བདེན་རྒྱབ་བདེན་གནོན།
བཀའ་ཤག་སྐབས་བཅོ་ལྔ་པའི་ལས་ཡུན་ནང་བྱང་ཨ་རིའི་དོན་གཅོད་འཕོ་འགྱུར་དང་འབྲེལ་བའི་ཐད་ནས་སྟོང་གསུམ་སྐད་ཀྱིས་ཆོད་པའི་ཁ་མཆུ་ཨང་ཉི་ཤུ་པ་འདི་བྱུང་ཞིང་། དེ་ཡང་ལོ་གཅིག་དུས་གཅིག་གཞུང་འབྲེལ་དུས་དྲན་མཛད་སྒོ་གལ་ཆེ་ཤོས་གསུམ་བཅུའི་དུས་དྲན་སྐབས་མི་མང་འདུ་འཛོམས་ཀྱི་སྡིང་ཆ་བེད་སྤྱད་དེ་ཁྲིམས་ལ་གཏུག་ཤོག་ཟེར་བའི་སྐད་གསང་མཐོན་པོ་དེ་ནས་བྱུང་བ་རེད། འོན་ཀྱང་འདི་ནི་ཁ་མཆུ་ཨང་ཉི་ཤུ་པའི་འགོ་འཛུགས་དང་ནོར་ས་ལྟེ་བ་དེ་མ་རེད། ཁྲིམས་ཁང་ནས་ཁ་མཆུ་དེའི་བཅད་ཁྲ་བཏང་ཟིན་པའི་རྗེས་སུ་མང་ཚོགས་ནང་སྲིད་སྐྱོང་མཆོག་གིས་དབུ་ཁྲིད་པའི་བཀའ་ཤག་ཁྲིམས་ཐོག་ནས་ཕམ་ཉེས་ཆེན་པོ་བྱུང་བར་བརྟེན། ད་ཆ་ཁྲིམས་ཀྱི་སྐད་ཆ་ཤོད་ས་མེད་པར་སོང་ལས་རྒྱུ་འབྲས་ཀྱི་སྐད་ཆ་ཤོད་འགོ་ཚུགས་པ་རེད། སྤྱིར་ལས་རྒྱུ་འབྲས་ཟེར་བ་ནི་ལས་འབྲས་དཔང་འཕེར་བླང་དོར་ཉམས་ལེན་བྱེད་མཁན་ཚོའི་ཞལ་ནས་ཤོད་དབང་ཡོད་པ་ལས། ལས་འབྲས་ཁྱད་དུ་གསོད་པའི་ཆབ་སྲིད་པའི་ཞལ་ནས་འདོན་རྒྱུ་ཞིག་མ་རེད། གལ་སྲིད་ཆབ་སྲིད་པའི་སྐད་ཆ་མཐར་ལས་འབྲས་དང་ཆོས་ཀྱི་ཐོག་ལ་འབབ་ཡོང་གི་འདུག་ན་ཁོ་ཚོ་འུ་ཐུག་གི་ཡོད་པའི་རྟགས་ཟག་མར་བསྟན་པ་རེད། ཁ་མཆུ་ཨང་ཉི་ཤུ་པའི་འགོ་འཛུགས་ཀྱི་དུས་རིམ་དེ་གནད་འགག་ཅིག་ཡིན་པས་ཁ་མཆུ་ཤོར་ཚར་པའི་སྲིད་སྐྱོང་བློ་བཟང་སེང་གེའི་བཀའ་ཤག་དང་དེའི་རྒྱབ་དཔུང་ཚོས་གཞུང་འབངས་ལ་གཅེས་མདོག་གིས་ཁ་ཕྱོགས་དེ་དང་འབྲེལ་བའི་གླེང་ཕྱོགས་གསར་པ་ཞིག་བཟོ་འགོ་ཚུགས་བཞིན་ཡོད། དཔེར་ན་ཁ་མཆུ་ཨང་ཉི་ཤུ་པ་དེ་སྐུ་དྲག་གསར་རྙིང་དང་དགའ་ལྡན་ཕོ་བྲང་ལ་འབྲེལ་བ་ཡོད་ཚུལ་གྱི་གླེང་ཕྱོགས་གསར་པ་བཟོ་སྟངས་ལས་གསལ་པོ་ཤེས་ཐུབ།
