བྱ་སྤུ་གནོན་གྱི་སྒྱོགས་རྡོ་རང་མགོར་ལྷུང་བ།

རྔ་བ་དུག་འཚེར།
 
ཕྱི་གླིང་པ་ཚོས་བོད་སྐད་བཤད་སྟངས་ལྟར་བྱས་ན་ཟླ་སྒྲོན་ཤར་གླིང་དང་། བོད་རང་གི་སྐད་ཀྱི་འགྲོ་སྟངས་ལྟར་བྱས་ན་ཤར་གླིང་ཟླ་སྒྲོན། གངས་སྐྱིད་དུ་ཨ་ནེ་སྙིད་མོ་རུ་གྲགས་པ་མོ་ནི་སྐད་གྲགས་ཆེ་བའི་ཁ་མཆུ་ཨང་ཉི་ཤུ་པའི་ཐོག་མའི་འབྱུང་རྐྱེན་གྱི་ནད་ཀྱི་རྩ་བ་དང་དུག་གི་སྡོང་པོ་ལྟ་བུ་དེ་རེད།

བློ་བཟང་སངས་རྒྱས་ཐེངས་གཉིས་པར་སྲིད་སྐྱོང་འོས་མིར་ཐོན་སྐབས། ཤར་གླིང་ཟླ་སྒྲོན་གྱིས་བློ་བཟང་སངས་རྒྱས་ཀྱི་བཀའ་ཤག་ནི་སྐྱུགས་བྲོ་བའི་བཀའ་ཤག་ཅིག་ཡིན་པ་དང་། བཀའ་ཤག་དེས་ཤེས་ཡོན་དང་འཇོན་ཐང་ཡོད་མེད་ལ་མི་བལྟ་བར། རང་གི་ངོ་ཤེས་དང་། རང་དང་འབྲེལ་བ་ཡག་པོ་ཡོད་མཁན་ཚོར་གོ་སྐབས་མང་བ་སྐྲུན་བཞིན་ཡོད་སྐོར་གྱི་སྐྱོན་བརྗོད་དྲག་པོ་བྱས།

བློ་བཟང་སངས་རྒྱས་ལ་ཐེངས་གཉིས་པའི་སྲིད་སྐྱོང་གི་རྒྱལ་ཁ་ཐོབ་རྗེས། བློ་བཟང་སངས་རྒྱས་ཀྱིས་ཟླ་བ་གསུམ་དང་ཉིན་ཉི་ཤུས་ལོ་ཚད་མ་ལོན་པས་བཀའ་བློན་གྱི་འོས་ཆོས་མི་ཚང་བའི་ཤར་གླིང་ཟླ་སྒྲོན་བཀའ་བློན་དུ་འཐེན་པ་དང་། ཤར་གླིང་ཟླ་སྒྲོན་གྱིས་ཀྱང་བཅའ་ཁྲིམས་ཀྱིས་བཀའ་བློན་འོས་ཆོས་ཐག་བཅད་པའི་༼ལོ་ངོ་ཧྲིལ་པོ་སུམ་ཅུ་སོ་ལྔ་འཁོར་བ་༽ཞེས་པའི་ཧྲིལ་པོ་ཞེས་པར་ལོ་ལྔའི་རིང་སྤྱི་འཐུས་བྱས་ནས་བསྡད་མྱོང་མཁན་ཞིག་གིས་མ་ཤེས་མདོག་མདོག་གིས་ཐར་འགྲོ་ངེས་རེད་བསམས་པས་བཀའ་བློན་གྱི་འོས་གཞིར་ལངས་ཡང་གྲོས་ཚོགས་ནང་ནས་འདྲེད་བརྡབ་ཤོར་བར་མ་ཟད། བཀའ་བློན་གྱི་འོས་མིར་ལངས་ཆེད་གྲོས་ཚོགས་ཀྱི་རྐུབ་བཀྱག་ཡང་བློས་གཏོང་བྱེད་དགོས་ཐུག འོན་ཀྱང་དེ་སྔོན་ཁ་ནས་ཐོན་ཚད་ལྟར་སྐྱོན་བརྗོད་བྱེད་སའི་སྲིད་སྐྱོང་དེ་ལ་གུས་བརྩི་ཡོད་རབས་དང་། ཁོང་གིས་ང་རང་བཀའ་བློན་འོས་མིར་འཐེན་པ་ནི་བསོད་ནམས་ཆེན་པོ་ཡིན་རབས་སོགས་ཁ་ཁོག་རྦད་དེ་མི་མཐུན་པའི་སྐད་ཆ་རྫབ་ཆེན་འདྲ་མིན་བཤད།

