གསོ་ཆར།
དེང་རིམས་ནད་ལས་ཉེན་ཡོལ་ཆེད་བཙན་བྱོལ་བོད་པའི་སློབ་གྲྭ་ཁག་གནས་སྐབས་འཚོགས་ཐུབ་ཀྱི་མེད་ཀྱང་། སློབ་ཕྲུག་གི་ཤེས་ཡོན་ལ་འཐུས་ཤོར་མི་ཡོང་བའི་སླད་ལྷག་བསམ་ཅན་རེ་ཟུང་ནས། དྲྭ་ལམ་སློབ་ཁྲིད་ཀྱི་ཐབས་ལམ་སྤྱད་པ་སོགས་ལས་གཞི་སྣ་མང་ཞིག་སྤེལ་བཞིན་པ་ནི་བསྔགས་འོས་སུ་མཆིས། གུས་པས་ཀྱང་དྲྭ་ཐོག་སློབ་ཚན་དེ་དག་ལ་ཉན་ཙམ་བྱས་པས་གནས་ལུགས་གཉིས་རྟོགས་སོང་སྙམ།
དང་པོ། སློབ་ཕྲུག་ཚོས་བོད་ཡིག་སློབ་ཚན་སྦྱོང་བ་ལ་སྤྲོ་བ་ཞན་པའི་རྒྱུ་མཚན།
དགེ་རྒན་གྱིས་སློབ་འཁྲིད་སྐབས། སློབ་ཚན་འཁྲིད་བདེ་ལོད་བལྟ་བ་ལས་ཕྲུ་གུས་ཤེས་བདེ་ལོད་ལ་དོ་སྣང་མི་བྱེད་པ། ཕྲུ་གུའི་སེམས་ཁམས་ནི་རང་བཞིན་གྱིས་ཤེས་འདོད་ཆེན་པོ་ཡོད་པས་ཐོག་མ་ནས་སློབ་ཚན་འདི་ལ་དགའ་བ་དང་། དེ་ལ་མི་དགའ་བ་ལྟ་བུ་གཏན་ནས་མིན། དཔེར་ན། ལེགས་བཤད་ལྗོན་དབང་ལ་མཚོན་ན། དེའི་དགོས་པ་གཙོ་བོ་དེ་ཕྲད་དང་རྣམ་དབྱེ་ཡི་གོ་བ་མི་དམན་པ་ཤེས་པའི་ཆེད་ཡིན་ནའང་། སློབ་ཚན་ལ་འཇུག་སྐབས་ཐོག་མ་ཉིད་ནས། འཇམ་པའི་དབྱངས་ལ་གུས་བཏུད་ནས། ཞེས་པ་མཆོད་བརྗོད་ཡིན་ཚུལ་དང་། འཇམ་དབྱངས་ཤེས་རབ་ཀྱི་ལྷ་ཡིན་ཚུལ། ད་དུང་བསྟན་བཅོས་ཀྱི་དགོས་སོགས་ཆོས་བཞི་འདི་དང་འདི་ཞེས་དགོས་པ་གཞན་དང་། བསྟན་བཅོས་རྩོམ་རྩོམ་པ་པོའི་ཤེས་ཚད་ལ་དཔག་ནས་བྲིས་པ་གང་དེ་ཕྲུ་གུའི་བློ་ལ་མཚམས་པོ་ཡོད་ཤག་བྱས་ནས་མགོ་ན་བཅུག་གི་འདུག སྔོན་རྗེས་མིང་གསུམ་གྱི་གྲངས་འདྲེན་ཙམ་དང་། ཕྲད་རྣམ་དབྱེའི་སྒྲ་དོན་འཇུག་ཚུལ་སོགས་ཐད་དཀར་བསླབས་ན་ཤེས་བདེ་བ་དང་། བོད་ཡིག་འདི་མགོ་རྙོག་པ་ལ་ཨང་ཞེས་པའི་བློ་མི་སྐྱེས་པའི་དགོས་པ་ཡོད། གཞི་རིམ་དགེ་རྒན་ཚོས་སློབ་ཁྲིད་སྐབས་མཆོད་བརྗོད་དང་དགོས་སོགས་ཆོས་བཞི་ཟེར་བ་དེ་ཚོ་གནས་སྐབས་མ་བསླབས་ཕན་ཡོན་ཆེ་བར་མཐོང་།