ཁ་མཆུ་ཨང་ཉི་ཤུ་པའི་ཐོག་མའི་འགོ་འཛུགས་དང་ནོར་ས་དང་པོ་ནི་སྤེན་པ་ཚེ་རིང་བྱང་ཨ་རིའི་དོན་གཅོད་ལ་སུས་བསྐོས་མིན་དེ་མ་ཡིན་པར་གལ་གནད་ཆེ་བའི་དོན་གཅོད་ཀྱི་ཞབས་སྟེགས་གཉིས་སྲིད་སྐྱོང་གི་འོས་བསྡུའི་བྱ་རིམ་ནང་བེད་སྤྱོད་ལོག་པར་བཏང་བ་དེ་ནས་འགོ་ཚུགས་པ་རེད། སྲིད་སྐྱོང་བློ་བཟང་སེང་གེ་ཐེངས་གཉིས་པར་སྲིད་སྐྱོང་འོས་མིར་བཞེང་སྐབས་དེ་སྔོན་དང་མི་འདྲ་བར་གཞུང་སྲིད་རང་ཉིད་ཀྱི་ལག་པར་ཡོད་པར་བརྟེན། གཞུང་ལས་མཐོ་རིམ་གྱི་རྐུབ་སྟེགས་མང་དག་ཅིག་རང་ཉིད་ཀྱི་འོས་ཤོག་དྲིལ་བསྒྲགས་ཆེད་དུ་བེད་སྤྱོད་བཏང་ཡོད་པ་རེད། འོས་བསྡུའི་ལས་རིམ་སྔོན་འགྲོ་དང་དངོས་གཞིའི་བར་ནས་འགྲན་རྩོད་རྣོ་ངར་ཆེན་པོར་གྱུར་པས་འཛིན་སྐྱོང་གི་ཞབས་སྟེགས་ཐོག་ཡོད་པའི་མི་སྣ་མང་པོ་ཞིག་ཁོང་གི་རྒྱབ་དཔུང་དུ་བཞེངས་དགོས་བྱུང་བ་རེད། ཛ་དྲག་དེའི་ཁྲོད་དུ་ཁོང་གི་བཀའ་བློན་ལས་རོགས་གཉིས་གློ་བུར་དུ་འོས་བསྡུའི་ལས་རིམ་ནང་མདུན་དུ་ཐོན་ཏེ་སྲིད་སྐྱོང་བློ་བཟང་སེང་གེ་དང་འབྲེལ་བའི་དྲིལ་བསྒྲགས་ཀྱི་ལས་འགུལ་ནང་རྒྱག་གཅིག་མཆོངས་གཅིག་གནང་ཡོད། བློ་བཟང་སེང་གེར་ཐེངས་གཉིས་པའི་སྲིད་སྐྱོང་འོས་ཤོག་ཐོབ་རྗེས་དུས་ཡུན་རིང་པོ་མ་འགོར་བར་དོན་གཅོད་འཕོ་འགྱུར་གྱི་གཞུང་འབྲེལ་བཀའ་ཁྱབ་མ་སྤེལ་གོང་ནས་ཤེས་རིག་ལས་ཁུངས་ནང་བཀའ་བློན་དངོས་གྲུབ་ཚེ་རིང་ཨ་རིའི་དོན་གཅོད་ཡིན་པ་གཏན་འཁེལ་བའི་སྐད་ཆ་ཁྱབ་པ་དང་། བཀའ་བློན་ལས་ཐོག་རྒྱ་རི་སྒྲོལ་མས་ཁྱིམ་ཆས་མང་པོ་ལྡི་ལི་དོན་ཁང་ནང་བཏང་ཡོང་བའི་སྐད་ཆ་ཁྱབ་པ་རེད།
བྱ་སྤྱོད་འདིས་༸གོང་ས་སྐྱབས་མགོན་ཆེན་པོའི་མཚན་གནས་རྗེས་འབྲེལ་ཡོད་པའི་ཞབས་སྟེགས་གནད་ཆེ་དེ་ཚོ་ཆབ་སྲིད་པའི་འོས་བསྡུའི་ལས་རིམ་ནང་ནག་ཚོང་བེད་སྤྱོད་བྱེད་ནུས་དུས་འདི་དག་གིས་མ་འོངས་པར་༸གོང་ས་མཆོག་གི་མཚན་གནས་ཡོད་པའི་ཞབས་སྟེགས་དེ་ཚོ་བེད་སྤྱོད་ཇི་ལྟར་གཏོང་མིན་ཐད་གལ་འགངས་ཆེན་པོར་སོང་དགའ་ལྡན་ཕོ་བྲང་འགན་འཛིན་ལྷན་ཚོགས་ནས་དེའི་ཐད་ཐུགས་སྣང་མ་གནང་བར་འཇོག་ཐབས་མེད་