བཀའ་ཤག་གིས་ཅི་ནས་ཀྱང་དགོངས་པ་ཞུ་རོགས་གནང་།

བོད་མི་མང་སྤྱི་འཐུས་བློ་བཟང་ཆོས་འབྱོར།
 
དཔལ་ལྡན་སྲིད་སྐྱོང་དང་དཔལ་ལྡན་བཀའ་ཤག ཡང་ན་དཔལ་ལྡན་བཀའ་བློན་ཞེས་པའི་མཚན་གནས་འདི་དག བཟང་སྤྱོད་དང་དྲང་པོའི་བློ་ཁོག་ཁྱོན་ནས་མེད་པའི་ད་ལྟའི་བཀའ་ཤག་གི་མི་འགྲོ་འདི་ལྟ་བུ་དག་ལ་སྦྱར་ན་ལས་འབྲས་ཁྱད་གསོད་ཆགས་འགྲོ་ངེས་ཀྱི་བསམ་ཚུལ་ཡང་ཡང་འཁོར་གྱི་འདུག འདི་ལྟར་ལངས་ཤོར་ལྟ་བུས་མཚན་གནས་འདི་དག་སྦྱར་རྐྱང་བྱས་ན་མ་འོངས་པར་བོད་རང་གི་རྒྱ་ཆེ་མི་མང་དང་། རྒྱལ་སྤྱིའི་སྤྱི་ཚོགས་ཀྱི་མཐུན་ཕྱོགས་གྲོགས་པོ་ཚོའི་ངོས་གཉིས་ཀ་ནས་ལོ་རྒྱུས་ལྡན་པའི་མཚན་གནས་འདི་དག་གསན་སྐབས་ཐུགས་སུན་ཉོབ་སྣང་ཡོང་མི་སྲིད་པ་མིན་སྟབས། རྩོམ་འདིའི་འགོ་བཙུགས་མ་ཐག་ཁོང་རྣམ་པར་མཚན་གནས་དེ་དག་སྦྱར་ནས་འབྲི་རྒྱུར་དཀའ་ངལ་ཆེན་པོ་བྱུང་། ཡིན་ནའང་། རྟ་ལམ་བོང་བུས་བཀག་པ་ད་ལྟའི་དུས་ཚོད་གཅིག་པུ་མིན་པ། མིའི་སྤྱི་ཚོགས་གང་སར་འབྱུང་བཞིན་པའི་གནས་སྟངས་ལ་རིགས་འགྲེས་ཏེ་རང་སེམས་རང་གིས་གསོ་བཞིན་རྩོམ་འདི་འབྲི་འདོད་བྱུང་།

སྤྱིར་བཏང་མང་པོ་བརྗོད་མི་དགོས་པར། བློ་བཟང་སངས་རྒྱས་ནས་འགན་བླངས་པའི་བཀའ་ཤག་སྔ་ཕྱི་གཉིས་ཀར་འཐུས་ཤོར་ཆེ་ཆུང་མང་པོ་བྱུང་ཡོད་པ་ནས། ཆེ་བ་༧རྒྱལ་བའི་ཐུགས་དཀྲུགས། སྲུང་མས་བཀའ་བཀྱོན་ཕོག མི་མང་གིས་ངོ་རྒོལ་བྱས། ༧རྒྱལ་བའི་སྐུ་ཕྱྭར་ཉེན་ཁ་བྱུང་ཡོད་པ་བཅས་མི་མང་ནང་ས་རིས་ཐང་གསལ་དུ་གྱུར་ཡོད་ཀྱང་། དེ་དག་གབ་སྦས་དང་གླེང་མི་དགོས་པ་གཙོ་འདོན་བྱས་ཡོད་པ་དཔེར་ན། བློ་བཟང་སངས་རྒྱས་ཀྱིས་ངའི་གྲོགས་པོ་ཡིན་ཟེར་པ་དབུ་དཀར་ཚང་སྐལ་