རྒྱ་མཚོའི་དབུས་ནས་ཕྱི་མིག་བོད་ལ་འཕངས།

ཀླུ་སྨྱོན་ཧེ་རུ་ཀ

སྦས་ཡུལ་ཧ་ཝ་ཡི་Hawaiiགླེང་བ།

ཉེ་ཆར་བདག་ཡུལ་སྐོར་སྤྲོ་འཆམ་དང་ཆོས་ཀྱི་གྲོགས་པོ་ཚོར་ཐུག་འཕྲད་དང་ཆོས་འབྲེལ་གྱི་ཆེད་དུ་ཞི་བདེ་རྒྱ་མཚོའི་རྒྱ་མཚོའི་དཀྱིལ་དབུས་སུ་ཡོད་པའི་སྦས་ཡུལ་ཧ་ཝ་ཡི་ཞེས་པའི་གླིང་ཕྲན་དེར་ཕྱིན་ཏེ་ཉིན་ལྔའི་རིང་བསྡད། གནས་དེར་བསླེབས་པ་ཙམ་གྱིས་ཡུན་རིང་ས་གཞི་ཆེན་པོའི་སྟེང་དུ་བསྡད་དེ་སྣོམ་དགོས་པའི་མི་རིགས་འདྲ་མིན་གྱི་དྲི་མ་དང་རླངས་འཁོར་སྣ་ཚོགས་ཀྱི་འུར་ཟིང་སོགས་མི་ཡུལ་གྱི་མི་སྡུག་པ་མང་པོ་ཞིག་མདང་གི་རྨི་ལམ་བཞིན་སྟོང་པའི་དབྱིངས་སུ་ཡལ་བར་གྱུར། ངས་གནས་དེར་མི་མང་པོས་དར་སྲོལ་ཆེ་བའི་སྟོད་གོས་སེར་ཁྲ་མེ་ཏོག་གི་རི་མོ་ཆེན་པོ་ཡོད་པ་ཞིག་དང་སྨད་དུ་དོར་ཐུང་སྔོ་སྐྱ་ཉི་མ་མཚོ་ལས་འཕགས་པའི་རི་མོ་ཡོད་པ་ཞིག་གྱོན་ནས་མཚོ་འགྲམ་དང་ནགས་ཚལ། བྲག་ཕུག་དང་མེ་རི་སོགས་ལ་ལྟ་སྐོར་ལྗོངས་རྒྱུར་སྐྱོད་བཞིན་པ་མཐོང།

ལོ་འདི་ནི་ང་རང་གནས་འདིར་བསླེབས་ཐེངས་བརྒྱད་པ་དེ་ཡིན་ཞིང་། ཕལ་ཆེར་ལོ་རེ་ལ་གནས་འདིར་ཐེངས་གཅིག་རེ་བསྐྱོད་བཞིན་ཡོད་ཅེས་བརྗོད་ཀྱང་ཆོག ངའི་བླ་མས་ངའི་ཆོས་མིང་ཐོག་མ་དེའི་མཇུག་ཏུ་རྒྱ་མཚོ་ཞེས་པའི་མིང་ཚིག་སྙིང་རྗེ་ལ་གཏིང་ཟབ་པོ་ཞིག་གནང་ཡོད་ཅིང་། ང་རང་ཡང་མིང་ཚིག་འདི་གཉིས་ལ་ཤིན་ཏུ་དགའ་ཞིང་གུས་པ་ཡོད་དོ།།