པ་གསལ་པོ་གསལ་རྐྱང་རེད། དེར་བརྟེན་༸གོང་ས་སྐྱབས་མགོན་ཆེན་པོའི་མཚན་གནས་དང་འབྲེལ་བའི་དོན་གཅོད་འཕོ་འགྱུར་གྱི་རྩ་འཛིན་ལམ་སྲོལ་བཞིན་གལ་གནད་ཆེ་བའི་དོན་གཅོད་ཀྱི་ཞབས་སྟེགས་གཉིས་ཆབ་སྲིད་པའི་དབང་ཆ་ནག་ཚོང་གི་ཚོང་རྫས་སུ་མི་འགྱུར་བར་དམ་དོན་གནང་དགོས་བྱུང་བ་ཁ་མཆུ་ཨང་ཉི་ཤུ་པའི་འགོ་འཛུགས་དང་ནོར་ས་ཆེ་ཤོས་ཏེ་ཡིན་པ་གསལ་པོ་མཁྱེན་དགོས་པ་རེད།
ཁ་མཆུ་ཨང་ཉི་ཤུ་པའི་ནོར་ས་གཉིས་པ་ནི་སྒེར་ནད་ཐོག་གཞུང་འབྲེལ་དབང་ཆ་བེད་སྤྱོད་བཏང་བ་དང་། དེ་ཡང་བུད་མེད་གཡོ་ཅན་གྱི་སྐད་ཆར་ཉན་པ་དེ་རེད། བོད་ཀྱི་ཁ་དཔེར། རྒྱལ་པོ་སྙན་ཁུང་སྲབ་པ་དང་། བཙུན་མོ་ཕྲ་མར་དགའ་བ་གཉིས། རྒྱལ་སྲིད་བརླག་པའི་སྔ་ལྟས་ཡིན། ཟེར་བ་ལྟར། གོ་ལོ་ཐོས་ལོའི་སྐད་ཆ་རྒྱུ་མཚན་དུ་བྱས་ཏེ་བྱང་ཨ་རིའི་དོན་གཅོད་འཕོ་འགྱུར་བཏང་པས། བོད་རྒྱལ་ཁབ་དང་མི་རིགས་ཀྱི་ལོ་རྒྱུས་ནང་བྱུང་མ་མྱོང་བ་བཀའ་ཤག་ཁྲིམས་འོག་ཏུ་ཤོར་བའི་ལོ་རྒྱུས་ནག་པོ་འདི་བྱུང་བ་རེད། ཁ་མཆུ་ཨང་ཉི་ཤུ་པའི་བཅད་ཁྲ་བཏང་ཟིན་རྗེས་ང་ཚོས་བསྐྱར་ལོག་གིས་བྱང་ཨ་རིའི་དོན་གཅོད་འཕོ་འགྱུར་བཏང་བའི་དགེ་སྐྱོན་ལ་བསམ་གཞིགས་བྱས་ན། མི་སྒེར་ལ་ཁེ་ཕན་ཆེན་པོ་ཐོབ་ཡོད་པ་ནི་ཤོད་མི་དགོས་ཀྱང་། གཞུང་སྲིད་ལ་དངོས་གྲུབ་ཚེ་རིང་གིས་ད་བར་སྤེན་པ་ཚེ་རིང་ལས་ལྷག་པའི་ལས་ཆོད་ཆེ་བ་གང་ཡང་བྱས་མེད་ཅིང་། དེ་ལས་ལྡོག་སྟེ་དོན་རྐྱེན་འདིའི་ཁྲོད་བོད་བསྟན་སྲིད་མི་རིགས་དང་བཅས་པ་ཆགས་འཇིག་གི་དུས་སྐབས་སུ་བོད་མིའི་མཐུན་ལམ་ཁ་གཏོར་དགུ་གཏོར་བཏང་བའི་ལས་ཚབས་ཆེ་བ་བསགས་པར་མ་ཟད། བསྟན་སྲིད་མི་རིགས་དང་བཅས་པར་རྨ་ཁ་ཆེན་པོ་བཟོས་པ་འདི་ཚོ་དང་བསྡུར་ན་བྱང་ཨ་རིའི་དོན་གཅོད་འཕོ་འགྱུར་བཏང་བ་དེས་བོད་བསྟན་སྲིད་ལ་ཁེ་ལས་གྱོང་ཆེ་བ་རག་ཡོད་པ་ལོ་རྒྱུས་ནང་གསལ་པོ་ཆགས་ཚར་བ་རེད།
