ཤེས་རབ་ཀྱི་ལྷ་མཆོག

སྐྱེས་སར་ཀླུ་སྒྲུབ་ཀྱིས་བསྡུ་སྒྲིག་བྱས།

      <<ཆོས་ལུགས་ཀྱི་འཇིག་རྟེན།>>དང་ཏཱ་ལའི་བླ་མ།

<<ཆོས་ལུགས་ཀྱི་འཇིག་རྟེན།>>ཞེས་པ་ནི། ཕྱི་ལོ་ ༡༩༥༣ ལོར་ཧྥ་རན་སིའི་ཞིང་ཆེན་དྷོ་མི་ནས་ཁན་(les dominicains de la province de France)ནས་འདོན་སྤེལ་བྱེད་མགོ་བརྩམས་པའི་དུས་དེབ་ཅིག་ཡིན། སྐབས་དེར་དེབ་འདིའི་མིང་ལ། <<འཛམ་གླིང་ཆོས་ལུགས་ཀྱི་གསར་འགྱུར། L’Actualité Religieuse dans le monde >>ཟེར། དེ་ནས་ཕྱི་ལོ་ ༡༩༥༥ ལོར་དུས་དེབ་འདིའི་མིང་དེ་<<རྒྱལ་སྤྱིའི་གནམ་བདག་ཆོས་ལུགས་ཀྱི་ཆ་འཕྲིན། Informations CatholiquesInternationales>> ཞེས་པར་བསྒྱུར། ཡང་ཕྱི་ལོ་ ༡༩༨༣ ལོར་ཐོག་མར་མགོ་འཛུག་སྐབས་ཀྱི་མིང་དེ་བསྐྱར་འགོད་ཀྱིས་མུ་མཐུད་དུ་འདོན་སྤེལ་བྱས།

ཕྱི་ལོ་ ༢༠༠༣ ལོར། འཛམ་གླིང་གི་ཚོགས་སྡེ་ Le Monde Group ཞེས་པའི་ཚོགས་པ་དེས་དུས་དེབ་འདི་ཉོས་ཏེ། <<ཆོས་ལུགས་ཀྱི་འཇིག་རྟེན། Le Monde des religions>> ཞེས་མིང་གསར་པ་བཏགས། དེ་ནས་བཟུང་དུས་དེབ་འདི་ཟླ་ངོ་གཉིས་རེའི་མཚམས་སུ་ཐེངས་རེར་འདོན་སྤེལ་བྱས། ད་ལྟ་ཕྱི་ལོ་ ༢༠༢༠ ལོའི་འདོན་ཐེངས་གཉིས་པ་(ཟླ་བ་ ༣/༤) འདི་དུས་དེབ་འདིའི་དེབ་ཕྲེང་བརྒྱ་པ་ཆགས་ཡོད། དུས་མཚམས་དམིགས་བསལ་བ་འདིར། དུས་དེབ་འདིས། དེབ་ཕྲེང་དང་པོ་ནས་བརྒྱ་པ་བར་རྩོམ་སྒྲིག་བྱེད་རིང་གི་བརྒྱུད་རིམ་ནང་། ཆོས་ལུགས་དང་། མཚན་ཉིད་རིག་པ། སེམས་ཁམས་རིག་པ། གཞན་ཡང་འཇིག་རྟེན་མི་ཆོས་ཀྱི་ལམ་བཅས་ནས་གཞན་ལ་ལམ་སྟོན་དང་སྣེ་ཁྲིད་ཡང་དག་གནང་མཁན་གྱི་སྐྱེས་ཆེན་དམ་པ་ཇི་སྙེད་ཅིག་གི་སྐོར་དང་། བཅར་འདྲི་ཞུས་པའི་མི་སྣ་དེ་དག་གི་ཁྲོད་ནས་ཆེས་བཀུར་བར་འོས་པ་དང་། མིག་དཔེར་འོས་པའི་སྐྱེས་བུ་དམ་པ་ཁག་ཅིག་བདམས་ཡོད་པའི་ནང་། བོད་མིའི་བླ་ན་མེད་པའི་དབུ་ཁྲིད་༸གོང་ས་སྐྱབས་མགོན་ཏཱ་ལའི་བླ་མ་མཆོག་བདམས་ཡོད།