གནས་འདིར་བསླེབས་པའི་རྗེས་ཀྱི་ཉིན་གཉིས་པར་ངས་ཁོ་ན་གྲོང་བརྡལ་གྱི་སྲང་ལམ་གང་སར་ལམ་རྟགས་ཀྱི་བྱང་བུ་དེ་ཚོའི་སྒང་ལ་འདྲ་རིས་ཤིག་བསྒར་ཡོད་པ་མཐོང་ཞིང་། འདྲ་རིས་དེ་ནི་གནས་འདིའི་གདོད་མའི་མི་རིགས་ཀྱི་སྐྱེས་པ་ཞིག་གི་ཆ་ལུགས་ཏེ། ལུས་ལ་ཤམ་ལྭ་བོད་ཀྱི་གྲྭ་པའི་ཟླ་གམ་དང་ཆ་འདྲ་བ་ཞིག་གྱོན་ཞིང་། མགོ་རུ་ཡང་བོད་ཀྱི་གྲྭ་པའི་ཞྭ་མོ་རྔོག་ཟེ་མ་དང་ཤིན་ཏུ་མཚུངས་པའི་ཞྭ་མོ་ཞིག་གྱོན་ཡོད་པ་མཐོང་། ཁོའི་ལུས་སྟེང་གི་ལྭ་བ་དང་ཞྭ་མོ་གཉིས་ཀའི་མཆོག་དམར་པོ་ཡིན་ཞིང་དེར་སེར་ཤས་ཀྱང་འདྲེས་ཡོད།
ངས་སྔོན་ཆད་རྩོམ་ཡིག་ཐུང་ངུ་ཞིག་ཏུ་བོད་ཀྱི་གྲྭ་པའི་ཆས་གོས་ནི་རྒྱ་གར་འཕགས་པའི་ཡུལ་གྱི་སྟོན་པ་བཅོམ་ལྡན་འདས་དང་ཁོང་གི་རྗེས་འཇུག་ཡུལ་དབུས་ཀྱི་དགེ་ཚུལ་སློང་ཚོའི་རྒྱུན་གོས་ལ་དཔེ་བླངས་པ་ཞིག་མ་ཡིན་པར་རྒྱང་རིང་རོ་མན་བཙན་རྒྱལ་གྱི་དམག་ཞྭ་དང་དམག་གོས་ལ་དཔེ་བླངས་འདུག་ཅེས་བྲིས་ཡོད་པ་དང་། ཐེངས་འདིར་བོད་ནས་ལེ་དབར་ཁྲི་ཕྲག་གི་ཡུལ་གྱིས་བསྐལ་པའི་གནས་འདིའི་ས་ཆའི་ཆས་གོས་ཀྱང་བོད་ཀྱི་གྲྭ་པའི་ཆས་གོས་དང་མཐུན་པ་འདིའི་རྟེན་བྱུང་འབྲེལ་དང་བདག་གཅིག་འབྲེལ་གང་ཡིན་མི་ཤེས་པའི་འབྲེལ་བ་ཡ་མཚན་ཅན་འདི་ཡིས་ང་ལ་བསམ་བློ་མང་པོ་ཞིག་འཁོར་དུ་བཅུག
གནས་འདིའི་ལོ་རྒྱུས་ཕྲན་བུ་ཞིག་མ་གཏོགས་གླེང་སློང་མ་བྱས་ཀྱང་དབྱིན་ཡུལ་གྱི་མྱུལ་ཞིབ་པ་གྲགས་ཅན་གྲུ་དཔོན་གྲགས་ཅན་ཇེམ་སི་ཁུའུ་ཁི་James Cook ཞེས་པ་དེ་མ་གླེང་ཐབས་མེད་རེད། https://www.youtube.com/watch?v=tPr6kfgIERY སྤྱི་ལོ་ ༡༧༧༨ལོར་གྲུ་དཔོན་ཁུའུ་ཁི་ཞི་བདེ་རྒྱ་མཚོའི་དབུས་ཀྱི་སྦས་ཡུལ་ཧ་ཝ་ཡུའུ་ལ་ཆེས་ཐོག་མར་འབྱོར་དུས་ས་གནས་གདོད་མའི་མི་རིགས་ཚོས་ཆོས་ལུགས་ཀྱི་མཛད་སྒོ་ཆེན་པོ་ཞིག་གཉེར་བཞིན་པ་དང་དུས་གཅིག་ཏུ་ཁེལ་བས་དེ་ཚོ་ཁོ་ནི་ལྷའི་ཕོ་ཉ་ཞིག་ཏུ་བརྩིས་ནས་མགྲོན་བསུ་རྒྱ་ཆེར་བྱས་ཤིང་། རིམ་བཞིན་ཁོ་ཚོའི་བར་ལ་ཡོ་རོབ་ཀྱི་ལྕགས་མཛེར་དང་ས་གནས་ཀྱི་མཛེས་མའི་རེག་བྱ་སོགས་ཀྱིས་ཚོང་འབྲེལ་བཙུགས། དེ་རྗེས་ཁོ་དང་ཁོའི་གྲུ་པ་རྣམས་སླར་ཡང་ཐེངས་གཉིས་ལ་དེར་འབྱོར་ཞིང་། ཐེངས་གཉིས་པའི་སྐབས་སུ་གདོད་མའི་མི་རིགས་ཚོས་ཁོ་ལ་དཀོན་མཆོག་ཕེབས་པ་ལྟ་བུའི་མགྲོན་བསུ་བྱས། ཐེངས་གསུམ་པའི་སྐབས་སུ་ཁོ་དང་གདོད་མའི་མི་རིགས་ཚོའི་བར་དུ་འགལ་ཟླ་བྱུང་སྟེ་སྤྱི་ལོ ༡༧༧༩ ལོའི་ཟླ་ ༢ ཚེས་ ༡༤ ཉིན་ཁོ་རང་གནས་དེར་དམར་གསོད་བྱས་ཤིང་། ཁོའི་ལག་རོགས་ཚོས་གདོད་མི་སུམ་ཅུ་ཙམ་ལ་མེ་མདས་བརྒྱབ་ནས་བསད་རྗེས་མགྱོགས་པོར་བྲོས་ནས་ཕྱིར་དབྱིན་ལན་དུ་ལོག
ས་གནས་འདིར་བོད་པ་མི་རིགས་ཆེས་སྔ་ཤོས་སུ་བསླེབས་པ་དེ་ནི་གནས་ཆུང་རིན་པོ་ཆེ་ཞུ་བའི་ལྷ་སའི་བླ་མ་ཞིག་ཡིན་ཞིང་། ཁོང་གིས་ལོ་ངོ་བཞི་བཅུའི་སྔོན་དུ་ས་དེར་གནས་ཆུང་གྲྭ་ཚང་གི་ཡན་ལག་ཆོས་ཚོགས་ཆུང་ཆུང་ཞིག་བཙུགས། ཁོང་ནི་གནས་ཆུང་བྷ་ཏ་ཧོར་གྱི་སྒོམ་གྲྭ་ནས་རྗེས་བསྙེགས་ཏེ་བོད་ལ་ཕེབས་པའི་བསེ་འབག་རྩ་ཆེན་དེ་བོད་ནས་རྒྱ་གར་དུ་བསྣམས་ཕེབས་པའི་བླ་མ་དེ་ཡང་རེད། དེ་རྗེས་བཀའ་བརྒྱུད་པའི་བླ་མ་རེ་ཟུང་ཡང་གནས་དེར་འབྱོར་ནས་ཆོས་ཚོགས་ཆུང་ཆུང་དང་མཆོད་རྟེན་ཆུང་ཆུང་དེ་འདྲ་གསར་སྐྲུན་བྱས་ཏེ་བོད་བརྒྱུད་ནང་བསྟན་གྱི་ས་བོན་རྒྱ་མཚོའི་དབུས་ཀྱི་གླིང་ཕྲན་མཛེས་སྡུག་ལྡན་པ་འདིའི་གྲུ་ཟུར་གང་སར་གཏོར་བ་དང་རིམ་བཞིན་མྱུ་གུ་འབུས་ཤིང་ལོ་འདབ་རྒྱས་ཏེ་མེ་ཏོག་ཆུང་ཆུང་སྙིང་རྗེ་བོ་དེ་འདྲ་མང་པོ་ཞིག་གང་སར་བཞད་པ་མཐོང་རྒྱུ་རིག་རྒྱུ་འདུག