ཁ་མཆུ་ཨང་ཉི་ཤུ་པའི་ནོར་ས་གསུམ་པ་ནི་དོན་གཅོད་འཕོ་འགྱུར་བཏང་བའི་རྗེས་སུ་གཞི་ནས་དོན་གཅོད་འཕོ་འགྱུར་གཏོང་དགོས་པའི་རྒྱུ་མཚན་བཙལ་བ་དེ་རེད། དེ་ཡང་ཨ་སྒོར་ས་ཡ་གཅིག་དང་ཕྱེད་ཀའི་གླེང་རྙོག་དང་འབྲེལ་བའི་ཨ་དོན་ཟུར་པ་དྲུང་ཆེ་མཚན་མཉམ་སྐལ་རྡོར་དང་། དོན་གཅོད་དང་སྲིད་སྐྱོང་བར་ཕྲ་མ་སྦྱོར་མཁན་དྲུང་ཆེ་མཚན་མཉམ་ཤར་གླིང་ཟླ་སྒྲོན་གཉིས་བཀའ་འགུག་གནང་ནས་གང་དྲག་ཅི་དྲག་བསམ་བཏང་དྲན་སྐྱེས་ཀྱིས་དོན་ཚན་བཅུ་བཟོས་ཏེ་ཡིན་མདོག་གིས་གཞུང་འབྲེལ་དྲ་བའི་ཐོག་ཡོངས་ཁྱབ་བྱས་ཀྱང་། ད་ཆ་ཁྲིམས་ཁང་ནས་ཁྲིམས་ཞིབ་བྱེད་སྐབས་ཁུངས་སྐྱེལ་ར་འཕྲོད་གཅིག་ཀྱང་མ་བྱུང་བའི་དོན་ཉེས་རྫོར་པོ་འདི་བྱུང་བ་རེད། སྐལ་རྡོར་ནི་དེ་སྐབས་དཔལ་འབྱོར་ལས་ཁུངས་ནང་གསོབ་ཀྱི་བཀའ་བློན་དང་སྲོག་གི་བཀའ་བློན་གཉིས་ཡོད་པའི་ནང་ནས་སྲོག་གི་བཀའ་བློན་དེ་ཡིན་པ་དང་། ཟླ་སྒྲོན་ནི་ཕྱི་དྲིལ་བཀའ་བློན་དང་དྲུང་ཆེ་རག་རྒྱུའི་ཆེད་དུ་ཅི་བྱེད་དགོས་ཀྱང་བྱེད་མཁན་ཞིག་ཡིན་པས། ཁོང་གཉིས་ལ་ཁྲིམས་ཀྱི་མདུན་སར་ལང་ཐུབ་པའི་སྐད་ཆ་བཤད་རྒྱུ་མེད་པ་གསལ་པོ་རེད། འདི་ལྟར་སྡེ་པ་གཞུང་ཟེར་ཡང་ང་ཚོ་ཕ་བུ་གཉིས་ཀྱི་རེད། ཅེས་པའི་དཔེ་ལྟར་བོད་མིའི་སྒྲིག་འཛུགས་འདི་མི་ཁ་ཤས་ཤིག་གི་དབང་ཆ་རྐུབ་སྟེགས་ཀྱི་ཆེད་དུ་བེད་སྤྱོད་བཏང་བའི་བརྒྱུད་རིམ་ཁྲོད་དེ་རིང་གི་དོན་ཉེས་ངོ་ཚ་དགོས་པ་འདི་བྱུང་བ་རེད།
ད་ནི་ཇི་ལྟར་ཡང་ཁྲིམས་ཀྱི་ཐོག་ནས་ཤོར་ཟིན་པས་བཀའ་ཤག་གིས་ཁྲིམས་དོན་ལྟར་བཅད་ཁྲ་དང་ལེན་བྱེད་དགོས་པ་ལས། དེ་མིན་ལས་འབྲས་བཤད་དེ་གླེང་གཞི་གསར་པ་བསྐྲུན་བརྩིས་ཀྱིས་བཙན་བྱོལ་བོད་མིའི་སྤྱི་ཚོགས་སྦར་མོ་གང་དེ་ཁ་ཐོར་དགུ་ཐོར་མ་འགྲོ་བ་བྱེད་རྒྱུ་གལ་ཆེན་པོ་རེད། གང་ཡིན་ཟེར་ན་སྲིད་ཚབ་ནང་སྲིད་བཀའ་བློན་ནས་བཅད་ཁྲ་མ་གཟིགས་པར་གང་བྱུང་གང་དྲན་ཤོད་འགོ་བཙུགས་པ་འདིས་བཀའ་ཤག་གིས་ཡ་མེད་རྒལ་རལ་གནང་བརྩིས་མེད་དམ་སྙམ་པ་འདུག