན་མ་བརྩིས་པས་ནང་ཆེན་ཆེ་ཁག་བཞི་སྟེ། ཐཱ་ལའི་ནང་ཆེན་དང། གཙང་བླའི་ནང་ཆེན། ཁ་གྱའི་ནང་ཆེན། མཛོད་དགེ་སྤྲུལ་སྐུའི་ནང་ཆེན་བཅས་ནང་ཆེན་བཞི་ཡོད་པའི་ནང་གི་གཅིག་ཡིན་ལ། གཙང་བླ་སྐུ་ཕྲེང་གཉིས་པ་རུས་མ་སྐྱབས་ཞུ་བ་དབུས་གཙང་དུ་ཕེབས་པའི་པཎ་ཆེན་སྐུ་ཕྲེང་བདུན་པ་བསྟན་པའི་ཉི་མས་ཁོང་གི་ཡོངས་འཛིན་སྟག་མོ་ཨ་ལི་དཔལ་ལྡན་གྱི་ཡང་སྲིད་ལ་ངོས་འཛིན་མཛད། དེ་ནས་བཟུང་གཙང་བླ་སྐུ་ཕྲེང་རིམ་བྱོན་རྣམས་ཀུན་གཟིགས་པཎ་ཆེན་རིན་པོ་ཆེ་སྐུ་ཕྲེང་ན་རིམ་ལ་དམིགས་བསལ་འབྲེལ་བ་ཡོད་པ་ཞིག་ཏུ་གྱུར་ཅིང། ལྷག་པར་དུ་པཎ་ཆེན་སྐུ་གོང་མ་མཆོག་གིས་ཨ་ལགས་གཙང་བླ་འཇིགས་མེད་བློ་བཟང་བསྟན་པ་རྒྱ་མཚོ་ཚང་ལ་དམིགས་བསལ་གཟིགས་སྐྱོང་གནང་བའི་ལོ་རྒྱུས་མང།
ཨ་ལགས་ཚང་གདན་ས་སྟག་ཚང་ལྷ་མོའི་ཚོགས་ལ་ཞུགས་ནས་དུས་ཡུན་རིང་པོ་མ་སོང་བར་བཅོས་བསྒྱུར་ལ་ཁ་གླན་པས་གཞོན་དུས་སུ་སྐུ་ཡོན་གསན་བཞེས་ཀྱི་གོ་སྐབས་བྱུང་མེད་ཀྱང། ཕྱིས་སུ་སྲིད་བྱུས་ཅུང་གུ་ཡངས་ཕྱིན་པའི་སྐབས་མཁས་དབང་མཛོད་དགེ་ཨ་ཁུ་ཉི་མ་ཚང་གི་སློབ་གྲྭར་དུས་ཡུན་གང་འཚམས་རིང་ཐུན་མོང་བའི་རིག་གནས་དང། སྨན་གཞུང། ལམ་རིམ་བློ་སྦྱོང་སོགས་ལ་གསན་བསམ་གནང་འདུག་ཅིང། གདན་ས་སྟག་ཚང་ལྷ་མོའི་དགེ་བའི་བཤེས་གཉེན་ཆེན་མོ་ནག་རྒྱའི་ཨ་ཁུ་བློ་བཟང་བསྟན་འཛིན་ཚང་གི་མདུན་ནས་གཞུང་ཆེན་ཁག་ལ་གསན་བསམ་གནང་བའི་ལོ་རྒྱུས་འདུག
ཕྲན་གྱིས་ཤེས་པའི་སྐབས་ཨ་ལགས་ཚང་གིས་ལྷ་སར་བརྐྱང་ཕྱག་འཚལ་ནས་ཕེབས་པས་གདན་ས་སྟག་ཚང་ལྷ་མོར་བཞུགས་མི་འདུག ལྷ་ས་ནས་ཕྱིར་ཕེབས་པའི་སྐབས་དགོན་པའི་འདུས་མང་ལ་སྐུ་འགྱེད་དང་རྟེན་སྐལ་རེ་འགྱེད་པ་དྲན་གྱི་འདུག ཨ་ལགས་ཚང་ལྷ་སར་ཕྱག་འཚལ་ནས་ཕེབས་པའི་སྐབས་ལམ་བར་གྱི་ངག་རྒྱུན་རྣམ་ཐར་མང་པོ་བཤད་དུ་འདུག་ཅིང། ང་ཚོ་ལྷ་སར་ཨ་ལགས་ཀྱི་དྲུང་དུ་ཡོད་པའི་སྐབས་ཁོང་གིས་གསུང་མོལ་གྱི་ཞོར་དུ་རྣམ་ཐར་ཡ་མཚར་ཅན་མང་པོ་གསུངས་ཀྱང་འདིར་ཡིག་ཚོགས་ལ་འཇིགས་ནས་བྲིས་མེད། ལྷ་ས་ནས་ཕྱིར་ཕེབས་པའི་རྗེས་སྟག་ཚང་ལྷ་མོའི་ཚོགས་ཆེན་འདུ་ཁང་ལུང་རིགས་རིན་ཆེན་སྤུངས་པའི་གན་མཛོད་སྔོན་མ་བཅོས་བསྒྱུར་སྐབས་གཏོར་བཤིག་ཐེབས་པ་དེ་བསྐྱར་བཞེངས་བྱེད་པའི་འབུལ་སྡུད་པར་བསྐོས་འདུག་པས། ཨ་ལགས་ཚང་ཉིན་མཚན་མེད་པར་ལྷ་སྡེ་མང་ཚོགས་ཀྱི་འདོད་མོས་ལྟར་ཕེབས་བཞུད་གནང་སྟེ་འབུལ་རྫས་གང་བྱུང་བ་ཡོངས་རྫོགས་དགོན་པའི་གཞུང་ལ་འབུལ་རྐྱང་བྱེད་པ་ལས་སྐར་གང་ཙམ་ཡང་བདག་ཐོབ་མི་བྱེད་པའི་སྙན་གྲགས་ཆེ།
ཁོ་བོ་ལོ་བཅུ་དྲུག་ཐོག་རོགས་པ་བཅས་དགོན་པའི་ནང་གི་དགེ་རྒན་དང་ནང་མི་སུ་གང་གིས་ཀྱང་མ་ཤེས་པར་བྱས་ཏེ་ལྐོག་ནས་ལྷོ་ཁ་བརྒྱུད་དེ་སྟག་ཚང་ལྷ་མོ་ནས་རྐང་ཐང་གིས་ལྷ་སར་དབུས་མཇལ་དུ་ཕྱིན། སྐབས་དེར་ཨ་ལགས་ཚང་དང་ཞབས་ཕྱི་པ་བཅས་ལྷ་སར་བཞུགས་འདུག ང་དང་རོགས་པ་གཉིས་ལྷ་སར་འབྱོར་བའི་སྐབས་ཉིན་གཅིག་གི་ཟས་སོང་འདང་བ་ཙམ་ཡང་ལག་ཏུ་མེད་པས་ཨ་ལགས་ཚང་གི་བཞུགས་གནས་རྩད་གཅོད་བཏང་སྟེ་ཕྱིན། ཁོང་གིས་ལྷ་སར་ང་ཚོ་བྱམས་བརྩེ་ཆེན་པོས་བདག་སྐྱོང་གནང་སྟེ་ལྷ་སར་བསྡད་རིང་གི་ཟས་སོང་དང་ལག་དངུལ་ཡོངས་རྫོགས་ནར་གཏོང་གནང་བར་མ་ཟད། ལྷ་སའི་ཉེ་འཁོར་དུ་གནས་སྐོར་དུ་འགྲོ་བའི་སྐབས་སུ་ཡང་འགྲིམ་འགྲུལ་གྱི་འགྲོ་སོང་ཡོངས་རྫོགས་ཨ་ལགས་ཚང་གིས་ཕངས་སེམས་མེད་པར་བཏང་གནང་བྱུང། སྐབས་དེར་ང་དང་རོགས་པ་གཉིས་རྒྱ་གར་ལ་འགྲོ་རྒྱུའི་བསམ་བློ་ཡོད་པ་ཨ་ལགས་ཚང་ལ་ཞིབ་ཏུ་ཞུས་པར། ཁོང་གིས་ད་དུང་ཁྱེད་གཉིས