དེ་རྗེས་ཡང་བསྐྱར་སྲིད་སྐྱོང་བློ་བཟང་སངས་རྒྱས་སྡོད་མ་ཚུགས་པར་ཤར་གླིང་ཟླ་སྒྲོན་བཀའ་བློན་འོས་མིར་སྐབས་བཅུ་དྲུག་པའི་བོད་མི་མང་སྤྱི་འཐུས་གྲོས་ཚོགས་ཀྱི་མདུན་ཅོག་ཐོག་ཏུ་བཞག་ཡང་བསྐྱར་དུ་འདྲེད་བརྡབ་ཤོར།

དུས་ཡུན་ཐུང་ཐུང་ཞིག་གི་རིང་བཀའ་བློན་གྱི་རྐུབ་བཀྱག་སྔ་ཕྱི་ཐེངས་གཉིས་དང་། གྲོས་ཚོགས་ཀྱི་རྐུབ་བཀྱག་བཅས་རྩ་ཆེའི་རྐུབ་བཀྱག་ཐེངས་གསུམ་ལ་ཤོར་བ་ནི་རྩེད་མོ་རྩེ་བཞིན་པ་ཞིག་དང་མཚུངས། དོན་ངོ་མར་དེ་ནི་སྐྱིད་པོ་གཉིས་བརྩེགས་མེད་པར་སྡུག་པོ་གསུམ་བརྩེགས་ཟེར་བའི་དཔེ་རུ་གྱུར། མ་ཟད་འཇིག་རྟེན་གཏམ་དཔེར། མ་བསྙབས་གནམ་ལ་བསྙབས་ན།། རྐང་པའི་རྟིང་རྩ་ཆད།། ཅེས་པའི་སྡོམ་ཚིག་དེ་ཏག་ཏག་ཤར་གླིང་ཟླ་སྒྲོན་གྱི་མགོ་ཐོག་ཏུ་ལྷུང་།

ཤར་གླིང་ཟླ་སྒྲོན་གྱི་བཀའ་བློན་དང་སྤྱི་འཐུས་ཀྱི་ལམ་ཁ་ཚང་མ་མེད་པར་ཆགས་རྗེས། སྲིད་སྐྱོང་བློ་བཟང་སངས་རྒྱས་ཀྱིས་སྒེར་གྱི་དབང་ཚད་བཀོལ་ནས་ཤོ་རྡེའུ་ལྟ་བུའི་ཤར་གླིང་ཟླ་སྒྲོན་དེ་དྲིལ་བསྒྲིགས་དྲུང་ཆེའི་ཚད་མཉམ་གྱི་རྐུབ་བཀྱག་ཐོག་ཏུ་དེད། རྒྱ་དང་ར་མ་གཉིས་ལ་མཐོ་དགའ་ཆེ་ཟེར་བའི་དཔེ་ལྟར་དེས་ཤར་གླིང་ཟླ་སྒྲོན་གྱི་འདོད་པ་ཡེ་ནས་མ་ཚིམས་པས་དུས་ཡུན་ཐུང་ངུའི་ནང་རྐུབ་བཀྱག་དེ་རང་སར་ཇི་མི་སྙམ་པས་གཡུགས།