དེ་བཞིན་བོད་བརྒྱུད་ནང་བསྟན་གྱི་སྐུ་བརྙན་དང་བོད་སྤོས་སོགས་འཚོང་སའི་ཚོང་ཁང་ཡང་རེ་ཟུང་འདུག་ལ། བླ་མ་བདག་ཉིད་ཆེན་པོ་དང་ཀརྨ་པ། མཁན་ཆེན་འཇིགས་མེད་ཕུན་ཚོགས་སོགས་བོད་བརྒྱུད་ནང་བསྟན་གྱི་བླ་མ་ཆེན་པོ་ཁག་ཅིག་ཀྱང་སྦས་ཡུལ་འདིར་ཕེབས་མྱོང་ཡོད་འདུག
གནས་འདི་ནི་ཨ་རིའི་ཞིང་ཆེན་ལྔ་བཅུ་ཐམས་པའི་ཆེས་མཇུག་མ་དེ་ཡིན་ཚོད་འདུག་ལ་ཨ་རིའི་དམག་དོན་ཐད་ནས་ཧ་ཅང་གལ་འགང་ཆེ་བའི་ས་གནས་ཤིག་རེད། དེ་ནི་དཔེར་ན་ཨ་རིས་རྒྱ་ནག་སོགས་ཤར་ཕྱོགས་རྒྱལ་ཁག་དག་ལ་དམག་འཁྲུག་རྒྱག་དགོས་ཚེ། གནས་འདིར་སྔ་མོ་ནས་དམག་མིའི་རྟེན་གཞི་གསར་འཛུགས་གཞི་རྒྱ་ཆེན་པོ་དེ་འདྲ་བྱས་ཡོད་ཅིང་། དམག་ཆེན་གཉིས་པའི་སྐབས་སུ་འཇར་པན་པས་ཨ་རིའི་མུ་ཏིག་གྲུ་ཁར་གཟའ་ཉི་མའི་ཉིན་འཇབ་རྒོལ་བྱེད་ས་དེ་ཡང་གནས་འདི་ཉིད་ཡིན། ཨ་རིའི་ཞིང་ཆེན་གཞན་དང་མི་འདྲ་བར་ཨ་རི་དང་རྒྱལ་ཁབ་གཞན་ནས་གནས་འདིར་བསྐྱོད་ལམ་ཉག་གཅིག་ནི་གནམ་གྲུ་རང་ཡིན་ཞིང་། གནས་འདིར་བསྐྱོད་སྐབས་རྒྱལ་ཁབ་ཅིག་ལ་བསྐྱོད་པ་བཞིན་ཤོག་བྱང་ཞིག་གི་སྟེང་དུ་གནས་འདིར་འགྲོ་དོན་དང་ཉི་མ་ཅི་ཙམ་ལ་འདུག་མིན། སྲོག་ཆགས་དང་འབྲུ་རིགས་སོགས་ཁྱེར་ཡོད་མེད་སོགས་འབྲི་དགོས་ཀྱི་ཡོད། ཨ་རིའི་གནམ་རིག་སྟེགས་བུ་གྲགས་ཅན་ཞིག་ཀྱང་མ་ནོ་ཁེ་ཡ་ཞེས་པའི་རི་མཐོན་པོ་དེའི་སྟེང་དུ་བཙུགས་ཡོད།