གཉིས་པ། ཕ་མ་བོད་པ་ཡིན་པའི་བོད་ཕྲུག་ཞིག་བོད་པའི་སློབ་གྲྭར་འཚར་ལོང་བྱེད་པ་དང་། སློབ་ཚན་ཁག་བོད་སྐད་ཐོག་འཁྲིད་ཀྱང་། ད་དུང་བོད་སྐད་ཡག་པོ་མི་ཤེས་པའི་རྒྱུ་མཚན་གང་ཡིན་ནམ།
སྤྱིར་སྐད་ཡིག་ཟེར་བ་ནང་བསམ་བློ་མཚོན་བྱེད་ཀྱི་རི་མོ་ལྟ་བུ་ཞིག་རེད། རྒྱུན་དུ་རང་གི་དགའ་ཕྱོགས་གང་ཡིན་དང་། རང་གི་འཚོ་བ་ལ་ཁ་ཐག་ཉེ་བའི་བྱ་བྱེད་གང་ཡིན་པ་དག་ལ་བསམ་བློ་མང་བ་གཏོང་བ་དང་། དེ་དང་འབྲེལ་བའི་སྐད་ཆ་ཡང་མང་བ་བཤོད་ཀྱི་རེད། རྒྱུ་མཚན་དེའི་ཕྱིར། ནང་བསམ་བློའི་དགའ་ཕྱོགས་དང་། དེ་མཚོན་བྱེད་སྐད་ཆའི་དབར་ལ་བོད་སྐད་ཀྱི་ཐག་ཉེ་བོ་བཟོ་མ་ཐུབ་ན་མཚོན་བྱེད་སྐད་ཡིག་གཞན་ཡིག་བེད་སྤྱོད་བྱེད་ཡོང་བ་ཆོས་ཉིད་རེད།
ཉེ་འཆར་ལ་དྭགས་བོད་ཁྱིམ་གྱི་ཚན་རིག་དང་། ཨང་རྩི་སློབ་ཚན་ཁག་དྲ་ཐོག་ནས་སློབ་ཁྲིད་བྱེད་བཞིན་པ་མཐོང་། སྤྱིར་བཏང་དགེ་རྒན་གྱིས་བོད་སྐད་ཐོག་ཚན་རིག་བསླབ་བཞིན་འདུག་ཀྱང་། བྱ་ཚིག་ཕལ་ཆེར་ཨིན་སྐད་དང་མིང་ཚིག་ཕལ་ཆེར་ཨིན་སྐད་སྤྱད་ནས་བར་ལ་བོད་སྐད་ཀྱི་ཕྲད་ཁ་ཤས་བཅུག་ནས་བསླབ་བཞིན་འདུག དཔེ་མཚོན་ཙམ་དྲངས་ན། དེ་རིང་ང་ཚོ་ Chemistry སྦྱོང་གི་ཡིན། Chemistry ལབ་ན་ Element འདྲ་མི་འདྲ་ reaction གང་འདྲ་བྱེད་ཀྱི་ཡོད་མེད་སྐོར་རེད། ཟེར་བ་ལྟ་བུ། མིང་ཚིག་དང་བྱ་ཚིག་གི་སྤྱོ་སྒོ་ཉམས་ན་སྐད་ཡིག་ཉམས་པ་དང་ཧ་ལམ་ཁྱད་མེད་པ་དང་། དེ་ལས་ཀྱང་བྱ་ཚིག་གི་སྤྱོད་སྒོ་ཉམས་ན་ཉེས་ཚབ་ཆེ་བའི་དེ་ལུགས་འབད་འབུང་གནང་གལ།
གང་ལྟར་ང་ཚོའི་རྒྱུན་ལྡན་འཚོ་བའི་ནང་ཡང་ཡང་བེད་སྤྱོད་ཡོད་པའི་ཅ་དངོས་དང་དེ་འབྲེལ་གྱི་བྱ་བྱེད། ནང་གི་བསམ་བློ་ཡ་མ་ཟུང་ཚུན་ཆད་བོད་སྐད་གྱིས་ལེགས་པར་མཚོན་མ་ཐུབ་ན་ལྷའི་སྐད་ཡིན་ན་ཡང་ཉམས་རྒྱུ་ཡིན་པ་གདོན་མི་ཟ། ང་ཚོས་སྐད་