ཀླུ་སྨྱོན།
བོད་ཕྱི་ལོགས་སུ་སྐྱེས་པའི་བོད་མི་ཚོས་ཤེས་མི་ཤེས་གང་ལྟར། བོད་ནང་ལོགས་ནས་སྐྱེས་པ་ཞིག་དང་ལྷག་པར་དུ་ངའི་ཕ་ཡུལ་ནས་སྐྱེས་པ་ཞིག་ཡིན་ན་ཕོ་མོ་རྒན་གཞོན་མེད་པར་འདྲེ་བཤད་ལ་དགའ་ཞིང་འདྲེ་བཤད་འདྲ་མིན་བཤད་ཀྱང་ཤེས། ཟླ་བ་གཅིག་གི་སྔོན་ལ་ངས་གྲོགས་པོ་ཞིག་གི་སྐད་འཕྲིན་རྒྱབ་ལྗོངས་ནས་འདྲེ་བཤད་གླིང་ཞེས་པའི་ཚོགས་པ་ཞིག་རྙེད་བྱུང་། ཚོགས་པ་དེའི་ནང་དུ་མི་སུ་ཞིག་གསར་དུ་འཛུལ་ཚེ་ཆེས་ཐོག་མར་འདྲེ་བཤད་ཅིག་ལེགས་སྐྱེས་ཀྱི་ཚུལ་དུ་བཤད་དགོས་ཤིང་། གལ་སྲིད་ཁྱེད་ཀྱིས་བཤད་མི་ཤེས་ན་རང་གི་གྲོགས་པོ་ཞིག་གླས་ནས་བཤད་ན་ཡང་འགྲིག་གི་འདུག སྟབས་ལེགས་པ་ཞིག་ལ། ངས་གནའ་བོའི་འདྲེ་བཤད་འགའ་རེ་བཤད་ཤེས་པ་མ་ཟད། རང་ཉིད་སྒྲུང་གཏམ་རྩོམ་པ་པོ་ཞིག་ཡིན་པའི་ཆ་ནས་འདྲེ་བཤད་གསར་བ་རེ་བརྩམས་ནས་བཤད་ན་ཡང་ཆོག ཚོགས་པ་འདིའི་ནང་དུ་འཛུལ་བ་དང་ཏོག་དབྱིབས་ནད་ཡམས་འདིས་འཛམ་གླིང་སྤྱི་དང་ཁྱད་པར་ཨ་མེ་རི་ཀར་རྒོལ་རྡུང་གཏོང་མགོ་བཙུགས་པ་ཕལ་ཆེར་དུས་མཉམ་ལྟ་བུ་ཞིག་རེད། དེའི་ཕྱིར། ངས་རང་གི་ཞོགས་པའི་ཁ་འདོན་དེ་ཚོ་བཏོན་ཚར་རྗེས་སྐད་འཕྲིན་གྱི་ཁ་ཕྱེས་ནས་འདྲེ་བཤད་ལ་ཉན་བཞིན་ཞོགས་ཇ་འཐུང་གི་ཡོད། འདི་ནི་ངོ་མ་དུས་ཚོད་སྡུག་པོ་འདིའི་ནང་ལ་མཚོན་ན་བསམ་པའི་ལོངས་སྤྱོད་གྱ་ནོམ་པ་ཞིག་རེད་ཡ།
ད་ལྟ་བར་དུ་ངས་འདྲེ་བཤད་གླིང་དུ་ཕྲ་མེན་མའི་སྒྲུང་མི་འདྲ་བ་གསུམ་དང་། མེ་ཡི་གྲུབ་ཐོབ་ལྷ་རིའི་གཟིམ་སྤྲུལ་གྱི་གཏམ་རྒྱུད། འཇའ་ལུས་པ་འཇམ་དབྱངས་རྒྱལ་མཚན་གྱི་གཏམ་རྒྱུད། ནྰ་ལུང་གྲུབ་ཆེན་སངས་རྒྱས་བཟང་པོའི་གཏམ་རྒྱུད་ཁག་དང་པོ་བཅས་བཤད་ཟིན།
