སྐྲན། [སིཌི་ནིས། ]
“རྒྱང་རིང་རྒྱང་རིང་ཞིག་ན་” བོད་ཡུལ་ལུང་པ་ཡོད་པས་ཨེ་ཡིན་གྲང་། གངས་རི་དཀར་པོ་ལྟ་བུའི། རྫ་རི་སྨུག་པོ་ལྟ་བུའི། ང་ཡི་དྲིན་ཆེན་ཡབ་ཡུམ་དང་སྤུན་མཆེད་དག་ཡོད་པས་ཨེ་ཡིན་གྲང་། ང་ཡིས་གྲོགས་མཆོག་གཞས་པ་འཇམ་དབྱངས་བཀྲ་ཤིས་ཀྱི་གཞས་གསར་ “རྒྱང་རིང་རྒྱང་རིང་ཞིག་ན་” ཅེས་པར་ཧ་ཅང་རྒྱང་རིང་རྒྱང་རིང་ཞིག་ནས་རེ་སྒུག་ཆེན་པོ་བྱ་དགོས་བྱུང་། གསལ་བསྒྲགས་སྔོན་སོང་གི་ཡི་གེའི་རི་མོས་ང་ཡི་ཡིད་ཀྱི་ནམ་མཁའ་ལ་རྟོག་བཏགས་ཀྱི་སྣང་བརྙན་སྣ་ཚོགས་བྲིས། མཚར་སྡུག དགའ་བ། དྲན་པ། དུངས་པ། ཧ་ཅང་གཟུགས་སུ་མི་ཕོབ་པའི་ན་ཟུག་དང་སྐྱོ་བ། མྱ་ངམ་གང་མང་ལྟ་བུ་ཉིན་མཚན་གྱི་ཕྱི་ནང་གཉིས་སུ་ཡུན་རིང་ཕབ།
ཕྱི་དྲོར་ང་རང་ལས་ཀའི་བྲེལ་འཚུབ་ཀྱི་དྲི་ངན་གསེབ་ན་ཡོད་མོད། བར་གསེང་གི་འོ་ཇ་དང་ལྷན་དུ་ངས་གྲོགས་མཆོག་གཞས་པ་འཇམ་དབྱངས་བཀྲ་ཤིས་ཀྱི་སྐད་འཕྲིན་བར་སྟོང་བཤེར་བ་ན། གཞི་ནས་ “རྒྱང་རིང་རྒྱང་རིང་ཞིག་ན་” ཅེས་པ་རྒྱང་རིང་རྒྱང་རིང་ཞིག་ནས་འདི་གར་འབྱོར་འདུག རྒྱང་རིང་རྒྱང་རིང་ཞིག་ནས་ཧ་ཅང་ཐག་ཉེ་ཐག་ཉེར་འབྱོར་འདུག
དེར་བརྟེན། ང་ཡི་བྲེལ་སེམས་ཀྱིས་ང་ཡི་ལག་པ་འདེད་ཅིང་འཐེན་པ་དང་འདྲ་ལ། དེ་བཞིན་བརྡ་རྟགས་ཀྱི་སུག་བཞི་ས་ལ་ཟུག་པ་ལྟ་བུའི་དལ་སྣང་གིས་གཟིར་ན་ཡང་། ག་ལེ་ག་ལེར་ “རྒྱང་རིང་རྒྱང་རིང་ཞིག་ན་” ཅེས་པའི་བརྙན་ངོས་ཀྱི་ཡིག་འབྲུ་རེ་རེ་དང་གསོན་ཉམས་དོད་པའི་སྐྱ་མདོག་གི་འདྲ་པར་ངོས་ཀྱི་འཁྲབ་སྟོན་པ་དག་ཁོ་བོའི་མིག་གི་ལོངས་སྤྱོད་དུ་གྱུར།
