ཆང་སྐྱེས།
སྨུག་ནག་མུན་པ་ས་ལ་ལྷུང་སྟེ་ཁོར་ཡུག་རི་བོའི་མཛེས་སྡུག་རྒུད།།
འདབ་ཆགས་མ་བུའི་གཤོག་འགྱུར་མྱུར་མོ་བདེ་མོ་ཐང་ནས་རྒྱང་དུ་ཡལ།།
སུན་སྣང་སྟུག་པའི་ཚོར་བ་ནག་པོ་ཡིད་སེམས་སྡུག་པའི་རྒྱུ་རུ་སྨིན།།
ཐ་མག་རྐང་གཅིག་རྔུབ་བཞིན་རྔུབ་བཞིན་སྐྱོ་གདུང་སེམས་པ་ལག་པས་སྐྱོར།།
སྒེའུ་ཁུང་ངོགས་ཀྱི་ཟླ་བ་ཁེར་འགྲོ་མཚན་མོའི་མཁའ་ན་དལ་གྱིས་འདུར།།
ཁྱི་ཚོགས་ཟུག་སྐད་ཕྱི་རོལ་ཁྲོམ་ན་སྐྱི་སེར་རླུང་གིས་རྒྱང་ལ་འཁུར།།
བསམ་གཞིག་མགོ་བོ་ཡར་ལ་བཅག་སྟེ་མིག་གི་དབང་བོ་རྒྱང་ལ་གཏད།།
འཛུམ་གྱིས་ཕྱུག་པའི་ཁྱེད་ཀྱི་ཞལ་རས་་ཡིད་ལ་ཝ་ལེར་ཝ་ལེར་ཤར།།
བརྡ་འཕྲིན་བུ་མོའི་དྲ་ལམ་ངོས་ནས་ཁྱེད་ལ་རེ་ཞིང་སྒུག་སྟེ་བསྡད།།
སྐུད་མེད་གློག་གི་ཁ་པར་སྐྱོར་ཏེ་ཁྱེད་ཀྱི་སྐད་ལ་ཉན་ནས་ཡོད།།
ལས་དབང་ཟེར་བའི་བར་ཆད་འདི་ཉིད་ཅི་འདྲའི་གདུག་རྩུབ་ཆེ་ཡང་རུང་།།
ང་རང་ཁྱེད་ལ་དགའ་བའི་སེམས་འདི་ཞུམ་མེད་་སྤོབས་པས་གང་ནས་ཡོད།།
གོམ་པའི་འདེགས་འཇོག་གར་གྱིས་བསྒྱུར་བའི་ཟུར་གསུམ་སྙིང་གི་སྡུག་གུ་མ།།
ཁ་ཚིག་སྙན་མོ་རྣ་བར་འཇམ་པའི་རྨི་ལམ་ཞིང་གི་ཡིད་འཕྲོག་མ།།
ཡིད་འོང་སྟོང་གི་འཛུམ་གྱིས་ཕྱུག་པའི་ཁྱེད་ཀྱི་ལང་ཚོའི་སྒེག་ཉམམ་ལ།།
བརྒྱ་བྱིན་འཁོར་གྱི་ལྷ་མོའི་ཚོགས་ཀྱང་འགྲན་པའི་སྐལ་བ་རིང་དུ་བྲལ།།
ཞེན་ཆགས་ལྕི་མོ་ཁྱེད་ལ་འཁྲེང་བའི་ཐག་རིང་ཡུལ་གྱི་ཁེར་རྐྱང་ངས།།
དུངས་བའི་སེམས་པ་འགོག་ཐབས་མ་བྱུང་བརྩེ་བ་ཁྱེད་ལ་བཅིངས་ཡོད་ཞེས།།
ཁྱོད་ལ་རན་པའི་སྙན་ངག་འདི་ཡི་མགོ་རྐང་སྒྲིག་ནས་མ་ཚར་གོང་།།
སྐྱ་རེངས་འོད་ཀྱིས་མུན་པ་འགམས་ཏེ་ཞོགས་པའི་ཉི་གཞོན་དགུང་ལ་བསུས།།