ཚོགས་པ་འདི་འཛུགས་མཁན་དང་ཚོགས་མི་ཕལ་མོ་ཆེ་མདོ་སྨད་མཚོ་སྔོན་གྱི་མི་རེད་ལ། ཚོགས་མི་རེ་ཟུང་རྔ་བ་དང་མཛོད་དགེའི་ཕྱོགས་ནས་ཡིན་པ་འདྲ། ཚོགས་མི་ཕལ་ཆེ་བ་བོད་ནང་དུ་འདུག་ལ། ཚོགས་པ་འདིའི་ནང་དུ་ཚོགས་པ་གཞན་དག་གི་ནང་དུ་བཤད་ཟིན་པའི་གཏམ་རྒྱུད་ཀྱི་རིགས་ཕལ་ཆེར་ནང་འདྲེན་བྱས་ཆོག་གི་མེད།
དེང་སྐབས་བོད་ཕྱི་ནང་གཉིས་སུ་བོད་པ་ཚོ་སྐད་འཕྲིན་དང་ཐད་གཏོང་འདྲ་མིན་ལ་ཞུགས་ནས་དུས་ཚོད་སྐྱེལ་བཞིན་པའི་དུས་འདིར། ང་ཡོད་སའི་ཚོགས་པ་འདི་ལ་མཚོན་ན་འདྲེ་བཤད་རིག་པ་འདི་ཡར་རྒྱས་གོང་འཕེལ་དང་མི་ཉམས་རྒྱུན་འཛིན་བྱེད་པ་ལ་དགེ་མཚན་ཆེན་པོ་ཡོད་པ་ཞིག་རེད།
ང་ཚོའི་མི་རབས་རྗེས་མའི་ཁྲོད་དུ་འདྲེ་བཤད་རིག་པར་ཞིབ་འཇུག་གིས་རབ་འབྱམས་པ་དང་འབུམ་རམས་པའི་ཐོབ་ཐང་ལག་ཁྱེར་ལེན་མཁན་ཡང་ཡོད་མི་སྲིད་པ་ཞིག་ག་ལ་ཡིན་ཏེ། ཉེ་ཆར་དྲ་ལམ་ནས་བོད་ནང་གི་དགེ་བཅུའི་ལུགས་སྲོལ་ལམ་དགེ་བཅུའི་ཁྲིམས་ལ་ཞིབ་འཇུག་གིས་རབ་འབྱམས་པའི་དམ་བཅའ་འཇོག་བཞིན་པའི་བརྙན་ཐུང་ཞིག་ཀྱང་མཐོང་བྱུང་།
ང་ཚོ་འདྲེ་ལ་ཡིད་ཆེས་ཤིང་འདྲེ་ལ་འཇིགས་ཤིང་སྐྲག་པ་མ་ཡིན་ནམ། ང་ཚོ་ཕལ་མོ་ཆེ་བྱིས་པ་ཡིན་དུས་མཚན་མོར་མུན་ནག་ནང་དུ་གཅིག་བུར་གཅིན་པ་གཏོང་དུ་འགྲོ་མི་ནུས་པ་མ་ཡིན་ནམ། དེ་ནི་འདྲེ་ཡོད་པར་ཡིད་ཆེས་པ་མ་ཟད་འདྲེ་ཡིས་མུན་ནག་ནང་རང་ཉིད་ལ་བསྒུགས་ཡོད་པར་བསམས་ཀྱང་རེད།
འདྲེ་བཤད་ནི་མི་རིགས་ཚང་མའི་འཚོ་བའི་ཁྲོད་ཀྱི་གྲུབ་ཆ་གལ་ཆེན་ཞིག་ཡིན། འདྲེ་ཡོད་པས་ལྷ་ཡོད་པར་གྱུར་ཅིང་། འདྲེ་ཡོད་པས་ལྷ་ཡི་རིན་ཐང་ཡང་ཇེ་མཐོར་སོང་བ་ལགས། འདྲེ་ཡོད་པས་ང་ཚོས་རང་བྱུང་ཁོར་ཡུག་ལ་གཅེས་སྤྲས་བྱེད་ཤེས་པར་གྱུར་ཅིང་། ལྷ་ཡོད་པས་ང་ཚོས་རང་བྱུང་ཁམས་ལ་བརྩེ་སེམས་བཅིངས་པ་རེད།