བཟང་རྡོ་རྗེ་དོན་གཅོད་ཀྱི་ལས་འགན་ཞུ་སྐབས། སན་ཕ་རིན་སེ་སི་ཀོར་དོལ་རྒྱལ་བསྟེན་མི་༧གོང་ས་མཆོག་གི་བཞུགས་གནས་མགྲོན་ཁང་དུ་སྔ་ཚུན་ནས་ཡིབ་སྟེ། ཆིབས་བསྒྱུར་སྐབས་སྐུའི་ཉེ་འཁྲིས་སུ་བཅར་ཏེ་ལོག་བཤད་བརྒྱབས་པའི་གནས་ཚུལ་བྱུང་བར། སྐབས་བཅོ་ལྔ་པའི་བོད་མི་མང་སྤྱི་འཐུས་ལྷན་ཚོགས་ནས་ཛ་དྲག་ཏུ་གཟིགས་ཏེ་གྲོས་ཆོད་ཀྱི་ལམ་ནས་ཞིབ་འཇུག་ཚོགས་ཆུང་འཛུགས་དགོས་པ་ཐག་གཅོད་གནང་། རྗེས་སུ་ཞིབ་འཇུག་ཚོགས་ཆུང་གིས་གྲུབ་དོན་སྙན་ཐོ་བཀའ་ཤག་གི་མཚན་བསྣམས་པའི་ད་ལྟའི་མི་འདི་དག་ལ་གནང་ཡོད་ཀྱང་། བཀའ་ཤག་གིས་སྙན་ཐོ་བོད་མི་མང་སྤྱི་འཐུས་ལྷན་ཚོགས་ལ་འབུལ་རྒྱུ་ལྟ་ཅི། དཔལ་ལྡན་ཚོགས་གཙོ་སྦྲེལ་པོ་ལའང་ནང་དོན་སྙན་སྒྲོན་ཙམ་ཡང་ཞུས་མེད། མཐར་རྐུན་མར་དཔའ་དར་འཐེན་པ་བཞིན་དབུ་དཀར་ཚང་སྐལ་བཟང་རྡོ་རྗེ་གངས་སྐྱིད་དུ་ལས་ཀ་མུ་མཐུད་སྤྲད་ཡོད་པ་ལ། དེའི་སྟེང་གཞུང་ཞབས་འདེམས་ལྷན་གྱི་སྒྲིག་གཞིར་བསྐྱར་བཅོས་སོང་བ་དམིགས་བསལ་བསྐོ་བཞག་ཁ་ལ་འཁྱེར་ཏེ། དོན་དུ་སྒྲིག་གཞི་དོན་ཚན་དེ་དང་རྒྱབ་འགལ་གྱིས་ཚད་མཉམ་དྲུང་འཕར་ནས་དྲུང་ཆེར་གནས་སྤར་བསྐོ་བཞག་བྱས་ཡོད། ཡིན་ཡང་ཕྱི་ཚུལ་འཁྲབ་སྟོན་དུ་སྐལ་རྡོར་ལ་ཉེན་བརྡ་ཞིག་བཏང་སྟེ་འཐུས་པ་བྱས་ཡོད། སྐལ་རྡོར་ལ་ད་བར་ཉེན་བརྡ་ཐེངས་གསུམ་ཕོག་ཡོད། གཞུང་ཞབས་གཞན་ལ་ཉེན་བརྡ་ནི་གནས་སྤར་འགོག་བྱེད་ཅིག་ཡིན་ཡང་། བློ་བཟང་སངས་རྒྱས་ཀྱི་གྲོགས་པོ་ཡིན་སྟབས་ལྟོས་མེད་རང་བྱེད་བཞིན་པ་གཞུང་ཞབས་ནང་དུའང་བསམ་ཚུལ་ཤུགས་ཆེ་ཡོད་པ་གསལ་བོ་རེད། དེ་བཞིན་དབུ་དཀར་ཚང་སྐལ་བཟང་རྡོ་རྗེ་དང་བློ་བཟང་སངས་རྒྱས་གཉིས་ཁ་མཐུན་ཏེ། བོད་ཀྱི་ཐེབས་རྩ་དང་མཉམ་བཞག་གཞུང་འབྲེལ་གན་ཡིག་ངོ་བཤུས་དོན་གཅོད་དང་བཀའ་དྲུང་ཡིག་ཚང་གང་གིའང་ཡིག་སྣོད་དུ་མ་བཞག་པར་ལྐོག་ཏུ་མེད་པ་བཟོས་པ་རེད། དེའི་རྒྱུ་མཚན་ནི་ཨ་རིའི་དོན་ཁང་དང་ཉི་ཧོང་དོན་ཁང་གཉིས་ཀ་ཁོང་གཉིས་ནས་འགྲོ་གྲོན་ཐབས་ཤེས་བཏང་སྟེ་ཉོས་པ་ཡིན་ཞེས། ༢༠༡༥ ལོའི་སྲིད་སྐྱོང་འོས་བསྡུ་ཆེན་མོའི་སྐབས་༧དཔལ་ལྡན་དགའ་ལྡན་ཕོ་བྲང་ཞལ་ཁྲ་ལམ་མེར་བཞུགས་ཡོད་པ་ཟུར་དུ་བཞག་སྟེ་རྒྱ་ཆེ་མི་མང་ལ་ཞལ་རྫུན་གྲངས་ལས་འདས་པ་གསུངས་ཡོད། དོན་ལ་དོན་ཁང་དེ་གཉིས་ཉོ་བྱེད་དཔལ་ལྡན་དགའ་ལྡན་ཕོ་བྲང་ཡིག་ཚང་དང་བོད་ཀྱི་ཐེབས་རྩ་ནས་བགོས་པའི་དོན་ཁང་གི་ཐོབ་སྐལ་གྱིས་སྤུས་གཟིགས་གནང་བ་རྩིས་ཞིབ་སྙན་ཐོར་ཧ་ཅང་གསལ་བོ་བཀོད་འདུག་པ་སོགས་སྐྱོན་དང་ནོར་འཁྲུལ་ཞིབ་པ་མ་འོངས་པར་དེབ་གཟུགས་སུ་ཐོན་ངེས་པས་སྐབས་འདིར་བརྗོད་པར་བྱ་བ་ནི།

ཆེས་མཐོའི་ཁྲིམས་ཞིབ་ཁང་གི་བཅད་ཁྲར་ཇི་ལྟར་གསལ་བོ་བཀོད་པ་བློ་རབ་འབྲིང་མཐའ་གསུམ་གྱི་གོ་བས་ཆུན་པ་ནང་བཞིན་ཡོད་ནའང་། བཀའ་ཤག་གིས་ཉམས་ལེན་ཞུ་ཕྱོགས་དེ་ལས་ལྡོག་སྟེ། ཆེས་མཐོའི་ཁྲིམས་ཞིབ་ཁང་ལ་ཟུར་ཟ་གནང་ཡོད་པ་མ་ཟད། མི་མང་ཁ་ལ་འཁྱེར་ནས་ཐག་གཅོད་དྲང་བདེན་མ་བྱུང་བའི་བསམ་ཚུལ་མི་མང་ནང་འདུག་ཚུལ་ཀྱང་ལྟོས་མེད་ཀྱིས་བཀོད་འདུག ཐག་གཅོད་དྲང་པོ་བྱུང་མིན་བཀའ་ཤག་རང་ལ་རྩོད་བཤད་ཀྱི་ཡང་དག་པའི་ལྕེ་དང་། དེ་སྒྲུབ་བྱེད་ཀྱི་དཔང་པོ་ཚད་འཕེར་ཡོད་མེད་ལ་རག་ལས་པ། ཁ་མཆུ་ཨང་ ༢༠ པའི་ཆེད་དུ་འཚོགས་པའི་ཉན་ཞིབ་དག་གི་སྐབས་བཀའ་ཤག་ལ་དགོས་ངེས་ཀྱི་དུས་ཚོད་ཡོངས་རྫོགས་གནང་སྟེ་བར་དོ་ངོ་འཕྲོད་གསལ་བོ་གནང་བ་དེས་ཤེས་པ་ལས། ཉན་ཞིབ་གཅིག་ལའང་བཅར་མ་མྱོང་ཞིང་ཟེར་རྗེས་འབྲང་པའི་༧གོང་ས་མཆོག་ལ་མཚན་སྨོད་ཞུ་མཁན་གྱི་མི་ཁ་ཤས་ཀྱི་བབ་ཅོལ་ལ་གསན་ཏེ་མི་མང་ཞེས་པའི་ཚིག་སྤྱད་ཡོང་བ་འདི་དེ་བས་རང་མདོག་སྟོན་བྱེད་ཅིག་སྟེ། འུ་ཐུག་ན་དགྲ་ལ་ཡིན་ཡང་ལག་གདེང་སྦྲེལ་སྲིད་པའི་རྣམ་པ་མཚོན་བྱེད་ཅིག་རེད།

འདོད་བློ་མ་ཁེངས་པ་དང་ལས་འབྲས་དང་མཐུན་མིན་གྱི་ཚིག་ཙམ་ལ་སྐྱབས་བཅོལ་བ་ལས། བཙན་བྱོལ་བོད་མིའི་ཁྲིམས་ཞིབ་ཁང་གི་སྤྱི་མང་གཏུག་བཤེར་འགྲོ་ལུགས་རྩ་འཛིན་ཁྲིམས་ཡིག་གི་ལེའུ་བཅུ་པ། བསྐྱར་ཞིབ་དང་དོགས་གཅོད། དོན་ཚན་ ༦༤ དགོངས་དོན་འོག་བསྐྱར་ཞིབ་གནང་ཆོག་པ་གསལ་ཡང་རང་བློ་རང་ལ་ལྐོག་ཏུ་མ་གྱུར་གཤིས་བསྐྱར་ཏུ་ཞུ་གཏུགས་ཀྱི་གཞི་རྩ་མེད་པ་གབ་ཡིབ། འཁྱོག་བཤད་ཅི་འདྲ་བྱས་ཀྱང་མི་མང་ལ་དབུ་སྐོར་ག་ནས་ཞུ་ཐུབ། དེ་མིན་དབུས་ལྷན་ཁང་ཞིག་གི་ལས་དོན་ཆེ་ཕྲ་གང་ཡང་པར་ཆས་ནང་གདོང་བསྟན་ཏེ་གསར་འགོད་པར་བཤད་དགོས་ཚེ། ཡ་གའི་སྲིད་སྐྱོང་ལྷན་ཁང་ཁག་ཏུ་མར་བབས་བབས་པ་ཡིན་པ་ཞིག་ལ། ཁ་མཆུ་ཨང་ ༢༠ པ་དང་འབྲེལ་ཏེ་གདོང་སྟོན་མ་ཕོད་པ་ནི། ཕུག་ན་བདེན་པ་མེད་པ། དོན་ལ་བློ་ཁོག་མེད་པ་ཉག་ཅིག་ཡིན་པ་གཤིན་རྗེའི་ཆོས་ཀྱི་རྒྱལ་པོས་ཀྱང་ཏན་ཏན་གསུང་གི་རེད། ལས་བྲེལ་ཡིན་ན། ཨ་ནེ་སྙིད་མོའི་ཆང་སར་ཉིན་ཕྱེད་གཏོང་ཐུབ་དོན་མེད་པས་རྫུན་དང་སྒྲུང་གིས་ནམ་རིང་མི་འཁྱོལ་བ་ཧ་ཅང་གསལ་བོ་ཆགས་སོང་སྙམ་པས། ད་ནི་ཚོད་ཅིག་འཛིན་རོགས་དཔལ་ལྡན་བཀའ་ཤག་ལགས།