གནས་འདི་ནི་གླིང་ཕྲན་ཆེ་ཆུང་བརྒྱད་ལས་གྲུབ་པ་ཞིག་ཡིན་ཞིང་། ཨ་རིའི་ནུབ་མཐའི་ཞིང་ཆེན་ཝ་ཤིང་ཁྲོན་དང་ཁ་ལི་ཧྥོ་ནི་ཡ་ན། ཨོ་རི་རྒན་གསུམ་ནས་འཕུར་ན་ཆུ་ཚོད་ལྔ་དང་ཕྱེད་ཀ་ཙམ་འགོར་བ་དང་། ཉིག་ཡོར་དང་རྒྱལ་ས་ཝ་ཤིང་ཁྲོན་སོགས་ཤར་མཐའ་ནས་འཕུར་ན་ཆུ་ཚོད་བཅུ་ལྷག འཇར་པན་དང་ལྷོ་ཁོ་རི་ཡ་ནས་འཕུར་ན་ཆུ་ཚོད་ལྔ་འམ་དྲུག་ཙམ་འགོར། རྒྱལ་ཁབ་གཞན་ནས་གནས་འདིར་ཤིང་ཏོག་གི་རིགས་ཁྲིམས་མཐུན་བརྟག་དཔྱད་མེད་པར་འཁྱེར་ཡོང་མི་ཆོག་ལ། དེ་བཞིན་གནས་འདི་ནས་ཨ་རིའི་ས་གནས་གཞན་པར་ཡང་ཤིང་ཏོག་གི་རིགས་འཁྱེར་མི་ཆོག་པའི་ཁྲིམས་ལུགས་ཡོད། གནས་འདིའི་ལྗོངས་རྒྱུའི་གླིང་ཕྲན་གྲགས་ཆེ་ཤོས་ནི་ཧ་ནི་ལུ་ལུ་ཞེས་པ་དེ་ཡིན་ཞིང་དེར་གྲོང་ཁྱེར་ཆེན་པོ་ཞིག་ཀྱང་ཆགས་ཡོད་མོད། མཚོ་འགྲམ་ཕལ་མོ་ཆེར་ཞི་བདེ་ལྷིང་འཇགས་དང་རྒྱ་མཚོའི་་དྲོད་ཚད་ཧ་ཅང་བཟང་བས་ཉིན་གང་བོར་ཆུ་རྐྱལ་ལ་རོལ་ཆོག དེ་བཞིན་གླིང་ཕྲན་ཆེ་ཤོས Big Island ་དུ་འབོད་པའི་གླིང་ཕྲན་སྟེང་དུ་མེ་རི་འབར་བ་དང་མེ་རི་བཞུར་བའི་ལྟད་མོར་ཡང་རོལ་ཆོག གལ་སྲིད་ཁྱེད་ལ་སྒོར་མོ་འདང་ངེས་ཡོད་ན་ཐད་འཕུར་གླས་ཆོག་ལ་གྲུ་གཟིངས་ཆེན་པོར་བསྡད་ནས་གླིང་ཕྲན་ཚོར་སྐོར་སྐྱོད་འགྲུལ་བཞུད་ཀྱང་བྱས་ཆོག

གླིང་ཕྲན་འདི་ཚོའི་སྟེང་གི་མི་གྲངས་ཆེ་ཤོས་ནི་མི་རིགས་དཀར་པོ་དང་དེ་འཕྲོས་གདོད་མའི་མི་རིགས། དེ་ནས་འཇར་པན་པ་དང་རྒྱ་རིགས་སོགས་ཡིན་ལ། སྤྱི་སྐད་དབྱིན་སྐད་དང་གདོད་མའི་མི་རིགས་ཀྱི་སྐད་རིགས་ལ་ཉམ་རྒུད་ཆེན་པོ་ཞིག་ཐེབས་ཀྱང་། སྤྱི་ལོ་ ༡༩༩༠ ལོ་ཙམ་ནས་སླར་ཡང་གདོད་མའི་མི་རིགས་ཀྱི་སྐད་རིགས་སླར་གསོའི་ཕྱོགས་སུ་ཤུགས་སྣོན་བྱས་པས་གྲུབ་འབྲས་ཅུང་ཟད་ཡག་པོ་ཞིག་ལོན་ཡོད་ཚོད་རེད། གནས་འདིར་གོང་གི་གྲུ་དཔོན་ཁུའུ་ཁི་སོགས་ཡོ་རོབ་པ་ཚོ་མ་བསླེབས་པའི་སྔ་རོལ་ཏུ་གདོད་མའི་མི་རིགས་འབུམ་གཅིག་དང་ཕྱེད་ཀ་ཙམ་ཡོད་ལུགས་དང་། ཡོ་རོབ་པ་ཚོ་བསླེབས་གྲངས་ཇེ་མང་དུ་སོང་བ་དང་བསྟུན་ནས་ཁོ་ཚོས་ཁྱེར་ཡོང་བའི་ན་ཚ་འདྲ་མིན་གྱིས་ལོ་ངོ་བཅུ་ཕྲག་འགའི་ནང་གདོད་མི་ཕྱེད་ཀ་ཙམ་ལ་འཆི་སྐྱོན་བྱུང་བར་ཡང་གླེང་། ཆོས་ལུགས་ནི་གདོད་མིའི་ཆོས་ལུགས་དང་ཡེ་ཤུའི་ཆོས་ལུགས། འཇར་པན་ནས་བསླེབས་པའི་ནང་བསྟན་ཆོས་ལུགས། དེང་སྐབས་བོད་ནས་བསླེབས་པའི་བོད་བརྒྱུད་ནང་བསྟན་པ་སོགས་ཡོད། གནས་ཀྱི་གནམ་གཤིས་སྤྱིར་ན་དུས་བཞིའི་དྲོད་ཚད་མཐོ་ཡང་རི་མཐོན་པོར་དགུན་ཁར་ཁ་བ་འབབ་ལ་བྱང་ཕྱོགས་སུ་ཁེལ་བའི་གནས་སུ་ཆར་བ་ཤུགས་ཆེན་པོ་འབབ། གནས་འདིའི་བྱ་རིགས་སོགས་ཕལ་མོ་ཆེ་གླིང་ཆེན་གཞན་ནས་གནས་སྤོར་ནང་འདྲེན་བྱས་པ་ཡིན་ཞིང་། ལོ་བཅུ་གྲངས་སྔོན་ནས་བཟུང་ལྷོ་ཨ་མེ་རི་ཀ་ནས་ཚོང་ཟོག་དང་མཉམ་དུ་ལྐོག་འཁྱེར་བྱས་ཡོང་བའི་སྦལ་བ་ཆུང་ཆུང་ཚོ་གཅིག་ཧ་ལས་པའི་མྱུར་ཚད་ཀྱིས་འཕེལ་རྒྱས་བྱུང་ནས་དེང་སྐབས་གླིང་ཕྲན་འདིའི་མཚན་མོའི་ལྷིང་འཇགས་ཡོངས་རྫོགས་སྦལ་བ་དེ་ཚོས་བཟུང་སྟེ་ཞག་གང་བོར་ཀི་ཀོ་ཀི་ཀོ་ཞེས་པའི་སྦལ་བའི་མཉམ་ལེན་གླུ་དབྱངས་ཀྱིས་ཡོངས་སུ་ཁྱབ་ཡོད་ལ། ས་འདིར་སྡོད་པའི་མི་རྣམས་ཀྱིས་སྦལ་བ་ཆུང་ཆུང་དེ་ཚོའི་སྐད་གདངས་ལས་དེ་ཚོ་ཀོ་ཀི་ཞེས་མིང་གསར་བ་ཞིག་བཏགས་ཡོད། མི་རྣམས་སྦལ་བ་ཆུང་ཆུང་འདི་ཚོས་མཚན་ཧྲིལ་བོར་ཅ་ཅོ་སྒྲོག་པར་སུན་སྣང་སྐྱེས་ནས་ས་གནས་སྲིད་གཞུང་ངམ་ཨ་རིའི་ཕོ་བྲང་དཀར་པོར་ཞུ་གཏུགས་བྱས་ཏེ་སྲིད་གཞུང་གིས་སྦལ་འགོག་སྲིད་ཇུས་རབ་དང་རིམ་པ་ཞིག་ལག་བསྟར་བྱས་ཀྱང་མཐའ་མཇུག་གི་རྒྱལ་ཁའི་དར་ཆ་དེ་སྔར་བཞིན་སྦལ་བ་ཆུང་ཆུང་གྲངས་འབོར་ཆེན་པོ་ཅན་དེ་ཚོའི་ལག་ཏུ་ཐོབ་འདུག ངས་ནི་མཚནམོ་རྟག་པར་སྦལ་བ་ཆུང་ཆུང་ཁྲི་སྟོང་མང་པོས་ལེན་བཞིན་པའི་སྙན་འཇེབས་གླུ་ཡི་དབྱངས་རྟར་ཉན་བཞིན་རང་ཉིད་ཆུང་དུས་སུ་རྒྱུགས་ཆུ་དང་མཚེའུའི་ནང་ནས་སྦལ་བ་ཆེ་འབྲིང་ཆུང་གསུམ་བཟུང་ནས་རྩེད་མོ་ཇི་ལྟར་བརྩེས་པའི་ངང་ཚུལ་དགོད་བྲོ་བོ་དེ་ཚོ་ཕྱིར་དྲན་ཡིད་ཚིམ་པ་བྱེད་བཞིན་སྐྱིད་སྣང་འདིའི་ཀློང་དུ་ཡོངས་སུ་འཐིམ་འགྲོ

འཛམ་གླིང་གི་སྲིད་དོན་པ་དང་ཚོང་པ་གྲགས་ཅན་ཚོ་ཡང་གནས་མཆོག་འདིར་མཚོ་ལ་ངང་བ་བཞིན་ལྗོངས་རྒྱུར་ཡོང་སྲོལ་ཆེན་པོ་ཞིག་ཡོད། ཐེངས་འདིའི་ཨོ་སི་ཁྲི་ལི་ཡའི་རང་བྱུང་མེ་སྐྱོན་འཇིགས་སུ་རུང་བ་འདིའི་ཆེས་དཀའ་སྡུག་གི་སྐབས་སུ་ཡང་རྒྱལ་ཁབ་དེའི་སྲིད་བློན་མོ་རི་སོན་སྦས་ཡུལ་འདིར་སྤྲོ་བསང་ལྗོངས་རྒྱུར་བསླེབས་ཡོད་པའི་གསར་འགྱུར་ཡང་གང་སར་ཁྱབ་བཞིན་ཡོད་པ་རེད།
ཕྱི་ལུགས་ཀྱི་དགུན་ཁའི་ལོ་གསར་དང་ཡེ་ཤུའི་དུས་སྐབས་སྔ་ནུབ་ཏུ་གནས་མཆོག་འདིའི་མགྲོན་ཁང་དང་གནམ་གྲུའི་འཛིན་ཡིག་སྔ་ཉོ་བྱས་ནས་ལག་ཏུ་ཡོང་ཧ་ཅང་དཀའ་ཞིང་། ཨ་རི་དང་ཁེ་ན་སྒྲའི་བྱང་ཕྱོགས་སུ་སྡོད་པའི་མི་མང་པོ་ཞིག་གིས་དགུན་དུས་དུས་རང་ཡུལ་དོར་ནས་གནས་འདིར་ཡོང་སྟེ་ལས་ཀ་བྱེད་པའམ་ཡང་ན་ལྗོངས་རྒྱུ་བྱས་ནས་དགུན་ཟླ་རིང་མོ་སྐྱིད་པོ་བྱས་ནས་སྐྱེལ་སྲོལ་ཞིག་