ཆང་སྐྱེས།
བདག་གིས་བརྩེ་བའི་རིན་ཐང་ཁྱེད་ལ་བཅོལ།།
ཁྱེད་ཀྱིས་དུངས་པའི་སེམས་པ་བདག་ལ་གཏད།།
ཁྱོད་དང་ང་ཡི་ཞེན་ཆགས་ཟབ་མོ་དེ།།
སྙིང་ལ་བཏབ་པའི་ལྷག་བསམ་དཀར་པོ་ཞིག།
ཁྱེད་ཀྱིས་འཛུམ་པའི་ཟུར་མིག་བདག་ལ་འཕངས།།
བདག་གིས་དགའ་བའི་རྣམ་འགྱུར་ཁྱེད་ལ་བསྟན།།
ཁྱོད་དང་ང་ཡི་སྙིང་གཏམ་སྙི་མོ་དེ།།
གནམ་མཁའི་ཟླ་བ་ལྷ་མོས་གོ་ནས་འདུག།
ཁྱོད་ནི་ཡིད་འཕྲོག་ལྷ་མོའི་རྣམ་སྤྲུལ་ཞིག།
ང་ནི་ཁྱེད་ལ་འཁྲེང་བའི་ཡི་དྭགས་ཤིག།
བརྩེ་དུང་མངར་མོའི་འོ་ཞོ་འཐུང་བ་དེ།།
བདུད་རྩི་ཁ་ལ་རོལ་བའི་ཡུལ་དུ་འཁྲུལ།།
ཁྱོད་ནི་ཁོ་བོའི་གདོང་གི་ཡ་ཐོད་མིག།
ང་རང་ཁྱེད་ཀྱི་ཁོག་གི་བརྩེ་ཆེན་སྙིང་།།
གཅིག་སེམས་གཅིག་ལ་མཐུན་པའི་ངང་ཚུལ་དེ།།
ཀླུ་མོ་དཀར་མོའི་སྒྲུང་གི་ཟླ་བོར་སྨིན།།
ཁྱེད་རང་བདག་ལ་འགྲོག་པའི་རང་དབང་འཕྲོག།
ང་རང་ཁྱོད་དང་ཐུག་པའི་ཐོབ་ཐང་བླངས།།
ངེད་གཉིས་ཁ་ཁར་གྱེས་སའི་ལམ་ཁ་དེར།།
མི་ཁ་ཚེར་མ་ནག་པོས་ཡོངས་སུ་གཡོགས།།
ཁྱོད་ཀྱིས་བདག་ལ་བཞག་པའི་ཕྱི་མིག་དེ།།
སྙིང་ལ་བཞག་པའི་དྲན་ཤིང་གསོན་པོ་ཞིག།
བདག་གིས་གནང་བའི་དངུལ་གྱི་མཛུབ་དཀྲིས་དེ།།
ཁྱོད་ལ་བཅོལ་བའི་ཁོ་བོའི་སེམས་པ་ཡིན།།
བརྩེ་གྲོགས་སྙིང་སྡུག་མ་ལགསུ།
་
རྒྱ་ནག་ཏང་གི་ནད་འབུ་ཡིས། །
ཁྱོད་དང་ང་གཉིས་རྒྱང་བར་ཆགས། །
ཁྱོད་རང་རང་གི་ནང་ལ་བསྡད། །
ང་ནི་ང་རང་ནང་ལ་བསྡད། །
་
ཁྱེད་རང་དྲན་ནས་སྒེའུ་ཁུང་ནས། །
ཡང་ཡང་བལྟས་ཀྱང་ཁྱོད་མ་མཐོང་། །
ཁྱོད་དང་ཕ་མ་མཉམ་བསྡད་པས། །
ཁ་པར་བཏང་ན་ཞེད་སྣང་སྐྱེས། །
ད་ནི་ཟ་ཁང་སྒོ་བརྒྱབས་འདུག །
འགྲོ་ས་ཐུག་སར་མི་མེད་ཀྱང་། །
ཏང་གི་ནད་འབུར་འཇིགས་སྐྲག་ནས། །
ཁྱོད་དང་ནད་པ་ནོར་ཉེན་འདུག །
ང་ཡི་སྙིང་གཏམ་འདི་མཐོང་ན། །
ཁྱོད་ཀྱིས་རྒྱ་ནད་མ་འགོས་བྱོས། །
ཁྱོད་ཀྱིས་ང་ཡང་མ་བརྗེད་ཅིག །
རྒྱ་ནད་ཡལ་དུས་འཕྲད་དུས་འོངས། །
་
ནང་བཀག་བར་རྒྱང་སྐབས་སུ་བྲིས།