སྲིད་སྐྱོང་བློ་བཟང་སངས་རྒྱས་དང་ཤར་གླིང་ཟླ་སྒྲོན་གཉིས་ཀྱི་གངས་སྐྱིད་ཀྱི་ལེའུ་དེ་རྫོགས་རྗེས། ཤར་གླིང་ཟླ་སྒྲོན་གྱིས་ཚོགས་ཟུར་སྤེན་པ་ཚེ་རིང་ལངས་རྒྱུ་མེད་པར་བཟོ་ཆེད། འཇིགས་སུ་རུང་བའི་འཁྲབ་སྟོན་གྱི་ལེའུ་གསར་པ་ཞིག་གི་འགོ་བཙུགས།

དེ་ཡང་ཚོགས་ཟུར་སྤེན་པ་ཚེ་རིང་གིས་དིལླཱིར་ཤར་གླིང་ཟླ་སྒྲོན་ལ་ལྷག་བསམ་རྣམ་དག་གིས་བཤད་པའི་སྐད་ཆ་དེ། ཤར་གླིང་ཟླ་སྒྲོན་གྱིས་རང་ལ་ཚད་ལས་བརྒལ་བའི་མཐོང་ཆུང་བྱས་པ་ལྟ་བུར་གོ་ནས། ཁོང་ཁྲོ་མེ་ལྟར་འབར་བ་ནའང་གནས་སྐབས་འཁོན་ལན་སློག་པའི་གོ་སྐབས་མ་རྙེད།

བསམ་ཡུལ་ལས་འདས་པ་ཞིག་ལ། མོས་ཚོགས་ཟུར་སྤེན་པ་ཚེ་རིང་གིས་བཤད་པའི་སྐད་ཆ་དེ་གསང་བ་ཡིན་མདོག་གིས་ཁ་བདག་མི་ཐུབ་པར་ཤེས་པའི་དགེ་ལུགས་སྤྱི་འཐུས་རྒྱགས་པ་དེ་བརྒྱུད་ལམ་ལྟ་བུར་ཤེས་ནས་གསང་བ་དེ་ཕྱི་ལ་ཤོར་ཆེད་བསམ་བཞིན་དུ་མི་དེར་བཤད། ཏག་ཏག་ལས་ངན་སྤྱི་འཐུས་དེས་ཤར་གླིང་ཟླ་སྒྲོན་གྱི་བསམ་དོན་ལྟར་གསང་བ་སྲིད་སྐྱོང་བློ་བཟང་སངས་རྒྱས་ཀྱི་རྣ་རྩར་བཏང་།

ཤར་གླིང་ཟླ་སྒྲོན་གྱི་དམིགས་ཡུལ་གཙོ་བོ་ནི། བཀའ་ཤག་དང་སྤེན་ཚེའི་བར་འགལ་ཟླ་བཟོས་ཏེ། ཚོགས་ཟུར་སྤེན་པ་ཚེ་རིང་སྲིད་སྐྱོང་བློ་བཟང་སངས་རྒྱས་ཀྱི་མིག་ནང་གི་ཚེར་མ་ལྟ་བུ་ཞིག་ཏུ་འགྱུར་དུ་འཇུག་རྒྱུ་དེ་ཡིན་པར་མ་ཟད། ལ་ཁའི་དར་ཅོག་ལྟ་བུའི་བཀའ་ཤག་གི་ནུས་པ་དེ་སྤྱད་ནས་ཚོགས་ཟུར་སྤེན་པ་ཚེ་རིང་ལ་བསམ་ཡུལ་ལས་འདས་པའི་མིང་ཆད་ངན་པ་བཟོ་རྒྱུ་དེ་རང་རེད།