གང་ལྟར་ང་ཚོའི་ཚོགས་པ་འདིའི་ནང་གི་འདྲེ་ཡི་གཏམ་རྒྱུད་རེ་རེ་ནི་ང་ཚོའི་ཕ་ཡུལ་གྱི་ཟབ་ས་ངོ་མ་དེ་རེད་ལ། འདྲེ་ཡི་དར་རྒུད་རེ་རེ་ནི་ང་ཚོའི་མི་རབས་འདིའི་སྐྱིད་སྡུག་གི་འཚོ་བའི་གཏིང་རུམ་ངོ་མ་དེ་རེད། འདྲེ་ཡོད་པས་ང་ཚོའི་གཏམ་རྒྱུད་ལ་ཚོན་མདངས་འབར་ཞིང་། འདྲེ་ཡོད་པས་ང་ཚོའི་མཚན་ལྗོངས་ལ་ཚེ་སྲོག་འབུས་ཐུབ་ཡོད།
འདྲེ་བཤད་གླིང་ནས་ཁྱེད་ཀྱིས་གཞི་བདག་གིས་འབྲོག་པའི་བུ་མོ་མནའ་མར་ཁྲིད་པའི་འདྲེ་དང་མིའི་བར་གྱི་བརྩེ་དུང་གི་གཏམ་རྒྱུད་ཐོས་ཐུབ་ལ། འདྲེ་བཤད་གླིང་ནས་ཁྱེད་ཀྱིས་འདྲེ་མོ་གཞོན་ནུ་མ་དེས་ན་གཞོན་དགེ་རྒན་དེ་ཇི་ལྟར་ཤ་ཟད་རུས་ཀོང་དུ་བསྒྱུར་པའི་གཟུགས་མེད་ཀྱི་ཚོར་བ་མངར་མོ་ཞིག་ཀྱང་ཉམས་སུ་མྱོང་ཐུབ།
ཕོ་མོ་དང་རྒན་གཞོན། སྐྱ་སེར་དང་དབུལ་ཕྱུག་མེད་པར་འཛམ་གླིང་བཟང་བཙོན་ཆེན་པོའི་བཙོན་མར་གྱུར་པའི་དུས་ཚོད་འདིར། འདྲེ་བཤད་ནི་ཁྱེད་ཀྱི་བཙོན་རོགས་བྱམས་བརྩེ་ལྡན་པ་ཞིག་ཡིན། འདྲེ་བཤད་ནི་ཁྱེད་ཀྱི་འདུག་རོགས་བློ་གཏད་ཆོག་པ་དེ་ཡིན།
འདྲེ་བཤད་མེད་ན་བོད་ཀྱི་ཆོས་ལུགས་པ་ཚོ་ལ་ཟ་རྒྱུ་དང་གོན་རྒྱུ། མ་ཚད་སྒོར་མོ་སོགས་གང་ནས་ཡོང་།
ཨ་ལགས་ཀླུ་སྨྱོན་ལགས། འདྲེ་སྒྲུང་དེ་དག་ཁ་བརྡ་དྲ་ཐོག་གམ་གདོང་དེབ་སྒང་ལ་འགོད་རོགས་ཞུ། ཀློག་འདོད་འདུག །
༄༅། བོད་ཀྱི་རིག་གནས་ཕྱུག་པོ་རྒྱས་པོ་གཏིང་གཟབ་པོ་དེ་ཚོ་མ་སྦྱང་མ་བཤད་པར་
གཟུགས་མེད་འདྲེ་ལ་ཡིད་ཆེས་དང་བཤད་པ་བརྒྱབ་ནས་འདི་ཕྱི་གཉིས་ཀར་ལ་
ཕན་ཅི་ལ་ཐོག་། ལམ་ལུགས་ངན་པ་ནད་དུག་ལྟར་དེ་ཚོ་ཕར་ཞོགས།