(ང་ལ་སེམས་དཔའ་ཆེན་པོ་གཱན་དྷི་དང་། མར་ཊིན་-ལུའུ་ཐེར་-ཁིང་། ནེལ་སོན་མན་དྷེ་ལ་བཅས་ཀྱིས་བསྟན་པའི་མཛའ་མཐུན་གྱི་འཇིག་རྟེན་དེ་མཐོང་བའི་རྨི་ལམ་ཞིག་ཡོད།)

ཉིན་ཤས་སྔོན། དབྱིན་ཡུལ་གྱི་དུས་དེབ་ཅིག་གིས་༸གོང་ས་༧སྐྱབས་མགོན་ཆེན་པོ་མཆོག་འཛམ་གླིང་ནང་བཟང་སྤྱོད་ཀྱི་ཤུགས་རྐྱེན་ཆེ་ཤོས་ལྡན་པའི་མི་སྣ་ཨང་དང་པོར་ངོས་འཛིན་ཞུས་པ་ཡོངས་བསྒྲགས་ཞུས། ནུབ་ཕྱོགས་པ་སྤྱི་དང་། ཤར་ནུབ་ཀྱི་ཤེས་ཡོན་པའི་སྡེས་འདི་ལྟར་གུས་ཞབས་ཞུས་དང་ཞུ་བཞིན་པ་ནི། བོད་ཀྱི་ཆོས་དང་རིག་གཞུང་གི་རིན་ཐང་ངོས་འཛིན་དང་། བོད་མི་རིགས་དང་རིག་གཞུང་གི་མཚོན་རྟགས་སུ་གྱུར་པའི་༸གོང་ས་༧སྐྱབས་མགོན་ཆེན་པོ་མཆོག་གི་མཁྱེན་ཡོན་དང་བྱམས་བརྩེའི་ནུས་སྟོབས་དང་། ཐུགས་ཀྱི་བཞེད་དགོངས་དང་མཛད་འཕྲིན་ལ་ངོས་འཛིན་ཞུས་པ་ཞིག་ཆགས་ཡོད།

འདི་འདྲའི་སྐབས་སུ། བོད་མི་ཚོས་ནོར་མི་རུང་བ་ཞིག་ནི། ནུབ་ཕྱོགས་པ་སྤྱི་དང་། བྱེ་བྲག་ཤར་ནུབ་དབྱེར་མེད་ཀྱི་ཤེས་ཡོན་པའི་ཚོགས་ཀྱིས་༸གོང་ས་མཆོག་སངས་རྒྱས་སུ་ཁས་བླངས་པ་དང་། འཕགས་པ་སྤྱན་རས་གཟིགས་སུ་ངོས་འཛིན་ཞུས་པ། ཚེ་འདི་ཕྱི་གཉིས་ཀའི་མགོན་དཔུང་དམ་པར་བརྩིས་སོ་སྙམ་ནས་ང་རྒྱལ་དང་ངོས་འཛིན་ནི་བྱེད་མི་རིགས་པ་ཡིན། སྤྱི་ཡོངས་ནས་བཤད་ན། ནུབ་ཕྱོགས་པས་༸གོང་ས་ཏཱ་ལའི་བླ་མར་ལྟ་སྟངས་དེ་ནི། འཇིག་རྟེན་གྱི་ཆོས་ལུགས་ཡོད་ཚད་མིའི་ཆེད་དུ་བཟོས་པར་འདོད་པའི་འགྲོ་བ་མི་ཞེས་པར་ངོས་འཛིན་དྭངས་གསལ་ཡོད་པའི་ཆོས་ལུགས་ཀྱི་རླབས་ཆེན་དབུ་ཁྲིད་ཅིག་དང་། གཏན་ཚིགས་དང་མཚན་ཉིད་ཀྱི་རྣམ་གཞག་ཇི་ལྟར་བཤད་ཅིང་། འགྲོ་བ་མིའི་མཐར་ཐུག་གི་དགོས་མཁོ་བདེ་སྐྱིད་ཉག་གཅིག་ལས་མེད་པའི་གནས་ལུགས་གསལ་སྟོན་དང་ལམ་སྟོན་ཡང་དག་གནང་མཁན་གྱི་སློབ་དཔོན་ཆེན་མོ་ཞིག རྒྱལ་ཁབ་དང་། གླིང་ཆེན། ཤར་ལྷོ་ནུབ་བྱང་སོགས་ཇི་ལྟར་དབྱེ་བ་བྱས་ཀྱང་ང་ཚོ་ཚང་མ་གཅིག་ལ་གཅིག་བརྟེན་དུ་གནས་པའི་སྤྱི་ཚོགས་ཆེན་པོ་ཞིག་ཡིན་པ་ངོ་སྤྲོད་མཛད་མཁན་གྱི་དེད་དཔོན་ཆེན་པོ་ཞིག་ཡིན་པ་བཅས་སུ་ངོས་འཛིན་བྱེད་པ་ཡིན།