གནས་ཚུལ་འདི་འདྲ་ཞིག་གི་འོག་ནས་ཤར་གླིང་ཟླ་སྒྲོན་གྱི་བསམ་ཐོག་ལ་རྟ་རྒྱུག་པ་ལྟར་བྱུང་སྟེ། སྲིད་སྐྱོང་བློ་བཟང་སངས་རྒྱས་ཀྱིས་ཚོགས་ཟུར་སྤེན་པ་ཚེ་རིང་དེ་རང་གི་དགྲ་དགྲ་ནག་ཅིག་ཏུ་བརྩིས་པས་རྦད་དེ་རྨོངས་པར་གྱུར། དེ་ནས་བཟུང་སྲིད་སྐྱོང་བཟང་སངས་རྒྱས་ཀྱིས་ཚོགས་ཟུར་སྤེན་པ་ཚེ་རིང་གིས་བོད་མིའི་རྩ་དོན་ཆེད་དུ་ལྷག་བསམ་རྣམ་དག་གིས་རང་གི་ཤེས་འཇོན་གྱི་ནུས་པ་ཡོད་ཚད་སྤྱད་དེ་ཁ་ནས་བཤད་ཚད་དང་། ལག་གིས་ལས་ཚད་ཚང་མ་མ་འོས་པ་དང་། མི་འཚམས་པ། རང་ལ་ངོ་རྒོལ་བྱེད་ཀྱི་ཡོད་པ་ལྟ་བུར་ཚོར་བ་དེ་སྤེན་ཚེ་དོན་གཅོད་ནས་གནས་དབྱུང་གཏང་རྒྱུའི་རྒྱུ་རྐྱེན་གྱི་གཏིང་རྡོ་ལྟ་བུའི་ནང་ནས་གཅིག་ཏུ་གྱུར།

རིམ་པས་སྲིད་སྐྱོང་བློ་བཟང་སངས་རྒྱས་ཀྱིས་ཚོགས་ཟུར་སྤེན་པ་ཚེ་རིང་དེ་ཁོ་རང་མེ་དང་ཆུ་ལྟ་བུའི་ལྷན་ཅིག་མི་གནས་འགལ་ལྟ་བུར་མཐོང་སྟབས། ཚོགས་ཟུར་སྤེན་པ་ཚེ་རིང་རང་ལ་མི་དགའ་བ་དེ་བྱ་སྤུ་གནོན་མེད་པར་ཁ་བསྒྱུར་ནས་གནས་དབྱུང་གཏང་རྒྱུའི་བསམ་ངན་སེམས་ལ་འཁོར་བ་དེ་ལྷན་ཁང་ཁག་གི་བཀའ་བློན་དེ་དག་བེད་སྤྱད་ནས་བཀའ་ཤག་སྤྱི་མོས་ཡིན་ཚུལ་གྱིས་ལག་བསྟར་བྱས།

བྱ་ངན་དེས་༸རྒྱལ་བ་ཡིད་བཞིན་ནོར་བུས་མི་ཧྲིལ་པོ་དྲུག་ཅུ་སྤྱད་དེ་བོད་ཆོལ་གསུམ་ཆོས་བརྒྱུད་དང་བཅས་པ་འོ་ཆུ་གཅིག་འདྲེས་ལྟ་བུར་བཟོས་པ་དེ་ཁ་འཐོར་དགུ་འཐོར་དུ་འགྱུར་རྒྱུའི་སྒྱོགས་རྡོ་ཆེན་པོ་ཞིག་ཏུ་ཆགས།

ཏག་ཏག་སྲིད་སྐྱོང་བློ་བཟང་སངས་རྒྱས་ཀྱི་ཕྱོགས་གཏོགས་པ་ཚོས་ཚོགས་ཟུར་སྤེན་པ་ཚེ་རིང་དང་། ཁོང་གི་ཕྱོགས་གཏོགས་པ་ཚོར་ཚད་ལས་བརྒལ་བའི་སྒྲོ་བཏགས་དང་། སྲིད་སྐྱོང་བློ་བཟང་སངས་རྒྱས་གར་ཕེབས་སར་རླངས་འཁོར་ནག་པོ་རྒྱུ་སྤུས་ཅན་མང་པོ་བཏང་ནས་དཔུང་བསྒྲིགས་པ་དང་། གནམ་ཐང་ཁག་ནས་རྩ་ཐང་ལུག་རྫི་ནང་བཞིན་ཀི་ཆེན་བཏབ་ནས་བསུ་ལེན་བྱེད་པ། ཉེན་ཁ་གང་ཡང་མེད་བཞིན་དུ་སྐུ་སྲུང་མང་པོ་བཀོལ་བ་མ་ཟད། སྲིད་སྐྱོང་བློ་བཟང་སངས་རྒྱས་ཀྱིས་ཀྱང་རླངས་འཁོར་གྱི་མདོག་དང་མཚུངས་པའི་མིག་ཤེལ་ནག་པོ་ཞིག་གྱོན་ནས་ཁོང་ཚོ་དང་མཉམ་དུ་འགྱིངས་སྟབས་དང་ཡིན་མདོག་གིས་ཕྱིན་པ་སོགས་ནི། སྤེན་ཚེའི་ཕྱོགས་གཏོགས་ཙམ་མིན་པར་བོད་མི་ཕལ་མོ་ཆེ་སྲིད་སྐྱོང་བློ་བཟང་སངས་རྒྱས་ལ་མི་དགའ་བའི་རྐྱེན་ངན་དུ་གྱུར།

