ཆང་སྐྱེས།
རེས་གཟའ་ཟླ་བའི་མཚན་མོ། ༢༠༢༠ལོའི་ཟླ་༤ཚེས་༦
ཏོག་དབྱིབས་གསར་བའི་གློ་ཚད་ནད་ཡམས་འདིའི་རྐྱེན་གྱིས་འཛམ་གླིང་གི་མི་དམངས་དུང་ཕྱུར་མང་བོ་རང་ཁྱིམ་དུ་བཀག་ནས་སྡོད་དགོས་པ་བྱུང་ཡོད་པ་མ་ཟད་འཇིེགས་སྣང་དང་སེམས་ཁྲལ་གྱིས་འཚོ་དགོས་པ་ཡང་བྱུང་ཡོད ། དེ་དང་དེའི་ནང་བཞིན་ཁོ་བོ་ཡང་རང་ཁྱིམ་དུ་འཛུལ་ནས་ཉིན་ཞག་གི་དུས་ཡུན་རིང་མོ་དོན་མེད་ངང་ཕུད་ཐབས་བྱས་ཏེ་མི་འདུག་ག་མེད་བྱུང་། དེ་བས་ཁོ་བོས་ཉིན་མ་རྟག་པར་བརྙན་འཕྲིན་ལ་ལྟ་ཞོར་དང་གསར་འགྱུར་ལ་ཉན་བཞིན་དུ་རང་ཁྱིམ་ནས་ཕྱི་ལ་གོམ་པ་གང་ཡང་སྤོ་མ་ཕོད་པར་སྡད་ཡོད། ད་དུང་མཚམས་མཚམས་ན་ཁོ་བོས་རང་གི་ཚོད་ཀྱིས་བསམ་བློ་ཡང་འདྲ་མིན་མང་པོ་ཞིག་བཏང་བ་ཡིན། དེ་ཡང་ཁོ་བོས་བསམ་ན་༢༠༡༩ལོའི་ལོ་མཇུག་ཏུ་རྒྱ་ནག་ཝུའུ་ཧན་ནས་མཆེད་པའི་ཏོག་དབྱིབས་གསར་བའི་གློ་ཚད་ནད་ཡམས་འདི་ད་ལྟའི་ཆར་འཛམ་གླིང་གི་རྒྱལ་ཁབ་ཕལ་ཆེ་བར་ཁྱབ་སྟེ་འཛམ་གླིང་མི་དམངས་ཡོངས་ཀྱི་སྟེང་ལ་ལོ་ངོ་བརྒྱ་ཕྲག་གཅིག་གི་རིང་ལ་བྱུང་མ་མྱོང་བའི་གོད་ཆགས་ཆེན་པོ་ཞིག་ཐེབས་དང་ཐེབས་བཞིན་ཡོད་པ་ཁོ་བོས་མ་བཤད་ཀྱང་ཚང་མས་མཁྱེན་གསལ་རེད། ཏོག་དབྱིབས་གསར་བའི་གློ་ཚད་ནད་ཡམས་འདིས་འཛམ་གླིང་གི་འགྲོ་བ་མི་སྤྱི་ཡོངས་ལ་བརྗོད་ཐབས་མེད་པའི་དཀའ་ཚེགས་ཤིག་དང་བཟོད་པར་དཀའ་བའི་སྡུག་བསྔལ་མང་པོ་ཞིག་སྤྲད་ཡོད་པ་མ་ཟད་མི་དམངས་གྲངས་ལས་འདས་པ་ཞིག་གི་ཚེ་སྲོག་ཀྱང་འཕྲོག་དང་འཕྲོག་བཞིན་པའི་སྒང་རེད། མ་ཟད་འཛམ་གླིང་གི་རྒྱལ་ཁབ་སོ་སའི་འཛུགས་བསྐྲུན་དང་དཔལ་འབྱོར ། སློབ་གསོ་དང་འཚོ་བའི་ཁ་ཕྱོགས་སོགས་ཀྱི་གོ་རིམ་ཡང་རྨང་ནས་དཀྲུགས་སོང་། འདི་དག་གིས་འཛམ་གླིང་མི་དམངས་ཀྱི་སེམས་ལ་སོས་ཐབས་མེད་པའི་རྨ་ཁ་ཞིག་དང་བརྗོད་ཐབས་བྲལ་བའི་དཀའ་ངལ་ཞིག་བཞག་ཡོད་པའང་བརྗོད་ག་ལ་དགོས། ཡིན་ན་ཡང་ཁོ་བོས་བསམ་ན་འཛམ་གླིང་གི་མི་བུ་རླབས་ཆེན་དག་གིས་གང་མགྱོགས་ངང་ཏོག་དབྱིབས་གསར་བའི་ནད་ཡམས་འདི་ཉིད་སྔོན་འགོག་བྱེད་ཐུབ་པ་བྱུང་རྗེས་འཛམ་གླིང་མི་དམངས་ལ་དཀའ་ངལ་ཅི་ཞིག་འབྱུང་རྒྱུ་ཡིན་མིན་གྱི་ཕྱོགས་ལའང་ཚང་མས་བསམ་བློ་གཏོང་དགོས་རྒྱུ་ནི་ཧ་ཅང་གིས་གལ་ཆེན་ཞིག་རེད་བསམ་བྱུང་། རྒྱུ་མཚན་ཏོག་དབྱིབས་གསར་བའི་ནད་ཡམས་འདིས་འགྲོ་བ་མི་ཡོངས་ལ་དཀའ་ངལ་མང་པོ་མང་པོ་ཞིག་སྤྲད་ཡོད་པས་ཆེ་ས་ནས་བཤད་ན་གླིང་ཕྲན་དང་གླིང་བར་དང་། རྒྱལ་ཁབ་དང་རྒྱལ་ཁབ་བར་ལ་ཆབ་སྲིད་དང་དཔལ་འབྱོར་སོགས་ཀྱི་རྙོག་དྲ་ཆེན་པོ་ཞིག་འབྱུང་སྲིད་པ་མ་ཟད་མི་དམངས་མང་པོ་ཞིག་ལ་མུ་གེ་བྱུང་སྟེ་མི་དམངས་དཀྱུས་མ་མང་པོ་ཞིག་གི་ཚེ་་སྲོག་ཀྱང་ཤོར་རྒྱུ་རེད ། མ་ཟད་རྒྱལ་ཁབ་ནང་ཁུལ་དུ་ཡང་སྲིད་དབང་འཐབ་རྩོད་གྱི་གཡོ་འགུལ་ཆེན་པོ་ཞིག་དང་ཁྱོད་ཤི་ང་གསོང་གྱིས་ནང་འཁྲུག་ཚབས་ཆེན་ཞིག་ཀྱང་འབྱུང་མི་སྲིད་པ་སུ་ཡིས་ཤེས། ད་དུང་ཆུང་ས་ནས་བཤད་ན་ས་ཁུལ་དང་ས་ཁུལ་བར་ལ་ཡང་ཚོང་དོན་རྙོག་དྲ་དང་ས་རྩོད་ཆུ་རྩོད། ད་དུང་ཁྱིམ་ཚང་ནང་རོལ་གྱི་བཟའ་ཟླའི་འགལ་ཟླ་ཡང་མི་ཉུང་བ་ཞིག་བྱུང་སྟེ་བཟའ་ཐོར་རྒྱག་པའང་ནམ་རྒྱུན་ལས་ལྡབ་འགྱུར་གྱིས་མང་རུ་འགྲོ་སྲིད། ཐ་ན་ཕ་མ་དང་བུ་ཕྲུག་གཉིས་ཀྱི་བར་ལ་ཡིན་ནའང་ཚར་རྒྱུ་མེད་ཞིང་གསལ་ཁ་མེད་པའི་དོན་དག་འདྲ་མིན་མང་པོ་ཞིག་མི་འབྱུང་བའི་ངེས་བ་ཡང་མེད་དོ། སྤྱིར་ན་ང་ཚོ་མིའི་རིགས་དཀའ་ངལ་དང་སྡུག་བསྔལ་སོགས་གང་ལ་ཡང་མ་ཕྲད་ཚེས་ཡོད་ཚད་འགྲིག་ནས་སྡད་ཡོད་པའི་རྣམ་པ་ཞིག་མཐོང་ཐུབ་མོད ། འོན་ཀྱང་གློ་བུར་ཏུ་དཀའ་ངལ་དང་སྡུག་བསྔལ་སོགས་ལ་ཕྲད་ཚེས་ད་བཟོད་རང་གཤིས་ངོ་མ་བོ་དེ་ཕྱིར་བཏོན་ནས་འཐབ་རྩོད་དང་རྙོག་དྲ་ཡི་འགོ་བཟུང་ནས་ཡོང་གིས་རེད། ད་ནི་མི་འགྱང་བར་དོན་དག་ཅི་ཞིག་འབྱུང་ཡོང་བསམ་ནས་འདང་རེ་བརྒྱབ་ན་ཁོ་བོ་ནི་འདུག་མི་བཟོད་པ་དང་གཉིད་མིི་ཐུབ་པའི་ཚོད་ཞིག་རེད།