དེས་ན་ཇི་ལྟར་མ་ཉེས་ཁ་གཡོག་གི་དོན་ཚན་བཅུ་གཞུང་འབྲེལ་དྲྭ་ངོས་སུ་བཀྲམ་པ་བཞིན། དེ་ལྟར་དགོངས་སེལ་ཡང་གཞུང་འབྲེལ་དྲྭ་ངོས་ནས་འགྲེམ་དགོས་པ་ནི་ལས་རྒྱུ་འབྲས་དང་མཐུན་པ་ཞིག་ཡིན། མདོར་ན་བཀའ་ཤག་བཀའ་ཤག་གི་ངོ་བོར་མ་བཞུགས་པར་བཀའ་ཤག་གི་སྒེའུ་ཁུང་ནས་མི་སྒེར་གྱི་རྣམ་འགྱུར་བསྟན་པ་ལས་ཆག་སྒོ་འདི་འཁྱེར་ཡོང་བས། ད་དུང་བཀའ་ཤག་གིས་མུ་མཐུད་འདི་ལྟར་གནང་ན་ངན་ཚབས་ཧ་ཅང་ཆེན་པོར་འགྱུར་རྒྱུ་གདོན་མི་ཟ་བས་དེ་དོན་དགོངས་པ་བཞེས་གལ་མཐོང་ངོ་།།
གནད་ལ་འཁེལ་བའི་དབྱེ་ཞིབ་དང་སེམས་ལ་འབབ་པའི་བསླབ་བྱ་གནང་བར་བཀའ་དྲིན་ཆེ། ཡིན་ནའང་འཁོར་ལྷ་ཚང་བསོད་སྟོབས་དང་བློ་བཟང་གྲགས་པ་གཉིས་ནས་བཅད་ཁྲ་ལ་བལྟ་ཀློག་མ་གནང་བར་ཁྱི་རྒན་ཀུ་ཅོ་འདོན་པའི་བྱེད་སྟངས་དེས་བོད་པའི་སྤྱི་ཚོགས་ད་དུང་མུ་མཐུད་དཀྲུགས་མི་ཡོང་ངམ་བསམ་པའི་བློ་འཚབ་ཆེ།
ཧ་ཅང་གི་ཡག་པོ་བྲིས་གནང་འདུག་ཐུགས་རྗེ་ཆེ།
བདེན་རྒྱབ་བདེན་གནོན་གྱི་དཔྱད་རྩོམ་ཁ་མཆུ་ཨང་ཉི་ཤུ་པའི་ཐོག་མའི་འགོ་འཛུགས་དང་ནོར་ས་འདི་རེད་ཞེས་པའི་དཔྱད་རྩོམ་དེ་ཧ་ཅང་ཡག་པོ་བྲིས་གནང་འདུག དཔྱད་རྩོམ་དེ་སྲིད་སྐྱོང་གཙོས་བཀའ་བླུན་༼བློན་མ་རེད།༽རྣམས་ནས་རློག་དགོས་འདུག གལ་སྲིད་ལས་ཁུངས་དུ་གཞུང་འབྲེལ་བཀླགས་མ་ཐུབ་ནའང་ནང་དུ་ངེས་པར་བཀླགས་དགོས་ཞུ་རྒྱུ་ཡིན། མི་འགའི་ལས་ཀ་ནོར་བ་དེའི་མི་མང་ཉམ་ཆུང་ལ་གཉའ་གནོན་ཐུབ་རྩོད་བཏང་བ་དེ་རྩ་བ་ནས་འགྲིག་གི་མ་རེད་ལ་ལས་རྒྱུ་འབྲས་ལའང་འགྲོ་གི་མ་རེད་ཚང་མས་ཤེས་དགོས་པ་གལ་ཆེའོ།།
ཁ་མཆུ་ཨང་ཉི་ཤུ་འདིའི་རྒྱལ་བ་རིན་པོ་ཆེ་བཞུགས་ས་ལ་བཞུགས་མ་བཅུག་པར་ཁོང་ལ་མཛད་དཀའ་མ་བཟོ་རོགས་
དེ་མིན་སྒེར་གྱི་ལྟོ་གོས་ཆེད་ག་རེ་གནང་གི་ཡོད་ཀྱང་ཁྱད་པར་མི་འདུག་ཐུགས་རྗེའི་གཟིགས།
ཁ་མཆུ་ཨང་ཉི་ཤུ་པ་འདི་རྩམ་ཐུག་ནང་བཞིན་སྐོལ་གྱིན་གར་དུ་འགྲོ་བཞིན་འདུག འདི་ལྟར་ན་དོན་གཅོད་བསྐོ་གཞག་གི་གླིང་གཞི་ཆེན་པོ་ཡོད་ས་རེད།