་ལོ་ཆུང་བས་ལམ་བར་དུ་དཀའ་ངལ་ཆེན་པོ་འཕྲད་རྒྱུ་ཡིན་པར་མ་ཟད་སྟབས་མ་ལེགས་ན་སྲོག་ལ་སྐྱོན་འབྱུང་རྒྱུའི་ཉེན་ཁ་ཡོད། ཕ་ཡུལ་དུ་ཕ་མ་གཉིས་ཀྱིས་གཙོས་ནང་མི་ཚོས་སེམས་ཁྲལ་ཆེན་པོ་བྱེད་ཀྱི་འདུག།གནས་སྟངས་འདིའི་འོག་ནས་ངས་ཁྱེད་གཉིས་ཉེན་ཁའི་འོག་ཏུ་གཏོང་ཐུབ་ཀྱི་མི་འདུག རྗེས་སུ་རིམ་པས་སྟབས་འགྲིག་པོ་ཡོང་གི་རེད། ད་ཐེངས་ཕྱིར་ཕ་ཡུལ་ལ་ལོག་རྒྱུ་ངའི་རེ་བ་ཡིན་གསུངས་ཏེ། ངེད་གཉིས་ལ་ལྷ་ས་ནས་ཕ་ཡུལ་དུ་ཕྱིར་ལོག་དགོས་པའི་ལམ་སྟོན་གནང་བར་མ་ཟད། ལམ་གྲོན་ཡོངས་རྫོགས་ཨ་ལགས་ཚང་གིས་གནང། སྐབས་དེར་ཨ་ལགས་ཚང་གིས་བྱམས་སྐྱོང་གནང་བའི་བཀའ་དྲིན་ནི་དུས་ནམ་ཡང་བརྗེད་མི་ཐུབ་པ་ཞིག་ཡིན་ལ། ང་ཕ་ཡུལ་དུ་འབྱོར་བའི་ལོ་ཤས་ཀྱི་རྗེས་ངའི་ཕ་དམ་པ་སྐུ་ཚེ་མ་ཟིན་པའི་སྐབས། སྟག་ཚང་ལྷ་མོ་ནས་ཨ་ལགས་ཚང་གདན་འདྲེན་ཞུས་པ་ལྟར་ཕེབས་ཏེ་ཀུན་རིག་གསུངས་པ་ད་ལྟ་ཡང་གསལ་པོ་དྲན་གྱི་འདུག་པས། ངའི་ནང་མི་ཡོངས་རྫོགས་ཀྱིས་ཨ་ལགས་ཁོང་ངའི་ཕ་དྲིན་ཅན་ལ་ཡང་ཤིན་ཏུ་བཀའ་དྲིན་ཆེན་པོ་ཡིན་པར་སེམས་གཏིང་ནས་ངོས་འཛིན་ཞུ་གི་ཡོད།
དེ་ནས་དུས་ཚོད་རིང་པོ་མ་འགོ་བར་ཨ་ལགས་གཙང་བླ་ཚང་རྒྱ་གར་ལ་ཕེབས་འདུག་ཅེས་པ་ཞིག་ཐོས། ཕྱི་ལོ་ ༡༩༩༣ ལོར་ཕྲན་རྒྱ་གར་དུ་འབྱོར་བའི་སྐབས་ཨ་ལགས་གཙང་བླ་ཚང་གིས་གཙོ་བོ་ཀིརྟིའི་མཚན་ཞབས་རིན་པོ་ཆེའི་སྐུ་བཅར་ཞབས་ཕྱི་གནང་བའི་ཞོར་དུ་ཀིརྟིའི་བྱེས་པ་གྲྭ་ཚང་གི་མཁན་ཚབ་ཀྱི་མཛད་འགན་ཡང་བཞེས་འདུག ཨ་ལགས་ཁོང་དགོན་པའི་འཛིན་སྐྱོང་ཐོག་ཐུགས་རྒྱུས་དང་ནུས་པ་ཡོད་མཁན་ཞིག་ཡིན་མིན་མི་ཤེས་ཀྱང། རྒྱ་གར་དུ་འབྱོར་བ་ནས་བཟུང་སྟེ་ཕྱི་ལོ་ ༢༠༠༦ ལོར་ཀིརྟིའི་མཚན་ཞབས་རིན་པོ་ཆེ་དགོངས་པ་རྫོགས་པའི་བར་གྲྭ་རྐྱང་དཀྱུས་མ་ཞིག་གི་རྣམ་ཐར་བསྐྱངས་ཏེ་ཀིརྟིའི་མཚན་རིན་པོ་ཆེའི་ཐུགས་ཟིན་གྱི་ཞབས་ཕྱི་གནང་བས་ཁོང་རྣམ་པ་གཉིས་ཀྱི་འབྲེལ་བ་ནི་ལྷ་བླ་མ་ཁུ་དབོན་གྱི་རྣམ་ཐར་དང་རྗེས་སུ་མཐུན་པ་ཞིག་བྱུང་ཡོད། ཀིརྟིའི་མཚན་ཞབས་རིན་པོ་ཆེར་མངའ་བའི་དབང་ལུང་ཁྲིད་མན་ངག་དང་བཅས་པའི་བརྒྱུད་པ་ཡོངས་རྫོགས་ཨ་ལགས་གཙང་བླ་ཚང་ལ་མངའ་བས། ཁོང་ནི་དོན་ངོ་མའི་སྙན་བརྒྱུད་གདམས་བྱེ་བའི་མཛོད་འཛིན་ཞིག་ཏུ་གྱུར་ཡོད།
ཕྱི་ལོ་ ༢༠༠༦ ལོར་ཀིརྟིའི་མཚན་ཞབས་རིན་པོ་ཆེ་སྐུ་ཞི་བར་གཤེགས་པའི་རྗེས་དགོངས་རྫོགས་མཆོད་འབུལ་དང་གསེར་གདུང་གསར་བཞེངས་སོགས་གྲུབ་པ་ན། ཐུགས་རྗེ་ཆེན་པོ་རྒྱལ་བ་རྒྱ་མཚོའི་བསྙེན་མཚམས་ཀྱི་སྔོན་འགྲོའི་འབུམ་ལྔ་གསོག་རྒྱུའི་དོན་དུ་ཨ་ལགས་ཚང་ལོ་གཉིས་གསུམ་རིང་གནས་མཆོག་ཝ་རཱ་ཎ་སཱིར་བཞུགས། ཕྱི་ལོ་ ༢༠༠༩ ལོར་ཕྲན་གྱིས་<<བོད་ཀྱི་ཤེས་ཡོན་ལམ་ལུགས་དང་སྲིད་བྱུས་>>ཞེས་པ་འབྲི་རྒྱུ་འགོ་འཛུགས་བྱེད་པའི་སྐབས་ཝ་རཱ་ཎ་སཱིར་རྒྱུ་ཆ་འགའ་ཤས་འཚོལ་སྒྲུབ་བྱ་བར་བསྐྱོད་པའི་སྐབས། ཨ་ལགས་ཚང་ཝ་རཱ་ཎ་སཱིར་བཞུགས་འདུག་པས་ཕྲན་ཨ་ལགས་ཀྱི་མདུན་དུ་འཚམས་ཞུར་བཅར། སྐབས་དེར་ཨ་ལགས་ཚང་གིས་འབུམ་ཕྱག་གྲངས་གསོག་གནང་བཞིན་འདུག་པས་སྐུ་ཤ་ཞི་ནས་སྐུ་གཟུགས་ཀྱི་མདངས་ཤིན་ཏུ་སྐྱོ་པོར་གྱུར་འདུག་པར་མ་ཟད་ལོ་ཤས་ནང་བགྲེས་ཉམས་ཆེན་པོར་གྱུར་འདུག་པའི་མཇལ་སྣང་བྱུང། ཉིན་དེར་དགོང་མོ་འཕྱི་བོའི་བར་ཨ་ལགས་ཀྱི་དྲུང་དུ་བཀའ་མོ་ཞུས་ནས་བསྡད། ཨ་ལགས་ཀྱིས་ཀིརྟིའི་མཚན་ཞབས་རིན་པོ་ཆེའི་རྣམ་ཐར་མང་པོ་གསུང་བྱུང་ལ། ཨ་ལགས་ཁོང་ཐུགས་རྗེ་ཆེན་པོ་རྒྱལ་བ་རྒྱ་མཚོའི་བསྙེན་མཚམས་ལ་བཞུགས་དགོས་པ་ཀིརྟིའི་མཚན་ཞབས་རིན་པོ་ཆེའི་ཞལ་ཆེམས་ཡོད་ལུགས་ཀྱང་གསུངས། ཕྲན་སྔོན་མ་ལྷ་སར་ཨ་ལགས་དང་མཉམ་དུ་འདྲིས་པོ་བྱུང་ཡོད་ལ། སྔོན་མ་ཀིརྟིའི་མཚན་ཞབས་རིན་པོ་ཆེ་རྡ་རམ་ས་ལར་བཞུགས་པའི་སྐབས་མཇལ་ཁར་ལན་མང་པོ་བཅར་གྱི་ཡོད་པས་ཨ་ལགས་དང་རང་བཞིན་གྱིས་འདྲིས་པོར་ཆགས་ཡོད། དེར་བརྟེན་ཕྲན་གྱིས་ཨ་ལགས་ཀྱི་མདུན་དུ་འཚེར་སྣང་མེད་པར་བསམ་ཚུལ་དྲང་མོ་ཞུ་ཐུབ་ཀྱི་ཡོད་པས། བསམ་ཚུལ་ཐད་ཀར་ཞུས་པ་ལ་ཨ་ལགས་ཀྱིས་ཀྱང་མཉེས་པོ་གནང་གི་འདུག ཉིན་དེར་ཨ་ལགས་ཚང་གིས་ཁོང་གིས་འཐེན་ཐུག་ཅིག་བཟོ་གི་ཡིན་གསུངས་ཏེ་ཕྱག་བསྟར་ནས་འཐེན་ཐུག་ཞིམ་པོ་ཞིག་གནང་བྱུང་བ་ད་དུང་ཡང་གསལ་པོ་དྲན་གྱི་འདུག
ཕྱི་ལོ་ ༢༠༡༠ ལོའི་ཟླ་ ༡༢ ཚེས་ ༡༡ ཉིན་ཨ་ལགས་ཚང་བལ་ཡུལ་བརྒྱུད་ནས་ཕྱིར་བོད་དུ་ཕེབས། རྒྱ་གར་དུ་ཡོད་པའི་འབྲེལ་ཡོད་འགའ་ཤས་ཀྱིས་བོད་དུ་རྒྱ་གཞུང་གིས་འཛིན་བཟུང་བྱ་རྒྱུའི་ཉེན་ཁ་ཡོད་ལུགས་ཞུས་པར། ཁོང་གིས་ང་གང་དུ་བསྡད་ཀྱང་ཁ་འདོན་སྒྲིབ་སྦྱོང་བྱ་རྒྱུ་ཡིན་པས་བཙོན་ཁང་གི་ནང་དང་ཕྱི་གང་ལ་བསྡད་ཀྱང་ཁྱད་པར་མེད་གསུངས་པའི་སྐད་ཆ་གོ་མྱོང། གང་ལྟར་ཨ་ལགས་བོད་དུ་ཕེབས་ནས་ལྷུན་རྩེར་འབྱོར་བའི་སྐབས་རྒྱ་ནག་གཞུང་གི་ཉེན་རྟོག་པ་དང་གསང་བའི་ལས་ཁུངས་ཀྱིས་འཛིན་བཟུང་བྱས་ཏེ་རིམ་གྱིས་སི་ཁྲོན་གྱི་གསང་བའི་ལས་ཁུངས་དང་ཉེན་རྟོག་པར་རྩིས་སྤྲད་འདུག ཁོ་ཚོས་ཟླ་བ་འགའ་ཤས་རིང་དྲི་རྩད་བྱས་པའི་མཐའ་མ་ཨ་ལགས་ཚང་ལོ་གཉིས་ལྷག་རིང་བཙོན་འཇུག་བྱ་རྒྱུའི་ཁྲིམས་ཐག་བཅད་དེ་བཙོན་འཇུག་བྱས། ཨ་ལགས་བཙོན་ཁང་དུ་བཅུག་པའི་རྗེས་སུ་ཡང་ཐུགས་ཕམ་དང་སྐྱོ་ཉམས་གང་ཡང་མི་མཛད་པར་བཙོན་ཁང་དུ་རྒྱུན་ལྡན་ལྟར་ཞལ་འདོན་དང་སྒོམ་སྒྲུབ་ཆག་མེད་གནང་བའི་ཐོག།མཛད་སྤྱོད་མཐའ་དག་ཆོས་དང་མཐུན་པ་ཤ་སྟག་གནང་གི་ཡོད་པར་བརྟེན་བཙོན་ཁང་གི་འབྲེལ་ཡོད་ལས་བྱེད་དང་བཙོན་སྲུང་པ་རྣམས་ཨ་ལགས་ཀྱི་མཛད་སྤྱོད་ལ་ཧ་ལས་པར་གྱུར་ཏེ་བཙོན་འཇུག་གི་དུས་ཡུན་ཐག་གཅོད་ལས་བྲི་སྟེ་བཙོན་གྲོལ་ཞུས་ཡོད་འདུག
བཙོན་གྲོལ་ཐོབ་པའི་རྗེས་རྐྱང་ཚའི་ཆབ་ཚན་དུ་ཁོང་ལ་མཚམས་ཁང་ཞིག་གསར་བཞེངས་ཞུས་ཡོད་པ་དེར་བླ་མའི་ཞལ་ཆེམས་ལྟར་ཐུགས་རྗེ་ཆེན་པོ་རྒྱལ་བ་རྒྱ་མཚོའི་བསྙེན་མཚམས་ལ་བཞུགས། བར་ལམ་ཟླ་བ་འགའ་ཤས་ཀྱི་གོང་ནས་ཨ་ལགས་ཚང་གིས་སྐུ་སྙུང་ཞིག་བཞེས་ཡོད་སྟབས་འབྲེལ་ཡོད་རྣམས་ཀྱིས་སྨན་ཁང་ལ་ཕེབས་དགོས་པའི་རེ་བ་ཞུས་འདུག་ཀྱང། ཁོང་གིས་ངའི་ན་ཚ་ལ་སྐྱོན་གང་ཡང་མི་འདུག་བསྙེན་མཚམས་མཇུག་གྲུབ་པ་བྱ་རྒྱུ་ལག་ཆེན་པོ་ཡིན་གསུངས་ཏེ་སྨན་ཁང་ལ་ཕེབས་རྒྱུ་ཞལ་བཞེས་གནང་མི་འདུག།ཐུགས་རྗེ་ཆེན་པོ་རྒྱལ་བ་རྒྱ་མཚོའི་བསྙེན་མཚམས་སྦྱོར་དངོས་མཇུག་གསུམ་ཨ་ལགས་ཚང་གི་ཐུགས་དགོངས་ལྟར་ཡོངས་སུ་གྲུབ་པ་ན། འབྲེལ་ཡོད་རྣམས་ཀྱིས་ད་ཨ་ལགས་སྨན་ཁང་ལ་ཕེབས་རོགས་ཞེས་བསྐྱར་དུ་ཞུ་བ་ནན་ཆེ་ཕུལ་བའི་སྐབས། ངའི་ན་ཚ་འདི་ལ་སྨན་ཁང་དུ་སོང་བས་ཕན་ཐོགས་ཡོད་པ་ཞིག་མིན་ཡང་ཁྱེད་ཚོའི་རེ་བ་ལྟར་སྨན་ཁང་དུ་སོང་ཡང་ཆོག་ཅེས་གསུངས་ཏེ་སྨན་ཁང་ལ་ཕེབས་འདུག།འོན་ཀྱང་སྨན་ཁང་དུ་ཕན་ངོ་གང་ཡང་མེད་པ་གསལ་པོར་གྱུར་པ་ན། ཕྱི་ལོ་ ༢༠༡༩ ལོའི་ཟླ་ ༧ ཚེས་ ༡༧ ཉིན་ཨ་ལགས་ཚང་གི་ཞལ་བཀོད་ལྟར་གདན་ས་སྟག་ཚང་ལྷ་མོའི་གཙང་བླའི་ནང་ཆེན་དུ་གདན་འདྲེན་ཞུས་འདུག།གདན་ས་སྟག་ཚང་ལྷ་མོར་གདན་འདྲེན་ཞུས་ནས་ཉིན་གཉིས་ལས་མ་འགོ་བར་ཕྱི་ཟླ་ ༧ ཚེས་ ༢༠ ཉིན་གྱི་ཆུ་ཚོད་བཅུ་དང་སྐར་མ་ཉི་ཤུའི་ཐོག་ཨ་ལགས་ཚང་གཙང་བླའི་ནང་ཆེན་དུ་དགོངས་པ་རྫོགས་འདུག། དེང་སང་གདན་ས་སྟག་ཚང་ལྷ་མོ་དང། འཕགས་ཡུལ་ཀིརྟིའི་བྱེས་པ་གྲྭ་ཚང། རྐྱང་ཚའི་རྒྱལ་དགེ་དགོན་པ་དང་དྲན་པ་དགོན་པ་སོགས་འབྲེལ་ཡོད་དགོན་གྲོང་མང་པོ་ནས་དགོངས་རྫོགས་གང་རྒྱས་ཞུས་དང་ཞུ་བཞིན་པའི་གནས་ཚུལ་འདུག།
