དྲེད་པོ་ཧོར་གྱིས་བསྒྱུར།
དེ་རིང་ངས་འདི་ནས་ཕྱིར་དྲན་ཞིག་བྱས་ན།དེ་ནི་ཧ་ཅང་དྲན་པར་དཀའ་ཞིང་རབ་རིབ་ཏུ་གྱུར་པའི་འདས་དོན་ཞིག་རེད།ཡིན་ཡང་ཤིན་ཏུ་གསལ་བོ་དྲན་ཐུབ་པ་ཞིག་ནི་ཁོའི་ངོ་གདོང་ཡིན་ལ།དེ་བས་ཀྱང་ཆེས་བརྗེད་དུ་མེད་པ་ནི་ཁོའི་མིག་ཟུང་ཡིན།ཁོའི་མིག་གཉིས་ཀྱི་ཐོག་ལ་སེར་ཐིག་རེ་ཡོད་པས་ང་ཚོས་ཁོ་ལ་གསེར་ཐིག་ཅེས་འབོད།ང་ཚོའི་ཁྱིམ་ཏུ་མ་ཡོང་བར་ཁོ་ནི་སྲང་གི་འཁྱམ་ཁྱི་ཆུང་ཆུང་ཞིག་ཡིན།
ང་ཕལ་ཆེར་དེ་དུས་ལོ་བདུན་ཙམ་ཡིན་པ་ཡོད།ཨ་ཕའི་ལས་གནས་འཕོ་འགྱུར་གྱི་དབང་གིས་ང་ཚོའི་ཁྱིམ་ཚང་ན་སིཀ་(Nasik)ལ་གནས་སྤོ་དགོས་བྱུང་།ང་ཚོས་ས་གནས་དེ་རུ་ཁང་པ་ཞིག་གླས་ནས་བསྡད་ཅིང་།ཁང་པ་དེའི་ཉེ་འཁོར་ཚང་མ་ཤིང་ཕྲན་དང་འཁྲི་ཤིང་གིས་ཡོངས་སུ་བསྐོར་ནས་ཡོད་པ་ཞིག་ཡིན།ང་ཚོ་སྤོས་པའི་ཉིན་དེར་ཉིན་གང་བོར་ཆར་བ་ཆད་མེད་དུ་བབས་ནས་བསྡད་སོང་།
ང་བསིལ་འཇམ་གྱི་རླུང་བུ་དེ་དང་ལྷན་དུ་འབབ་བཞིན་པའི་དག་གཙང་གི་ཆར་འབྲི་རེ་རེས་ངོ་གདོང་བརླན་བཞིན།ཕྱི་རོལ་དུ་དགུང་ཕྱི་པོ་བར་འཁྱམ་གཡེང་ལ་སོང་།ཡིན་ཡང་དེ་ཡི་ཉིན་གྱི་དགོང་མོ་དེར་གནམ་གཤིས་གྲང་ངད་ཆེ་ལ་སྨག་ཧ་ཅང་གནག་པས།ང་ཚོའི་ཁྱིམ་མི་གང་བོ་དགོང་ཟས་སྔ་སེ་ནས་ཟོས་ཏེ་ཉལ་བ་ཡིན།
མཚན་དཀྱིལ་ཙམ་ལ་སྒོ་ཆེན་འགྲམ་ནས་ལྡིག་སྒྲ་ཆེན་པོ་ཞིག་གོ་བ་དང་ང་གཉིད་ལས་སད་བྱུང་།སྨག་ཧ་ཅང་གནག་ཀྱང་ངས་བློ་ཁོག་ཡོད་ཚད་བསྐྱེད་དེ་སྒོ་དང་ལྟག་སྤྲོད་དུ་ཡོད་པའི་སྒེའུ་ཁུང་དེ་ལས་མགོ་བསྲིངས་ཏེ་ཕྱི་ལོགས་སུ་གཅིག་བལྟས་པ་ན།ཧ་ཅང་ཡིད་འགུལ་ཐེབས་ཤིང་བརྗེད་པར་དཀའ་བའི་དེ་རིང་འདི་ནས་འབྲི་རྒྱུ་ཅན་གྱི་བརྗོད་བྱ་དེ་ཐོག་མར་མཐོང་།
