༄༅།།ཏོག་དབྱིབས་གཉན་རིམས་ཀྱི་བྱུང་རྐྱེན་དང་མ་འོངས་ཁ་ཕྱོགས་སྐོར་ལ་ཅུང་ཟད་ལྟ་བ།

ཨེ་ཝམ།

ཕྱི་ལོ་ ༢༠༡༩ ལོ་མཇུག་ཙམ་དུ་རྒྱ་ནག་ལྷོ་ཕྱོགས་ཝུ་ཧན་ནས་བྱུང་བའི་ཏོག་དབྱིབས་གཉན་རིམས་(covid 19)ཟེར་བ་དེ་ད་ལྟ་འཛམ་གླིང་ཁྱོན་ཡོངས་ལ་ཁྱབ་སྟེ། ཕྱི་ལོ་༢༠༢༠ ཟླ་ ༥ ཚེས་༣ བར་ནད་རིམས་དེ་ཉིད་མི་3,356,205 ཙམ་ལ་འགོས་ཤིང་། མི་གྲངས་238,730འཆི་སྐྱོན་བྱུང་བའི་ཆེས་ཛ་དྲག་གི་མཐོ་རླབས་ཀྱི་སྐབས་འདིར། ནད་རིམས་འདིའི་བྱུང་རྐྱེན་ལ་ཕྱི་མིག་བལྟས་ནས་འབྱུང་འགྱུར་ལ་བསམ་གཞིགས་

ཀྱིས་ཁ་ཕྱོགས་གསར་བ་ཞིག་འཚོལ་དགོས་པའི་གཉན་འཕྲང་གི་དུས་ཚོད་ཅིག་ཡིན། དེའི་ཕྱིར་འདིའི་བྱུང་རྐྱེན་དང་འབྱུང་འགྱུར་གྱི་ཕུགས་འདུན་ལ་ཁ་ཕྱོགས་ཏེ་བསམ་ཚུལ་མདོ་ཙམ་གླེང་བར་འདོད། དེ་ཡང་ཚད་མར་གྱུར་པའི་སྐྱེས་བུ་དམ་པ་དག་གི་ལུང་བསྟན་ཚད་མ་དང་། ཉམས་མྱོང་ཚད་མ། མངོན་སུམ་ཚད་མ་གཞི་རྩར་བཟུང་སྟེ་རིགས་པ་ཚད་མའི་སྒྲུབ་བྱེད་ཡོད་པའི་སྒོ་ནས་གླེང་བར་བྱ་བ་ལ།
དང་པོ། རྒྱུ་རྐྱེན་དང་།
གཉིས་པ། ནད་རིམས་འདིའི་ནད་རྟགས་དང་འགོ་ཚུལ།
གསུམ་པ། ད་ལྟའི་དཀའ་ངལ་སྤྱི་ཙམ།
བཞི་པ། འབྱུང་འགྱུར་གྱི་ཁ་ཕྱོགས་སམ་ཕུགས་འདུན་བཅས་ཡིན།
དང་པོ་རྒྱུ་རྐྱེན།
རྒྱུ་རྐྱེན་གང་ཟེར་ན། འདི་ལ་བཤད་ཚུལ་གསུམ་ཡོང་ཆོག་པ་ཡིན།༡ལྟ་གྲུབ་ཡོད་པའི་ཆོས་ལུགས་ཀྱི་བཤད་སྟངས་དང་།༢དེང་གི་ཚན་རིག་གི་བཤད་སྟངས། ༣ད་ལྟའི་སྤྱི་ཚོགས་ཀྱི་གླེང་ཕྱོགས་བཅས་ཡིན། ལྟ་གྲུབ་ཡོད་པའི་ཆོས་ལུགས་ཀྱི་བཤད་སྟངས་ལ་འཇིག་རྟེན་བཀོད་པ་པོ་འདོད་མཁན་ཚོས་བཤད་སྟངས་གཅིག་དང་། འཇིག་རྟེན་བཀོད་པ་པོ་མི་འདོད་པའི་ལས་འབྲས་སྨྲ་བ་ཚོས་བཤད་སྟངས་གཅིག་བཅས་ཡོད། དང་པོ་འཇིག་རྟེན་བཀོད་པ་པོ་དཀོན་མཆོག་གི་རྗེས་སུ་འབྲང་མཁན་ཚོས་བྱ་བཞག་ཐམས་ཅད། སྣོད་བཅུད་ཐམས་ཅད། བདེ་སྡུག་ཐམས་ཅད་མཁྱེན་བརྩེ་ནུས་གསུམ་གྱི་བདག་ཉིད་ཅན་དཀོན་མཆོག་གིས་བཀོད་པར་འདོད་ཀྱི་ཡོད་པས་ད་ལྟའི་དཀའ་ངལ་འདི་ཡང་དཀོན་མཆོག་གིས་བཀོད་པར་འདོད་ཀྱི་ཡོད། འོ་ན་དཀོན་མཆོག་ལ་བརྩེ་བ་མེད་པ་རེད་དམ་ཟེར་ན། མ་རེད། ང་ཚོས་དཀོན་མཆོག་གི་ཐུགས་དགྱེས་པར་མ་བྱས་པ་ལ་བརྟེན་ནས་ང་ཚོར་དཀོན་མཆོག་གིས་ཆད་པ་བཅད་པ་ལྟ་བུར་འདོད་ཀྱི་ཡོད། དེ་ཡང་ཡིན་སྲིད་དེ། འཇིག་རྟེན་བཀོད་པ་པོ་དཀོན་མཆོག་ནི་བརྩེ་བའི་བདག་ཉིད་ཅན་ཡིན་པས། ང་ཚོས་ཁོང་གི་བཀོད་པའི་སྣོད་བཅུད་ཐམས་ཅད་ལ་བརྩེ་བ་དང་བདག་བཅེས་མ་བྱས་པའི་རྒྱུ་མཚན་ལ་བརྟེན་ནས་ད་རེས་ཆད་པ་བཅད་པ་ཅེས་བཤད་ན་དེ་ལ་ཡང་རྒྱུ་མཚན་ངེས་ཅན་ཞིག་ཡོད་པ་ཡིན།