དེས་ན། མཚམས་འདིར་ངས་ཞུ་འདོད་པ་ནི། ནུབ་ཕྱོགས་པས་ངོས་འཛིན་ཞུ་སྟངས་དེ་ནི་བརྟག་ཅིང་དཔྱད་ནས་རང་གིས་མིག་མཐོང་ལག་ཟིན་གྱི་ཆ་ཞིག་གཞན་ལ་བསྒྲགས་ཤིང་བསྟན་པ་ཡིན་ལ། བོད་མི་ཕལ་མོ་ཆེས་༸གོང་ས་མཆོག་ལ་དད་གུས་བྱེད་པ་དེ་ནི། ལམ་དང་ལུགས་སྲོལ་ལ་གཞོལ་བ་ཤས་ཆེ་བས་ན། ང་ཚོ་༸གོང་ས་༧སྐྱབས་མགོན་ཏཱ་ལའི་བླ་མར་ཅི་ཙམ་དགའ་ཞེན་ཆེ་བ་དེ་ཙམ་གྱིས་རང་རང་གི་ངོས་ནས་ཁོང་ཤེས་རྟོགས་བྱེད་དགོས། ཅི་ཙམ་གྱིས་༸གོང་ས་༧སྐྱབས་མགོན་ཏཱ་ལའི་བླ་མར་རྒྱུས་ལོན་ཡོད་ན། དེ་ཙམ་གྱིས་༸གོང་ས་ཏཱ་ལའི་བླ་མའི་བྱིན་རླབས་དེ་འཐོབ་ངེས་ཡིན།

ཤེས་རྟོགས་ཀྱི་གོ་དོན་ནི། ཁོང་གི་བླ་ན་མེད་པའི་དགོངས་བཞེད་གསལ་བའི་བཀའ་སློབ་དག་ལ་སློབ་སྦྱོང་དང་ཤེས་རྟོགས། ཉམས་ལེན་བྱེད་པ། རླབས་ཆེ་བའི་མཛད་པ་འཕྲིན་ལས་བསྐྱངས་པའི་རིམ་པ་དག་ངོ་འཕྲོད་པ་ཞིག་དགོས་པ་དེ་ཡིན། གནད་འདི་དང་འབྲེལ་ནས། ནུབ་ཕྱོགས་པས་ཤེས་རྟོགས་བྱེད་པ་ནང་བཞིན་རང་རེས་ཀྱང་ཤེས་རྟོགས་བྱེད་ཐུབ་དགོས་ངེས་ཤིག་ཡིན་པ་དམ་པ་དུ་མས་ཡང་ཡང་གསུངས་ཡོད།

༸གོང་ས་༧སྐྱབས་མགོན་ཏཱ་ལའི་བླ་མ་ནི་ཁྱེད་རང་གི་མདུན་དུ་ཡོད་པའི་ཤེས་རབ་ཀྱི་ལྷ་མཆོག་ཅིག་ཡིན་པ་ལས། གསོལ་བ་སྨོན་ལམ་འདེབས་སའི་ཐག་རིང་ཐག་རིང་གི་དཀོན་མཆོག་དེ་མ་རེད།

ཕྱི་ལོ་ ༢༠༢༠ ཟླ་  ༢ ཚེས་ ༢༩ ཉིན།