ལར་ནས་ཤེས་ལྡན་གཟུ་བོར་གནས་པ། ངོ་ཚའི་གོས་དང་ལྡན་པ། རིག་པ་རྣལ་དུ་གནས་པ། སྤྱི་པ་ནམ་ཡང་རང་དོན་ཁོག་བཅུག་གིས་ཡལ་བར་མི་འདོར་མཁན་ཞིག་ཡིན་ན། ཇི་ལྟར་བཅའ་ཁྲིམས་རིན་པོ་ཆེའི་དོན་ཚན་ ༦༦ པའི་ནང་གསེས་ ༡ གསལ་བ་བཞིན། ‘‘ ཆེས་མཐོའི་ཁྲིམས་ཞིབ་ཁང་ནི་བཙན་བྱོལ་བོད་མི་སྤྱི་སྒེར་ཡོངས་ཀྱི་མཐར་གཏུག་གི་ཞུ་གཏུགས་བྱ་ཡུལ་ཁྲིམས་ཞིབ་ཁང་དང་། བོད་མིའི་སྒྲིག་འཛུགས་ཀྱི་ཁྲིམས་འཛིན་གོང་ན་མེད་པ་དེ་ཡིན་’’ ཞེས་པའི་བླ་ན་མེད་པའི་གནས་བབ་ལ་ལྟོས་མེད་སུས་བྱེད་ནུས་སམ།
བཀུར་འོས་མི་མང་གིས་མཁྱེན་གསལ་བཞིན། སྲིད་སྐྱོང་དང་བཀའ་བློན་ཚོས་ལས་འཁུར་དམ་བཅའ་ཕུལ་སྐབས། ‘‘༄༅། ། བདག་་་ བློ་བཟང་སེང་གེ་་་ཞེས་བགྱི་བ། བོད་མིའི་སྒྲིག་འཛུགས་ཀྱི་སྲིད་སྐྱོང་ལ་འོས་ཐོན་བྱུང་བ་ལགས་ན། བཙན་བྱོལ་བོད་མིའི་བཅའ་ཁྲིམས་ལ་ཡིད་ཆེས་དང་། བློ་གཏད་ཀྱི་ཐོག་ནས། སྲིད་སྐྱོང་གི་ལས་འཁུར་ཞུ་སྒོ་མཐའ་དག བཅའ་ཁྲིམས་ཀྱི་དགོངས་དོན་འགལ་མེད་ཐོག རང་དོན་ཕྱོགས་ལྷུང་དང་། འཇིགས་ཞུམ་ཆགས་སྡང་མེད་པར། དྲང་བདེན་ལྷག་བསམ་ཟོལ་མེད་ཀྱི་སྒོ་ནས། རང་ནུས་གང་ཐེག་ཞུ་རྒྱུའི་མཆོག་གསུམ་དཔང་བཙུགས་ཀྱི་དམ་བཅའ་བརྟན་པོ་ཞུ་རྒྱུ་ཡིན་’’ཞེས་མནའ་བོར་ཏེ་དམ་བཅས་ཡོད།

འོན་ཀྱང་བཅད་ཁྲའི་ནང་གསལ་དུས་ཡུན་ཟླ་གཅིག་རིང་ ༢༠༡༩ ཟླ་ ༡༠ ཚེས་ ༡༤ ནས་ ༢༠༡༩ ཟླ་ ༡༡ ཚེས་ ༡༤ བར་བཅད་ཁྲ་ཉམས་ལེན་བྱས་མེད་ཅིང་། དེ་རིང་ཚེས་ ༡༦ ཉིན་ད་དུང་གྲགས་འགུལ་གང་ཡང་མེད། བཙན་བྱོལ་བོད་མིའི་ཁྲིམས་ཞིབ་ཁང་གི་སྤྱི་མང་གཏུག་བཤེར་འགྲོ་ལུགས་རྩ་འཛིན་ཁྲིམས་ཡིག་གི་དོན་ཚན་ ༢༨ ནང་། གལ་སྲིད་རྩོད་ལན་པས་བརྡ་ཐོར་བརྩི་བཀུར་མ་བྱས་ན། བཅའ་ཁྲིམས་རིན་པོ་ཆེའི་དོན་ཚན་ ༡༣ པའི་ནང་གསེས་ ༢ ། ‘‘བཅའ་ཁྲིམས་དང་། ཁྲིམས་ལུགས་ཁག་ལ་སྙིང་ནས་བརྩི་བཀུར་དང་། ཉམས་ལེན།’’ ཞེས་པ་དང་འགལ་བར་ངོས་འཛིན་བྱས་ཡོད། ཞུ་སྦྱོར་པའི་ཞུ་རྩ་ཁྲིམས་ཞིབ་ཁང་གིས་ངོས་ལེན་གནང་རྗེས་རྩོད་ལན་པར་བརྡ་ཐོ་བཏང་བར་བརྩི་བཀུར་མ་བྱས་པ་བཅའ་ཁྲིམས་རིན་པོ་ཆེ་དང་འགལ་གྱི་ཡོད་ན། ཆེས་མཐོའི་ཁྲིམས་ཁང་གིས་བཏང་བའི་བཅད་ཁྲ་ཉམས་ལེན་མ་བྱས་ན་བཅའ་ཁྲིམས་རིན་པོ་དང་འགལ་ཟིན་པ་ཐང་གི་གྲོག་མ་ལའང་ཞུ་ག་ལ་དགོས།

དེ་བཞིན་བཙན་བྱོལ་བོད་མིའི་ཁྲིམས་ཞིབ་ཁང་གི་སྤྱི་མང་གཏུག་བཤེར་འགྲོ་ལུགས་རྩ་འཛིན་ཁྲིམས་ཡིག་གི་དོན་ཚན་ ༥༡ ནང་གསེས་ཁ་པའི་ནང་དུའང་། གྱོད་ཡ་སུ་རུང་ནས་ཁྲིམས་ཞིབ་ཁང་གི་བཅད་ཁྲ་དང་། བཀའ་ཁྲ། བཀའ་ཁྱབ། བཀའ་ཤོག བཀོད་འདོམས་བཅས་ལ་བརྩི་མེད་བྱས་ཚེ། བཅའ་ཁྲིམས་དོན་ཚན་ ༢༢ པ་བཀའ་བློན་འོས་འདེམས་ཁོངས་ཞུགས་རྒྱུ་དང་། བཅའ་ཁྲིམས་དོན་ཚན་ ༦༣ པ་ཆེས་མཐོའི་ཁྲིམས་ཞིབ་པ་ཆེ་བ་དང་ཁྲིམས་ཞིབ་པ་གཞན་གཉིས་ཀྱི་འོས་མིའི་ནང་ཞུགས་རྒྱུ། བཅའ་ཁྲིམས་དོན་ཚན་ ༩༧ ། ༡༠༡། ༡༠༧། ཏེ་རང་དབང་ཅན་གྱི་སྡེ་ཚན་ཏེ་དབུས་འོས་བསྡུ་ལས་ཁང་། ལས་བྱེད་འདེམས་བསྐོ་ལྷན་ཁང་། སྤྱི་ཁྱབ་རྩིས་ཞིབ་ལས་ཁང་གི་སྤྱི་ཁྱབ་རྩིས་པ་བཅས་ཀྱི་འོས་མིར་ཞུགས་རྒྱུ་བཅས་བཀག་བསྐྱིལ། དེ་བཞིན་འོས་བསྡུའི་སྒྲིག་གཞི་དོན་ཚན་ ༤ ནང་གསལ་གདམ་བྱ་འདེམས་བྱེད་ཀྱི་ཐོབ་ཐང་མེད་པ་བཟོ་ཆོག་པ་གསལ་བ་མ་ཟད། ད་དུང་དེར་བོད་མིའི་སྒྲིག་འཛུགས་མ་ལག་གི་གཞུང་འབྲེལ་ལས་གནས་གང་རུང་དུ་འདེམས་བསྐོ་བཀག་སྡོམ་དང་། གནས་ཕབ། གནས་དབྱུང་སོགས་ཐད་ཀར་གནང་ཆོག་པ་གསལ་བས། ཁྲིམས་སྒྲིག་གི་གནས་ཚུལ་ཞིབ་ཏུ་མ་སྦྱངས་པའི་རྒྱབ་སྐྱོར་པ་མི་མང་ཉུང་ཤས་ཀྱི་མདུན་