ཆང་སྐྱེས།
སྣ་ཚོགས་གཡུ་ལོ་རྒྱས་པའི་དུས་ཚིགས་ཤིག་སྟེ།།
ཁུ་བྱུག་གསུང་སྐད་སྒྲོག་པའི་ནགས་འདབས་དེ་རུ།།
ཁྱེད་ཀྱི་ཁྲ་ཆུང་མིག་གིས་ཟུར་མིག་འཇམ་པོས།།
ཁོ་བོའི་གངས་དཀར་སེམས་ཀྱི་ལྷིང་འཇགས་དཀྲོགས་སོང་།།
ཆར་བ་ཟ་ཟིམ་འབབ་པའི་ཉིན་མོ་ཞིག་སྟེ།།
སྤང་ལ་མེ་ཏོག་བཞད་པའི་མཛེས་སྡུག་ངོགས་ན།།
ཁྱེད་ཀྱི་མགོ་བོ་བདག་གི་ཕྲག་ཁར་གླན་ཏེ།།
མ་ཤི་གསོན་བྲལ་མེད་པའི་དམ་བཅའ་བཞག་མྱོང་།།
ལོ་མ་སེར་ཐིག་ལྷུང་བའི་ནམ་ཟླ་ཞིག་སྟེ།།
ཁྲུང་ཁྲུང་ལྷོ་ལ་བསྟར་བའི་མཚོ་འགྲམ་དེ་ན།།
ཁྱེད་ཀྱིས་ལག་ཟུང་བདག་གི་སྐེ་ལ་འཐམས་ཏེ།།
འོ་ཞིག་བྱས་ནོ་ད་དུང་བརྗེད་ཐབས་མི་འདུག།
ཁ་བ་མར་མར་འབབ་པའི་ས་སྲོད་ཅིག་སྟེ།།
འཇག་མས་ཤུགས་འཐེན་པའི་མྱ་ངན་ཀློང་ན།།
ངེད་གཉིས་ཁ་ཁར་གྱེས་པའི་སྐད་ཅིག་དེ་ལ།།
ཁྱོད་ཀྱི་མིག་ཆུས་བདག་གི་བྲང་ཁ་བརླན་སོང་།།
ཁ་ཡག་ངོ་དགའ་ཚིག་གིས་བསླུ་བྲིད་མ་གནང་།།
བརྒྱ་ཤོག་བརྩེགས་མ་བྱིན་ཏེ་མགོ་སྐོར་མ་བཏང་།།
སེམས་དང་བསམ་པ་འདྲེས་པའི་མཛའ་མཐུན་བར་ནས།།
དུངས་བ་ཟབ་ཏུ་སོང་བའི་གོ་བ་མ་རྙེད།།
མི་འདོད་ལས་དབང་བཙན་པོས་གོ་སྒྲིག་ཅིག་སྟེ།།
བརྩེ་བ་རུམ་ནས་འཕྲོག་པའི་ན་ཟུག་ལྕི་མོ།།
མགོ་བོ་ལག་པས་སྐྱོར་ཏེ་འདང་རེ་བརྒྱབ་ན།།
སེམས་ཀྱི་རི་ལུང་སྐྱོ་གདུང་ཁ་བས་གཡོག་སོང་།།