གང་ལྟར་སྲིད་སྐྱོང་བློ་བཟང་སངས་རྒྱས་ཀྱིས་ཤར་གླིང་ཟླ་སྒྲོན་གྱིས་ཁོ་གཉིས་དབར་དཀྲུག་ཤིང་། བརྒྱབ་པ་ཙམ་མིན་པར་ཚོགས་ཟུར་སྤེན་པ་ཚེ་རང་གིས་ཕྱི་གསལ་ནང་གསལ་གྱིས་ཕྱག་ལས་གནང་སྟངས་དང་གསུང་བཤད་གནང་སྟངས་དེ་ཚོར་ལྟ་སྐབས་ཚོགས་ཟུར་སྤེན་པ་ཚེ་རིང་དེ་ཁོ་རང་གིས་བཀའ་ཤག་ནས་རྐང་བརྐྱངས་ལག་བརྐྱངས་བྱས་ནས་རང་དོན་བསྒྲུབ་རྒྱུར་ཧ་ཅང་ཉེན་ཁ་ཅན་ཞིག་ཏུ་མཐོང་ནས་གནས་དབྱུང་བཏང་བ་དང་། དེར་གཞུང་གི་ལས་བྱེད་པ་དང་མི་མང་སུ་ཞིག་གིས་ཀྱང་མི་འཐད་པའི་ཡ་ལན་འདི་འདྲ་ཞིག་ཡོང་རྒྱུ་མི་སྲིད་པ་ལྟ་བུས་རྩོད་རྩིས་བྱས།

བསམ་ཡུལ་ལས་འདས་པ་ཞིག་ལ་རྒྱ་བལ་འབྲུག་གསུམ་དང་། ཕྱི་རྒྱལ་ཡུལ་གྲུ་ཁག་ཏུ་ཡོད་པའི་བོད་མི་ཧ་ཅང་མང་པོས་བཀའ་ཤག་གི་བྱ་ངན་དེར་གཉིས་རྗེས་གཉིས་མཐུད་ཀྱིས་འདྲི་རྩད་ཤུགས་ཆེ་བྱས་སྟབས། གཞི་ནས་སྲིད་སྐྱོང་བློ་བཟང་སངས་རྒྱས་དང་། ཁོའི་གྲོགས་པོ་སྐལ་རྡོར་ཟེར་བ་དང་། གངས་སྐྱིད་ཀྱི་ཨ་ནེ་སྙིད་མོ་གསུམ་གྱིས་གསང་གྲོས་ཀྱིས་༸གོང་ས་མཆོག་གི་བཀའ་དགོངས་གཞིར་བཟུང་བོད་ཀྱི་རྩ་དོན་ཐོག་ཕྱག་ལས་ནུས་པ་ལྡན་པ་ཐོན་མཁན་གྱི་རླབས་ཆེན་མི་སྣ་ཚོགས་ཟུར་སྤེན་པ་ཚེ་རིང་གནས་དབྱུང་གཏང་དགོས་པའི་རྒྱུ་རྐྱེན་བཅུ་ཟེར་བ་གསར་དུ་བསྒྲིགས།

རྒྱུ་རྐྱེན་བཅུ་ཟེར་བ་དེས་མི་མང་གི་འདོད་པ་དེ་བས་ཀྱང་མ་ཁེངས་པ་ལྟ་བུར་གྱུར་སྟབས། སྲིད་སྐྱོང་བློ་བཟང་སངས་རྒྱས་ཀྱིས་སུམ་ཅུའི་དུས་དྲན་དང་། གྲོས་ཚོགས་ར་བ་སོགས་རྩ་ཆེའི་གོ་སྐབས་མང་པོ་ཇུས་ནས་འདོད་པ་མ་ཁེངས་ན་ཁྲིམས་ལ་གཏུགས་ཤོག་ཅེས་ཡང་བསྐོར་བསྐྱར་བསྐོར་གྱིས་བཤད་སྟབས། ཚོགས་ཟུར་སྤེན་པ་ཚེ་རིང་གིས་ཁྲིམས་གཏུགས་ཀྱི་ལས་ཀ་མི་གཉེར་ཐབས་མེད་བྱུང་།

དེ་ལྟར་ཁྲིམས་ཁང་ནས་དོན་ཚན་རེ་རེའི་ཐོག་ཕྱོགས་སོ་སོའི་ཁྲིམས་རྩོད་པ་དང་བདེན་དཔང་བྱེད་མཁན་དག་བརྒྱུད་ནས་སྲེག་བཅད་བརྡར་གསུམ་གྱིས་ཁྲིམས་གཤེར་རིམ་པར་བྱས་པ་དང་། དོན་ཚན་རེ་རེར་ཁྲིམས་གཤེར་བྱེད་ཉེའི་སྐབས་སྲིད་སྐྱོང་བློ་བཟང་སངས་རྒྱས་གངས་སྐྱིད་ནས་འཇའ་ཡལ་བ་ལྟར་གར་སོང་ཆ་མེད་ལྟ་བུར་གྱུར་འགྲོ་བ་མ་ཟད། ཧམ་པ་དང་རྫུན་གྱིས་བསྒྲིགས་པའི་རྒྱུ་རྐྱེེན་བཅུ་ཟེར་བ་དེའི་དོན་ཚན་རེ་རེ་དང་ལྷན་དུ་ཁྲིམས་ལ་གསལ་ཆ་མེད་པ་དང་ཁྲིམས་ལུགས་ཀྱིས་སྤྲད་པའི་གོ་སྐབས་མང་པོ་སྐབས་འཛིན་མི་ཤེས་པའི་སྲིད་སྐྱོང་བློ་བཟང་སངས་རྒྱས་ཀྱི་ཁྲིམས་རྩོད་པ་དེའི་རྐང་པ་དང་ལག་པ་ཚང་མ་ཚོགས་ཟུར་སྤེན་པ་ཚེ་ཚེ་རང་གི་དཔང་རྟགས་དང་བཅའ་ཁྲིམས་གཉིས་ཀྱིས་བསྡམས་བཞག་པ་ལྟ་བུར་གྱུར།

འདི་ལྟར་ཁྲིམས་གཤེར་གྱི་བྱ་རིམ་ཚང་མ་ཕྱི་གསལ་ནང་གསལ་གྱིས་གྲུབ་རྗེས། གསེར་ས་འོག་ཏུ་ཡོད་ཀྱང་འོད་ནམ་མཁར་འཆར་ཟེར་བའི་དཔེ་ལྟར། དྲང་བདེན་མེད་པའི་བཀའ་ཤག་གི་བྱ་ངན་བྱས་ངན་ཚང་མ་དམར་དམར་རྗེན་རྗེན་དུ་བཏོན་ཏེ། ཁྲིམས་ལུགས་རྩ་འཛིན་འོག་ནས་རྦད་དེ་ཕམ་པར་གྱུར།