གཉིས་པ་འཇིག་རྟེན་བཀོད་པ་པོ་མི་འདོད་ཅིང་ལས་འབྲས་སྨྲ་བ་ཚོས་དཀོན་མཆོག་གི་ཆད་པ་ཞིག་ལ་ངོས་མི་འཛིན་ཅིང་། འདི་ནི་འགྲོ་བ་མིའི་སྤྱི་མཐུན་གྱི་ལས་ལས་བྱུང་བ་ཞིག་ལ་ངོས་འཛིན་བྱེད་ངེས་ཡིན། དེ་ཡང་བདེ་སྡུག་ཐམས་ཅད་གང་ཟག་གི་སྒོ་གསུམ་གྱི་བྱ་སྤྱོད་བཟང་ངན་དང་། སྒོ་གསུམ་གྱི་བྱ་སྤྱོད་བཟང་ངན་བསམ་བློའི་ཀུན་སློང་བཟང་ངན། བསམ་བློའི་ཀུན་སློང་བཟང་ངན་རྣམ་དཔྱོད་ཀྱི་ཤེས་རབ་ཡོད་མེད་ལ་རག་ལས་པར་གསུངས་ཡོད། དེ་ཡང་ཁ་གསལ་དུ་བཏང་ནས་བཤད་ན། སྡུག་བསྔལ་ཐམས་ཅད་ཀྱི་རྩ་བ་ང་དང་ང་ཡིར་དང་། ང་དང་ང་ཚོའི་ཟེར་བའི་ངར་འཛིན་པ་ཤུགས་ཆེན་པོ་ཞིག་ཡོད་པ་འདི་ལ་ཐུག་ཡོད། འདི་ག་ཚོད་ཤུགས་ཆེ་བའི་ཚོད་ཀྱིས་ཚུལ་མིན་ཡིད་བྱེད་ཀྱི་རྣམ་རྟོག་ཤུགས་ཆེ་བ་ཡོང་གི་ཡོད། ཚུལ་མིན་ཡིད་བྱེད་ཀྱི་རྣམ་རྟོག་ག་ཚོད་ཤུགས་ཆེ་བའི་ཚོས་ཀྱིས་རང་ཕྱོགས་ལ་ཆགས་པ་དང་། གཞན་ཕྱོགས་ལ་སྡང་བ་ཤུགས་ཆེན་པོ་ཡོང་གི་ཡོད། ཆགས་སྡང་གི་བློ་ག་ཚོད་ཤུགས་ཆེ་བའི་ཚོད་ཀྱིས་སྒོ་གསུམ་བྱ་བ་ངན་པ་སྟེ་གཞན་གནོད་ཀྱི་བྱ་མང་པོ་རྩོམ་གྱི་ཡོད། གཞན་གནོད་གྱི་བྱ་བ་ག་ཚོད་མང་པོ་བརྩམས་པའི་ཚོད་ཀྱིས་རང་གཞན་ལ་སྡུག་བསྔལ་མང་པོ་ཡོང་གི་ཡོད་པར་སྟོན་པ་ཤཱཀྱ་ཐུབ་པ་དང་། ཁོང་གི་རྗེས་སུ་འབྲང་བའི་སྐྱེས་བུ་དམ་པ་མང་པོས་ཉམས་མྱོང་ཚད་མ་གཞི་ལ་བཞག་སྟེ་ཕྱོགས་སྡོམ་གྱི་གསུང་རབ་ཚད་མ་མང་པོ་ཡོད། དཔེར་ན། དམ་པའི་ཆོས་ཀྱི་རྒྱལ་པོ་ཐེག་པ་ཆེན་པའི་མདོ་ལས། མྱ་ངན་ཐམས་ཅད་ནི། ཕྱིན་ཅི་ལོག་ལས་སྐྱེ་སོ།། ཕྱིན་ཅི་ལོག་ཐམས་ཅད་ནི། མི་བདེན་པའི་སེམས་ལས་སྐྱེས་སོ།། མི་བདེན་པའི་སེམས་ཐམས་ཅད་ནི།། ང་ཡོད་པ་ལས་སྐྱེས་སོ།། ཞེས་གསུངས་ཡོད། དེའི་དོན་ནི། མྱ་ངན་ཐམས་ཅད་ཅེས་པ་ནི་སྡུག་བསྔལ་དང་དཀའ་ངལ་ཐམས་ཅད་ལ་གོ་བ་ཡིན། ཕྱིན་ཅི་ལོག་ཐམས་ཅད་ཅེས་ནི། སྒོ་གསུམ་གྱི་ལས་ངན་པ་བྱས་པ་ཐམས་ཅད་ལ་གོ་བ་ཡིན། མི་བདེན་པའི་སེམས་ཐམས་ཅད་ཅེས་པ་ནི། ཆགས་སྡང་རྨོངས་གསུམ་དང་ཚུལ་མིན་ཡིད་བྱེད་ཀྱི་རྣམ་རྟོག་སོགས་འཁྲུལ་བའི་བློ་རྣམས་ལ་གོ་བ་ཡིན། ང་ཡོད་པ་ལས་སྐྱེས་སོ་ཞེས་པ་ནི། ང་དང་ང་ཡིར་ཏེ་རང་ཉིད་གཅིག་པུ་གཅེས་པར་འཛིན་པ་དང་བདག་ཏུ་འཛིན་པ་ལ་གོ་བ་ཡིན། དེ་ལ་སོགས་པའི་སངས་རྒྱས་ཀྱིས་གསུངས་པའི་མདོ་མང་པོ་ཡོད། དེ་བཞིན་དུ། མགོན་པོ་ཀླུ་སྒྲུབ་ཀྱི་རྩ་ཤེས་ལས། འདོད་ཆགས་ཞེ་སྡང་གཏི་མུག་རྣམས།། ཀུན་ཏུ་རྟོག་ལས་འབྱུང་བར་གསུངས།། སྡུག་དང་མི་སྡུག་ཕྱིན་ཅི་ལོག། བརྟེན་པ་ཉིད་ལས་ཀུན་ཏུ་འབྱུང༌། ཞེས་དང་། དཔལ་ལྡན་ཆོས་གྲགས་ཀྱི་ཚད་མ་རྣམ་འགྲེལ་ལས། ཉེས་པ་རྣམ་པ་ཐམས་ཅད་དག། འཇིགས་ཚོགས་ལྟ་ལས་སྐྱེས་པ་ཡིན།། དེ་མ་རིག་དེར་དེ་ལ་ཆགས།། དེ་ལས་ཞེ་སྡང་ལ་སོགས་འབྱུང་།། ཞེས་གསུངས་ཡོད། དེའི་དོན་ནི། ཉེས་པ་རྣམ་པ་ཐམས་ཅད་དག། ཅེས་པ་ནི་སྡུག་བསྔལ་དང་སྐྱོན་གྱི་རྣམ་པ་འདྲ་མིན་ཐམས་ཅད་ལ་ཟེར་བ་ཡིན། འཇིགས་ཚོགས་ལྟ་བ་ཞེས་པ་ནི། བདག་འཛིན་དང་ངར་འཛིན་ལ་གོ་བ་ཡིན། ཉེས་པ་དེ་དག་གི་རྩ་བ་འཇིགས་ཚོགས་ཀྱི་ལྟ་བའམ་མ་རིག་པ་ཡིན་པ་མ་ཤེས་པའི་དབང་གིས་ཆགས་སེམས་ཏེ་འདོད་རྔམས་ཀྱི་དབང་དུ་སོང། འདོད་རྔམས་ལས་ཞེ་སྡང་སོགས་བསམ་བློ་ངན་པ་འདྲ་མིན་སྐྱེས་པ་ལས་སྡུག་བསྔལ་ཀྱི་རྣམ་པ་འདྲ་མིན་འབྱུང་བར་གསུངས། ཡང་དེ་ཉིད་ལས། བདག་ཡོད་ན་ནི་གཞན་དུ་ཤེས།། བདག་གཞན་ཆ་ལས་འཛིན་དང་སྡང་།། འདི་དག་དང་ནི་ཡོངས་འབྲེལ་ལས།། ཉེས་པ་ཐམས་ཅད་འབྱུང་བར་འགྱུར། ཞེས་གསུངས། སློབ་དཔོན་དབྱིག་གཉེན་གྱི་མཛོད་ལས། ཕྲ་རྒྱས་སྤངས་པ་མ་ཡིན་དང་།། ཡུལ་ནི་ཉེ་བར་གནས་པ་དང།། ཚུལ་བཞིན་མ་ཡིན་ཡིད་བྱེད་ལས།། ཉོན་མོངས་རྒྱུ་ནི་ཚང་བ་ཡིན།། ཞེས་དང། དེ་བཞིན་དུ་སློབ་དཔོན་པདྨའི་བདུད་རྩི་བུམ་པ་ལས། ཨེ་མ་ཇོ་མོ་མཁར་ཆེན་བཟའ༔ སེམས་ཅན་མ་རིག་སྡོང་པོ་མི་ལུས་འདི་ལ༔ ཉོན་མོངས་དུག་ལྔའི་ལོ་འདབ་རྒྱས༔ མི་དགེ་སྡིག་སྤྱོད་ལོ་ཏོག་འཁྲུངས༔ རྣམ་སྨིན་འབྲས་བུ་ནད་དུ་སྨིན༔ འཛམ་བུ་གླིང་པའི་བཞི་གསུམ་འཇོམས༔ དུ་རུ་ཀ་ཡི་དམག་ཀྱང་འབྱུང༔ བསྟན་པའི་ཚོང་དུས་བཅོམ་པར་བྱེད༔ ཞེས་གསུངས། དེ་བཞིན་དུ་བོད་ཀྱི་གསོ་རིག་མེས་པོ་རྗེ་གཡུ་ཐོག་ཡོན་ཏན་མགོན་པའི་མན་ངག་རྒྱུད་ལས། རིམས་ཞེས་བྱ་བའི་ནད་འབྱུང་རྒྱུ་རྐྱེན་ནི།། ལྔ་བརྒྱ་དུས་ཀྱི་ཐ་མར་གྱུར་ཙ་ན།། མི་རྣམས་འདོད་པའི་དབང་གིས་ལོག་པར་སྤྱོད།། ཞེས་སྤྱིར་བཤད་ནས་བྱེ་བྲག་གང་ཟག་སོ་སོའི་སྤྱོད་ཚུལ་ཕྱིན་ཅི་ལོག་ཏུ་ཞུགས་པའི་དབང་གིས་བྱུང་བར་ཞིབ་རྒྱས་གསུངས་ཡོད། དེ་མཚུངས་སུ། བོད་ཀྱི་མཁས་པ་སྡེ་སྲིད་སངས་རྒྱས་རྒྱ་མཚོས་སློབ་དཔོན་པདྨའི་བདུད་རྩི་བུམ་པ་དང་། གསོ་རིག་རྒྱུད་ཀྱི་དགོངས་པ་ལྟར་གཉན་རིམས་བཅོ་བརྒྱད་ཀྱི་རྒྱུ་རྐྱེན་སོགས་གསུངས་ཡོད། དེ་ལ་སོགས་ཀྱི་རྒྱུ་རྐྱེན་ཞིབ་ཏུ་གསུངས་པའི་མདོ་རྒྱུད་མང་དུ་ཡོད་ཀྱང་འདིར་དཔེ་མཚོན་ཙམ་ལས་ཆ་ཚང་འགོད་ག་ལ་ནུས། དེས་ན་གཞུང་དག་གིས་འགྲོ་བ་མིའི་དཀའ་སྡུག་ཐམས་ཅད་ནི། འགྲོ་བ་མི་རང་ཉིད་ཀྱི་སེམས་རྒྱུད་མ་ཐུལ་བར་ཐལ་དྲག་པའི་བྱ་སྤྱོད་ངན་པ་ལས་བྱུང་བ་ཡིན་པ་རིགས་པ་ཡང་དག་གི་སྒོ་ནས་ར་སྤྲོད་བྱས་ཡོད།
གཉིས་པ་ཚན་རིག་གི་བཤད་ཚུལ་ནི། སྤྱིར་ཚན་རིག་པས་ནད་ཡམས་མང་པོ་ཞིག་ཕྱིའི་སྐྱེ་ཁམས་འཁོར་ཡུག་དང་རླུང་ཁམས་འབག་བཙོག་དང་རི་སྐྱེས་སྲོག་ཆགས་ལས་བྱུང་བར་བཤད་ཀྱི་ཡོད་ལ། དུས་རབས་ཉི་ཤུ་བའི་ལོ་རབས་ལྔ་བཅུ་ཙམ་ནས་ཚན་རིག་པས་ཞིབ་འཇུག་ལས་ཤེས་རྟོགས་བྱུང་བ་ལྟར་ན། ད་ལྟའི་ཏོག་དབྱིབས་ནད་འབུ་འདི་ཆ་ཞིག་ཙི་ཙི་དང་། བྱི་བ། ཁྱི། ཞི་མི། བྱ། རྟ། ཕག་པ། ན་གི ཕ་ཝང་། སྒོ་ཕྱུགས་དུད་འགྲོ་སོགས་མང་པོ་ཞིག་ལ་ཡོད་པར་བརྗོད། འོན་ཀྱང་ད་ལམ་གྱི་ཏོག་དབྱིབས་ཕྲ་སྲིན་འདི་ནི་ཙི་ཙི་སྐམ་པོའམ་ཕ་ཝང་ལས་བྱུང་བར་བཤད་པཡོད་ཀྱང་ད་དུང་ཞིབ་འཇུག་གི་གྲུབ་དོན་གསལ་པོ་ཞིག་དང་། རྒྱལ་སྤྱིའི་རང་བཞིན་ལྡན་པའི་གཅིག་གྱུར་གྱི་ངོས་འཛིན་གསལ་པོ་ཞིག་བྱུང་མེད་པས་རེ་ཞིག་ངང་སྒུག་མི་བྱེད་ཀ་མེད་དུ་གྱུར་ཡོད། གང་ལྟར་ཕྱིའི་འཁོར་ཡུག་དང་རླུང་ཁམས་འབག་བཙོག་དང་རི་སྐྱེས་སྲོག་ཆགས་གང་རུང་ལས་བྱུང་བའི་ཕྱོགས་ལ་ཁ་ཚོན་གཅོད་ཐུབ་ངེས་ཡིན། དེས་ན་འཁོར་ཡུག་འབག་བཙོག་སུས་བཟོས་པ་རེད་དམ། རི་སྐྱེས་སྲོག་ཆགས་ལས་ཇི་ལྟར་བྱུང་བ་རེད་དམ་ཞེས་པའི་དྲི་བ་གཉིས་ཀྱི་དྲིས་ལན་ཕུག་དེད་ན་འགྲོ་བ་མིའི་བྱ་སྤྱོད་ལ་ཐུག་ཡོད་པ་དང་། བྱ་སྤྱོད་དེ་འདོད་སྲེད་ལ་ཐུག་ཡོད་པ། ད་དུང་གཏིང་ཟབ་པོ་དང་རྒྱ་ཆེན་པོའི་སྒོ་ནས་ཞིབ་འཇུག་བྱས་ཏེ་ཡར་རིམ་བཞིན་དེད་ན་ནང་པའི་གཞུང་ལས་གསུངས་པའི་ཚུལ་མིན་ཡིད་བྱེད་ཀྱི་རྣམ་རྟོག་གང་ལས་འབྱུང་བའི་བདེན་འཛིན་གྱི་སྤྲོད་པ་སྟེ་བདག་དང་བདག་གིར་འཛིན་པའམ་ང་དང་ང་ཡིར་འཛིན་པའི་ཕྱིན་ཅི་ལོག་གི་བློ་འཁྲུལ་ཤེས་ལ་ཐུག་ཡོད་པ་ཤེས་ངེས་ཡིན།