དེ་ལྟར་དྲ་སྟེང་གི་འགྲོ་ལུགས་ཆ་ཚང་*བསྒྲུབས་རྗེས་ང་ཡིས་རང་དབང་གིས་རོལ་མྱོང་ལན་གཅིག་བྱས། ངས་རྒྱང་རིང་རྒྱང་རིང་ཞིག་ནས་རེ་སྒུག་བྱ་སའི་ “རྒྱང་རིང་རྒྱང་རིང་ཞིག་ན་” ཅེས་པར་ཧ་ཅང་རྒྱང་རིང་རྒྱང་རིང་གི་མཛེས་པའི་རྩྭ་ཐང་། དེར་སྤྲ་ཆུང་གྲུ་བཞི། དེར་ཚེ་གཅིག་འདུན་མ་བཅོལ་སའི་ཕ་ཡུལ་གྱི་སློག་པ་གྱོན་པའི་བརྩེ་བའི་གཞོན་ནུ་ཟུང་གཅིག དེར་ད་དུང་དགུན་ཁ་བའི་གཡོགས་པའི་ཕ་ཡུལ་གྱི་ཡུལ་བཀོད་དང་བཅས་པ། དེར་སྨུག་པའི་རི་བོ། དེར་གཡང་དཀར་ལུག་ཁྱུ་བཀྲམས་ཤིང་། ཚེ་གཅིག་འདུན་མ་བཅོལ་སའི་མཐུན་པའི་བུ་མོ། དེར་དམ་བཅའི་མགུལ་རྒྱན་ཕུལ་བཞིན་པ། དེར་མཚམས་དང་མཚམས་སུ་གྲོགས་མཆོག་གཞས་པ་འཇམ་དབྱངས་བཀྲ་ཤིས་ཀྱི་དམར་སྨུག་གི་ངོ་གདོང་ལས་མུ་ཏིག་བསྟར་ལ་བརྒྱུས་འདྲའི་འཛུམ་པའི་ཚེམས་ཕྲེང་ངོམས་ཤིང་། ད་དུང་སྟོད་གོས་དཀར་ཆིལ་ལེ་བ་འོ་མས་ཚོས་པ་ལྟ་བུ་ཞིག་ལ། གོང་དཀྲིས་སྔོན་པོ་ནམ་མཁའ་དག་པ་འདྲ་བ་ཞིག་གྱོན་པ་སོགས་ཀྱིས་ཆེས་མཐའ་མཇུག་ཏུ་ཁོ་མོའི་མགོ་བོ་དེ་ཁོང་གི་ཕྲག་པར་བསྙེས་པ་ལྟ་བུའི་བདེ་སྣང་བསྩལ་ཅིང་། རེ་སྒུག་གི་ཁ་གསབ་ལ་ཆེད་དུ་བསྐྲུན་པ་ལྟ་བུས་ང་ཡི་ཡིད་གདུང་དང་སྐྱོ་ངལ་རྨང་ནས་སངས་པར་བྱས།
རྒྱང་རིང་རྒྱང་རིང་ཞིག་ན། རྒྱང་རིང་རྒྱང་རིང་ཞིག་ན། … … …
* ཟ་མ་བཟས་ཚེ་ཟས་རིན་སྤྲོད་དགོས་པ་བཞིན། དེང་གི་ཆར་དྲ་སྟེང་ནས་རང་ལ་གང་མཁོ་ཕབ་ལེན་ནམ་བེད་སྤྱོད་བྱེད་པ་ལ་དེར་བླུ་ཡོན་སྤྲོད་དགོས་པ་རེད་དེ། ཉེ་སྔོན་ཡང་། ང་ཡིས་བྲི་ཁུལ་བྱས་པའི་“གཞས་ཆུང་ཕྲ་མོ་” གྲོགས་མཆོག་གཞས་པ་འཇམ་དབྱངས་བཀྲ་ཤིས་ཀྱིས་བོང་བ་གསེར་གཟིགས་ཀྱིས་དེ་ལ་གདངས་བརྩམས། སྒྲ་བཟོས། བརྙན་ཕབ། དཀོན་པའི་རྒྱུ་བཏང་། དཀའ་བའི་ཚེགས་ཕུལ། ཆེད་ལས་པ་གང་མང་ཞིག་དང་འབྲེལ་བ་བརྒྱུད་དེ། མཐར་གླུ་གཞས་ལེགས་པར་གྲུབ་རྗེས་དྲ་སྟེང་ལ་བཞག་པར་ཡང་ཁ་ཤས་ཀྱིས་རིན་གོང་ཆེ་འདུག་ཟེར་བ་དང་། ཡང་བསམ་མེད་ཞེ་ནག་རེ་འགའ་ཡིས་ལྐོག་ཏུ་ཕབ་ལེན་བྱས་ཏེ་གང་སར་འགྲེམ་སྤེལ་བྱས་པ་སོགས་བྱུང་མོད། དེ་ནི་ད་ལྟའི་བོད་སྤྱི་ཚོགས་དང་དེང་གི་དྲ་རྒྱའི་རིག་གནས་བར་གྱི་ཧེ་བག་ཡིན་ཀྱང་སྲིད།
གང་ལྟར། ཐེངས་འདིའི་ “རྒྱང་རིང་རྒྱང་རིང་ཞིག་ན་” ཅེས་པར་རོལ་མྱོང་བྱ་བར་དམངས་སྒོར་ ༡༠ འབུལ་དགོས་མོད། ང་ལ་མཚོན་ན་དེ་ནི་ཧ་ཅང་ཡིད་སེམས་སྤྲོ་བོས་འབུལ་མོས་པ་ཞིག་ཡིན། སྤྱིར་ན། དེ་ནི་འབུལ་འོས་པ་ཞིག་དང་ངེས་པར་འབུལ་དགོས་པ་ཞིག་ཀྱང་རེད་སྙམ། ཆུང་ས་ནས་བཤད་ན། དེས་མི་མང་པོ་ཞིག་གི་དཀའ་སྤྱད་དང་འབད་འབུངས་ལ་བསམ་ཤེས་བྱས་པ་རེད་ལ། མི་མང་པོ་ཞིག་གི་དགའ་ཕྱོགས་ལ་བརྩི་བཀུར་བྱས་པའང་རེད། ཡང་ཆེ་རུ་བཏང་ན། བོད་ཀྱི་རིག་གཞུང་ལ་གོང་བཀུར་ཞུས་པ་རེད་ལ། ཉམ་ང་ཉག་ཕྲག་བའི་བོད་ཀྱི་གླུ་གཞས་སྒྱུ་རྩལ་ལ་ཕྱག་གྲུ་མཉམ་འདེགས་གནང་པའང་རེད། དེ་བས་རྒྱ་ཆེ་བའི་བོད་མི་ཉན་མཁན་ཡོངས་ཀྱིས་ཁ་དང་ལག་པ་སུས་མགྱོགས་ཀྱིས་ལྐོག་ཏུ་རིན་མེད་ཕབ་ལེན་མི་གནང་པར་དྲ་སྟེང་གི་འགྲོ་ལུགས་ཆ་ཚང་ཡིན་ལུགས་ཚུལ་མཐུན་གྱིས་བསྒྲུབ་རྒྱུའི་རེ་བའང་ཞར་ལ་ཞུ་ཞུའོ།།
གཞས་གསར་དེ་ཧ་ཅང་སྙན་གི་ཟེར་ནས་གོ་སོང་། དེ་རིང་གི་ངོ་སྤྲོད་འདིས་དེ་ལས་ཀྱང་ཉན་འདོད་སྐྱེས་བྱུང་། གང་མགྱོགས་མྱོང་རོལ་བྱ་ངེས་ཡིན། བཀྲིན་ཆེ།
ཡག་པོ་རེད