སར་ཉི་མ་འཁྱོལ་ཐབས་དང་། མཉམ་དུ་སྡིག་པ་མིག་བཙུམ་བྱེད་པ། ཁྲིམས་ཀྱི་དབང་བསྒྱུར་ཡང་རང་ལ་ཐུག་ན་གལ་ཆེར་མི་བརྩི་རུང་། སྲིད་སྐྱོང་དང་བཀའ་བློན་གྱི་མཚན་ལ་དགའ་བའི་སྤུན་ཟླ་ཕོ་མོ་ཚོས་རང་ཉིད་ལ་ཐར་ལམ་ཞིག་བཙལ་དགོས་པའི་དུས་ལ་བབ་འདུག་པ་ཅི་ནས་ཀྱང་ངོས་བཞེས་གནང་ན་མཛེས།

གུས་པའི་རེ་བ་ནི། ཡང་ན་ད་ལྟའི་བཀའ་ཤག་གི་གནས་སྟངས་འདི་བཞིན་རང་ཐོག་ཏུ་བླངས་ཏེ་གཏོང་ལེན་གྱི་སྒོ་ནས་བསམ་བློ་བཏང་བ་ཡིན་ན། ངས་ནི་མི་ཚེ་ལྷག་མ་ཅི་ཡོད་དང་། ལྷག་པར་སྐྱེ་བ་ཕྱི་མ་རྣམས་ལ་ལམ་ཁ་ཞིག་ཏན་ཏན་སྐྲུན་རྒྱུར་འབད་བརྩོན་ཞུ་ངེས་ཡིན། ནོར་བ་ཡོང་སྲིད། སྤྱི་པ་རང་དོན་དུ་སྤྱད་ནས་ནོར་འཁྲུལ་བཟོས་པ་ནོར་ལུགས་ཚབས་ཆེན་ཡིན་ཡང་། ད་ནི་བྱུང་ཟིན་པས། ལམ་ཁ་ཡག་ཤོས་གཅིག་ཡོད་པ་ནི། འཇིག་རྟེན་ཀུན་ཏུ་དབྱར་གྱི་ཆུ་བོའི་རྣམ་པར་དར་སྲོལ་ཆགས་ཟིན་པ་ལྟར། མང་གཙོའི་ལམ་ལུགས་ནང་མི་མང་གི་བརྒྱ་ཆ་མང་ཆེ་བས་འདོད་མོས་ཁྱོན་ནས་མེད་པ། ཐ་ན་ཡིད་ཆེས་ཚུན་བརླགས་ཟིན་པའི་རྣམ་པ་བསྟན་པ་ཡིན་ན། ངེས་པར་བཟང་སྤྱོད་དང་ལྡན་པའི་ངང་དགོངས་པ་ཞུ་དགོས་པ་རེད། དེ་ནི་ཚུལ་མཐུན་གྱི་ལམ་ཁ་གཅིག་པུ་དེ་རེད། དེས་རང་ཉིད་བདེ་བ་དང་ཡང་དག་པའི་ལམ་ལ་དགོད་པ་ཙམ་མིན་པར། བོད་མིའི་སྒྲིག་འཛུགས་སྲ་བརྟན་དུ་སྒྱུར་བ་དང་། བོད་མིའི་མང་གཙོ་སྔར་ལས་ཡང་དག་པར་སྒྱུར་བ། བོད་ཀྱི་བདེན་དོན་འཐབ་རྩོད་ལ་ནུས་ཤུགས་གསར་པ་ཁ་སྣོན་བྱས་པ་དང་མཚུངས་པས་དེ་ལ་ཅི་ནས་ཀྱང་དགོངས་པ་བཞེས་དགོས་པ་རེད་སྙམ། ངས་བསམས་ན་ལམ་ཁ་འདི་ད་ལྟའི་བོད་ཀྱི་དམ་ལྡན་ལྷ་མི་ཡོངས་ཀྱི་དགོངས་ཚུལ་རེད་སྙམ། གལ་སྲིད་བཀའ་ཤག་ཐུགས་ཡིད་མི་ཆེས་ན། ད་བར་ཆོས་སྐྱོང་ཁག་གིས་བཀའ་ཤག་ལ་བསྩལ་བའི་བཀའ་ལུང་ཁག་ལ་བསྐྱར་ཞིབ་ཅིག་གནོང་དང་། ཡིད་ལ་ལྗིད་ཏིག་གེར་འབབ་པ་ཞིག་ཏན་ཏན་ཡོད་པ་རེད།