གསུམ་པ། ད་ལྟའི་སྤྱི་ཚོགས་ཀྱི་གླེང་ཕྱོགས།
ད་ལྟའི་སྤྱི་ཚོགས་ཀྱི་གླེང་ཕྱོགས་ལྟར་ན། ཏོག་དབྱིབས་རིམས་ནད་(covid 19)རྒྱ་ནག་གི་ལྷོ་རྒྱུད་ཝུ་ཧན་གྲོང་ཁྱེར་ནང་བྱུང་བ་ཡོངས་སུ་གྲགས་ཡོད་ཀྱང་། ཡུལ་དེར་ཚུལ་ཇི་ལྟར་བྱུང་བའི་ཐད་ལ་བཤད་ཚུལ་ཆེན་པོ་བཞི་འགྲོ་བཞིན་ཡོད། ༡ ཝུ་ཧན་ནང་གི་ནད་འབུ་ཚོད་ལྟ་ཁང་ལས་བྱུང་བར་བཤད་པ་དང་། ༢ རྒྱ་ནག་གིས་ཆེད་དུ་བཟོས་པར་བཤད་པ། ༣ རི་སྐྱེས་ཤ་ཁང་ནང་གི་ཕ་ཝང་ངམ་ཙི་ཙི་སྐམ་པོ་ལས་བྱུང་བར་བཤད་པ། ༤ ཕྱི་ལོ་༢༠༡༩ ལོར་ཨ་རིའི་དམག་གི་ཟབ་སྦྱོང་བ་སྐོར་ཞིག་རྒྱ་ནག་ཝུ་ཧན་ལ་ཡོང་བའི་སྐབས་ཨ་རིའི་དམག་མིས་ཁྱེར་ཡོང་བ་ཡིན་པའི་རྩོམ་ཞིག་ཆེད་སྤེལ་བྱས་པ་བཅས་ཡིན།   འོན་ཀྱང་གང་ཞིག་དོན་དངོས་ཡིན་མིན་གསལ་ཁ་མེད་པས་རེ་ཞིག་ཞིབ་འཇུག་གི་གྲུབ་དོན་ལ་སྒུག་བསྡད་བྱ་རྒྱུ་ལས་ཐབས་གཞན་མེད།
གཉིས་པ། ནད་རིམས་འདིའི་ནད་རྟགས་དང་འགོས་ཚུལ་གླེང་བ།

ནད་རིམས་འདིའི་ནད་རྟགས་ནི། སྐམ་ལུ་རྒྱག་པ་དང་། ཚ་བ་འཕར་བ། གྲང་ཤུམ་བྱེད་པ། རོ་སྟོད་སོགས་ཤ་གྲིམ་ན་བ། མིད་པ་ཚ་བ། ཛ་དྲག་ཏུ་གྱུར་ཚེ་དབུགས་འབྱིན་རྔུབ་དཀའ་བ་བཅས་ནི་ད་ལྟ་རྒྱལ་སྤྱིའི་རང་བཞིན་ལྡན་པའི་ངོས་འཛིན་ཡིན་ལ། སྤྱིའི་ཆ་ནས་ཆམ་ནད་ཀྱི་ནད་རྟགས་གཅིག་མཚུངས་ཡིན་པར་བཤད།
སློབ་དཔོན་པདྨའི་བདུད་རྩི་བུམ་པ་ལས། ནད་རིམས་ཀྱི་གླེང་གཞི་ནས་བཅོས་ཐབས་བར་ས་བཅད་བརྒྱད་ཀྱི་བརྟག་ཐབས་ལ། དང་པོ་སྐྱ་རིམས་སྤྱི་ཡི་རྟགས༔ བར་དུ་ཁྱད་པར་གཉན་གྱི་རྟགས༔ ཐ་མར་དོན་ལ་བབ་པའི་རྟགས༔ བཅས་ཞིབ་རྒྱས་གསུངས་ཡོད་པས་གཟུར་གནས་བློ་ལྡན་དག་གིས་དེ་ལ་གཟིགས་ན་ངོ་མཚར་བའི་ལེགས་སྐྱེས་མང་པོ་ཞིག་ཐོབ་ངེས་ཡིན།
དེ་བཞིན་བོད་ཀྱི་གསོ་རིག་གཞུང་དུ་ཆམ་རིམས་ལ་གྲེ་ཆམ་དང་། གློ་ཆམ་དང་། རིམས་ཆམ་དང་། སྣ་ཆམ་རྣམ་པ་བཞི་གསུངས་ཡོད་ཅིང་། ད་ལྟའི་ཏོག་དབྱིབས་ཀྱི་ནད་རྟགས་ལ་གཞིགས་ན། རིམས་ཆམ་དུ་མངོན་ཏེ། རིམས་ཆམ་གྱི་ནད་རྟགས་ནི། བཻ་སྔོན་དུ། རིམས་ཆམ་ནི་མགོ་དང་ཚིགས་གཞི་དང་བྱིན་པ་ཉྭ་སོགས་ན་ལ་རོ་སྟོད་མི་བདེ་ཞིང་བརླ་དང་རྐེད་པ་བརྡུངས་སྙམ་བྱེད་པ་དང་ཁ་ཁ་ལ་དང་ག་མི་བདེ་ཞིང་གྲང་ཤུམ་བྱེད་ཅིང་སྲོད་ལ་ཤ་ཚ་ཞིང་རྨི་ལམ་དུ་ཟ་ཟི་མང་བ་འབྱུང་ཞིང༌།ཞེས་སོགས་གསུངས།
འགོས་ཁྱབ་ཇི་ལྟར་འགྲོ་བའི་ཚུལ་ནི། ཏོག་དབྱིབས་གཉན་རིམས་འདི་ཐོག་མར་སྲོག་ཆགས་ནས་མིར་འགོས་ཁྱབ་བྱུང་སྟེ། ད་ལྟ་མི་ནས་མིར་འགོས་ཁྱབ་འགྲོ་བཞིན་ཡོད་པར་བཤད་ཅིང་། དེ་ནི་ཁ་རླངས་དང་། ཁ་ལུད། མཆིལ་མ་སོགས་བརྒྱུད་ནས་ཕན་ཚུན་འགོས་ཀྱི་ཡོད་པར་བཤད།  དེ་ཡང་གཙོ་བོ་ཕོག་ཟིན་པའི་མིས་གློ་དང་ཧབ་སྦྲིད་བརྒྱབ་པ།  དེ་དག་དང་མཉམ་ཟ་མཉམ་སྡོད་བྱེད་པ། དེ་དག་གི་ལུས་དང་ཅ་དངོས་སོགས་ལ་རེག་པ། འགོས་ནད་སྨན་བཅོས་བྱེད་སའི་སྨན་ཁང་། རིམས་ནད་འདི་ཕོག་པའི་ནད་པའི་ཉལ་ཁང་སོགས་ཀྱི་བར་སྣང་དུ་ཆུ་ཚོད་གཉིས་ཙམ་ལ་སྡོད་ཐུབ་ཀྱི་ཡོད་པས་མཁའ་རླུང་བརྒྱུད་ནས་ཀྱང་འགོ་སྲིད་པའི་ཚོད་དཔག་བྱེད་ཀྱིན་ཡོད། གཞན་ཡང་ཚོགས་འདུ་ཚོགས་པ་དང། ཆོས་ལུགས་ཀྱི་བྱེད་སྒོར་མི་མང་འདུ་འཛོམས་ཆེ་ས། ས་གནམ་ཆུ་གསུམ་གྱི་འགྲུལ་འཁོར་ནང་དུ་མཉམ་བསྐྱོད་བྱེད་པ་སོགས་དང་། གཞན་ཡང་ཤ་རིགས་རྣམས་འཚོས་ཐག་མ་ཆོད་པའམ་མི་གཙང་གནས་ནས་འཁྱེར་ཡོང་བ། བཟའ་ཆས་དང་ཅ་དངོས་སོགས་ཚོང་ཁང་ནས་ཉོས་ཏེ་མ་འཁྲུས་པའམ་དུག་སེལ་མ་བྱས་པར་ཐད་ཀར་སྤྱོད་པ་བཅས་ནས་འགོས་ཁྱབ་བྱུང་བཞིན་ཡོད་པར་བཤད།
གསུམ་པ། ད་ལྟའི་དཀའ་ངལ་སྤྱི་ཙམ་གླེང་བ།
ནད་རིམས་འདིས་སྤྲད་པའི་དཀའ་ངལ་ནི་ཀུན་གྱིས་མཐོང་གསལ་རེད། ནད་ངན་འདི་ཕོགས་མཁན་མི་གྲངས་ས་ཡ་གསུམ་དང་སུམ་འབུམ་ལྔ་ཁྲི་དྲུག་སྟོང་ཉིས་བརྒྱ་ལྷག་གི་ནང་མི་གཉེན་ཉེ་སོགས་དང་། ཤི་སྐྱོན་བྱུང་བ་ཉིས་འབུམ་སུམ་ཁྲི་བརྒྱད་སྟོང་སུམ་ཅུ་བྱུང་ཡོད་པས་དེ་དག་གི་ཤུལ་ལུས་ནང་མི་བཟའ་ཟླ། ཕ་མ་བུ་ཕྲུག སྤུན་མཆེད་སོགས་ཀྱིས་གཙོས་དེ་དག་གི་འཁོར་ཡུག་ཏུ་གནས་པའི་མི་རྣམས་དང་། ལྷག་པར་ལས་དོན་དེ་ལ་ཉིན་རེ་བཞིན་གདོང་གཏོད་དགོས་པའི་སྨན་པ་དང་སྨན་ཞབས་དང་། གཙང་འཕྲོད་མི་སྣ། བདེ་སྲུང་མི་སྣ་སོགས་ལས་དོན་དེ་དང་ཐད་ཀར་འབྲེལ་འདྲེས་བྱེད་དགོས་པའི་མི་སྣ་ཡོངས་ལ་ལུས་སེམས་གཉིས་ཀྱི་དཀའ་ངལ་ཇི་ཙམ་ཡོད་པ་བཤད་