དེ་ནི་ངེད་ཚང་གི་སྒོ་རྒྱབ་ཀྱི་རྐང་གདན་རྙིང་པ་དེའི་ཐོག་ཏུ་ཁྱི་ཕྲུག་ཆུང་ཆུང་ཞིག་ཉལ་ཡོད་པ་དེ་རེད།ཡིན་ཡང་དང་པོ་ཆར་ཞོད་ཀྱི་སྨག་ནག་ནང་དུ་ནག་ཡོར་ཡོར་ཙམ་ལས་ཁོའི་གཟུགས་གཞི་གསལ་པོ་མཐོང་མི་ཐུབ་ཀྱང་།ཁོའི་མིག་ཟུང་སྟེང་གི་སེར་ཐིག་གཉིས་པོ་དེས་ཁྱི་ཕྲུག་ཆུང་ཆུང་ཞིག་ཉལ་ནས་ཡོད་པ་གསལ་པོ་ཤེས་ཐུབ་ཀྱི་འདུག
ཁོ་ཆར་རླུང་ཁྲོད་ནས་གྲང་ངད་ལས་བྱོལ་ཆེད་ལྟེབ་དྲིལ་བྱས་ནས་ཡོད་པའི་རྐང་གདན་ཁུག་ཏུ་འཛུལ་ཏེ།མགོ་ཆུང་ཆུང་དེ་ཕྱི་ལོགས་སུ་བཏོན་ནས་ཉལ་བསྡད་ཡོད་པ་ངས་སྒེའུ་ཁུང་བརྒྱུད་ནས་མཐོང་ཐུབ་ཀྱི་འདུག སྒེའུ་ཁུང་ཕྱི་ལ་བཞག་ཡོད་པའི་མེ་ཏོག་བུམ་པ་དེ་ཡང་ཡ་ང་བའི་ཁྱི་ཕྲུག་ཁོའི་འཁྲིས་སུ་ཟག་ཏེ་ཆག་གྲུམ་དུ་གྱུར་ནས་བསྡད་འདུག
ཁོ་མཐོང་བ་དང་ང་ཧ་ཅང་སྙིང་རྗེ་བྱུང་བས།ངས་ལག་རས་རྙིང་པ་ཞིག་ཁྱེར་ཏེ་ཕྱི་ལ་སོང་ནས་ཡ་ང་བའི་ཁྱི་ཕྲུག་ཆུང་ཆུང་དེ་ལག་ཏུ་བླངས་བ་ན།ཁོའི་ལུས་པོ་ཆ་ཚང་ཆར་བས་སྦང་སྟེ་གྲང་འདར་སིག་སིག་ཏུ་རྒྱག་བཞིན་འདུགདེ་ནས་ངས་སྤུ་ཚང་མ་སྐམ་པོ་མ་ཆགས་བར་ལག་རས་ཀྱིས་གཙང་མ་ཕྱིས་ཏེ་ཁྱིམ་དུ་ཁྱེར་ཡོང་བ་ཡིན།
ཁྱིམ་དུ་ཁྱེར་བ་དང་ངས་ཁོ་ལ་ཁང་པའི་ཟུར་དེར་བལ་གདན་གྱིས་ཉལ་ས་ཆུང་ཆུང་དྲོན་པོ་ཞིག་བཟོས་ནས་བསྙལ་བ་ན།ཁོ་ཧ་ཅང་སྐྱིད་ཉམས་ཀྱིས་དེ་མ་ཐག་གཉིད་ལ་ཡུར་སོང་།ཕྱི་ཉིན་ནངས་མོ་ཁྱིམ་མི་ཚང་མས་ངེད་ཚང་གི་ནང་ལ་མགྲོན་པོ་གསར་བ་ཞིག་སླེབས་ཡོད་པ་ཤེས་ཏེ་ཚང་མས་ཡ་མཚན་མཚན་ངང་དགའ་བསུ་བྱེད་ཀྱི་འདུག