ཡང་ཕྱོགས་གཞན་ཞིག་ནས་ཞུས་ན། ད་ལྟའི་སྲིད་སྐྱོང་དང་བཀའ་བློན་རྣམ་པར་ནོར་འཁྲུལ་ཚབས་ཆེན་ཡོད་ཀྱང་། འཇོན་ནུས། མཁྱེན་དཔྱོད། བཟང་སྤྱོད་ཀྱི་ཆ་བཅས་ཀྱང་གང་འཚམས་ཡོད་ན་དེ་ཡང་བསམ་བློ་གཏོང་ས་ཞིག་ཡིན་མོད། ང་ཚོས་མཉམ་དུ་གྲོས་ཚོགས་ནང་བོད་སྤྱི་པའི་རྩ་དོན་དང་། སྒྲིག་འཛུགས་ཀྱི་ལས་དོན་ཆེད་ལོ་བཞི་ལྷག་ལ་རྣམ་དཔྱོད་གཅིག་ཏུ་སྤུངས་ཏེ། རྣམ་དཔྱོད་ཀྱི་བློའི་རྩལ་ཕར་གསལ་ཚུར་གསལ་ཆགས་ཡོད་ཙང་། དྲང་པོར་ཞུས་ན། ཁྱེད་རྣམ་པ་མེད་ཐབས་མེད་པ་དང་། ཁྱེད་རྣམ་པས་དགོངས་པ་ཞུས་པ་ཡིན་ན། དྲག་གྲས་གོ་འཕེར་ཞིག་སྒྲུག་རྒྱུ་མེད་པ་དེ་འདྲ་རྩ་ནས་མིན་པ། ཐོག་མར་བཀའ་བློན་དུ་སླེབས་སྟངས་ནས་ཤེས་གསལ་ཡིན་པས། ག་ས་གང་དུ་ཚད་འཕེར་གྱིས་ཁེངས་འདུག་པ་ཧ་ཅང་གསལ་བོ་རེད་འདུག་ན། མ་འོངས་པ་ལའང་ཐུགས་ཁྲལ་ཁྱོན་ནས་གནང་དགོས་དོན་མི་འདུག་སྙམ། དེས་ན་བརྒྱ་བཤད་ཚིག་གི་རྩ་བ། སྟོང་བཤིགས་འོ་མའི་མར་ལོ་ཅི་ཡིན་ཟེར་ན། དཔལ་ལྡན་སྲིད་སྐྱོང་དང་བཀའ་བློན་གྱི་མཚན་གནས་འོག་མི་སྒེར་ཆེན་པོའི་ཟོལ་དུ་བཞུགས་འདོད་བློས་ཐོངས་མིན་ཙམ་ལ་འཁྲིལ་ནས་ལྟོས་མེད་བྱེད་མིན་ཁོ་ནར་ཐུག་འདུག་པས། ན་ཚོད་ཀྱི་ཆ་ནས་ཞུས་ཀྱང་དགུང་ལོ་ཡར་ཕེབས་ཡོད་སྟབས། རབ་ཏུ་བྱུང་ན། ཚེ་མཇུག་དགེ་སྒྲུབ་ལ་འབད་དེ་བཀའ་ཤག་ལྷན་རྒྱས་ནས་དགོངས་པ་ཞུ་རོགས་གནང་ཞེས་མ་ཞུ་ཐབས་མེད་ཆགས་སོང་ངོ་།།

2019 ཟླ་ 11 ཚེས་ 16 ཉིན་ནོར་བུ་འཚིག་ཇ་ཁང་དུ་བྲིས།།