ཆང་སྐྱེས།
སྐར་ཚོགས་གཉིད་ལ་ཤོར་བའི་མཚན་མོ་ཞིག་སྟེ།།
གཉིད་ཀྱི་འདོད་ཡོན་འཁྲུག་པའི་རོང་ཕྲུག་ཁ་ནག།
བསམ་གཞིག་ལྕི་མོ་ཞིག་གི་ཀློང་རུམ་ཟབ་ནས།།
འབྲོག་ཕྲུག་གཞོན་ནུ་མ་ཞིག་ཡུན་གྱིས་འཛུམ་བྱུང་་།།
མགོ་བོ་ལག་པས་སྐྱོར་ཏེ་འདང་ཞིག་བརྒྱབ་ན།།
འཁྲེང་ཞེན་ཁྱེད་ལ་ཞོགས་པའི་་རྒྱུ་མཚན་མི་འདུག།
ངེད་གཉིས་ཞག་གཅིག་མཉམ་དུ་ཉལ་ནོ་མ་གཏོགས།།
ཕན་ཚུན་བར་ལ་དམ་བཅའ་ཅི་ཡང་བཞག་མེད།།
སེམས་ཀྱི་བུ་ཆུང་ལང་ཤོར་ནང་ལ་བཀུག་སྟེ།།
འདས་བའི་ལོ་ཟླ་དེ་དག་ཞིབ་ཏུ་སྔོག་ན།།
ཁྱེད་ཞལ་མཁུར་ཚོས་དམར་བའི་འཛུམ་མདངས་ཞིམ་པོ།།
ད་དུང་བརྗེད་རྒྱུ་མེད་པའི་དན་རྟགས་ཡིན་འདྲ།།
ནམ་ཟླ་དྲུག་པ་ཚེས་པའི་དབྱར་གཞུང་ཞིག་སྟེ།།
མེ་ཏོག་སྤང་ལ་བཞད་པའི་གཡོན་རུ་སྡེ་བ།།
གཡང་དཀར་འབའ་སྒྲ་འཁོར་བའི་རི་ཁུགས་དེ་ནི།།
ངེད་གཉིས་དང་པོར་ཐུག་སའི་འཁོར་ཡུག་ཡིན་སོང་།།
ཁྱི་ཚོགས་ཟུག་སྐད་འཕུར་བའི་འབྲོག་སྡེ་ཕྱུག་མོ།།
ཆར་ཆུས་ཡོངས་སུ་བརླན་པའི་སྦྲ་ཁྱིམ་སྨུག་པོ།།
མ་མོ་པགས་རྩག་ནང་གི་ལང་ཚོ་དམར་པོ།།
ད་ནི་ཡོད་ཚད་ཡིད་ལ་ཝ་ལེར་ཤར་བྱུང་།།