དེ་རྗེས་ཅི་བཤད་འདི་བཤད་མེད་པའི་ནང་སྲིད་བཀའ་བློན་ཟེར་བའི་མི་རྒན་དེས། ཕྱི་གསལ་ནང་གསལ་གྱིས་ཁྲིམས་གཤེར་གྱི་བརྒྱུད་རིམ་ཚང་མ་མིག་གིས་མཐོང་གིས་མཐོང་གིས་ཁྲིམས་གཤེར་དེ་ལས་རྒྱུ་འབྲས་དང་མི་མཐུན་ཚུལ་བཤད་དེ། མུ་མཐུད་ནས་སྤྱི་ཚོགས་ཀྱི་འཆམ་མཐུན་དང་། ལྷིང་འཇགས་དེ་གཏོར་ཐབས་བྱས་པ་མ་ཟད། སྲིད་སྐྱོང་བློ་བཟང་སངས་རྒྱས་ཀྱིས་ཀྱང་དེ་མཚུངས་མི་མང་གི་འདོད་པ་མ་ཁེངས་ཚུལ་ལ་ཁ་གཡར་བ་དང་། ལྷག་པར་དུ་ཁྲིམས་ཁང་གིས་ཐག་བཅད་པའི་བཅད་ཁྲ་ལ་རྩིས་མེད་ཀྱིས་ཚོགས་ཟུར་སྤེན་པ་ཚེ་རིང་ལ་དགོངས་སེལ་མ་ཞུས་པ་ནི། ཁྲིམས་ལུགས་ཀྱི་འོག་ལ་བྱ་སྤུ་གནོན་གྱིས་མ་གནས་པ་ཞིག་ཡིན་སྟབས། སྐད་གྲགས་ཆེ་བའི་བྱ་སྤུ་གནོན་གྱི་སྒྱོགས་རྡོ་དེས་སྐོར་བ་བརྒྱབ་བརྒྱབ་པའི་མཐར་བཀའ་ཤག་གི་སྲིད་སྐྱོང་དང་བཀའ་བློན་དེ་ཚོའི་མགོར་ཟགས་པར་གྱུར།།

དོན་ངོ་མར་སྤྱི་ཚོགས་ལྷིང་འཇགས་ཤིག་ཡོང་བར་འདོད་ཀྱི་ཡོད་ན། ཁྲིམས་ཁང་གིས་བཏང་བའི་བཅད་ཁྲ་ཆ་ཚང་ལ་རང་གནོང་ངོས་ལེན་གྱིས་བརྩི་སྲུང་བྱས་ཏེ། ད་ནས་བཟུང་བོད་ཀྱི་བསྟན་པ་ཆབ་སྲིད་དང་། སྤྱི་ཚོགས་ཀྱི་མཐུན་བསྒྲིལ་ལ་ཤུགས་གནོན་བརྒྱབ་རྒྱུ་ལས། ལམ་ཁ་གཞན་གང་ཡང་མེད་པ་དེ་མིག་མཐོང་ལག་ཟིན་རེད་སྙམ།

མ་ཟད་སྲིད་སྐྱོང་གི་རྒྱབ་སྐྱོར་བ་ཡིན་ཟེར་མཁན་ཚོས་ཀྱང་དོན་ངོ་མར་སྲིད་སྐྱོང་ཡག་པོ་ཞིག་ཆགས་པར་འདོད་ན། སྲིད་སྐྱོང་དེ་མུ་མཐུད་ནས་ལོག་ལམ་དུ་མི་འགྲོ་ཆེད་བསླབ་བྱ་རྒྱག་དགོས་རྒྱུ་གལ་ཆེ་བ་ལས། ཕྱོགས་ཞེན་འབའ་ཞིག་གི་དབང་དུ་སོང་ནས་མུ་མཐུད་དུ་ངན་རོགས་ལྟ་བུ་བྱས་ན། དེས་སྲིད་སྐྱོང་ལ་ཕན་ཐོགས་རྒྱུ་བཞག་ནས། སྲིད་སྐྱོང་དེ་ལོ་རྒྱུས་ཐོག་གི་ཉེས་ཅན་པ་གཏེ་བོ་ཞིག་ཏུ་ཆགས་རྒྱུར་ཉེན་ཁ་ཆེ་བའི་རྒྱུ་རྐྱེན་ཞིག་ཏུ་མི་འགྱུར་བའི་ངེས་པ་གང་ཡང་མེད་དོ།།