དགྲ་ལེན་སློག་བསམ་ཡང་སློག་སྟངས་མི་ཤེས་པསི་མཁས་པས། འཁྲབ་ཚད་གཟིགས་མོར་བསམས་ཏེ་འཁྲབ་པས། སྤྱི་དོན་ནང་ཁུལ་ཆིག་སྒྲིལ་ལ་གསོ་མི་ཐུབ་པའི་གས་ཆག་ཆེན་པོ་ཤོར་བ་དང་། བཀའ་ཤག་གི་མཚན་མཐོང་ལའང་གནོད་པའི་གྱོང་གུན་ཆེན་པོ་ཕོག་པ་རེད། མདོར་ན་བསམ་ཡོད་མང་པོ་ཞིག་གིས་ཉམས་མྱོང་དམན་པའི་ཕོ་གསར་ཁ་བདེ། མགོ་བདེ་འདི་འདྲ་ཞིག་ལ་སྲིད་སྐྱོང་བསྐོས་ན། མགོ་ལོག་ཞིག་རྩེད་རྒྱུ་ཡིན་པའི་ཚོད་དཔག་བྱས་པ་དེ་བདེན་པར་གྱུར་པ་རེད།
དང་པོ་ནས་ནོར་སོང་། འཛམ་གླིང་ནང་ལ་ཁྲིམས་རྩོད་ལྷན་ཚོགས་གཙོའི་ལས་འགན་གཙོ་བོ་དེ་མི་མང་གི་ཁེ་ཕན་བསྲུང་སྐྱོབ་བྱས་ནས་སྲིད་གཞུང་གི་དབང་ཡོད་དང་ཐུབ་ཚོད་ལ་ཁ་གཏད་འཇལ་དགོས། ང་ཚོའི་ཁྲིམས་རྩོད་ལྷན་ཚོགས་ཀྱི་ཚོགས་གཙོ་བློ་བཟང་གྲགས་པ་དེས་ཁ་མང་མི་མང་ལ་བསློག་ནས་སྲིད་དོན་པ་རུལ་སུངས་དེ་ཚོའི་ཁ་དང་རྐུབ་འགེབ་ཐབས་བྱས་སོང་།
ད་ཕྱོགས་གཉིས་ཆ་ནས་སེམས་ཆུང་བྱས་ན་ཡག གང་ལྟར་ཁྲིམས་ནས་ཐག་གཅོད་བྱས་ཚར་རེད་ཁྲིམས་ལུགས་ལྟར་སོང་ན་སྤྱི་ཚོགས་ལ་ལྷིང་འཇགས་ཡོང་ངེས་རེད་མ་གཏོགས་ཡར་བཤད་མར་བཤད་མང་པོ་བྱས་ནས་བསྡད་ན་ནམ་ཞིག་༧གོང་ས་མཆོག་ལ་མཛད་དཀའ་གནང་རྒྱུ་ལས་གཞན་གང་ཡང་མེད།
ཁ་མཆུ་ཨང་ཉི་ཤུ་གི་བཅད་ཁྲ་ཆ་ཚང་ཀློག་ནས་བསམ་ཚུལ་གླེང་
ཆོག་པ་ཞུ།
བདེན་རྒྱབ་བདེན་གནོན་ལགས། ཡག་པོ་བྲིས་འདུག་ཐུགས་རྗེ་ཆེ།
ཆེས་ ངུ་དགོད་མི་ངེས་པའི་ བཀའ་ཤག་གི་གྱོད་བཤད་མཁན་ བློ་བཟང་གྲགས་པ་ཟེར་བ་དེ་ཁ་ཕོད་ཆེ་བ་ཙམ་ལས་ དོན་ལ་ལས་ཀ་གང་ཡང་མི་འགྱོན་པ་འདུག ཁོ་རང་རྐང་ལག་ཆད་ཟིན་པ་འདྲ་བོ་འདུག
ད་ཁ ་མཆུ་འདི་ལ་འབྲེལ་ཐོགས་པ་ཚང་མ་བཟང་སྤྱོད་ཀྱི་སྒོ་ནས་དགོངས་པ་ཞུ་དགོས་རེད།