མ་དགོས་པ་ཞིག་རེད་ལ། རྒྱལ་ཁབ་སོ་སོའི་ཁྱིམ་སྡོད་བཀག་རྒྱའི་སྐབས་སུ་ཉིན་རེའི་འཚོ་བ་ཉིན་རེའི་གླ་ཆ་ལ་བརྟེན་མཁན་མང་པོར་འཚོ་བའི་དཀའ་ངལདང་། རྒྱུན་ལྡན་གྱི་སློབ་སྦྱོང་དང་བྱེད་སྒོ་ཁག་འགྲོ་མ་ཐུབ་པའི་དཀའ་ངལ། རང་ཁྱིམ་དུ་ཡོང་མ་ཐུབ་པར་ཡུན་རིང་ལྷག་པ་དང་། ཁྱིམ་སྡོད་བཀག་རྒྱའི་འོག་རང་ཁྱིམ་དུ་ཡུན་རིང་གཅིག་པོར་ལྷག་སྟེ་བཟའ་ཅ་སོགས་མ་ཐོབ་པའི་དཀའ་ངལ། ཚོང་ལས་སོགས་བྱེད་སྒོ་མང་པོ་རྒྱུན་ལྡན་འགྲོ་མ་ཐུབ་པས་དཔལ་འབྱོར་གྱི་གནས་བབ་ལ་གྱོང་ཆེན་རེག་པའི་དཀའ་ངལ་སོགས་དང་། གཞན་ཡང་ཁྱིམ་སྡོད་བཀག་རྒྱའི་འོག་གནོན་ཤུགས་ཇི་སྐྱེད་ཅིག་ཐེབས་བཞིན་པ་དང་། དེའི་རྐྱེན་གྱིས་སེམས་ཁམས་ཀྱི་དཀའ་ངལ་སོགས་མི་རེ་ངོ་རེ་ལ་དཀའ་ངལ་གྱི་བྱུང་བ་བརྗོད་ལས་འདས་པ་ཞིག་ཡོད་པ་ཚང་མས་མཁྱེན་གསལ་ལྟར་རེད།་མདོར་ན་འཛམ་གླིང་གི་ལོ་རྒྱུས་ཐོག་རིམས་ནད་ཀྱིས་ནར་གཅོད་བཏང་བའི་དཀའ་ངལ་ཆེ་ཤོས་དེ་ཡིན།
བཞི་པ། འབྱུང་འགྱུར་གྱི་ཁ་ཕྱོགས་སམ་ཕུགས་འདུན་གླེང་བ།
དེས་ན་གོང་སྨྲས་དཀའ་ངལ་འདི་དག་སླར་ཡང་འབྱུང་བར་མི་འདོད་ན། ད་ལམ་གྱི་དཀའ་ངལ་འདི་དཔེ་མཚོན་དུ་བཟུང་ནས་གོང་དུ་ལམ་ཙམ་གླེང་ཟིན་པའི་དཀའ་ངལ་གྱི་རིང་རྒྱུ་ང་དང་ང་ཡིར་འཛིན་པ་སྟེ་མ་རིག་པ་དང་ཚུལ་མིན་ཡིད་བྱེད་ཀྱི་རྣམ་རྟོག་དང་། ཁྱད་པར་གྱི་རྒྱུ་ཆགས་སྡང་སོགས་ཀྱི་བསམ་བློ་ངན་པ། ཉེར་རྒྱུ་སྒོ་གསུམ་གྱི་བྱ་ངན་སྤྱོད་ངན་རྣམས་ཡང་དག་པར་ངོས་ཟིན་བྱས་ཏེ་དེ་དག་ལ་རྒྱུན་དུ་གཉེན་པོ་བསྟེན་ཏེ་སྔོན་འགོག་བྱ་རྒྱུ་ཉག་གཅིག་ཡིན། དེ་ཡང་ང་ཚོ་འཚོ་གནས་བྱེད་སའི་འཛམ་གླིང་ས་གཞི་འདི་ནི་ང་ཚོའི་རང་ཁྱིམ་ཡིན་པས་བདག་གཅེས་བྱེད་དགོས་པ་དང་། ཁྱིམ་གཞི་འདིར་གནས་པའི་མི་དུང་འགྱུར་བདུན་ཅུ་ནི་གཅིག་བརྟེན་གཅིག་གྲོགས་དང་སྐྱིད་སྡུག་མཉམ་མྱོང་ཡིན་པས་ཕན་ཚུན་ལ་གཅིག་གྱུར་གྱི་འདུ་ཤེས་དང་། བྱམས་བརྩེ་ཡི་འདུ་ཤེས་མཐོར་འདེགས་གཏོང་བའི་སྐོར་༸གོང་ས་མཆོག་གིས་དུས་ནས་དུས་སུ་གསུངས་པའི་མུན་སེལ་ལམ་སྟོན་ཁག་ལག་ལེན་དོན་འཁྱོང་བྱེད་པའི་དུས་ལ་བབ་ཡོད། དེ་ཡང་མགོན་པོ་གང་ཉིད་ཀྱིས་རྒྱུན་དུ་གསུང་བཞིན་པ། ལྟ་བ་རྟེན་འབྱུང་དང་སྤྱོད་པ་འཚེ་བ་མེད་པའི་འདུ་ཤེས་ཟབ་ཏུ་གཏོང་རྒྱུ་སྟེ། ཕན་ཚུན