དུར་བྱང་། ཕུར་ཐི། (Perth)
དེང་གི་ཆར་རྒྱ་ནད་ཀྱི་རྐྱེན་པས་འཛམ་གླིང་གི་མི་རྣམས་འཇིགས་སྣང་དང་དོགས་ཟོན་ངང་སྤྱི་ཚོགས་རྒྱང་བཀྱེད་ཀྱི་ངལ་བ་ཁུར་དུ་བླངས་ཡོད། སྡུག་བསྔལ་མགོ་ཐོག་ཏུ་མ་བབ་ན་བསམ་མི་ཤེས་པའི་ཁོ་བོ་ཁ་སང་ས་གནས་ཀྱི་དཔེ་ཚོང་ཁང་དུ་ཕྱིན། ཤེས་རབ་ཀྱི་བཅུད་དང་བྱམས་བརྩེ་ཡི་ཟས་ཀྱིས་གཏམས་པའི་བྱིས་སྒྲུང་འདི་མཇལ་བྱུང་། གསེར་སྲང་སྟོང་གིས་གཞལ་དཀའ་བའི་བྱིས་སྒྲུང་དེ་བླུས་ནས་རང་ཁྱིམ་ལ་མགྱོགས་པོར་ལོག་ཡོང་བ་ཡིན།
གཡའ་དག་པའི་ནམ་མཁའ་དང་དྭངས་གསལ་གྱི་རྒྱུག་ཆུ་དལ་གྱིས་བཞུར་བའི་ཨ་མདོའི་བྱང་ཤར་གྱི་སྲབ་ངོས་སུ་ཆགས་པའི་གྲོང་སྡེ་ཆུང་ཆུང་ཞིག་ནས་སྐུ་བལྟམས་ཤིང་ངོ་མཚར་ཆེ་བའི་ཁྱེའུ་ཞིག་གི་དངོས་བྱུང་རྣམ་ཐར་གྱི་བེའུ་བུམ་བྱིས་སྒྲུང་གི་རྣམ་ཅན་དུ་མཛད་གནང་བ་ཞིག་རེད་འདུག
ང་ཚོས་འདས་ཟིན་པའི་ལོ་རྒྱུས་ལ་བཅོས་སྒྱུར་བྱེད་མི་ཐུབ་ཀྱང་འབྱུང་འགྱུར་གྱི་འཇིག་རྟེན་ལ་ཏན་ཏན་འགྱུར་བ་གཏོང་ཐུབ་པ་ཡིན།གསར་བཞད་ཀྱི་མེ་ཏོག་ལྟ་བུའི་འཛམ་གླིང་གི་བྱིས་པ་ཡོད་དོ་ཅོག་ལ་བྱས་བརྩེའི་ལྡན་པའི་འཇིག་རྟེན་གསར་བ་ཞིག་བསྐྲུན་པའི་ནུས་པ་གཅིག་མཚུངས་སུ་ཡོད་པ་ཡིན།
བྱམས་བརྩེའི་བདག་ཉིད་དུ་འབོད་པའི་ཨ་མ་ཞིག་གིས་རང་ཉིད་ཀྱི་བྱིས་པའི་རྒྱུད་ལ་བྱམས་བརྩེའི་ས་བོན་ཇི་ལྟར་བཏབ་པའི་བྱུང་བ་བརྗོད་པ་འདི་དངོས་གནས་ཁྱད་དུ་འཕགས་པ་ཞིག་རེད། གྲོང་སྡེ་ཆུང་ཆུང་དེ་དང་ཁ་གྱེས་པའི་ཁྱེའུ་དེས་རང་ཁྱིམ་ནས་ཁྱེར་ཡོང་བ་ནི་ཡུམ་ཆེན་གྱིས་བཏབ་པའི་བྱམས་བརྩེའི་ས་བོན་དེ་རེད་འདུག
«བྱམས་བརྩེའི་ས་བོན»ཞེས་པའི་བྱིས་སྒྲུང་དེའི་ནང་དུ་ཁྱེའུ་དེའི་འཛུམ་མདངས་ཀྱིས་ཁྱབ་ནས་འདུག སྐྱེས་བུ་ཆེན་པོ་ཞིག་གི་རེ་སྨོན་ཁྲོད་ཀྱི་གོ་ལ་གསར་བ་ཞིག་ལེགས་འགྲུབ་བྱུང་འདུག དགུང་ལོ 85 ལ་ཕེབས་པའི་ཤཱཀྱའི་དགེ་སློང་ཞིག་གིས་ཤོག་བུ་དཀར་གཙང་ཞིག་དང་ཤིན་ཏུ་འདྲ་བའི་འཛམ་གླིང་གི་བྱིས་པའི་ཚོགས་ལ་གླེང་མོ་བྱེད་བཞིན་འདུག བྱིན་རླབས་ཀྱིས་མཚན་ཁ་འབར་བའི་ཞལ་གདམས་དག་ལྷུག་ལྷུག་ཏུ་འཆད་གནང་གི་འདུག
ང་ཚོས་ཆུ་རྐྱལ་བ་དང་རོལ་ཆས་སོགས་ལ་སྦྱོང་བརྡར་མང་བོ་ཞིག་བརྒྱུད་དགོས་པ་བཞིན། བྱམས་བརྩེའི་ལག་ལེན་ལའང་སྦྱོང་བརྡར་དགོས་པ་སྨོས་ཅི་དགོས། ཀྭ་ཡེ་བྱིས་པའི་ཚོགས། རྣ་བ་བློགས་དང་། ཁྱེད་ཅག་ལ་བྱམས་བརྩེ་ལྡན་པའི་འཇིག་རྟེན་གསར་བ་ཞིག་བསྐྲུན་པར་གོ་སྐབས་ཡོད་པ་མཁྱེན་པར་མཛོད། ཀྭ་ཡེ། དྭངས་གཙང་གི་འཛུམ་མདངས་དེ་ང་ལ་སྟོན་རོགས། ཕ་མ་དང་གྲོགས་ཀྱི་ཚོགས་ལ་སྟོན་རོགས།འཛམ་གླིང་གི་སྐྱེ་འགྲོ་ཀུན་ལ་སྟོན་རོགས།
17/04/2020 ཉིན་བྲིས།