འཇར་མན་ Germany གྱི་རྒྱལ་ས་བྷ་ལན་ Berlin ནས་བྲིས།
མྱ་ངན་ཞུ། དགུང་ལོ་ཅི་ཙམ་ཡིན་ནམ། །
རང་བྱུང་རིག་པའི་རྡོ་རྗེ་ལགས་ཁམས་བཟང་། ད་བར་དྲ་ཐོག་ཏུ་ཡོང་མ་ཐུབ་པས་ཁྱེད་ཀྱི་དྲི་བ་མ་མཐོང་བས་ལྷག ངས་ད་ལྟ་དྲན་ཚོད་བྱས་ན་ཨ་ལགས་གཙང་བླ་དགུང་ལོ་བདུན་ཅུ་དོན་ལྔ་ཡས་མས་ཤིག་ཡིན་སྙམ། ཕྲན་ད་ལྟ་ཕྱི་ལོགས་ཤིག་ལ་ཡོད་སྟབས་ཡིག་ཆ་ལྟ་ས་མི་འདུག གོང་གི་ངོ་སྤྲོད་རྣམ་ཐར་འདི་ཡང་ཕྲན་གྱི་དྲན་ངོས་སུ་ཡོད་པ་རྣམས་ཡིག་ཐོག་ཏུ་བཀོད་པ་ཙམ་ལས་རྒྱུ་ཆ་གསར་པ་གང་ཡང་འཚོལ་ལོང་མ་བྱུང་། གཙང་བླ་སྐུ་ཕྲེང་རིམ་བྱོན་གྱི་རྣམ་ཐར་ས་བོན་ཀིརྟིའི་མཚན་ཞབས་རིན་པོ་ཆེས་མཛད་པ་ཞིག་ཡོད།
ཁོང་ལ་མྱ་ངན་ཞ྄ུ། འོན་ཀྱང
རེ་འདོ་ལགས། བཀའ་དྲིན་ཆེ། །
རེ་མདོ་སེང་གེ་ལགས་ནས་ཨ་ལགས་གཙང་བླ་རིན་པོ་ཆེའི་སྐོར་གྱི་ངོ་སྤྲོད་རྩོམ་ཡིག་སྤེལ་བ་ལ་ཐུགས་རྗེ་ཆེ་ཞུ། ཨ་ལགས་ཁོང་ནི་བྱ་ཉུང་དོན་ཉུང་གི་ཆོས་པ་གཤའ་མ་ཞིག་ཡིན། ཁོང་དང་ཞལ་འདྲིས་ཐུགས་འདྲིས་གཉིས་ལྡན་ཅིག་ནས་རྣམ་ཐར་ཡི་གེ་རྩོམ་སྒྲིག་བྱེད་བཞིན་འདུག་པའང་རིང་མིན་འདི་ལྟར་མཇལ་ཀློག་ཞུ་རྒྱུར་སྒུག་ཡོད།
་་་་་གཙང་བླ་སྐུ་ཕྲེང་གཉིས་པ་རུས་མ་སྐྱབས་ཞུ་བ་༼དབུས་གཙང་དུ་ཕེབས་པའི་པཎ་ཆེན་སྐུ་ཕྲེང་བདུན་པ་བསྟན་པའི་ཉི་མས༽ཁོང་གི་ཡོངས་འཛིན་སྟག་མོ་ཨ་ལི་དཔལ་ལྡན་གྱི་ཡང་སྲིད་ལ་ངོས་འཛིན་མཛད།་་་་
འདིའི་དོན་ཅི་རེད། པཎ་ཆེན་སྐུ་ཕྲེང་བདུན་པ་གཉིས་ཡོད་པ་ལ་གོ་ན་འགྲིག་གམ།