བདེན་པ། ཁྲིམས་ཀྱི་དབང་སྒྱུར། ལས་འབྲས་སོགས་མདོར་ན་མིའི་སེམས་ནང་སིམ་པའི་སྐད་ཆ་ཅི་འདྲ་ཞིག་བཤད་རུང་། རང་རེའི་སྤྱི་ཚོགས་འདིའི་འགོ་འཁྲིད་ཁམས་པ་དང་ཨ་མདོ་བ་སུ་འདྲ་ཞིག་གིས་བྱས་ཀྱང་། ཆོལ་ཁོངས་དེ་གཉིས་ནས་ཡིན་ཕྱིན། ང་ཚོའི་སྤྱི་ཚོགས་འདིར་ཞི་བདེ་ལྷིང་འཇགས་མེད་པ་དཔེ་མཚོན་མང་པོས་ར་སྤྲོད་བྱེད་ཐུབ་ཀྱི་ཡོད། ཆེ་ས་ནས་ལོ་རབས་དྲུག་ཅུ་ནས་རྩིས་ཏེ་ད་ལྟའི་བར་གྱི་རང་རེའི་སྤྱི་ཚོགས་འདིར་སྙོག་ཁྲ་སུས་བཟོས་དང་བཟོ་བཞིན་འདུག དེ་བཞིན་ད་ཡོད་འཛམ་གླིང་ག་སར་ཡོད་པའི་སྙོག་འཛིང་ནང་ལྷུང་བའི་ཚོགས་སྡེ་དེ་དག་གི་འགོ་ཁྲིད་དེ་ཚོར་ལྟོས་དང་། གང་དུ་ཁམས་པ་དང་ཨ་མདོའི་སྣེ་ཁྲིད་པ་མཉམ་དུ་ཡོད་ཕྱིན་དེར་སྙོག་རྫིང་ཡོད་པ་གཏན་འཁེལ་བ་རེད། རྒྱུ་མཚན་ཅི་ཡིན་མི་ཤེས། གཅིག་བྱས་ན་ཆི་ཚོས་ཤེས་ཀྱི་མེད་པ་འདྲ།
བདེན་པ། ཁྲིམས་ཀྱི་དབང་སྒྱུར། ལས་འབྲས་སོགས་མདོར་ན་མིའི་སེམས་ནང་སིམ་པའི་སྐད་ཆ་ཅི་འདྲ་ཞིག་བཤད་རུང་། རང་རེའི་སྤྱི་ཚོགས་འདིའི་འགོ་འཁྲིད་ཁམས་པ་དང་ཨ་མདོ་བ་སུ་འདྲ་ཞིག་གིས་བྱས་ཀྱང་། ཆོལ་ཁོངས་དེ་གཉིས་ནས་ཡིན་ཕྱིན། ང་ཚོའི་སྤྱི་ཚོགས་འདིར་ཞི་བདེ་ལྷིང་འཇགས་མེད་པ་དཔེ་མཚོན་མང་པོས་ར་སྤྲོད་བྱེད་ཐུབ་ཀྱི་ཡོད། ཆེ་ས་ནས་ལོ་རབས་དྲུག་ཅུ་ནས་རྩིས་ཏེ་ད་ལྟའི་བར་གྱི་རང་རེའི་སྤྱི་ཚོགས་འདིར་སྙོག་ཁྲ་སུས་བཟོས་དང་བཟོ་བཞིན་འདུག དེ་བཞིན་ད་ཡོད་འཛམ་གླིང་ག་སར་ཡོད་པའི་སྙོག་འཛིང་ནང་ལྷུང་བའི་ཚོགས་སྡེ་དེ་དག་གི་འགོ་ཁྲིད་དེ་ཚོར་ལྟོས་དང་། གང་དུ་ཁམས་པ་དང་ཨ་མདོའི་སྣེ་ཁྲིད་པ་མཉམ་དུ་ཡོད་ཕྱིན་དེར་སྙོག་རྫིང་ཡོད་པ་གཏན་འཁེལ་བ་རེད། རྒྱུ་མཚན་ཅི་ཡིན་མི་ཤེས། གཅིག་བྱས་ན་ཆི་ཚོས་ཤེས་ཀྱི་མེད་པ་འདྲ།
