ཆང་སྐྱེས།
____པཎ་ཆེན་རིན་པོ་ཆེ་དགེ་འདུན་ཆོས་ཀྱི་ཉི་མ་མཆོག་དགུང་གྲངས་༣༡བཞེས་པའི་འཁྲུངས་སྐར་ལ་ཕུལ།
གྱ་དགུ་ལོ་ཡི་བཞི་བའི་ཉེར་ལྔའི་ཉིན།།
གང་གི་ཡང་སྲིད་མཆོག་སྤྲུལ་རིན་པོ་ཆེ།།
ཁ་བ་རི་བོའི་ཆོས་ཀྱི་ཞིང་ཁམས་སུ།།
སླར་ཡང་ཆོལ་གསུམ་བོད་མིའི་མགོན་དུ་བྱོན།
ཉིད་ཀྱི་ཆུང་སྲིད་ཟླ་བ་གཞོན་ནུ་མཆོག།
གངས་དཀར་རི་བོ་རྩེ་ནས་འཛུམ་དང་ལྷན།།
མུན་ནག་མཚན་མོ་ཀློང་གི་འགྲོ་རྣམས་ལ།།
རེ་ཞིག་འོད་སྣང་སྟོང་གིས བདེ་བ་སྦྱིན།།
ཡིན་ཡང་སྣང་བ་མཐའ་ཡས་མཆོག་གི་སྐུ །
དགུང་གྲངས་དྲུག་ལ་བཞེས་པའི་ལོ་ཟླ་དེར།།
ནག་ཕྱོགས་ཀླ་ཀློ་བདུད་ཀྱི་བཀའ་ལུང་གིས།།
མགོན་པོ་གང་ཉིད་རྒྱང་དུ་བཙན་གྱིས་ཁྱེར།།
འཇིག་རྟེན་འགྲོ་བ་མི་ཡི་གཙུག་གི་རྒྱན།།
ལྷག་པར་ས་ཡ་དྲུག་གི་མགོན་པོ་གང་།།
བཙན་གྱིས་སྲིན་པོའི་ཡུལ་དུ་ཁྱེར་ཉིན་ནས།།
ཇོ་མོ་གླང་མའི་དབུ་འཕང་བྲང་ལ་སྨད།།
མི་ཡི་གཟུགས་ལ་ལྷ་ཡི་ཐུགས་ཀྱི་སྲས།།
འགྲོ་དྲུག་སེམས་ཅན་བུ་བཞིན་སྐྱོངབའི་མགོན།།
ད་ལྟ་སྐུ་ཉིད་ཡུལ་ཕྱོགས་གང་དུ་བཞུགས།།
མྱུར་ཏུ་རང་ཡུལ་ཕྱོགས་ལ་ཕེབས་པར་མཛོད།།
དེ་རིང་སྐྱབས་མགོན་བླ་མའི་འཁྲུངས་སྐར་ལགས།།
བླ་མའི་གསེར་ཞལ་དད་པའི་རྩེ་ན་བཞད།།
དྲན་གདུང་མིག་ཆུ་གཙང་བོའི་ཆུ་ལ་བསྲིངས།།
གང་ལྟར་བླ་མ་སྐུ་ཚེ་བརྟན་པར་ཤོག།