་ལྟོས་གྲུབ་རྟོགས་པའི་རྣམ་དཔྱོད་དང་ཀུན་ཕན་བརྩེ་སེམས་གཉིས་ཟུང་དུ་འབྲེལ་ནས་མ་འོངས་པའི་འཛམ་གླིང་འདི་མིས་བཟོས་ནད་མེད་འཁྲུག་རྩོད་མེད་པར་ཞི་བདེ་བག་ཕེབས་ཡོང་ཐབས་སུ་ནང་པའི་གཞུང་ནས་གསུངས་པའི་རྟེན་འབྱུང་ལྟོས་གྲུབ་དང་། ཚན་རིག་པས་བཤད་པའི་དངོས་ཁམས་ཚན་རིག་གི་ཐོག་ནས་འཁོར་ཡུག་ལ་གཅེས་སྐྱོང་དང་། འགྲོ་བ་མི་གཙོ་བོར་གྱུར་པའི་སྲོག་ཆགས་ཀུན་ལ་བྱམས་བརྩེའི་འདུ་ཤེས་ཟབ་ཏུ་གཏོང་དགོས་པའི་དགེ་མཚན་སོགས་རྒྱལ་སྤྱིའི་རང་བཞིན་ལྡན་པའི་འཆར་འགོད་ཀྱིས་གཞི་རིམ་སློབ་གསོའི་ནང་དུ་འཇོག་དགོས་མ་ཟད། རྒྱལ་སྤྱིའི་ཁྲིམས་ལུགས་འོག་འཛམ་གླིང་གི་འགྲོ་བ་མི་ཀུན་གྱིས་ངེས་པར་བརྩི་སྲུང་བྱེད་དགོས་པའི་ལམ་སྟོན་དང་འཆར་འགོད་རྩ་འཛིན་ཁ་གསལ། གལ་སྲིད་འཁོར་ཡུག་དང་སྐྱེ་འགྲོའི་ཚེ་སྲོག་ལ་གནོད་ངེས་ཅན་གྱི་བྱ་སྤྱོད། དཔེར་ན། ད་ལམ་གྱི་རིམས་ནད་འདི་ལྟ་བུའི་བྱུང་རྐྱེན་དང་། འདི་ལྟ་བུའི་འབྱུང་རྐྱེན་དུ་འགྱུར་ངེས་པ། དཔེར་ན། ཤིང་གཉན་གཅོད་པ། ས་གཉན་བརྐོས་པ། བྲག་གཉན་བཤིག་པ། རྡོ་གཉན་བསློགས་པ། ཆུ་གཉན་དཀྲུགས་པ། ནེའུ་གསིང་བརྐོས་པ། སྤང་རྒོད་འཕྲུ་འདུལ་བྱེད་པ། རི་སྐྱེས་སྲོག་ཆགས་འཛེམས་མེད་དུ་གསོད་པ། མི་གཙང་ཐབ་གཞོབ་བྱེད་པ། དུག་རླངས་དང་དུག་ཆུ་ཤོར་བ་སོགས་ཀྱི་དོན་རྐྱེན་བྱུང་ཚེ་རྒྱལ་ཁོངས་གང་ནས་བྱུང་བའི་རྒྱལ་ཁབ་དེ་དང་ས་ཁོངས་དེ་ལ་རྒྱལ་སྤྱིའི་ཁྲིམས་ཆད་ངེས་པར་གཅོད་དགོས་པའི་ཁྲིམས་ལུགས་གཏན་འབེབས་བྱ་དགོས་པའི་དུས་ལ་སླེབས་ཡོད། དེ་བཞིན་དུ་ལོ་རེའི་ནང་ད་ལམ་གྱི་རིམས་ནད་འདི་ཐོག་མར་བྱུང་དུས་དང་། ཡང་ན་ཐ་མའི་མཇུག་བསྒྲིལ་གང་རུང་གི་སྐབས་ཏོག་དབྱིབས་རིམས་ནད་Covid 19རྗེས་དྲན་གཞེན་བསྐུལ་ཡོང་ཆེད་དུས་ཚིགས་སྲུང་གཙི་དང་འབྲེལ་འཛམ་གླིང་ཁྱོན་ཡོངས་ལ་ཉིན་གྲངས་གསུམ་ནས་ལྔའི་བར་གནམ་གྲུ་དང་། མེ་འཁོར། སྤྱི་སྤྱོད་རླངས་འཁོར་ཆེ་ཆུང་སོགས་འགྲིམ་འགྲུལ་ཡོངས་དང་། དུ་རླངས་ཅན་གྱི་བཟོ་གྲྭ་ཆེ་ཆུང་སོགས་ཡོངས་སུ་མཚམས་འཇོག་གིས་འཁོར་ཡུག་ལ་མཁའ་དབུགས་གཙང་མ་རོལ་མྱོང་བྱེད་དུ་འཇུག་དགོས་པ་བཅས་ཀྱི་འཆར་སྣང་མདོ་ཙམ་གླེང་བ་འདིས་འབྱུང་འགྱུར་གྱི་སྐྱེ་འགྲོ་ཀུན་ལ་ཅུང་ཟད་ཕན་པའི་རྒྱུ་རུ་གྱུར་ཅིག