བཀའ་ཤག་གི་མགྲིན་ཚབ་པ་དང་ཁྲིམས་རྩོད་པའི་སྐད་ཆ་དེ་དུས་དང་གནས་སྐབས་གང་ལ་བལྟས་ཀྱང་ཤིན་ཏུ་ནས་མ་རན་པ་ཞིག་རེད། འོན་ཀྱང་ཁོ་ཅག་གིས་མཇུག་འབྲས་སོགས་གང་ལའང་ཐུགས་བསམ་མ་བཞེས་པར་ཁ་ཐུག་གི་སྐད་སྒྲའི་མཐོ་དམན་དང་རྒྱབ་སྐྱོར་བར་ཤོག་གུ་རླུང་འཚང་གི་དམིགས་ཡུལ་ཁོ་ན་གཙོ་བོར་བཟུང་ནས་ཁྲིམས་ཞིབ་ཁང་གི་བཅད་ཁྲ་དེ་ལས་འབྲས་དང་མཐུན་པ་ཞིག་མ་བྱུང་ཚུར་གསུངས་སོང་། དྲང་བདེན་བྱུང་མིན་ཐག་གཅོད་གནང་མཁན་ནི་ཆེས་མཐོའི་ཁྲིམས་ཞིབ་ཁང་ཡིན་པ་ལས་བཀའ་ཤག་མ་རེད། དེར་མ་ཟད་ཆེས་ཐོག་མར་ཁྲིམས་ཁང་ལ་ཕེབས་ཤོག་གསུངས་མཁན་ཡང་བཀའ་ཤག་ཡིན་པ་ལས་ཞུ་སྦྱོར་བ་མ་རེད། རང་གིས་ཉེས་པ་གང་འདྲ་ཞིག་བསགས་ཡོད་མེད་སྔོན་ཚུད་ནས་ཤེས་བཞིན་ཏུ་མི་མང་གི་བློ་སྣ་བྲིད་ཐབས་ཀྱི་གཡོ་ཇུས་གཤོམ་བཞིན་འདུག་པ་འདི་ནི་དོན་གཅོད་ཟུར་པར་བཙུགས་པའི་ནག་ཉེས་དེ་ལས་ཀྱང་ཉེས་པ་ཆེ་བ་རེད། སོང་ཙང་བོད་མིའི་ཆིག་སྒྲིལ་ལ་བསམ་བློ་གཏོང་མཁན་ཚོས་ངེས་པར་དུ་ཁྲིམས་ཁང་གི་བཅད་ཁྲ་ལ་བརྩི་འཇོག་གནང་དགོས་པ་ལས་གྱོད་ཡ་ཕན་ཚུན་གྱི་སྐད་ཆ་ཉ་ཉོག་དག་ལ་དོ་སྣང་བྱེད་དགོས་དོན་མེད།
བཀའ་ཤག་གི་ཁྲིམས་རྩོད་པ་བློ་བཟང་གྲགས་པ་ཟེར་བ་དེ་དེ་སྔོན་སུ་ཇ་སློབ་གྲྭར་ཡོད་དུས་དོལ་རྒྱལ་པ་ཞིག་ཡིན་པ་ཡོངས་གྲགས་རེད། དེ་བཀའ་ཤག་གིས་མ་མཁྱེན་པ་རེད་དམ་ཡང་ན་་་་་
བློ་སེང་བོད་མིའི་མགོ་རེད།
རྨ་ཁ་ཡོད་ཀྱང་སྲུང་དགོས།
ཆིག་སྒྲིལ་མེད་པའི་སྤྱི་ཚོགས།
གཞན་གྱི་ཞིང་བྲན་ཡིན་ནོ།
ལྷ་ཀླུང་དཔལ་གྱི་རྡོ་རྗེས།
བཙན་པོའི་མགོ་ལ་བརྒྱབ་ནས།
ལོ་ངོ་སྟོང་ཕྲག་འགའ་ལ།
ང་ཚོས་མྱངས་པ་བརྗེད་དམ།
ཆིག་སྒྲིལ་མེད་པའི་སྐྱོན་དང་།
ནང་ཁུལ་བརྩོད་པའི་མི་ཡིས།
སྔོན་ཡང་རྒྱལ་ཁབ་བཤིག་སོང་།
ད་དུང་འཇིག་བཞིན་འདུག་གོ།
ཕྱག་རོགས་བཀའ་བློན་རྣམ་པས་ཀྱང་མགོ་རུལ་རྣ་བས་མ་ཚོར་བར་ལགས་སོ་དང་ལགས་སོ་མ་གཏོགས་བདེན་རྫུན་རྣམ་དབྱེ་མ་ཐུབ་པ་དཔེ་རེད།
ད་ང་ཚོ་མི་མང་རྣམས་ནས་སྲིད་སྐྱིད་གཙོས་བཀའ་བླུན་ཚང་མར་གུས་བརྩི་ཞུ་ཐུབ་པ་མི་འདུག་གོ སུ་དགོངས་པ་ཚོམ་ན་ཚོམ། བཟང་པོའི་ཞོར་ལ་ཇ་ཆང་དང་ངན་པའི་ཞོར་ལ་ག་རེ་ཡོད་རེད་པས།།།
ཡག་པོ་བྲིས་འདུག