ཡོད་ལ། འཛམ་གླིང་གི་ས་ཕྱོགས་གང་ས་ནས་གནས་མཆོག་འདིར་ལྗོངས་རྒྱུ་དང་ལས་ཀ་བྱེད་པར་ཡོང་མཁན་ཆུ་བོའི་རྒྱུན་བཞིན་ཡོད། གནས་འདིར་ཅ་ལག་དང་ཟ་མའི་རིན་གོང་ཨ་རི་དང་ཁ་ན་སྒྲ་དང་བསྡུར་ན་ཅུང་ཟད་མཐོ་ཞིང་། དབྱར་གཞུང་དུག་སྦྲང་ཧ་ཅང་མང་བས་མི་མང་པོ་ཞིག་ལ་སུན་སྣང་ཚད་མེད་སྤྲོད་པར་བྱེད་མོད། གལ་སྲིད་ཁྱེད་རང་རྒྱ་གར་གྱི་དུག་སྦྲང་ལ་གོམས་འདྲིས་ཆེ་ཞིང་བཟོད་པའི་ཉམས་ལེན་ལ་སྤྲོ་སྣང་ཡོད་ཚེ་དུག་སྦྲང་ལ་བསྟེན་ནས་བདུན་ཕྲག་གཅིག་གཉིས་ནང་ཚུད་ས་ལམ་གྱི་རྟོགས་པ་ཁྱད་པར་ཅན་བརྙེས་ཐུབ་པའི་གོ་སྐབས་ཀྱང་ཁྱེད་རང་གི་ལག་མཐིལ་ན་ཡོད།
ཕ་ཡུལ་གཅན་ཚ་ནས་ཡིན་པའི་ཁེ་ལས་མ་གྲགས་ཅན་ཞིག་གནས་འདིའི་གླིང་ཕྲན་ཧ་ནུ་ལུ་ལུ་རུ་ལོ་མང་སྔོན་ནས་གཞིས་སྡོད་བྱས་ཡོད་ཀྱང་ན་ནིང་ལོ་སྟོད་ནས་བཟུང་མོའི་སྐད་འཕྲིན་འབྲེལ་ལམ་ཆད་པ་དང་། གཞན་ས་སྐྱའི་གྲྭ་པ་ཞིག་དང་གཞིས་ཀ་རྩེ་ནས་ཡིན་པའི་བད་མོ་ཞིག་སོགས་བོད་མི་རེ་ཟུང་གནས་འདིར་ཡོད་ཀྱང་ཚང་མ་ལས་བྲེལ་ཆེ་བས་ཐུག་འཕྲད་ཀྱི་གོ་སྐབས་མ་བྱུང་ཡང་། སྟོན་པ་གར་སོང་སྟོན་ཁ་ཞེས་པའི་གཏམ་དཔེ་བཞིན། ཐག་རིང་ཡུལ་གྱིས་བསྐལ་པའི་སྦས་ཡུལ་འདིར་བསླེབས་ཐེངས་རེ་རེ་བཞིན་མི་རིགས་མི་གཅིག་ཀྱང་ཆོས་བརྒྱུད་གཅིག་པའི་ཕྱི་གླིང་ཆོས་གྲོགས་གསར་རྙིང་མང་པོ་ཞིག་གིས་སྙིང་ཉེ་ཉེ་དང་ཤ་ཚ་ཚས་སྣེ་ལེན་རོགས་རམ་ཚད་མེད་བྱས་དང་བྱེད་བཞིན་པར་སེམས་གཏིང་ནས་ཐུགས་རྗེ་ཆེ་ཞུ་བ་དང་། མ་འོངས་པར་ཡང་མ་ཤི་ཚེ་རིང་བྱུང་ན་སྦས་ཡུལ་འདིར་ཡང་ཡང་བསླེབ་ཐུབ་པའི་རེ་སྨོན་ཡང་ཤུགས་དྲག་ཙམ་ཡོད་དོ།།