དེ་ནས་ངས་ཨ་མ་ལ།ཁྱི་ཕྲུག་ཆུང་ཆུང་དེ་ང་ཚོའི་ཁྱིམ་ལ་གསོ་ཉར་བྱེད་ཆོག་པའི་བཀའ་འདྲི་བསྐོར་བ་ཡིན།དང་ཐོག་ངེད་ཚང་གི་ཕ་མ་གཉིས་ཀས་དང་ལེན་དེ་ཙམ་གནང་གི་མི་འདུག་ཀྱང་།ཨ་ཅེ་ངེད་གཉིས་ཀྱིས་ཡུན་རིང་པོའི་བར་ཞུ་བ་ཐེངས་མང་འཐེན་རྗེས་ཁྱི་ཕྲུག་གསེར་ཐིག་གསོ་ཉར་བྱེད་ཆོག་པའི་ཁས་ལེན་གནང་སོང་།
ཉིན་བཞིན་གསེར་ཐིག་ནི་ཁྱིམ་མི་ཚང་མ་དང་ཧ་ཅང་འདྲེས་ལོབ་ཆགས་ནས་ཁྱིམ་མི་སུ་ཕྱི་ལ་སོང་ཡང་ཁོ་སྒོ་འགྲམ་བར་དུ་སྐྱེལ་དུ་འགྲོ་ཞིང་།ཕྱི་ནས་ནང་ལ་ཡོང་སྐབས་ཀྱང་རྔ་མ་གཡུག་གིན་བསུ་རུ་ཡོང་བར་གོམས་ལོབས་སུ་གྱུར་ནས་ཡོད།ད་དུང་ངོ་མི་ཤེས་པའི་མི་འདྲ་གཡས་གཡོན་ནས་འགྲོ་བ་ཐོས་ཚེ་ཁོས་ངར་ངར་གྱིས་འབ་སྒྲ་དྲག་པོ་བྱེད།
ཉིན་ཞིག་གི་དགོང་མོ་ཁོ་ཐག་རིང་ཞིག་ལ་སོང་ནས་ལོག་ཡོང་སྐབསཧ་ཅང་ཐང་ཆད་པའི་ཉམས་ཀྱིས་ངའི་ཟུར་དེར་བསྡད་སོང་།ཡིན་ཡང་ཁོའི་རྐང་པ་གཡས་པ་དེ་ལ་རྨས་ཅུང་ཙམ་ཕོག་ཏེ་རྨ་ཁ་ནས་ཁྲག་ཐོན་བཞིན་འདུགཨ་མ་ངེད་གཉིས་ཀྱིས་སྨན་སྒམ་ནས་སྨན་དང་རྨ་དཀྲིས་བླངས་ནས་ཁོའི་རྐང་པ་ལ་སྨན་བཅོས་བྱས་ཞིང་ལྟོ་ཆས་བླུད་པ་ཡིན།
ཡིན་ཡང་ཕྱིར་ཉིན་ཞོགས་པ་ནས་རྐང་པ་དེ་ཅུང་ཙམ་འཐེང་གྱོལ་བྱེད་བཞིན་བསྟན་བཤིག་བསླངས་ཏེ་ངེད་ཚང་གི་སྒོ་ཕྱི་ནང་ལ་སྔར་བཞིན་ཡར་རྒྱུག་ཕྱིར་རྒྱུག་བྱས་ནས་བསྡད་འདུགཁོ་ལ་རྨས་སྐྱོན་ཕོག་རྗེས་དེ་སྔོན་ལས་ཀྱང་ང་ཚོ་ནང་མི་ཚང་མས་ཁོ་ལ་བྱམས་སྐྱོང་དང་སེམས་ཁུར་བྱེད་ས་རུ་གྱུར་སོང་ཞིང་།ཁོ་ནི་ང་ཚོའི་ཁྱིམ་གྱི་གཅེས་ཕྲུག་གཅིག་པུ་དེ་ཡིན།
ལོ་གཅིག་ཙམ་གྱི་རྗེས་སུ་ཡིན་པ་ཡོད།མཚན་དགུང་ཞིག་ལ་གསེར་ཐིག་དབུགས་ཐང་ཆད་ཆད་ལ་སྐད་ཆེན་པོ་བརྒྱབ་ཏེ་ཕྱི་ལོགས་སུ་འབ་བཞིན་འདུགང་ཚོ་སྒོ་ལ་སོང་ནས་བལྟས་པ་ཡིན་ཡང་།ཁོས་སྨག་ནག་ནང་ཕྱོགས་ཤིག་བལྟས་ནས་མཚམས་འཇོག་མེད་པར་འབ་ནས་བསྡད་འདུག་ཀྱང་།དམིགས་གསལ་ཅི་ཡང་རིག་རྒྱུ་ནི་མི་འདུག
འོན་ཀྱང་ནམ་སྟོད་ནས་ཙམ་ནས་ཁོས་འབ་མཚམས་བཞག་ནས་འཇམ་སོང་།ངས་ནི་ཁོ་ཚུར་ནང་ལ་ལོག་ནས་ཉལ་བསྡད་ཡོད་ཤག་བྱས་པ་ཡིན་ཡང་།ཞོགས་པ་དེར་ཆེས་དངངས་འཚབ་སྐྱེས་པ་ཞིག་ལ།གསེར་ཐིག་ནི་ཕྱོགས་གང་དུ་ཡང་མཐོང་རྒྱུ་མི་འདུགང་སོང་ནས་ཁྱིམ་གྱི་ཕྱི་ནང་དང་གཡས་གཡོན་གང་སར་བཙལ་ཡང་གཏན་ནས་མ་རྙེད།
ངས་ཁོ་ལ་སྐད་བརྒྱབ་དེ་བོས་ཤིང་ཡུན་རིང་བསྒུགས་ཀྱང་ཡོང་རྒྱུ་མི་འདུགདེ་ནས་བཟུང་ཁོ་གང་ཞིག་ལ་བུད་སོང་མིན་སུས་ཤེས།ནམ་ཡང་ངེད་ཚང་གི་ནང་ཕྱི་ལོག་མེད་པར་གྱུར་སོང་།ཕལ་ཆེར་ང་ཚོ་ཚང་མས་བདུན་ཕྲག་གཅིག་ལྷག་ཙམ་གསེར་ཐིག་ལ་བསྒུགས་ནས་བསྡད་ཀྱང་ཁོའི་སྤུ་འཇག་གཅིག་ཀྱང་མཐོང་རིག་མི་འདུག
དེ་ནས་ཉིན་ཞིག་ངེད་ཚང་གི་ཨ་ཕ་མོམ་བྷེ་ལ་ལས་བསྒྱུར་བྱས་པས།ང་ཚོ་ཚང་མ་མུམ་བྷེ་(Mumbai)ལ་སླར་ཡང་གནས་སྤར་ནས་ལོག་ཡོང་དགོས་བྱུང་བས།དུས་དེ་ནས་བཟུང་ངའི་སེམས་ནང་ལ་གསེར་ཐིག་ལ་ཅི་ཞིག་བྱུང་བ་ཡིན་ནམ་སྙམ་པ་དང་།གསེར་ཐིག་ཤི་གསོན་གང་ཡིན་ནམ་སྙམ་པའི་དྲི་བ་དེ་དག་ཡང་ཡང་འཁོར་ཡོང་ནས་མཚམས་ཆོད་ཀྱི་མི་འདུགའོན་ཀྱང་དེ་དག་ནི་གཏན་ཏུ་ལན་རྙེད་མེད་ཀྱི་དྲི་བ་ཤ་སྟག་གོ།། ༡༩/༩/༢༠༡༩