ཡིག་མི་འདྲ་བ་གཉིས་ཀྱི་འཕེལ་རིམ་ལ་འཁྱུག་ཙམ་བལྟ། ལེགས་སྦྱར་གྱི་སྐད་ནི་གཙོ་བོ་བྲམ་ཟེའི་ཆོས་ལུགས་ཀྱི་སྐད་ཡིག་ལྟ་བུ་ཞིག་དང་། བརྡ་སྤྲོད་ཀྱི་ཁྲིམས་ཧ་ཅང་འཐུས་ཚང་ཡོད་ཀྱང་། ད་ཆ་ཤ་མ་གསོན་གྱི་གནས་སུ་གྱར་བཞིན་པ་འདི་བརྡ་སྤྲོད་ཀྱི་ཁྲིམས་ཀྱི་མ་འདང་བ་མ་ཡིན་པར་སྤྱོད་སྒོ་ཆུང་བས་ལན་པ་ཡིན། ཨིན་སྐད་འདི་གནའ་དུས་བེད་སྤྱོད་བྱེད་མཁན་ཉུང་ངུ་ལས་མེད་ཀྱང་། དེང་སང་འཛམ་གླིང་གི་སྐད་ཡིག་ལྟ་བུ་གྱུར་ཡོད། འདིའི་རྒྱུ་མཚན་གཙོ་བོ་ནི། ཁ་སྐད་ལས་རྒྱང་ཐང་རིང་བའི་བརྡ་སྤྲོད་ཀྱི་ཁྲིམས་ཀྱིས་ཚད་བཀག་མེད་པས་ཡིན། མཐའ་དོན། སྤྱོད་སྒོ་ཆུང་བའི་སྐད་ཡིག་ནི་བེད་སྤྱོད་བྱེད་མི་བདེ་བའི་ཅ་དངོས་ཤིག་དང་གཉིས་སུ་མེད་པས་རིང་མིན་ཀུན་གྱིས་འདོར་ངེས།
རྩོམ་ཡིག་ཆ་ཚང་བཀླགས་པ་ཡིན། ཡག་པོ་བྲིས་འདུག འོན་ཀྱང་། དགོངས་ཚུལ་ཚང་མར་ངོས་ལེན་ཞུ་ཐུབ་མ་སོང་། དམིགས་བསལ་ཨིན་སྐད་དར་ཁྱབ་ཆེན་པོ་བྱུང་བའི་རྒྱུ་མཚན་དེ་ལ་རྒྱབ་སྐྱོར་དེ་ཙམ་བྱེད་ཐུབ་མ་སོང་། ད་ལྟ་ང་ཚོས་བེད་སྤྱོད་བྱེད་བཞིན་པའི་ཨིན་སྐད་དེ་ནི་སྐད་ཡིག་ཆེ་ཁག་མང་པོ་ཞིག་མཉམ་དུ་བསྡུས་ནས་བཟོ་དགོས་བྱུང་བའི་སྐད་ཡིག་ཡིན་པ་དང་། ཐོག་མའི་ཨིན་སྐད་ལ་ཉམས་རྒུད་ཤུགས་ཆེ་ཕྱིན་པ་ལོ་རྒྱུས་ནང་གསལ་པོ་ཡོད། དཔེར་ན། ད་ལྟའི་ཨིན་སྐད་ནང་ལན་ཌན་དང་། གྷི་རིག་སོགས་ནས་གཡར་པའི་ཚིག་མང་པོ་ཡོང་དོན་གང་ཡིན་ནམ། དེ་ལ་གཞིགས་ན་རང་རེ་བོད་ཀྱི་སྐད་ཡིག་ནང་ལ་དེ་ལྟ་བུ་རྒྱ་དཀར་ནག་གི་ཚིག་དང་ཐ་སྙད་གཡར་དགོས་བྱུང་བའི་གནས་སྟངས་ཡོད་དམ།
བོད་སྐད་ནང་ལ་གཡར་ཚིག ཨ་རབ་ནས། ཨ་རག རྒྱ་ནག་ནས། པད་ཚལ། ཁོ་ཙེ། རྒྱ་གར་ནས། པདྨ་སོགས་ཡོད་རེད། ཁ་སྐད་ལ་སུམ་རྟགས་གསར་པའི་སྒྲིག་ལམ་ལ་ཞིག་བཟོ་མ་ཐུབ་ན། བོད་ཡིག་ཉམས་དཀའ་ཡང་། བོད་སྐད་ཉམས་རྒྱུ་ངེས་པ་རེད་དོ།།
ལྷག་པ་དོན་གྲུབ་ལགས་སུ་ཞུ་རྒྱུར། ཨིན་སྐད་དར་ཁྱབ་བྱུང་ཟེར་དུས་སྔར་གྱི་སྐད་དེ་འགྱུར་བ་མེད་པ་མེད་པ་དར་ཁྱབ་འགྲོ་གི་འདུག་ཟེར་གྱི་མེད། སྐད་ཡིག་གཞན་ལས་ཐ་སྙད་ནང་འདྲེན་བྱས་ཡོད་ཟེར་བ་བདེན་པ་རེད་ལ། གདོན་མའི་སྐད་ཡིག་ལ་ཉམས་རྒུད་ཟེར་ན་འདྲ་འགྱུར་བ་ཕྱིན་ཡོད་ཡོད་པ་བདེན་པ་རེད། འོན་ཀྱང་ད་སྐབས་སྤྱོད་བཞིན་པའི་ཨིན་སྐད་དེ་བེད་སྤྱོད་བྱེད་བདེ་ཤོས་དང་འབྲི་བདེ་ཤོས་ཀྱི་སྐད་ཡིག་ཅིག་ཏུ་གྱུར་པའི་རྒྱུ་མཚན་གང་རེད། མ་གཞི་ཨིན་ཇི་སྐད་ཡིག་ལ་འགྱུར་བ་འགྲོ་ཡོད་མེད་དེ་བརྩོད་གཞི་མ་རེད། བརྩོད་གཞི་གཙོ་བོ་དེ་ཨིན་སྐད་ནང་སྐད་ཡིག་གཞན་ནས་ཐ་སྙད་གཡར་བ་དང་། སྐད་ཡིག་ལ་འགྱུར་བ་འགྲོ་མུས་ཁར། ད་དུང་སྐད་ཡིག་འདི་བེད་སྤྱོད་བྱེད་མཁན་མང་དུ་འགྲོ་བཞིན་ཡོད་པ་དེའི་རྒྱུ་མཚན་གང་རེད། སྐད་ཡིག་གང་ཞིག་གཏན་ནས་ཉམས་རྒྱུ་དང་འགྱུར་རྒྱུ་མེད་པ་དེ་སྐད་ཡིག་ཞིག་གི་ཁྱད་ཆོས་གཙོ་བོ་མ་རེད། འོ་ན། སྐད་ཡིག་ཞིག་གི་ཁྱད་ཆོས་གཙོ་བོ་གང་རེད་ཅེ་ན། ཕན་ཚུན་དབར་གོ་བརྡ་འཕྲོད་སླ་པོ། མཚོན་བྱེད་ཡི་གེའམ་རྗོད་བྱེད་དང་། མཚོན་བྱ་བརྗོད་དོན་དབར་ཧེ་བག་དེ་ཙམ་མེད་པར་། བརྗོད་བྱ་ལེགས་པ་མཚོན་ཐུབ་ན་ཡི་གེའི་གོ་དོན་རྫོགས་པ་མ་ཡིན་ནམ།
དོན་གང་ཞིག་སྟོན་པར་བཞེད་ནས། ངག་ནས་ཚིག་ཅིག་ཐོན་པ་ན། ཚིག་དེས་དོན་གང་ཡིན་པ་དེ་་ཇི་ཙམ་ལས་སླ་པོ་མཚོན་ཐུབ་ན་དེ་ཙམ་གྱིས་བཟང་བ་མ་ཡིན་ནམ།
བོད་ཀྱི་སྐད་ཡིག་འདི་ཡང་མི་ཉམས་གོང་འཕེལ་དགོས་ན། མཐའ་གཉིས་དང་བྲལ་བའི་དབུ་མའི་ལམ་ཞིག་ལ་བརྟེན་དགོས། དེ་ཡང་། དཔེར་ན། དངོས་པོ་བྱེ་བྲག་པ་དང་། གང་ཟག་ག་གེ་མོའི་དངོས་མིང་ཚུན་ཆད་བསྒྱུར་དགོས་པའི་མཐའ་གཅིག་དང། བྱ་ཚིག་ཚུན་ཆད་གཞན་ནས་གཡར་ཏེ་བྱ་བའི་མཐར་ ཅེས་ཁོ་ན་སྦྱར་ནས་འཐུས་པ་ལྟར་བུ། དཔེར་ན། ཁོང་གིས་ Exercise བྱེད་ཀྱི་འདུག་ཟེར་བ་ལྟ་བུ་སོགས་མཐའ་དེ་གཉིས་དང་བྲལ་བའི་དབུས་ན་གནས་ན། མིང་ཚིག་གཡར་བ་ཙེ་སྐད་ཡིག་ཉམས་པའི་རྒྱུ་རུ་མི་འགྲོ་བ་བར་སྐད་ཡིག་ཕྱུག་ཏུ་འགྲོ་བའི་རྒྱུ་རུ་འགྲོ་ངེས། གཞན་ང་ཚོས་སྐད་ཆའི་ནང་སྐད་ཡིག་གཞན་གྱི་ཐ་སྙད་རྡོག་པོ་གཅིག་བེད་སྤྱོད་མ་བྱེད་ནའང་སྐད་ཡིག་མི་ཉམས་པའི་ཁག་ཐེག་བྱེད་ག་ལ་ཐུབ། བརྡ་རྙིང་ཚིག་མཛོད་ཟེར་བ་ཞིག་དགོས་པ་གང་འདྲ་ཆག་པ་རེད། གནའ་རྩོམ་དང་ད་རྩོམ་དབད་ལ་དུས་ཀྱི་ཁྱད་པར་གི་དབང་གིས་རྩོམ་གཤིས་ལ་མི་འདྲ་བའི་ཁྱད་པར་ཡོད་པ་མངོན་སུམ་རེད། མ་ཚད་ཞིབ་མོར་དཔྱད་ན་བོད་ཕྱི་ནང་གཉིས་ཀྱི་རྩོམ་པ་པོ་མི་འདྲ་བ་གཉིས་ཀྱིས་ཉིན་ཐོ་ཞིག་བྲིས་པའི་དབང་དུ་བཏང་རུང་། བཟང་ངན་གྱི་སྐད་ཆ་མ་བཤད་ནའང་། རྩོམ་གཤིས་དང་བྲིས་ལུགས་ལ་ཁྱད་པར་ཡོད་བདེན་པ་རེད་བ། བྱས་ཙང་། དུས་སྔ་ཕྱི་ལ་སྐད་གཤིས་ལ་ཕྲན་བུ་འགྱུར་བ་འགྲོ་ནའང་། བོད་སྐད་ཟེར་བའི་མ་རྩ་འདི་གནས་ཐུབ་དགོས་པ་གལ་ཆེ་ཤོས་ནང་གི་ཆེ་ཤོས་མ་ཡིན། འདུ་བྱས་ཐམས་ཅད་མི་རྟག་པར་གསུངས་ཙང་། འགྱུར་ཡ་མེད་པའི་བོད་སྐད་ཅིག་འོང་མི་སྲིད་པས་འགྱུར་བ་དེ་ཉམས་པའི་རྒྱུ་རུ་མི་འགྲོ་བར་འཕེལ་བའི་རྒྱུ་རུ་འགྲོ་ཐུབ་དགོས་པ་དེ་གནད་ཀྱི་དོན་པོར་སེམས་སོ།
་་་་་་་་་་་་་་ དུས་སྔ་ཕྱི་ལ་སྐད་གཤིས་ལ་ཕྲན་བུ་འགྱུར་བ་འགྲོ་ནའང་། བོད་སྐད་ཟེར་བའི་མ་རྩ་འདི་གནས་ཐུབ་དགོས་པ་གལ་ཆེ་ཤོས་ནང་གི་ཆེ་ཤོས་མ་ཡིན། འདུ་བྱས་ཐམས་ཅད་མི་རྟག་པར་གསུངས་ཙང་། འགྱུར་ཡ་མེད་པའི་བོད་སྐད་ཅིག་འོང་མི་སྲིད་པས་འགྱུར་བ་དེ་ཉམས་པའི་རྒྱུ་རུ་མི་འགྲོ་བར་འཕེལ་བའི་རྒྱུ་རུ་འགྲོ་ཐུབ་དགོས་པ་དེ་གནད་ཀྱི་དོན་པོར་སེམས་སོ། ་་་་་་་་་་་
་
འདི་ལ་རྒྱབ་སྐྱོར་ཡོད་དོ།།